Ciiyo 11

Izisyomwa Aziyanza Zimucima Leza

Nzintu nzi zisyomwa aziyanza izitaluzi? (1)

Sena Banakristo beelede kusyoma kuti Leza Mbutatu? (2)

Nkaambo nzi Banakristo ncobatasekeleli Kkilisimasi, Isita, naaba mazuba aakuzyalwa? (3, 4)

Sena bafwide balakonzya kucisa baumi? (5) Sena Jesu wakafwida aciingano? (6) Ncintu cipati buti kukkomanisya Leza? (7)

1. Tazili zyoonse zisyomwa aziyanza izibi pe. Pesi Leza tazizumizyi kuti kazili zizwa mubukombi bwakubeja antela kazikazyanya aziyiisyo zya Bbaibbele.—Matayo 15:6.

2. Butatu: Sena Jehova Mbutatu—sena mbantu botatwe muli Leza omwe? Peepe! Jehova, Wisi, ‘ngo Leza mwini-mwini, uuli alikke.’ (Johane 17:3; Marko 12:29) Jesu Mmwanaakwe mutaanzi kuzyalwa, alimwi mutwanga wa Leza. (1 Ba-Korinto 11:3) Wisi mupati kwiinda Mwana. (Johane 14:28) Muuya uusalala tali muntu pe; ninguzu zya Leza nzyabelesya.—Matalikilo 1:2; Incito 2:18.

3. Kkilisimasi a Isita: Jesu taakazyalwa mu December 25 pe. Wakazyalwa munsi-munsi a October 1, iciindi beembezi nobakali kuzilekela anze mbelele kulutanga. (Luka 2:8-12) Jesu takwe naakalailila Banakristo kuti kabasekelela kuzyalwa kwakwe pe. Pesi wakabalailila basiciiya bakwe kuti kabaibaluka, naa kuyeeya, lufwu lwakwe. (Luka 22:19, 20) Kkilisimasi alimwi aziyanza zyayo zizwa mubukombi bwansiku bwakubeja. Ncimwi buyo aziyanza zya Isita, mbuli kubelesya mayi alimwi abasulwe. Banakristo bakusaanguna taakwe nobakasekelela Kkilisimasi naa Isita pe, alimwi ncimwi buyo a Banakristo beni-beni sunu.

4. Buzuba Bwakuzyalwa: Kwelikke kusekelela kwamazuba aakuzyalwa ikwaambwa mu Bbaibbele kwakacitwa abantu bobile batakali kukomba Jehova. (Matalikilo 40:20-22; Marko 6:21, 22, 24-27)  Banakristo bakusaanguna taakwe nobakasekelela mazuba aakuzyalwa pe. Iciyanza cakusekelela mazuba aakuzyalwa ­cizwa mubukombi bwansiku bwakubeja. Banakristo beni-beni balapana zipo alimwi balasekelela antoomwe kuziindi zimbi mukati kamwaka.

5. Kuyoowa Bafwide: Bafwide kwiina cintu ncobanga bacita nokuba kumvwa. Taakwe mbotunga twabagwasya, abalo taakwe mbobanga batucisa pe. (Intembauzyo 146:4; Mukambausi 9:5, 10) Muntu muumi ulafwa, tazumanani kupona amana kufwa pe. (Ezekiele 18:4) Pele kuli bangelo bampelenge, bategwa badaimona, balo ibalicengeezya kuba mizimo yabafwide. Kufwumbwa ciyanza cijatikizya kuyoowa antela kukomba bafwu taciluzi pe.—Isaya 8:19.

6. Ciingano: Jesu taakafwida aciingano pe. Wakafwida acisamu. Ibbala lya Cigiliki ilisandulwidwe kuti “ciingano” muma Bbaibbele manji lyakali kwaamba buyo cipulanga comwe. Iciingano nceezyo cizwa mubukombi bwansiku bwakubeja. Iciingano teecakali kubelesegwa pe nokuba kukotaminwa a Banakristo bakusaanguna. Aboobo sena muyeeya kuti inga kunooluzi ikubelesya ciingano mukukomba?—Deuteronomo 7:26; 1 Ba-Korinto 10:14.

7. Cilakonzya kuyuma kapati ikufwutatila zisyomwa alimwi aziyanza zimwi ezi. Basazinyoko alimwi abeenzinyoko inga baa­kusoleka kumuzula kuti mutacinci nzyomusyoma. Pesi kukkomanisya Leza ncintu cipati kwiinda kukkomanisya bantu.—Tusimpi 29:25; Matayo 10:36, 37.

[Cifwanikiso icili apeeji 22]

Leza tali Butatu pe

[Cifwanikiso icili apeeji 23]

Kkilisimasi a Isita zizwa kubukombi bwansiku bwakubeja

[Cifwanikiso icili apeeji 23]

Kwiina kaambo kakukombela bafwide naa kubayoowa