Ciiyo 7

Kuswena Kuli Leza Kwiinda Mukupaila

Nkaambo nzi ncecili cintu cipati kupaila lyoonse? (1)

Nkuuli ni nkotweelede kupaila, alimwi munzila ili buti? (2, 3)

Ntwaambo nzi tumwi tweelede kupailila? (4)

Ndilili nomweelede kupaila? (5, 6)

Sena Leza uliiswiilila mipailo yoonse? (7)

1. Kupaila nkwaambaula a Leza cakulibombya. Mweelede kupaila kuli Leza lyoonse. Mwacita obu mulakonzya kulimvwa kuyanzana cilongwe cipati anguwe. Jehova mmupati alimwi ngusinguzu kapati, pesi ulatuswiilila notupaila! Sena mulapaila kuli Leza lyoonse?—Intembauzyo 65:2; 1 Ba-Tesalonika 5:17.

2. Kupaila ncibeela cabukombi bwesu. Aboobo tweelede kupaila kuli Leza alikke, Jehova. Ciindi Jesu naakali anyika, lyoonse wakali kupaila kuli Wisi,  kutali kumuntu umbi pe. Aswebo mbotweelede kucita. (Matayo 4:10; 6:9) Pesi mipailo yesu yoonse yeelede kwaambwa muzina lya Jesu. Eeci citondezya kuti tulacilemeka ciimo ca Jesu alimwi akuti tulacisyoma cipaizyo cakwe cacinunuzyo.—Johane 14:6; 1 Johane 2:1, 2.

3. Notupaila kuli Leza tweelede kwaamba zili mumoyo. Tatweelede kwaamba mipailo yakwiibaluka buya naa kwiibala kuzwa mubbuku lyamipailo. (Matayo 6:7, 8) Tulakonzya kupaila muciimo cili coonse cabulemu, kufwumbwa ciindi alimwi kufwumbwa kubusena. Leza ulakonzya kumvwa niiba mipailo yaambilwa mumoyo cakaumuumu. (1 Samuele 1:12, 13) Ncibotu kujana busena buumwine ikutakwe bantu ikwakuyoolipailila tobeni.—Marko 1:35.

4. Ino ntwaambo nzi ntomunga mwapaila? Kufwumbwa cintu cinga cajatikizya bulongwe bwenu anguwe. (Ba-Filipi 4:6, 7) Imupailo wacikonzyanyo ulatondezya kuti tweelede kupailila zina lya Jehova alimwi amakanze aakwe. Alimwi tulakonzya kupailila nzyotuyandika zyakumubili, izibi zyesu, alimwi alugwasyo lwakukaka masunko. (Matayo 6:9-13) Mipailo yesu tayeelede kuba yakuliyanda pe. Tweelede kupailila zyalo-zyalo zintu zyeendelana akuyanda kwa Leza.—1 Johane 5:14.

5. Mulakonzya kupaila kufwumbwa ciindi moyo wenu nuuyanda kumulumba naa kumutembaula Leza. (1 Makani 29:10-13) Mweelede kupaila ciindi nomulaa mapenzi alimwi ciindi nomuli mumasunko. (Intembauzyo 55:22; 120:1) Kuleelede kupaila nomutana talika kulya. (Matayo 14:19) Jehova ulatutamba kuti tupaile kulinguwe “lyoonse.”—Ba-Efeso 6:18.

6. Ikapati naa twacita cibi cipati tweelede kupaila. Muziindi zili boobu tweelede kulikombya kuli Jehova kuti atubede aaluse akutulekelela. Kuti twalyaamba zibi zyesu kulinguwe akusoleka mbotukonzya ikutaziinduluka alimwi, Leza “ulafwambaana kujatila.”—Intembauzyo 86:5; Tusimpi 28:13.

7. Jehova uswiilila buyo mipailo yabantu baluleme. Kutegwa mipailo yenu aimvwe Leza, mweelede kusoleka kapati kweendelana amilawo yakwe mubukkale bwenu. (Tusimpi 15:29; 28:9) Mweelede kulibombya ciindi nomupaila. (Luka 18:9-14) Mweelede kucibelekela anguzu ncomupailila. Munzila eyi muyootondezya kuti mulaa lusyomo alimwi akuti mulisinizizye kwaamba. Ilyalo elyo Jehova nayooingula mipailo yenu.—Ba-Hebrayo 11:6.