Ibbaibbele Lilakonzya Kubacinca Bantu

Ino ncinzi cakagwasya mwaalumi umwi iwatakali kuyanda kuyanzana abantu alimwi iwakali muzangi kutalika kubayanda bantu akuyanda kubagwasya? Ino ncinzi cakakulwaizya mwaalumi umwi waku Mexico kuleka bukkale bwakwe bwakutalilemeka? Nkaambo nzi umwi wabasikutola lubazu mumizundano yakusiyana amancinga iwakazyibidwe kapati mu Japan ncaakacileka akutalika kubelekela Leza? Amumvwe nzyobakaamba bantu aaba.

“Ndakali muntu uutababikkili maano bamwi, sikulisumpula alimwi mukali.”​—BA DENNIS O’BEIRNE

MWAKA WAKUZYALWA: 1958

CISI NKOBAZWA: ENGLAND

MBOBAKABEDE KAINDI: MUNTU MUZANGI IWATAKALI KUYANDA KUYANZANA ABANTU

MBONDAKABEDE KAINDI: Bataata bakali kuzwa ku Ireland, alimwi ndakakomenena mumukwasyi wacikombelo ca Katolika. Kanji-kanji ndakali kuunka kucikombelo endikke nokuba kuti tiindakali kuyanda kuunka. Pele ndakacili aanzala yazintu zyakumuuya. Lyoonse ndakali kupaila Mupailo wa Mwami, alimwi ndilayeeya cimwi ciindi nondakalede abulo masiku kandiyeeya ncowakali kupandulula. Ndakali kusola kuubikka muzibeela-beela mpoonya akusola kuyeeya cibeela cimwi acimwi ncocakali kupandulula.

Kandili mukubusi, ndakatalika kutola lubazu mutubunga twiindene-indene twabuzangi. Ndakatalika kubelesya misamu iikola, kwaambisya lubanje lwalo ndondakali kufweba abuzuba. Ndakaba amuuya wakuti “Sikwe ndaba,” ndakali kubutila bukoko citaambiki, akucita zintu izyakali kukonzya kubikka buumi bwangu muntenda alimwi tiindakali kubikkila maano muntu uuli woonse. Tiindakali kuyanda kuyanzana abantu, nokuba kubandika amuntu uuli woonse ccita kuti ndabona kuti kuli mubandi uugwasya. Mane buya tiindakali kuyanda akukkopwa zifwoto. Lino ndalanga musyule, ndilabona kuti ndakali muntu iwatakali kubabikkila maano bamwi, uulisumpula alimwi mukali. Balongwe bangu mbambabo buyo mbondakali kufwida luse.

Nondakali aamyaka iili 20, ndakatalika kulikkomanina Bbaibbele. Mweenzuma ngotwakali kubelesya limwi misamu iikola wakatalika kwiiya Bbaibbele ciindi naakali muntolongo, aboobo twakali kuba amibandi anguwe iijatikizya bukombi, cikombelo alimwi alubazu ndwajisi Saatani munyika. Ndakaula Bbaibbele akutalika kuliiya ndelikke. Mebo amweenzuma twakali kubala zibeela zya Bbaibbele kumane twakali kubandika antoomwe kujatikizya nzyotwaiya, atwaambo ntotwazyiba. Twakazumanana kucita boobu kwamyezi iili mbwiibede.

Tootu twaambo tumwi ntotwakazyiba ciindi notwakali kubala: kuti tupona kumazuba aamamanino aayika eeyi; kuti Banakristo beelede kunookambauka makani mabotu aa Bwami bwa Leza; kuti tabeelede kuba banyika eeyi alimwi akutatola lubazu mutwaambo twacisi; akuti Bbaibbele lilapa busolozi bugwasya kujatikizya bantu mbobeelede kulilemeka. Twakabona kuti nzyolyaamba Bbaibbele zyamasimpe alimwi akuti kweelede kuti kuli cikombelo cakasimpe. Pele ino nceecili? Twakayeeya kujatikizya zikombelo ikwakali kuunka bantu banji zyalo izyakayakidwe munzila yaalubazu alimwi azilengwa zyanzizyo, akutola lubazu mutwaambo twacisi nkozyakali kucita. Pele twakabona kuti Jesu walo kunyina naakali kucita zintu zili boobu. Twakazyiba kuti tiizyakali kubelesyegwa aa Leza, aboobo twakasala kuti tusole kulanga-langa zikombelo zimbi izyatakazyibidwe kapati kutegwa tubone nzyobakali kuyiisya balo.

Twakali kuswaangana antoomwe abasizikombelo aaba akubabuzya mibuzyo minji. Pele swebo twakalizyi kale Bbaibbele ncolyakali kwaamba kujatikizya mubuzyo umwi aumwi, aboobo twakali kukonzya kuzyiba naa bwiinguzi bwabo bwakali kweendelana ancolyaamba Jwi lya Leza. Twamana miswaangano eeyi, lyoonse ndakali kupaila kuli Leza akwaamba kuti, ‘Ikuti naa bantu aaba baiminina cikombele cakasimpe, akaka Taata kondikulwaizya kuti ndiyande kuyooswaangana alimwi ambabo.’ Pele nokwakainda myezi iili mbwiibede katuswaangana munzila eeyi, tiindakalinakajana kakamu ikakali kukonzya kwiingula mibuzyo yesu kweelana ancolyaamba Bbaibbele; alimwi tiindakali kuyanda kuti tukaswaangane alimwi.

Kumamanino, mebo amweenzuma twakaswaangana a Bakamboni ba Jehova. Twakababuzya mibuzyo njiyona njotwakali kubuzya basizikombelo zimbi, pele balo bakatwiingula kwiinda mukubelesya Bbaibbele. Nzyobakaamba zyakali kweendelana kabotu-kabotu anzyotwakaiya ciindi notwakali kulibala. Aboobo twakazumanana kubabuzya amibuzyo njotwatakalinajana bwiinguzi bwamu Bbaibbele, mucikozyanyo, twakababuzya kujatikizya Leza mbwakubona kufweba alimwi amisamu iikola. Alimwi bakatwiingula kwiinda mukubelesya Bbaibbele. Aboobo twakazumina kuunka kumuswaangano ku Ŋanda ya Bwami.

Kujanika kumiswaangano tiicakali cuuba-uba kulindime. Kayi ndakali muntu iwatakali kuyanda kuyanzana abantu naaceya cakuti tiindakali kuyanda kubandika abantu aaba nokuba kuti bakali kutondezya bulongwe alimwi bakali kuboneka kabotu. Ndakali kuyeeya kuti bamwi tiibakajisi makanze mabotu aakubandika andime, aboobo tiindakacili kuyanda kuunka alimwi kumiswaangano yabo. Pele mbubwenya mbuli lyoonse, ndakapaila kuli Leza kuti andipe kuyanda kuyooswaangana abantu aaba alimwi ikuti naa bakali kwiiminina cikombelo cakasimpe. Aboobo ndakaba aluyandisisyo kapati lwakuyanda kwiiya Bbaibbele a Bakamboni.

BBAIBBELE MBOLYAKANDICINCA: Ndakazyiba kuti ndakeelede kuleka kubelesya misamu iikola alimwi ndakacikonzya kuleka kakunyina buyumuyumu. Pele nkondo yakali akuleka kufweba. Ndakasola ziindi zili mbozibede kuti ndicileke, pele ndakaalilwa. Ciindi nondakamvwa bamwi ibakacikonzya kuleka kufweba kakunyina akuciinduluka alimwi, ndakapaila kuli Jehova kujatikizya makani aaya. Aboobo, kwiinda mukugwasyigwa a Jehova, andime ndakacikonzya kuleka kufweba. Ndakabona mbociyandika kumwaambila Jehova cakuzwa ansi aamoyo mumupailo.

Kucinca kumbi kupati nkondakacita kwakali kujatikizya makani aansamino alimwi akulibamba. Ciindi cakusaanguna nondakaunka kumiswaangano ku Ŋanda ya Bwami, masusu aangu akalizabalangene kaajisi amibala yiindene-indene. Mpoonya mukuya kwaciindi, ndakaapenta mubala waolenji. Ndakali kusama majini atujansi tulembedwe-lembedwe. Ndakabona kuti tiindakali kuyandika kucinca nokuba kuti Bakamboni bakasola kubandika andime caluzyalo kujatikizya makani aaya. Pele mukuya kwaciindi, ndakayeeya lugwalo lwa 1 Johane 2:15-17 ilwaamba kuti: “Mutayandi nyika noziba zintu zili munyika. Ikuti naa muntu kayanda nyika, nkokuti iluyando lwa Taata taluko pe mulinguwe.” Ndakabona kuti kwiinda munsamino yangu ambondakali kulibonya, ndakali kutondezya kuti ndiyanda nyika eeyi alimwi akuti, kutegwa nditondezye luyando ndondijisi kuli Leza, ndakeelede kucinca. Aboobo ndakacita oobo.

Mukuya kwaciindi, ndakazyiba kuti tabali buyo Bakamboni ibakali kuyanda kuti kandijanika kumiswaangano ya Bunakristo. Lugwalo lwa Bahebrayo 10:24, 25 lwakanditondezya kuti Leza nguwakali kuyanda kuti kandicita oobo. Nondakatalika kuunka kumiswaangano yoonse alimwi akubazyiba kabotu bantu, ndakasala kutondezya kulyaaba kwangu kuli Jehova kwiinda mukubbapatizyigwa.

MBONDAGWASYIGWA: Ndilikkomene kapati kubona Jehova mbwatupa coolwe cakuba acilongwe anguwe. Lubomba ndwajisi alimwi akubikkila maano, zyandikulwaizya kumwiiya alimwi akutobela cikonzyanyo ca Mwanaakwe Jesu Kristo, mubuumi bwangu. (1 Petro 2:21) Ndakaiya kuti ciindi nondisolekesya kuba abube bwa Bunakristo, ndilijisi lwaanguluko lwakucita nzyondiyanda. Ndabeleka canguzu kuba abube bwaluyando alimwi akubikkila maano. Ndilasolekesya kuba abube bwa Kristo ciindi nondeendelezya bakaintu bangu amwanaangu. Alimwi ndilababikkila maano kapati bakwesu abacizyi Banakristo. Kutobela Kristo kwandipa kuba aabulemu, kulimvwa kulemekwa alimwi akucikonzya kutondezya luyando kubantu.

“Bakandeendelezya cabulemu.”​—BA GUADALUPE VILLARREAL

MWAKA WAKUZYALWA: 1964

CISI NKOBAZWA: MEXICO

MBOBAKABEDE KAINDI: BUKKALE BWAKUTALILEMEKA

MBONDAKABEDE KAINDI: Ndakali umwi wabana bali 7 ibakakomenena ku Hermosillo, mu Sonora, ku Mexico, ibusena bantu nkobakali bacete citaambiki. Bataata bakafwa nondakacili muniini, aboobo baama bakeelede kubeleka canguzu kutegwa batujanine ziyandika. Bunji bwaziindi ndakali kweenda bbeya nkaambo tiitwakajisi mali aakuula mabbusu. Aboobo kandicili mwana, ndakatalika kubeleka kutegwa kandigwasyilizya mukwasyi kuula ziyandika. Mbubwenya mbuli mikwasyi minji, twakali kukkala banji aŋanda.

Bunji bwaziindi, baama tiibakali kujanika aŋanda kutegwa kabatukwabilila tobana. Aboobo, nondakali amyaka iili 6, musankwa umwi iwakajisi myaka iili 15 wakatalika kunditundulula mumakani aakoonana. Wakali kucita oobu lyoonse kwaciindi cilamfwu. Eeci cakapa kuti nditalike kukuyandisya koonana. Ndakali kuyeeya kuti cili buyo kabotu kunyomenena basankwa. Ciindi nondakali kulomba lugwasyo kuli bamadokota naa kubasololi bazikombelo, bakali kundaambila kuti ndili buyo kabotu alimwi akuti kunyina cakalubide ambondakali kulimvwa.

Nondakkwanya myaka 14, ndakasala kuti ndilizyibye kubantu kuti ndili sikoonana abasankwama kwiinda munsamino yangu azintu nzyondakali kucita. Ndakazumanana kucita oobo kwamyaka iili 11, alimwi buya akukkala abasankwa baindene-indene. Mukuya kwaciindi, ndakaiya kubamba bantu masusu mpoonya ndakajula saluuni. Pele, tiindakakkomene pe. Kanji-kanji ndakali kupenga alimwi akulimvwa kulekelezyegwa. Ndakabona kuti ncondakali kucita tiicakaluzi pe. Ndakatalika kulibuzya kuti, ‘Mwati kuli bantu bali boonse ibali kabotu buya?’

Ndakatalika kuyeeya mupati wangu musimbi. Wakali kwiiya Bbaibbele a Bakamboni ba Jehova, kumane mukuya kwaciindi wakabbapatizyigwa. Wakali kundaambila nzyaakali kwiiya, pele tiindakali kubikkila maano. Nokuba boobo, ndakali kubunyomenena buumi mbwaakali kupona alimwi acikwati cakwe. Ndakali kubona kuti bakali kuyandana abalumi bakwe alimwi akulemekana. Alimwi bakali kweendelezyanya caluzyalo. Mukuya kwaciindi, andime ndakatalika kwiiya Bbaibbele aumwi wa Bakamboni ba Jehova. Kumatalikilo, ndakali kwiile kwiinzya buyo mulawo, kakunyina akupya moyo. Pele mukuya kwaciindi, zintu nzyakacinca.

BBAIBBELE MBOLYAKANDICINCA: Bakamboni bakanditamba kumuswaangano wabo umwi, mpoonya ndakaunka. Nzyondakabona, zyakali zipya kulindime. Bunji bwabantu bakali kundifwubaazya pele ikutali Bakamboni. Balo bakali kundaanzya calubomba alimwi akundeendelezya cabulemu. Ndakakkomana kapati.

Ndakaindila kubakkomanina Bakamboni ciindi nondakajanika kumuswaangano wabo wabbazu. Ndakabona kuti noliba leelyo nobali nkamu, bantu aaba bakali mbuli mupati wangu musimbi, ikuba aluyando lwini-lwini alimwi akusyomeka. Ndakatalika kulibuzya kuti naa aaka nkekakamu kabantu bali kabotu mbondakali kuyandaula kwaciindi cilamfwu. Luyando ndobakajisi alimwi alukamantano zyakandigambya kapati, kubikkilizya ambobakali kubelesya Bbaibbele kwiingula mibuzyo yoonse. Ndakabona kuti Bbaibbele ndelyakali kubagwasya kuba abuumi buli kabotu. Alimwi ndakabona kuti ndakeelede kucinca mumbazu zinji kutegwa ndibe umwi wabo.

Mubufwaafwi, ndakeelede kucinca cakumaninina, nkaambo ndakali kucita zintu mbuli musimbi. Ŋambawido yangu, mbondakali kucita zintu, nsamino, mbondakali kubamba masusu alimwi abalongwe zyoonse ndakeelede kucinca. Beenzuma mbotwakali kumvwana limwi kaindi bakatalika kundifwubaazya akwaamba kuti: “Nkaambo nzi ncocita boobu? Wakali buyo kabotu obuya mbookabede. Ucileke kwiiya Bbaibbele. Kunyina ncopengede pe.” Pele icintu cakandikazya kapati kuleka, mbukkale bwakutalilemeka.

Nokuba boobo, ndakalizyi kuti ndakali kukonzya kucinca nkaambo majwi aamu Bbaibbele aali kulugwalo lwa 1 Bakorinto 6:9-11 akandisika amoyo. Aamba kuti: “Sena tamuzyi kuti bantu bataluleme tabakanjili mu Bwami bwa Leza? Mutalyeeni pe. Basibwaamu, basikukomba mituni, basimamambe, baalumi boonwa abaaluminyina, baalumi boona baaluminyina . . . tabakanjili mu Bwami bwa Leza. Lino oobo mbobakabede bamwi akati kanu. Pele nywebo mwakasanzyigwa; mwakasalazyigwa.” Jehova wakabagwasya bantu kaindi kutegwa bacikonzye kucinca, aboobo andime wakandigwasya. Nokuba kuti cakatola myaka iili mbwiibede alimwi akubeleka canguzu, pele busolozi bwa Bakamboni alimwi aluyando ndobakanditondezya nzyakandigwasya kapati.

MBONDAGWASYIGWA: Mazuba aano, ndipona buumi buli kabotu. Ndilikwete, alimwi mebo abakaintu bangu tulamuyiisya mwaneesu musankwa kupona kweelana anjiisyo zyamu Bbaibbele. Bukkale bwangu bwakaindi ndakabulekela limwi lino, aboobo ndagwasyigwa kapati kumuuya alimwi ndijisi mikuli minji yakumuuya. Ndili mwaalu mumbungano, alimwi ndacikonzya kugwasya bamwi kwiiya kasimpe kamu Jwi lya Leza. Kucinca nkondakacita mubuumi bwangu kwakabakkomanisya kapati baama, cakuti bakazumina kutalika kwiiya Bbaibbele alimwi lino Mbanakristo babbapatizyidwe. Musyoonto wangu musimbi iwakali kupona buumi bwakutalilemeka awalo wakaba umwi wa Bakamboni ba Jehova.

Nobaba bantu bamwi ibakali kundikulwaizya kuti ndizumanane abuumi bwangu bwakaindi, balabona kuti ndacinca akuba muntu uuli kabotu. Alimwi ndilizyi icakapa kuti ndicikonzye kucinca. Kaindi ndakasola kulomba lugwasyo kuli basyaazibwene, balo ibakandipa buyo lulayo lutali kabotu. Pele Jehova wandigwasya kapati. Nokuba kuti ndakali kulimvwa kubula mpindu, wakandibona akundeendelezya caluyando alimwi akundikkazikila moyo. Ikuzyiba buyo kuti Leza uulibedelede, musongo alimwi siluyando wakakonzya kundibona akuyanda kuti ndibe mulongwe wakwe, cakandikulwaizya kapati.

“Ndakali kulimvwa kutakkutila, kulendelelwa alimwi akubula mpindu.”​—BA KAZUHIRO KUNIMOCHI

MWAKA WAKUZYALWA: 1951

CISI NKOBAZWA: JAPAN

MBOBAKABEDE KAINDI: SIKUTOLA LUBAZU MUMUZUNDANO WAKUSIYANA AMANCINGA

MBONDAKABEDE KAINDI: Ndakakomenena mudolopo ilyakali acito mu Shizuoka Prefecture, ku Japan, kwalo nkotwakali kukkala antoomwe toonse 8 mukaanda kasyoonto. Bataata bakajisi cintoolo camancinga. Aboobo kuzwa ciindi nondakacili muniini, bakali kunditolelezya kuzisobano zyakusiyana amancinga calo icakapa kuti nditalike kuzikkomanina. Kumane bataata bakatalika kundigwasya kutegwa ndikabe syaazibwene mucisobano eeci. Kandicili kupulaimali, bakatalika kundiyiisya mbondikonzya kuwina. Nondakaunka kusekondali, ndakawina mumuzundano wakusiyana amancinga wacisi coonse myaka yotatwe iiccililene. Mpoonya ndakapegwa coolwe cakuunka kuyunivesiti, pele ndakasala kuunka kucikolo cakwiiya kusiyana. Nondakali amyaka iili 19, ndakali sikuccovwa ncinga uucibwene.

Aciindi eeco, ndakajisi mbaakani yakuti ndibe wiinda kuccovwa ncinga mumizundano mucisi ca Japan coonse. Ndakali kuyanda kupanga mali manji kutegwa mukwasyi wangu ukapone buumi buli kabotu kumbele. Aboobo ndakali kubeleka canguzu. Kufwumbwa ciindi nondakali kulimvwa kutyompwa naa kuyoowa akaambo kakukatazya kwalwiiyo, ndakali kulyaambauzya cakwiinduluka-induluka kuti ndakazyalilwa kuba sikutola lubazu mumizundano yamancinga alimwi akuti ndakeelede kuzumanana. Aboobo ndakazumanana. Mukuya kwaciindi, ndakatalika kujana bulumbu akaambo kakubeleka canguzu. Mumwaka wakusaanguna, ndime ndakawina akati kabasikuzundana bapya. Mumwaka wabili, ndakeelela kunjila mumuzundano wakusala wiinda kuccovwa ncinga mucisi ca Japan coonse. Mumuzundano ooyu, ndakali kuzwa namba 2 kwaziindi zili 6.

Akaambo kakuti lyoonse ndime ndakali kuwina mumuzundano, bantu bakatalika kundiita kuti simaulu mayumu waku Tokai, ibusena bumwi bwamu Japan. Ndakajisi muuya wakuzundana kapati. Mukuya kwaciindi, bantu bakatalika kundiyoowa nkaambo ndakanyina luse mumuzundano. Ndakaba amali manji cakuti ndakali kukonzya kuula kufwumbwa ncondakali kuyanda. Ndakaula ŋanda yakajisi aluumu mwakunyanyaasyila mubili imwakali mincini mibotu kapati. Kumane ndakaula moota iyakali kuulwa mweelwe wamali wakali kutandila amali aawulwa ŋanda. Akaambo kakuyoowa kuti ambweni mali inga anyongana, ndakatalika kucita makwebo aakuula nyika amayake alimwi akuula masyeyaazi mumakkampani.

Nokuba boobo, ndakali kulimvwa kutakkutila, kulendelelwa alimwi akubula mpindu. Aciindi eeco, ndakalikwete alimwi ndakalijisi abana, pele kanji-kanji tiindakali kubakkazikila moyo bamukwasyi wangu. Ndakali kubakalalila bakaintu bangu abana bangu atwaambo tutayi akoomoonga. Mane bakatalika kundilanga ameso kutegwa babone naa cilibukide.

Pele mukuya kwaciindi, bakaintu bangu bakatalika kwiiya Bbaibbele a Bakamboni ba Jehova. Eeci cakasololela kukucinca kunji. Bakandaambila kuti bakali kuyanda kuunka kumisawaangano ya Bakamboni, aboobo ndakasala kuti tuunke mbuli mukwasyi. Ndicibuyeeya busiku mwaalu umwi naakasika aŋanda yangu akutalika kwiiya Bbaibbele andime. Nzyondakaiya nzyakandikkomanisya kapati.

BBAIBBELE MBOLYAKANDICINCA: Tandikalubi mbolwakandijatikizya kapati lugwalo lwa Baefeso 5:5. Lwaamba kuti: “Kunyina sibwaamu naa muntu uusofweede naa syaacivwulemwangu, icaamba kuba sikukomba mituni, uujisi lukono luli loonse mu Bwami bwa Kristo abwa Leza.” Ndakabona kuti muzundano ooyu iwakusiyana amancinga wakaliswaangene akubbeja alimwi wakali kukulwaizya muuya wabusyaacivwulemwangu. Aboobo manjezyeezya akatalika kundikatazya. Ndakalimvwa kuti, ikuti kandiyanda kukkomanisya Jehova Leza, ndakeelede kuleka kutola lubazu mumuzundano ooyu. Pele tiicakali cuuba-uba kucita boobo.

Ndakazwide akumanizya mwaka wamizundano iikkomanisya kapati, alimwi ndakacili kuyanda kutola lubazu mumizundano iimbi. Pele ndakabona kuti kwiiya Bbaibbele kwakandigwasya kuliiba alimwi kuba aluumuno lwamumizeezo, icintu ciindene kapati amuuya ngondakali kuyandika kutegwa ndiwine mumuzundano. Ndakatola buyo lubazu ziindi zyotatwe mumuzundano wamancinga kuzwa ciindi nondakatalika kwiiya, pele mumoyo ndakacili kuyanda kutola lubazu. Alimwi tiindakazyi mbondakali kunoowujanina ziyandika mukwasyi wangu. Tiindakazyi cakucita, ikuzumanana kutola lubazu mumizundano naa kucileka, alimwi babbululu bangu bakatalika kundikatazya akaambo kanjiisyo zipya nzyondakatalika kwiiya. Bataata bakanyema alimwi akutyompwa kapati. Akaambo kakukopana mumizeezo, lyoonse ndakali kulimvwa kutyompwa kapati calo icakapa kuti nditalike kuciswa mawusazi.

Pele icakandigwasya kuliyumya mubukkale oobu bukatazya, nkuzumanana kwiiya Bbaibbele alimwi akuunka kumiswaangano ya Bakamboni ba Jehova. Mukuya kwaciindi, lusyomo lwangu lwakayuma kapati. Ndakamulomba Jehova kuti ayiswiilile mipailo yangu alimwi akundigwasya kubona kuti ulaiswiilila. Kutyompwa kwangu kwakaceya-ceya ciindi bakaintu bangu nobakandisyomezya kuti tiibakali kuyandika kukkala muŋanda mpati kutegwa bazumanane kukkomana. Asyoonto-syoonto, ndakatalika kuyaambele.

MBONDAGWASYIGWA: Ndakazyiba kuti majwi aa Jesu aali kulugwalo lwa Matayo 6:33 ngamasimpe ncobeni. Wakaamba kuti: “Aboobo, amuzumanane kusaanguna kuyandaula Bwami abululami bwakwe, eelyo zintu zimbi zyoonse eezyi ziyooyungizyigwa kulindinywe.” Kunyina buzuba notwakabulide “zintu zimbi” nzyaakaamba Jesu, nkokuti zintu ziyandika mubuumi. Nokuba kuti mazuba aano ndipanga mali masyoonto kapati tweezyanisya ayaayo ngondakali kupanga mumizundano, kunyina cintu ncondakabulide mebo amukwasyi wangu kwamyaka eeyi iili 20 yainda.

Cikkomanisya kapati ncakuti, ciindi nonditola lubazu muzintu zyabukombi antoomwe abasyomima, ndilimvwa kukkomana kapati alimwi akukkutila nkondatakali kumvwa kaindi. Alimwi eeci candipa kutaabona ambwayenda mazuba. Abwalo buumi bwamumukwasyi wangu bwabota kapati. Bana bangu basankwa botatwe antoomwe abamakaintu babo, boonse mbabelesi ba Jehova basyomeka.