Ciiyo 14

Mbobeendelezegwa Bakamboni ba Jehova

Muciimo ncobabede mazubaano, ndilili Bakamboni ba Jehova nobakatalika? (1)

Mbuti miswaangano ya Bakamboni ba Jehova mbwiicitwa? (2)

Ino mali aabelesegwa azwa kuli? (3)

Nguni uusololela mumbungano imwi aimwi? (4)

Miswaangano nzi mipati iicitwa mwaka amwaka? (5)

Mmilimo nzi iicitwa kumaopesi abo mapati akumaopesi aamitabi? (6)

1. Muciimo ncobabede mazubaano Bakamboni ba Jehova bakatalika mumyaka yakuma 1870. Kusaanguna bakali kwiitwa kuti Basikwiiya Bbaibbele. Pesi mu 1931 bakabweza zina lyeendelana a Magwalo ilyakuti Bakamboni ba Jehova. (Isaya 43:10) Kuzwa kumatalikilo noyakali nsyoonto mbunga yakomena kusika kumamiliyoni aa Bakamboni, balo ibaujisi kukambauka mumanyika ­aainda ku 230.

2. Bunji bwambungano zya Bakamboni ba Jehova zilabaa miswaangano ziindi zyotatwe nsondo ansondo. Mwatambwa kuti kamujanika kulinjiyo. (Ba-Hebrayo 10:24, 25) Iziyiisigwa zizwa mu Bbaibbele. Miswaangano ilajulwa akujalwa amupailo. Alimwi kulaimbwa “nyimbo zyakulumba” izikonda moyo kubunji bwamiswaangano. (Ba-Efeso 5:18, 19) Kunjilwa buyo, alimwi takubwezelelwi mulumbo pe.—Matayo 10:8.

3. Bunji bwambungano miswaangano ziicitila mu Ŋanda zya Bwami. Kanjikanji eezi niŋanda buyo iziyakwa a Bakamboni balisungula kugwasya. Kulinzizyo tamukaboni zinkozya, ziingano, naa zimwi zintu zili boobu pe  mu Ŋanda zya Bwami. Mali aabelesegwa azwa mukusanga kwakulisungula. Kuli baabo bayanda kusanga, inga kuli kabbokesi kakusanga.—2 Ba-Korinto 9:7.

4. Mumbungano imwi aimwi kuli baalu, naa balangizi. Balasololela mukuyiisya mbungano. (1 Timoteo 3:1-7; 5:17) Balagwasigwa abakutausi. (1 Timoteo 3:8-10, 12, 13) Aaba bamaalumi tabasumpwidwe atala lyabambi mumbungano pe. (2 Ba-Korinto 1:24) Tabapegwi mazina mapati aabulemu pe. (Matayo 23:8-10) Tabaindani abambi kusama. Alimwi tababbadelwi mulimo wabo. Baalu balilisungwide kulanganya ziyandika kumbungano munzila yakumuuya. Balakonzya kupa luumbulizyo abusolozi muziindi zyamapenzi.—Jakobo 5:14-16; 1 Petro 5:2, 3.

5. Alimwi Bakamboni ba Jehova balacita miswaangano mipati mwakaa mwaka. Kuziindi ezi imbungano zinji zilayoboloka kuprogramu yaalubazu kuzooyiisigwa zyamu Bbaibbele. Kubbapatizigwa kwabasiciiya bapya ncibeela camiswaangano yoonse eyi.—Matayo 3:13-17; 28:19, 20.

6. Opesi lipati lya Bakamboni ba Jehova lili mu New York. Ooko nkokujanika Kabunga Keendelezya, ikakamu kabaalu baciindi balo balanga mbungano yamunyika yoonse. Alimwi kuli maopesi aamitabi aainda ku 100 mumanyika-manyika. Kumasena aaya, babelesi balisungwide balagwasya mukusimba akumwaya mabbuku aajatikizya Bbaibbele. Busolozi abwalo bulapegwa ibwakweendelezya mulimo wakukambauka. Sena inga taciboti kuti mwakanza kuyooswaya opesi lyamutabi lili afwaafwi ankomubede?