IBANTU banji basyoma kuti kuli cintu cimwi citalibonyi alimwi citafwi ncotujisi. Bayeeya kuti muntu afwa, icibeela eeci citalibonyi ncobajisi bantu cilazwa mumubili akuzumanana kupona. Mbwaanga njiisyo eeyi ilidumide kapati, ibanji balagambwa ikuzyiba kuti teensyi ncoliyiisya Bbaibbele. Aboobo ino ncinzi cini cicitika twafwa kweelana aciyiisyigwa mu Jwi lya Leza?

Ambweni muciyeeyede kuti kumatalikilo Ibbaibbele lyakalembwa mumyaambo ya Cihebrayo alimwi a Cigiliki. Balembi ba Bbaibbele bakabelesya bbala lya Cihebrayo lyakuti neʹphesh naa ibbala lya Cigiliki lyakuti psy·kheʹ ziindi ziinda ku 800 mu Magwalo, alimwi cilisalede kuti mabala aaya aamba (1) bantu, (2) banyama naa (3) ibuumi bwamuntu naa munyama. Atulange-lange magwalo aamba bupanduluzi oobu botatwe.

 Bantu. ‘Mumazuba aa Nowa . . . bantu [psy·kheʹ] bace, nkokuti bali musanu mubatatu mbebakafwutuka mumaanzi.’ (1 Petro 3:20) Aawa ibbala lya Cigiliki lyakuti psy·kheʹ lyakasandululwa kuti bantu—nkokuti Nowa, mukaintu wakwe, bana bakwe basankwa botatwe alimwi abamakaintu babo. Kubbuku lya Kulonga 16:16 kwaambwa malailile aakapegwa bana Israyeli kujatikizya mbobakeelede kubweza cilyo camana. Bakaambilwa kuti: “Amucibweze, . . . umwi aumwi abwezele bantu [neʹphesh] bamuŋanda yakwe.” Aboobo mana aakabwezyegwa akeelede kweelana abantu bakali mumukwasyi aumwi. Izikozyanyo zimbi zyakusandulula mabala aakuti neʹphesh alimwi a psy·kheʹ kuba muntu naa bantu zilajanika ku Matalikilo 46:18; Joshua 11:11; Incito 27:37; alimwi a Ba-Roma 13:1.

Banyama. Mucibalo camu Bbaibbele camakani aakulenga, tubala kuti: “Lino Leza wakaamba kuti, Maanzi avuzye makamu makamu aazintu zyuumi [neʹphesh], abalo bayuni bauluke atala lyanyika mumweenya wakujulu. Lino Leza wakaamba kuti, Amwalo munyika muzwe zintu zyuumi [neʹphesh], cimwi acimwi mbuli musyobo waco. Muzwe iŋombe abauka abanyama baansi, umwi aumwi mbuli musyobo wakwe. Nkabela kwakaba obo.” (Matalikilo 1:20, 24) Mucibalo eeci, inswi alimwi abanyama boonse buyo baambwa abbala lya Cihebrayo lyomwe lyakuti neʹphesh. Bayuni alimwi abanyama bambi baambwa kuti neʹphesh ku Matalikilo 9:10; Levitiko 11:46; alimwi aku Myeelwe 31:28.

Ibuumi bwamuntu. Zimwi ziindi imabala aakuti neʹphesh alimwi a psy·kheʹ inga aamba buumi bwamuntu. Jehova wakaambila Musa kuti: “Bafwa bantu boonse ibali kuyandaula buumi [neʹphesh] bwako.” (Kulonga 4:19, NW) Eeci caamba kuti bakali kuyanda kumujaya, nkokuti ikugozya buumi bwa Musa. Musyule, Rakele naakali kutumbuka mwanaakwe mulombe Benjamini, “buumi [neʹphesh] bwakwe bwakamusiya (nkaambo wakafwa).” (Matalikilo 35:16-19, NW) Alimwi amulange-lange majwi aa Jesu aakuti: “Ndime sikweembela mubotu, sikweembela mubotu ulatulila mbelele buumi [psy·kheʹ] bwakwe.” (Johane 10:11) Jesu wakapa psy·kheʹ naa buumi bwakwe kutegwa banamaleya bagwasyigwe. Muzibalo zyamu Bbaibbele eezyi, cilisalede kuti mabala aakuti neʹphesh alimwi a psy·kheʹ aamba buumi bwamuntu. Mulajana zikozyanyo zimbi zyabupanduluzi bwamabala aakuti  neʹphesh alimwi a psy·kheʹ ibwaamba buumi ku 1 Bami 17:17-23, BT; Matayo 10:39; alimwi a Johane 15:13.

Ikuyungizya lwiiyo lwa Jwi lya Leza kuyoomupa kuzyiba kuti kunyina mu Bbaibbele lyoonse nkotujana mabala aakuti “kutafwa” naa “kupona lyoonse” nkwaaswaanganizyidwe amabala aakuti neʹphesh alimwi a psy·kheʹ. Muciindi caboobo, Magwalo aamba kuti coonse icaambwa abbala lya neʹphesh naa psy·kheʹ cilafwa. (Ezekieli 18:4, 20) Aboobo Ibbaibbele lyaamba muntu wafwa kuti “mutunta,” icaamba neʹphesh naa psy·kheʹ uufwide.—Levitiko 21:11.

Imyaambo yakusaanguna yakabelesyegwa kulemba Bbaibbele yaamba kuti ibbala lya Cihebrayo lyakuti ruʹach alimwi alya Cigiliki lyakuti pneuʹma aamba nguzu zyabuumi zibeleka izijisi zilenge zyaanyika. Mucikozyanyo, ibbuku lya Intembauzyo 104:29 lyaamba kuti: ‘Ikuti yebo Jehova wazinyanzya muuya [ruʹach], zilafwa akupiluka kubulongo bwanzizyo.’ Kuli Luka 8:55 tubala kuti “muuya [pneuʹma] wakwe wakaboola, wabuka ndilyonya.” Alimwi kuli Jakobo 2:26 tubala kuti “mubili uuanzeene amuuya [pneuʹma]” ulifwide. Aboobo mutupango ootu, ruʹach alimwi a pneuʹma mmabala aamba cintu cipa kuti mubili kuupona. Ikuti cintu eeco kacitako, mubili ulifwide. Aboobo mu Bbaibbele lya New World Translation, ibbala lyakuti ruʹach talisandulwidwe buyo kuti muuya, pele alimwi akuti nguzu zyabuumi. Mucikozyanyo, kujatikizya Zambangulwe lyakuciindi ca Nowa, Leza wakati: “Ndaleta izambangulwe lyamaanzi aansi lyakunyonyoozya banyama boonse muli nguzu [ruʹach] zyabuumi.” (Matalikilo 6:17; 7:15, 22) Aboobo mabala aakuti ruʹach alimwi a pneuʹma aamba nguzu zitalibonyi (nguzu zyabuumi) zipa kuti zilenge zipona zyoonse kazili zyuumi.

Imubili uyandika nguzu zyabuumi mbubwenya wayilesi mboiyandika mabwe naa magesi kutegwa ibeleke. Amuyeeye wayilesi ndyotwaamba. Nomubikka mabwe muwayilesi akutalika kulilizya, imulilo uuli mumabwe upa kuti wayilesi italike kubeleka. Pele kuti kakunyina mabwe, wayilesi inga taibeleki pe. Ncimwi buyo amawayilesi aamusyobo uumbi ciindi naagusyigwa kumagesi. Mbubwenya buyo, imuuya ninguzu zipa kuti mubili wesu  kuuli muumi. Alimwi mbubwenya mbuli magesi, imuuya kunyina mboulimvwa alimwi tuuyeeyi pe. Ninguzu zitali muciimo cacintu cili coonse. Pele ikuti kakunyina muuya ooyo naa nguzu zyabuumi, mibili yesu ‘ilafwa akupiluka kubulongo bwayo,’ mbubwenya bwakaamba sintembauzyo.

Kalyaamba zyalufwu lwamuntu, ibbuku lya Mukambausi 12:7 mu Bbaibbele lyamu 1996 lyaamba kuti: “Bulongo [imubili wakwe] bulapiluka kubulongonyina nkubwakazwida. Muuya ulapiluka kuli Leza wakuupa.” Eelyo muuya naa nguzu zyabuumi nozimana mumubili, imubili ulafwa akupiluka nkowakazwa—nkokuti kubulongo. Munzila njimunya, inguzu zyabuumi zipiluka nkuzyakazwa—nkokuti kuli Leza. (Jobu 34:14, 15; Intembauzyo 36:9) Eeci tacaambi kuti nguzu zyabuumi zyeenda ncobeni kuya kujulu. Muciindi caboobo, eeci caamba kuti kumuntu wafwa, ibulangizi buli boonse bwakupona alimwi kumbele buyeeme ali Jehova Leza. Inga twaamba kuti buumi bwakwe buli mumaanza aa Leza. Kulikke kwiinda munguzu zya Leza, imuuya naa nguzu zyabuumi nozyinga zyapegwa alimwi ikutegwa muntu ooyo apone alimwi.

Elo cilaumbulizya kapati kaka ikuzyiba kuti eeci Leza ncayoocitila boonse iboona “muzyuumbwe” mbayeeya! (Johane 5:28, 29) Aciindi cabubuke, Jehova uuyoolenga mubili mupya kujatikizya muntu woona mulufwu akuupa kuti ube muumi kwiinda mukubikka muuya naa nguzu zyabuumi mulinguwo. Elo ciindi eeco cinooli ciindi calukkomano lutalivwulili kubantu kaka!

Ikuti kamuyanda kwiiya zinji kujatikizya mabala aakuti neʹphesh alimwi a psy·kheʹ, ruʹach alimwi a pneuʹma kweelana ambwaabelesyedwe mu Bbaibbele, kuli makani aagwasya kapati mubroshuwa lyakuti Ncinzi Cicitika Kulindiswe Twafwa? alimwi amubbuku lyakuti Kukambitsirana za m’Malemba apeeji 294-99, aakamwaigwa a Bakamboni ba Jehova.