Ciiyo 4

Ino Diabolosi Nguni?

Saatani Diabolosi—nkuli nkwaakazwida? (1, 2)

Mbuti Saatani mbwacenga bantu? (3-7)

Nkaambo nzi ncomweelede kumulwana Diabolosi? (7)

1. Ibbala lyakuti “diabolosi” lyaamba muntu uubejelezya muntu umbi cabumpelenge. Ilyakuti “Saatani” lyaamba sinkondo antela sikukazya. Mbuboobu mbwaitwa sinkondonyina wa Leza imupati. Kumatalikilo wakali mungelo uulondokede kujulu, iwakali a Leza. Nokuba boobo kumbele wakazootalika kulisumpula akuyanda kukombwa okuya ikweelede buyo Leza.—Matayo 4:8-10.

2. Ooyu mungelo, Saatani wakabelesya nzoka kwaambaula kuli Eva. Kwiinda mukumucenga, wakamupa kuti atamvwidi Leza. Munzila eyi Saatani wakalwana ceeco ciitwa kuti “bwami” bwa Leza, antela icuuno cakwe ncali ngo Sijulu Lyamajulu. Saatani wakazumbauzya kuti naa Leza ulela munzila yeelede alimwi iigwasya batwanga Bakwe. Alimwi Saatani wakazumbauzya kuti naa kuli muntu uunga wasyomeka kuli Leza lyoonse. Mukucita boobu Saatani wakalicita kuba sinkondonyina a Leza. Ncenciceeco ncaakazoobeda muntu uutegwa Saatani Diabolosi.—Matalikilo 3:1-5; Jobu 1:8-11; Ciyubunuzyo 12:9.

3. Saatani ulasoleka kweena bantu kutegwa bamukombe. (2 Ba-Korinto 11:3, 14) Imwi nzila njacengela bantu nkwiinda mu bukombi bwakubeja. Kuti cikombelo cimwi kaciyiisya zyakubeja kujatikizya Leza, incobeni cibelekela makanze aa Saatani. (Johane 8:44) Ibantu basizikombelo zyakubeja balakonzya kabasinizizye kusyoma kuti bakomba Leza mwini-mwini. Pesi ngobakomba mwini ngu Saatani. Ngo ‘leza waansi aano.’—2 Korinto 4:4.

4. Kusyoma mizimo ninzila imbi Saatani njaletya bantu munguzu zyakwe. Balakozya kulomba mizimo kuti ibakwabilile, kuti icise bambi, kuti ibaambile zyakumbele, naa ikuti ibacitile maleele. Inguzu zibi zyoonse eezi nzizya Saatani. Kutegwa tumukkomanisye Leza, tatweelede kuswaangana azyamizimo munzila iili yoonse pe.—Deuteronomo 18:10-12; Incito 19:18, 19.

5. Alimwi Saatani ulabacenga bantu kwiinda mukuciindilizya kusumpula musyobo alimwi akukomba mbunga zyamapolitikisi. Bamwi bantu basyoma kuti cisi  cabo naa musyobo ulayiinda imwi. Pesi eci tacili camasimpe. (Incito 10:34, 35) Ibambi bantu balangila kumana kwamapenzi aabantu kuzwa kumbunga zyamapolitikisi. Kwiinda mukucita boobu, bakaka Bwami bwa Leza. Bwalo bulikke mbobuyoomana mapenzi esu.—Daniele 2:44.

6. Iimbi nzila Saatani njeena bantu nkubasunka kulombozya zibi. Jehova ulatwaambila kutantamuka micito mibi nkaambo ulizi kuti iyootucisa. (Ba-Galatiya 6:7, 8) Bamwi bantu balakonzya kuyanda kuti mubasangane mumicito iili boobu. Kamuyeeyede pesi kuti wini-wini uuyanda kuti muzicite zintu eezi ngu Saatani.—1 Ba-Korinto 6:9, 10; 15:33.

7. Saatani inga wabelesya kupenzegwa naa kukazigwa ikumupa kuti mumusiye Jehova. Bamwi bayandwa benu balakonzya kumunyemena kapati akaambo kakuti mwiiya Bbaibbele. Ibambi inga bamusampaula. Pele nguni uumupede buumi? Saatani uyanda kumukonga kutegwa muleke kwiiya zya Jehova. Mutamulekeli kuzunda Saatani! (Matayo 10:34-39; 1 Petro 5:8, 9) Kwiinda mukumulwana Diabolosi, muyoopa kuti Jehova akkomane alimwi muyootondezya kuti bwami Bwakwe mulabuzuminizya.—Tusimpi 27:11.

[Zifwanikiso izili apeeji 9]

Bukombi bwakubeja, izyamizimo, alimwi akuyandisya cisi cakwenu izyeena bantu

[Cifwanikiso icili apeeji 9]

Amumulwane Saatani kwiinda mukuzumanana kwiiya zya Jehova