1. Mmupailo nzi uuzyibidwe kapati uutiilangwe-langwe lino?

TUULUNZUMA twabantu nyika yoonse baluuzyi mupailo ngobaita kuti Mupailo wa Mwami. Ikaambo aaka kaamba mupailo uuzyibidwe kapati wakapegwa kauli citondezyo a Jesu Kristo lwakwe. Itwaambo twaambidwe mumupailo ooyu tulayandika kapati, alimwi ikulanga-langa kulomba kwakusaanguna kotatwe mumupailo ooyu kulamugwasya kwiiya zinji kujatikizya cini Bbaibbele ncoliyiisya.

2. Nzintu nzi zyotatwe Jesu nzyaakayiisya basikwiiya bakwe kuti kabalomba mumupailo?

² Kumatalikilo kwamupailo ooyu wacitondezyo, Jesu wakalailila bakali kumuteelela kuti: “Mbuboobu mbumweelede kukomba:—Taateesu ooli kujulu, alilemekwe izina lyako, abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:9-13) Ino kulomba ooku kotatwe kwaamba nzi?

3. Ino ncinzi ncotweelede kuzyiba kujatikizya Bwami bwa Leza?

³ Nzinji nzyotwaiya kale kujatikizya zina lya Leza lyakuti Jehova. Alimwi munzila imwi twakubandika kuyanda kwa Leza—zintu nzyabacitilide kale alimwi anzyaciyoocitila bantu kumbele. Pele ino Jesu wakali kwaamba nzi naakatuyiisya kupaila kuti: “Abuze Bwami bwako”? Ino Bwami bwa Leza ninzi? Ino mbuti kuboola kwambubo mbokuyoolisalazya izina lya  Leza? Alimwi ino kuboola kwa Bwami kuswaangene buti akucita kuyanda kwa Leza?

4. Ino Bwami bwa Leza ninzi, alimwi ino nguni Mwami wambubo?

⁴ Bwami bwa Leza nimfwulumende njaakatalisya Jehova Leza yeendelezyegwa a Mwami ngwaakasala. Ino nguni Mwami wa Bwami bwa Leza? Ngu Jesu Kristo. Jesu Mmwami mupati kwiinda beendelezi bantunsi boonse alimwi wiitwa kuti “Mwami wabami, Mweendelezi wabeendelezi.” (1 Timoteo 6:15) Ulijisi nguzu zyakucita zintu zili kabotu kapati kwiinda mweendelezi muntunsi uuli woonse, naba wooyo wiinda beenzinyina kubota.

5. Ino Bwami bwa Leza bweendelezya kuzwa kuli, alimwi ino bweendelezya nzi?

⁵ Ino Bwami bwa Leza bunooyendelezya kuzwa kuli? Ambweni inga twabuzya kuti, ino Jesu lino uli kuli? Muciyeeyede kuti mwakaiya kuti wakajaigwa acisamu cakupenzyezya, amane wakabusyigwa. Kwiinde buyo mazuba masyoonto kuzwa leelyo, wakapiluka kujulu. (Incito 2:33) Aboobo, kujulu nkwaakagama nkobubede Bwami bwa Leza. Nkakaambo kaako Bbaibbele ncolibwiita kuti ‘mbwami bwakujulu.’ (2 Timoteo 4:18) Nokuba kuti Bwami bwa Leza buli kujulu, buyooyendelezya anyika.—Amubale Ciyubunuzyo 11:15.

6, 7. Ino ncinzi cipa kuti Jesu abe Mwami wiinda boonse?

⁶ Ino ncinzi cipa kuti Jesu abe Mwami wiinda boonse? Kaambo kamwi nkakuti kunyina naya kufwa. Kalikozyanisya Jesu kubami bantunsi, Ibbaibbele limwaamba kuti “walo alikke nguutafwi alimwi nguukkala mumumuni uutaswenwa afwiifwi.” (1 Timoti 6:19) Eeci caamba kuti zintu zibotu zyoonse nzyayoocita Jesu ziyoozumanana kukabe kutamani. Alimwi tulizyi kuti uyoocita zintu zinji zibagwasya bantu bakwe.

⁷ Amulange-lange businsimi oobu bwamu Bbaibbele kujatikizya Jesu bwakuti: “Uyookalwa Muuya wa-Jehova, Muuya wabusongo awakuswiililisya, Muuya walulayo awanguzu,  Muuya waluzibo awakulemeka Jehova. Uyookondwa kulemeka Jehova. Takooyoobeteka kukuyeeya zintu ziboneka kumeso buyo, nikuba kukosola makani cakuzuminina majwi ngaamvwa kumatwi buyo. Uyoobeteka bacete cakululama, akukosweda batengwana banyika makani aaelede.” (Isaya 11:2-4) Imajwi aaya atondezya kuti Jesu wakali kuyooba Mwami mululami alimwi silubomba kubantu bali anyika. Sena inga mwayanda kuba amweendelezi uuli boobo?

8. Ino mbaani mbociyoolela limwi a Jesu?

⁸ Nkaaka kaambo akambi kajatikizya Bwami bwa Leza: Jesu takeendelezyi kali alikke. Kuli mbociya kweendelezya limwi. Mucikozyanyo, imwaapostolo Paulo wakaambila Timoteo kuti: “Kuti twakakatila tuyooendelezya awe,” nkokuti kabali bami. (2 Timoteo 2:12) Inzya, Paulo, Timoteo alimwi abambi basyomeka mbaakasala Leza bayooyendelezya antoomwe a Jesu mu Bwami bwakujulu. Ino bali bongaye ibanoojisi coolwe eeco cilibedelede?

9. Ino bali bongaye ibayooyendelezya a Jesu, alimwi ino ndiilili Leza naakatalika kubasala?

⁹ Mbubwenya mbokutondezyedwe mu Cibalo 7 mubbuku eeli, imwaapostolo Johane wakapegwa cilengaano oomo mwaakabona ‘Mwanaambelele [Jesu Kristo] kaimvwi acilundu ca Zioni [cuuno cakwe cabwami kujulu] abantu bali zyuulu zili mwaanda amakumi one azine, bakalijisi izina lyakwe azina lyawisi lilembedwe ankumu zyabo.’ Ino mbaani aabo ibali 144,000? Johane mwini utwaambila kuti: “Mbimbabo batobela Mwanambelele koonse nkwaya. Mbimbabo bakasaanguna kunununwa akati kabantu, kuti babe kabalwebalwe ba-Leza aba-Mwanambelele.” (Ciyubunuzyo 14:1, 4) Inzya, mbaasikutobela ba Jesu Kristo basyomeka aabo ibakasalwa kuti beendelezye kujulu anguwe. Nobamana kubusyilwa kubuumi bwakujulu kuzwa kubafwu, ‘bayooyendelezya nyika kabali bami’ antoomwe a Jesu. (Ciyubunuzyo 5:10) Kuzwa kuciindi cabaapostolo, Leza wali kusala Banakristo basyomeka kutegwa akkwanisye mweelwe wa 144,000.

10. Nkaambo nzi ncobuli bubambe bwaluyando kuti Jesu alimwi abali 144,000 bakeendelezye banamaleya?

 ¹⁰ Ikucita bubambe bwakuti Jesu alimwi abali 144,000 bakeendelezye banamaleya ncintu caluyando kapati. Ikaambo kamwi nkakuti, Jesu ulizyi mbocibede kuba muntunsi alimwi akupenga. Paulo wakati Jesu “tali Mupaizi Mupati uutakonzya kutweetelela mukulengauka kwesu, pele ngonguwe oyo uwakasunkwa mbubonya mbuli ndiswe, nekuboobo taakwe naakacita cibi.” (Ba-Hebrayo 4:15; 5:8) Abalo mbociyoolela limwi bakapenga alimwi bakaliyumya kabali bantunsi. Kuyungizya waawo, balapenga akutalondoka alimwi balaliyumya mumalwazi aamisyobo-misyobo. Mmasimpe bayoowabikkila maanu mapenzi aapenzya bantu!

11. Nkaambo nzi Jesu ncaakaamba kuti basikwiiya bakwe beelede kupailila kuti luyando lwa Leza lucitwe kujulu?

¹¹ Jesu naakaamba kuti basikwiiya bakwe beelede kupailila Bwami bwa Leza kuti buboole, alimwi wakati beelede kupailila kuti luyando lwa Leza lucitwe “ansi ano mbubonya mbuli kujulu.” Leza uli kujulu, alimwi luyando lwakwe lwali kucitwa lyoonse ooko abangelo bakwe basyomeka. Pele mu Cibalo 3 cabbuku lino, twakaiya kuti imungelo umwi mubi wakaleka kucita kuyanda kwa Leza alimwi wakapa kuti ba Adamu a Eva babisye. Mu Cibalo 10, tuyooyiya zimbi nzyoliyiisya Bbaibbele kujatikizya mungelo ooyo mubyaabi ngotuzyi kuti wiitwa kuti ngu Saatani Diabolosi. Saatani alimwi azilenge zyamuuya izyakasala kumutobela izyiitwa kuti madaimona zyakazumizyigwa kukkala kwaciindi cili mbocibede kujulu. Aboobo tabali boonse bangelo bakali kujulu ibakali kucita luyando lwa Leza. Eeco cakali kuyoocinca Bwami bwa Leza nobwakali kuyootalika kweendelezya. Imwami mupya Jesu Kristo wakali kuyoolwana a Saatani.—Amubale Ciyubunuzyo 12:7-9.

12. Nzintu nzi zyobile ziyandika izipandululwa kubbuku lya Ciyubunuzyo 12:10?

¹² Imajwi aaya aatobela aabusinsimi apandulula cakali kuyoocitika: “Ndakaswiilila ijwi ipati mujulu, lyakati, Sunu  kwasika lufutuko, anguzu, abwami bwa-Leza wesu, abwami bwa-Kristo wakwe, nkaambo sikubejelezya bakwesu twaambo [Saatani] wawisigwa ansi, nguwe wakali kubabejelezya kuli-Leza wesu lyoonse isikati amasiku.” (Ciyubunuzyo 12:10) Sena mwazibona zintu ziyandika zyobile zipandululwa mukapango kamu Bbaibbele aaka? Cakusaanguna, Ibwami bwa Leza bweendelezyegwa a Jesu Kristo bwakatalika kweendelezya. Icabili, Saatani wakawisyilwa anyika.

13. Ino ncinzi cakacitika akaambo kakuti Saatani wakatandwa kujulu?

¹³ Ino ncinzi cakacitika akaambo kazintu eezyo zyobile? Ikujatikizya cakacitika kujulu, tubala kuti: “Nkaambo kaako amusekelele nomajulu, anywebo nomukala mulingao.” (Ciyubunuzyo 12:12) Inzya, ibangelo basyomeka kujulu bakakkomana akaambo kakuti, mbwaanga lino Saatani amadaimona aakwe tiibakacinooliko, boonse kujulu bakali kunooli buyo baabo basyomeka kuli Jehova Leza. Lino kujulu kuli luumuno akubelekela antoomwe zitanyonganizyigwi. Lino luyando lwa Leza lulacitwa kujulu.

14. Ino ncinzi cacitika akaambo kakuti Saatani wakatandilwa anyika?

¹⁴ Pele ino mbuti kujatikizya nyika? Ibbaibbele lyaamba kuti: “Nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.” (Ciyubunuzyo 12:12) Saatani ulinyemede akaambo kakutandwa kuzwa kujulu alimwi akuti ucijisi buyo ciindi ciniini. Mubukali bwakwe nguuleta “mapenzi” anyika. Tulaiya azimbi kujatikizya “mapenzi” aayo mucibalo citobela. Pele mbwaanga Saatani wakatandilwa anyika alimwi lino nguuleta mapenzi, tulakonzya kubuzya kuti, Ino mbuti Bwami mbobunga bwacita kuti luyando lwa Leza lucitwe anyika?

15. Ino nduyando nzi ndwajisi Leza kujatikizya nyika?

¹⁵ Amuyeeye luyando ndwaakajisi Leza kujatikizya nyika. Mwakalwiiya mu Cibalo 3. Mu Edeni, Leza wakatondezya kuti luyando lwakwe kujatikizya nyika eeyi ndwakuti ibe paradaiso muzwide bantu batafwi alimwi baluleme. Saatani wakapa kuti ba Adamu a Eva babisye, alimwi eeco cakanyonganya kuzuzikizyigwa  kwaluyando lwa Leza kujatikizya nyika, pele kunyina makanze aa Leza naakacinca. Makanze aa Jehova acili akuti “balulami bayookona nyika, bayookala alinjiyo lyoonse.” (Intembauzyo 37:29) Alimwi Bwami bwa Leza buyoocita oobo. Munzila nzi?

16, 17. Ino bbuku lya Daniele 2:44 litwaambila nzi kujatikizya Bwami bwa Leza?

¹⁶ Amulange-lange businsimi buli kuli Daniele 2:44. Ooko tubala kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” Ino eeci citwaambila nzi kujatikizya Bwami bwa Leza?

¹⁷ Cakusaanguna, citwaambila kuti Bwami bwa Leza bwakali kuyootalisyigwa “mumazuba aabaami abo” naa kuti eelyo mfwulumende zimbi nozyiciliko. Icabili, citwaambila kuti Bwami oobo bunooliko kukabe kutamani. Kunyina nobuyoozundwa akunjililwa mubusena amfwulumende iimbi. Icatatu, twazyiba kuti kuyooba nkondo akati ka Bwami bwa Leza amami aamunyika eeyi. Ibwami bwa Leza buyoozunda cakumaninina. Mukuya kwaciindi, bunooli nemfwulumende ilikke iinooyendelezya bantu. Aboobo bantu ciindi eeco banooli mubweendelezi bwiinda boonse mbobazyi ikubota.

18. Ndizina nzi lipedwe nkondo yamamanino iinooli akati ka Bwami bwa Leza amfwulumende zyanyika eeyi?

¹⁸ Nzinji nzyolyaamba Bbaibbele kujatikizya nkondo eeyo yamamanino akati ka Bwami bwa Leza amfwulumende zyanyika eeyi. Mucikozyanyo, liyiisya kuti mamanino mbwaayaabuswena, imyuuya mibi iyoomwaya makani aakubeja kutegwa yeene “bami boonse banyika.” Kaijisi makanze nzi? “Kuti ibabungike [ibami] kunkondo yabuzuba bupati bwa-Leza Singuzuzyoonse.” Ibami bamunyika bayoobunganisyigwa antoomwe “mubusena butegwa muci-Hebrayo Harmagedoni.” (Ciyubunuzyo 16:14, 16) Akaambo kaceeco caambwa mutupango ootu tobile, imazwanga aamamanino aanooli  akati kamfwulumende zyabantunsi a Bwami bwa Leza ayitwa kuti ninkondo ya Harmagedoni.

19, 20. Ino ncinzi cipa kuti luyando lwa Leza kalutacitwi lino anyika?

¹⁹ Ino Bwami bwa Leza buyoozuzikizya nzi kwiinda munkondo ya Harmagedoni? Alimwi amuyeeye luyando ndwajisi Leza kujatikizya nyika. Jehova Leza wakakanza kuti inyika kiizwide bantu baluleme alimwi ibalondokede ibamubelekela mu Paradaiso. Ino ncinzi cipa kuti lino kacitacitiki eeco? Cakusaanguna, nkaambo tobantu tuli babi alimwi tulaciswa akufwa. Pele mu Cibalo 5 twakaiya kuti Jesu wakatufwida ikutegwa tucikonzye kupona kukabe kutamani. Cakutadooneka mucaayeeyede majwi aalembedwe mu Makani Mabotu ngaakalemba Johane aakuti: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—Johane 3:16.

²⁰ Ipenzi limbi ndyakuti ibantu banji bacita zintu zibyaabi. Balabeja, baleena alimwi tabalilemeki munzila ziindene-indene. Tabayandi kucita nzyayanda Leza. Ibantu bacita zintu zibyaabi bayoonyonyoonwa lyankondo ya Leza ya Harmagedoni. (Amubale Intembauzyo 37:10) Ikaambo kambi ncolutacitwi luyando lwa Leza anyika nkakuti imfwulumende tazibakulwaizyi bantu kulucita. Imfwulumende zinji tazikulwaizyi, nzyalunya alimwi zizwide bumpelenge. Cakutainda mumbali, Ibbaibbele lyaamba kuti: ‘Muntu weendelezya muntunyina kukumubisizya.’—Mukambausi 8:9.

21. Mbuti Bwami mbobuyoopa kuti luyando lwa Leza lucitwe anyika?

²¹ Yaakwiinda Harmagedoni, bantu banooyendelezyegwa buyo amfwulumende yomwe, Ibwami bwa Leza. Ibwami oobo buyoocita luyando lwa Leza akuleta zilongezyo. Mucikozyanyo, buyoogusya Saatani amadaimona aakwe. (Ciyubunuzyo 20:1-3) Inguzu zyacituuzyo ca Jesu ziyoobelesyegwa ikutegwa bantu basyomeka kabataciciswi akufwa. Muciindi caboobo, mubweendelezi bwa Bwami bayookonzya kupona kukabe kutamani. (Amubale Ciyubunuzyo 22:1-3) Inyika iyoosandulwa  kuba paradaiso. Aboobo Bwami buyoocita kuti luyando lwa Leza lucitwe anyika, alimwi buyoolisalazya zina lya Leza. Ino eeci caamba nzi? Caamba kuti mukuya kwaciindi mubweendelezi bwa Bwami bwa Leza, boonse ibanoopona bayoolilemeka izina lyakuti Jehova.

22. Nkaambo nzi ncotuzyi kuti Bwami bwa Leza tiibwakaboola Jesu naakali anyika naa mbwaakabusyilwa buyo?

²² Cakalisalede kuti Bwami tiibwakaningasika ciindi eeco Jesu naakaambila basikumutobela kupaila kuti: “Abuze Bwami bwako.” Sena bwakaboola Jesu naakapilukila kujulu? Peepe, akaambo kakuti Petro alimwi a Paulo bakaamba kuti naakabusyigwa Jesu, ibusinsimi buli kubbuku lya Intembauzyo 110:1 bwakazuzikizyigwa kujatikizya nguwe bwakuti: “Mbuboobu Jehova mbwaambila mwami wangu. Kala kujanza lyangu lyalulyo, [kusikila mane] mbike basinkondonyoko babe citandabalilo camaulu aako.” (Incito 2:32-34; Ba-Hebrayo 10:12, 13) Kwakali kuyooba ciindi cakulindila.

23. (a) Ino ndiilili Bwami bwa Leza nobwakatalika kweendelezya? (b) Ino ncinzi citiibandikwe mucibalo citobela?

²³ Kwaciindi cilamfwu buti? Mumwaanda wamyaka wa 19, basikwiiya Bbaibbele basungu bakajana kuti iciindi eeco cakulindila cakali kuyoogola mu 1914. (Ikujatikizya mwaka ooyu, amubone Makani Aayungizyidwe mucibalo cakuti “1914—Imwaka Uuyandika Kapati Mubusinsimi bwa Bbaibbele.”) Izintu zijatikizya nyika yoonse izyakatalika kucitika mu 1914 zisinizya  kuti ikubala kwabasikwiiya Bbaibbele aaba basungu kwakaliluzi. Ikuzuzikizyigwa kwabusinsimi bwamu Bbaibbele kutondezya kuti mu 1914, Kristo wakaba Mwami alimwi Bwami bwa Leza bwakujulu bwakatalika kweendelezya. Aboobo tupona ‘kuciindi ciniini buyo’ ncacijisi Saatani. (Ciyubunuzyo 12:12; Intembauzyo 110:2) Alimwi tulakonzya kwaamba katusinizyide kuti ino-ino, Ibwami bwa Leza buyoobweza ntaamu yakuti luyando lwa Leza lucitwe anyika. Sena makani aaya alamukkomanisya? Sena mulasyoma kuti ngamasimpe? Icibalo citobela cilamugwasya kuzyiba kuti Bbaibbele lilaziyiisya ncobeni zintu eezyi.