Ciiyo 10

Micito Njasulide Leza

Mweelede kuzibona buti zintu Leza nzyaamba kuti nzibi? (1)

Mmisyobo iili buti yakoonana iitaluzi? (2)

Mbuti Munakristo mbweelede kulanga kubeja? (3) kubbeja? (3)kubba? (3) kulwana? (4) mizimo? (5) bukolwi? (6)

Mbuti muntu mbwanga walyaangulula kuzwa kumicito mibi? (7)

1. Babelesi ba Leza bayanda zintu zibotu. Pesi alimwi baleelede kwiiya kusulaika zibi. (Intembauzyo 97:10) Eeci caamba kutantamuka micito imwi Leza njasulide. Ino mmicito nzi imwi eyi?

2. Bwaamu: Koonana kamutana kwatana, bumambi, koonana amunyama, koonana mubusazinyina, alimwi abunasodoma zyoonse nzibi zipati kuli Leza. (Levitiko 18:6; Ba-Roma 1:26, 27; 1 Ba-Korinto 6:9, 10) Kuti banabubili kabatana kwatana pesi bakkala antoomwe, beelede kwaandaana ccita bakwatane mumulawo.—Ba-Hebrayo 13:4.

3. Kubeja, Kubbeja, Kubba: Jehova Leza takonzi kubeja pe. (Tito 1:2) Bantu bayanda kumubotezya beelede kukutantamuka kubeja. (Tusimpi 6:16-19; Ba-Kolose 3:9, 10) Kufwumbwa musyobo wakubbejelana ulajatikizya bulyato. Aboobo Banakristo tabatoli lubazu mukubbeja kwamusyobo uuli woonse, mbuli cisolo cacoolwe, kubeelelana kwamabbiza, alimwi anjuka.  (Ba-Efeso 5:3-5) Alimwi Banakristo tababbi pe. Tabauli zintu nzyobazi kuti nzyakubba naa kubweza zintu nzyobatazumizidwe.—Kulonga 20:15; Ba-Efeso 4:28.

4. Bukali, Kulwana: Bukali bwakutalijatilila buleta kulwana. (Matalikilo 4:5-8) Muntu mulwani takonzi kuba mulongwe wa Leza pe. (Intembauzyo 11:5; Tusimpi 22:24, 25) Nkulubizya ikupilusizya naa kujosezya zibi bantu nzyobanga batucitila.—Tusimpi 24:29; Ba-Roma 12:17-21.

5. Bulozi Amizimo: Bamwi bantu balalomba nguzu zyamizimo kusola kusilika malwazi. Bamwi balowa basinkondonyina kubapa kuciswa nokuba kubajaya. Inguzu zyoonse zyamicito eeyi nzizya Saatani. Aboobo Banakristo tabeelede kutola lubazu luli loonse anjiyo. (Deuteronomo 18:9-13) Kukakatila kuli Jehova mbobukwabilizi bupati kuzwa kukulowegwa abambi.—Tusimpi 18:10.

6. Bukolwi: Takuli kulubizya pe kunywa tuwaini naa tukoko twamisyobo-misyobo tusyoonto. (Intembauzyo 104:15; 1 Timoteo 5:23) Pele kunywa loko naa bukolwi nkulubizya kumeso a Leza. (1 Ba-Korinto 5:11-13; 1 Timoteo 3:8) Kwiindilizya kunywa kulakonzya kunyonyoona buumi bwenu alimwi akunyonganya mukwasyi wenu. Alimwi kulakonzya kumupa kuti cuube-ube kuzundwa mumasunko ambi.—Tusimpi 23:20, 21, 29-35.

7. Bantu bacita zintu Leza nzyaamba kuti nzibi “tabakooyookona Bwami bwa-Leza.” (Ba-Galatiya 5:19-21) Kuti Leza kamumuyanda ncobeni akuyanda kumukkomanisya, mulakonzya kulyaangulula kumicito eeyi. (1 Johane 5:3) Amwiiye kusulaika zintu Leza nzyaamba kuti nzibi. (Ba-Roma 12:9) Amusangane abantu balaa ziyanza zyabuna Leza. (Tusimpi 13:20) Banakristo basimide inga baakumubeda bagwasyi. (Jakobo 5:14) Icipati kwiinda ncakuti amuyaame alugwasyo lwa Leza kwiinda mukupaila.—Ba-Filipi 4:6, 7, 13.

[Zifwanikiso izili apeeji 20, 21]

Leza ulibusulide bukolwi, kubba, kubbeja, amicito yoonse yakulwana