Ciiyo 3

Ino Jesu Kristo Nguni?

Nkaambo nzi Jesu ncategwa Mwanaa Leza “mutaanzi kuzwalwa”? (1)

Nkaambo nzi ncategwa ‘ndi Jwi’? (1)

Nkaambo nzi Jesu ncaakaboolela ansi kuzooba muntu? (2-4)

Nkaambo nzi ncaakacita maleele? (5)

Ncinzi Jesu ncayoocita ino-ino? (6)

1. Jesu wakakkala kujulu kali muntu wamuuya katana kuboola anyika. Ngowakali cilenge ca Leza citaanzi, aboobo ulategwa ngo Mwanaa Leza “mutaanzi kuzwalwa.” (Ba-Kolose 1:15; Ciyubunuzyo 3:14) Jesu alikke ngo Mwanaa Leza walo wakalengwa a Leza lwakwe. Jehova wakamubelesya Jesu katanaba muntunsi kali ‘ngomubelesi Wakwe mupati’ mukulenga zyoonse zintu zimbi zyakujulu alimwi azyaanyika. (Tusimpi 8:22-31; Ba-Kolose 1:16, 17) Alimwi Leza wakamubelesya kuba mwaambilizi Wakwe mupati. Ncencico eci Jesu ncategwa ‘ndi Jwi.’—Johane 1:1-3; Ciyubunuzyo 19:13.

2. Leza wakatuma Mwanaakwe anyika kwiinda mukulonzya buumi bwakwe kutola mwida lya Mariya. Aboobo Jesu taakajisi wisi muntunsi. Ncencico eci ncaakazyalwa kalondokede. Leza wakamutumina twaambo totatwe Jesu anyika: (1) Kutuyiisya kasimpe kajatikizya Leza (Johane 18:37), (2) kuti atondezye kusyomeka kulondokede, ikutupa mukondo wakuti tutobele (1 Petro 2:21), alimwi (3) ape buumi bwakwe cibe cituuzyo cakutwaangulula kuzwa kucibi akulufwu. Nkaambo nzi eci ncicakali kuyandika?—Matayo 20:28.

3. Kwiinda mukutyola mulawo wa Leza, muntu wakusaanguna, Adamu, wakacita ceeco Bbaibbele ncoliita kuti “cibi.” Aboobo Leza wakamusinganya kuti akafwe. (Matalikilo 3:17-19) Takwe naakacili kusika pe azyeelelo zya Leza, aboobo taakacili muntu uulondokede. Bucebuce wakacembaala akufwa. Adamu wakasiila bana bakwe cibi. Ncencico ncotucembaalila, ncotucisilwa, alimwi akufwa. Mbuti muntu mbwaakali kunga ulafwutulwa?—Ba-Roma 3:23; 5:12.

 4. Jesu wakali muntu uulondokede mbubwena mbuli Adamu. Pesi wakaindana a Adamu munzila yakuti walo Jesu wakamvwida Leza cakulondoka nomuba mumasunko mapati loko. Aboobo wakali kukonzya kupa cituuzyo cabuumi bwakwe bwabuntu bulondokede ikubbadelela cibi ca Adamu. Eeci Ibbaibbele ncoliita kuti cinunuzyo. Aboobo bana ba Adamu bakali kukonzya kwaangululwa kuzwa kukusinganizigwa kwalufwu. Boonse basyoma muli Jesu balakonzya kulekelelwa akutambula buumi butamani.—1 Timoteo 2:5, 6; Johane 3:16; Ba-Roma 5:18, 19.

5. Naakali anyika Jesu wakaponya baciswa, wakasanina bafwide nzala, alimwi wakaumuzya amaguwo. Mane wakabusya abafwu. Nkaambo nzi ncaakacitila maleele? (1) Wakabafwida luzyalo bantu bakali mumapenzi, eelyo wakali kuyanda kubagwasya. (2) Maleele akwe akasinizya kuti wakali Mwanaa Leza. (3) Akatondezya nzyayakucitila bantu bamvwa ciindi aakulela nyika kali Mwami.—Matayo 14:14; Marko 2:10-12; Johane 5:28, 29.

6. Jesu wakafwa amane wakabusigwa a Leza akuba cilenge camuuya icanguzu akupiluka kujulu. (1 Pita 3:18, Ci) Kuzwa ciindi eco, Leza wamubikka kuba Mwami. Ino-ino Jesu uyoogwisya bubi boonse amapenzi anyika.—Intembauzyo 37:9-11; Tusimpi 2:21, 22.

[Zifwanikiso izili apeeji 7]

Mulimo wa Jesu wakali kubikkilizya kuyiisya, kucita maleele, alimwi mane akupa buumi bwakwe akaambo kandiswe