Ciiyo 2

Ino Leza Nguni?

Nguni Leza mwini-mwini, alimwi nguni zina lyakwe? (1, 2)

Ino ulaa mubili uuli buti? (3)

Mbube nzi bulibonya kapati mulinguwe? (4)

Sena tuleelede kubelesya zinkozya alimwi azitondezyo mukumukomba? (5)

Ninzila nzi zyobile motunga twaiya kujatikizya Leza? (6)

1. Bantu balakomba zintu zinji. Pesi Bbaibbele lilatwaambila kuti kuli buyo Leza omwe MWINI-MWINI. Nguwakalenga zintu zyoonse kujulu alimwi aanyika. Akaambo kakuti nguwakatupa buumi, ngonguwe alikke ngotweelede kukomba.—1 Ba-Korinto 8:5, 6; Ciyubunuzyo 4:11.

2. Leza ujisi mazina manji aabulemu, pesi ujisi buyo zina lyomwe. Eelyo zina litegwa JEHOVA. Bunji bwama Bbaibbele, izina lya Leza liligwisidwe mulingawo akubikkilwa mazina aabulemu aakuti MWAMI naa LEZA. Pesi ciindi Ibbaibbele nilyakalembwa, izina lyakuti Jehova lyakali kujanika ziindi zisika ku 7,000!—Kulonga 3:15; Intembauzyo 83:18.

3. Jehova ulaa mubili nokuba kuti tuuli mbuli yesu pe. “Leza Muuya,” mbolyaamba Bbaibbele. (Joni 4:24, Ci)  Muntu wamuuya ulaa buumi busumpukide kwiinda kule-kule ali bwesu. Taakwe muntu walinamubwene Leza pe. Jehova ukkala kujulu, pesi ulabona zintu zyoonse. (Intembauzyo 11:4, 5; Johane 1:18) Ino walo muuya uusalala ninzi? Tali muntu mbuli Leza pe. Ninguzu nzyabelesya Leza.—Intembauzyo 104:30.

4. Ibbaibbele lilatuzibya mbuli mbwabede Jehova. Lilatondezya kuti bube bwakwe bulibonya kapati nduyando, bululami, busongo, alimwi anguzu. (Deuteronomo 32:4; Jobu 12:13; Isaya 40:26; 1 Johane 4:8) Alimwi Bbaibbele lilatwaambila kuti ngusiluse, siluzyalo, silweengelelo, mwaabi, alimwi ulakkazika moyo. Swebo, mbuli bana bamvwa, tweelede kusola kumwiiya.—Ba-Efeso 5:1, 2.

5. Sena tuleelede kuzikotamina zinkozya, zifwanikiso, antela zitondezyo mukukomba kwesu? Peepe! (Kulonga 20:4, 5) Jehova waamba kuti tweelede buyo kukomba nguwe alikke. Takwe nanga waabana bulemu bwakwe amuntu umbi neciba cintu cimbi. Zinkozya tazikwe nguzu zyakutugwasya pe.—Intembauzyo 115:4-8; Isaya 42:8.

6. Mbuti mbotunga twamuziba kabotu Leza? Imwi nzila njakulangilila zintu nzyaakalenga akuyeeya loko ncezyaamba kulindiswe. Zilenge zya Leza zilatutondezya kuti ulaa nguzu zinji alimwi abusongo. Tulabona luyando lwakwe muzintu zyoonse nzyabambide. (Intembauzyo 19:1-6; Ba-Roma 1:20) Iimbi nzila njotunga twaiya zya Leza nkwiinda mukubala Bbaibbele cakuzumanana. Mulindilyo Leza ulatwaambila azimbi zyambuli mbwabede. Alimwi ulatwaambila makanze aakwe alimwi ancayanda kuti swebo tucite.—Amosi 3:7; 2 Timoteo 3:16, 17.

[Zifwanikiso izili apeeji 5]

Tulaiya mbwabede Leza kwiinda muzilenge alimwi amu Bbaibbele