• MWAKA WAKUZYALWA: 1941

• CISI NKOBAZWA: BENIN

• MBOBAKABEDE KAINDI: SIMAALI, SIKUKAZYA BAKAMBONI BA JEHOVA

MBONDAKABEDE KAINDI:

Ndizwa ku Cotonou, dolopo lipati mu Benin. Ndakakomezyegwa mucikombelo ca Katolika, pele tiindakali kuunka lyoonse. Bunji bwaba Katolika kubusena nkondakali kukkala bakakwete bamakaintu banji, nkaambo maali akali kuzumizyigwa kaindi. Mukuya kwaciindi andime ndakakwata bamakaintu bone.

Ciindi manyongwe naakatalika kuma 1970, ndakali kuyeeya kuti eeci cilagwasya cisi cesu. Ndakatola lubazu mumanyongwe aaya alimwi ndakatalika kujatikizyigwa mumapolitikisi. Basimanyongwe tiibakali kubayanda Bakamboni ba Jehova nkaambo tiibakali kutola lubazu mutwaambo twamapolitikisi. Ndakali akati kabaabo bakali kupenzya Bakamboni ba Jehova. Ciindi bamisyinali Bakamboni nobakatandwa mucisi mu 1976, ndakalisinizyide kuti kunyina nobakali kuyoopiluka alimwi.

BBAIBBELE MBOLYAKANDICINCA:

Manyongwe akamana mu 1990. Cakandigambya kapati ncakuti, tiilyakalampa Bakamboni bamisyinali bakapiluka alimwi. Ndakatalika kuyeeya kuti ambweni Leza wakali abantu aaba. Aciindi eeci, ndakacinca nkondakali kubelekela. Mubelesima umwi wakali Kamboni, alimwi kakutanainda ciindi wakatalika kundikambaukila. Wakanditondezya magwalo aamu Bbaibbele aamba Jehova kuti ngu Leza siluyando alimwi uuyandisya bululami. (Deuteronomo 32:4; 1 Johane 4:8) Ndakabukkomanina kapati bube oobu. Ndakali kuyanda kwiiya zinji kujatikizya Jehova, aboobo ndakazumina kwiiya Bbaibbele.

Kalitanalampa ndakatalika kujanika kumiswaangano ya Bakamboni ba Jehova. Ndakakkomana kapati kubona luyando lwini-lwini lwakali akati kabo, kunyina wakali kubona musyobo uumwi kuti ulayandika kapati kwiinda uumbi naa kubona bantu bambi kuti balayandika kapati kwiinda bamwi. Mbondakali kuyaabuzumanana kuyanzana a Bakamboni, ndakabona kuti masimpe bantu aaba bakali basikutobela Jesu beni-beni.​—Johane 13:35.

Ndakabona kuti kutegwa ndibelekele Jehova, ndakeelede kuleka kuunka ku Cikombelo ca Katolika. Tiicakali cuuba-uba pe kucita boobo nkaambo ndakali kuyoowa bantu kuti ino balandibona buti. Nokwakainda ciindi alimwi kwiinda mukugwasyigwa a Jehova, ndakaba sicamba aboobo ndakaleka kuzulilwa kucikombelo eeci.

Kwakali kucinca akumbi kupati nkondakeelede kucita. Nondakali kwiiya Bbaibbele ndakazyiba kuti Leza takukkomanini kukwata maali. (Matalikilo 2:​18-​24; Matayo 19:​4-6) Mumeso aakwe, cikwati cakusaanguna ncecakali kusalala. Aboobo ndakacilembya kumulawo cikwati eeci akubaleka bamakaintu bangu bambi mpoonya akubamba bubambe bwakuti kabajana zintu nzyobayandika zyakumubili. Mukuya kwaciindi, ibakali bamakaintu bangu bobilo abalo bakaba Bakamboni ba Jehova.

MBONDAGWASYIGWA:

Nokuba kuti bakaintu bangu bakazumanana kuzulilwa ku Katolika, balakulemeka kusala kwangu kwakubelekela Jehova. Toonse twabona kuti ndaba mulumi uuli kabotu.

Ndakali kuyeeya kuti ndakali kukonzya kucinca bukkale bwamucilawo mondakali kukkala kwiinda mukutola lubazu mumapolitikisi, pele tiicakakonzyeka pe. Lino ndalibonena kuti Bwami bwa Leza bolikke mbobukonzya kumana mapenzi ngobajisi bantu. (Matayo 6:⁠9, 10) Ndilamulumba kapati Jehova akaambo kakunditondezya mbondikonzya kupona buumi bukkomanisya.

• MWAKA WAKUZYALWA: 1977

• CISI NKOBAZWA: BRAZIL

• MBOBAKABEDE KAINDI: PASITA WACIKOMBELO CA PENTECOSTAL

MBONDAKABEDE KAINDI:

Ndakakomenena mudolopo lya Itu, mu São Paulo State. Dolopo eeli lyakalizyibidwe kapati akaambo kakuvwula kwabugwebenga.

Ndakali sinkondo kapati alimwi tiindakali kulilemeka. Kuyungizya waawo, ndakali kutola lubazu mukusambala misamu iikola. Mukuya kwaciindi, ndakabona kuti ibukkale buli boobu bwakali kuyoopa kuti ndaangwe naa kufwa buya, aboobo ndakacileka. Mpoonya ndakasangana Cikombelo ca Pentecostal, alimwi mukuya kwaciindi ndakaba pasita.

Ndakali kuyeeya kuti ndakali kukonzya kubagwasya bantu kwiinda mumilimo yangu mucikombelo. Alimwi buya ndakali kukambauka awailesi kubelesya ŋanda yasikapepele iyakali mucilawo, aboobo ndakazyibwa kapati mubusena oobu. Nokuba boobo, ndakatalika kubona kuti cikombelo coonse tiicakali kububikkila maano bukkale bwabantu bamucikombelo, alimwi buya tiicakali kubikkila maano kujatikizya kulemeka Leza. Ndakalimvwa kuti makanze eeni aacikombelo eeci akali buyo aakujana mali. Aboobo ndakasala kucileka kuzulilwa kucikombelo eeci.

BBAIBBELE MBOLYAKANDICINCA:

Nondakatalika kwiiya Bbaibbele a Bakamboni ba Jehova, ndakabona mpoonya-mpoonya kuti bakaliindene azikombelo zimbi. Kuli zintu zyobilo zyakandikkomanisya kapati. Cakusaanguna, Bakamboni ba Jehova tabaambi buyo kumulomo kujatikizya kuyanda Leza alimwi abasimukobonyina; balalutondezya luyando oolo. Cabili, tabatoli lubazu mumapolitikisi naa munkondo. (Isaya 2:4) Zintu zyobilo eezyi zyakandipa kusyoma kuti ndacijana cikombelo cakasimpe, nkokuti nzila iisyanikide iitola kubuumi butamani.​—Matayo 7:​13, 14.

Ndakabona kuti kutegwa ndimukkomanisye Leza, kuli kucinca kumwi kupati nkondakeelede kucita. Ndakeelede kutalika kuubikkila maano kapati mukwasyi wangu. Alimwi ndakeelede kuba muntu uulicesya kapati. Tiicakali cuuba-uba kucinca munzila eeyi, pele kwiinda mukugwasyigwa a Jehova, ndakacikonzya. Bakaintu bangu bakakkomana kapati akaambo kakucinca nkondakacita. Mbobakasaanguna kutalika kwiiya Bbaibbele, pele aciindi aawa bakayaambele kapati. Kalitanalampa toonse tobilo twakazyiba kuti twakali kuyanda kuba Bakamboni ba Jehova. Twakabbapatizyigwa buzuba bomwe.

MBONDAGWASYIGWA:

Mebo abakaintu bangu tulikkomene akaambo kakubagwasya bana besu botatwe kuba acilongwe ciyumu a Jehova. Tuli mukwasyi uukkomene. Ndilamulumba Jehova akaambo kakundikwelela kukasimpe kajanika mu Jwi lyakwe, Bbaibbele. Masimpe lilabucinca buumi bwabantu! Ndili bumboni bulibonya.

• MWAKA WAKUZYALWA: 1957

• CISI NKOBAZWA: AUSTRALIA

• MBOBAKABEDE KAINDI: NDAKAKOMEZYEGWA MUNZILA YALUNYA

MBONDAKABEDE KAINDI:

Ndakakomenena mu Newcastle, ku New South Wales. Ndendime mupati akati kabana bali 7. Bataata bakali basinkondo alimwi bacakolwa mpoonya abalo baama bakali basinkondo. Baama bakali kunditundulula kumubili alimwi amukwaambaula. Cakwiinduluka-induluka bakali kundaambila kuti ndakali mubi alimwi akuti ndiyoopenzyegwa mumulilo wahelo. Ŋambawido iili boobu yakali kundipa kuyoowa kapati.

Zilonda nzyobakali kundicisa baama kanji-kanji nzyakali kupa kuti kandilovwa kucikolo. Nondakajisi myaka iili 11, ndakagusyigwa kubazyali bangu akutalika kulanganizigwa amfwulumende mpoonya nokwakainda ciindi ndakatolwa kuŋanda yabamasiite. Nondakakkwanya myaka iili 14, ndakatija kuŋanda yabamasiite. Tiindakali kuyanda kujokela kuŋanda aboobo ndakatalika kukkala mumigwagwa yamu Kings Cross, mucooko ca Sydney.

Nondakali kukkala mumigwagwa, ndakatalika kubelesya misamu iikola, makoko, kweebelela zintu ziletela muzeezo wakoonana, alimwi akuvwuula. Kuli cintu cimwi cakacitika icakandiyoosya kapati. Ndakali kukkala aŋanda yamuntu iwakajisi nightclub. Buzuba bumwi kumangolezya, baalumi bobilo bakaboola kumubona. Wakandaambila kuti nduunke kubbedilumu, pele ndakali kukonzya kumvwa nzyobakali kwaamba. Mukamwini nightclub wakali kuyanda kuti andisambale kubaalumi aaba. Bakapangana kuti bandisise mubwato bunyamuna zintu mpoonya akunditola ku Japan kutegwa kandibeleka mubbiyaholo. Ndakalibilika kapati, mpoonya ndakasotoka kuzwa mujulu akubalika kutegwa ndilombe lugwasyo.

Ndakajana mwaalumi umwi iwakali kuswaya mu Sydney, ndakamwaambila bukkale bwangu kandiyeeya kuti ulandipa mali. Muciindi caboobo, wakandaambila kuti nduunke anguwe kubusena nkwaakali kukkala kutegwa ndikasambe alimwi akulya. Cakacitika ncakuti, ndakazumanana kukkala muŋanda yamwaalumi ooyu. Nokwakainda mwaka omwe twakakwatana.

BBAIBBELE MBOLYAKANDICINCA:

Nondakatalika kwiiya Bbaibbele a Bakamboni ba Jehova, nzyondakaiya nzyakandipa kulimvwa munzila ziindene-indene. Ndakanyema nondakazyiba kuti Saatani nguupa kuti kakuli bubi; lyoonse ndakali kuyiisyigwa kuti Leza nguupa kuti katupenga. Ndakakatalukwa kapati ciindi nondakaiya kuti Leza tapenzyi bantu mumulilo wahelo, injiisyo iyakali kundipa kuyoowa kapati kufwumbwa buyo kuti ndaiyeeya.

Cakandikkomanisya kapati kubona Bakamboni mbobakali kubelesya njiisyo zyamu Bbaibbele muzintu nzyobasala. Bakali kupona kweelana alusyomo lwabo. Ndakali muntu uukatazya, pele tacikwe makani ancondakali kwaamba naa kucita, Bakamboni bakali kundeendelezya caluyando alimwi acabulemu.

Cintu cakali kundikatazya kapati nkulimvwa kubula mpindu. Ndakali kulisulaika, kulimvwa boobu kwakazumanana noliba leelyo nondakamana kubbapatizyigwa akuba umwi wa Bakamboni ba Jehova. Ndakalizyi kuti ndakali kumuyanda Jehova, pele ndakalisinizyide kuti takonzyi kuyanda muntu uuli mbuli ndime.

Kucinca kupati kwakacitika ciindi nokwakainda myaka iili 15 kuzwa nondakabbapatizyigwa. Ciindi mwaambi naakali kupa makani ku Ŋanda ya Bwami ya Bakamboni ba Jehova, wakabala lugwalo lwa Jakobo 1:​23, 24. Tupango ootu tukozyanisya Jwi lya Leza kucimbonimboni calo ncotukonzya kubelesya kulibona munzila mbwatubona Jehova. Ndakatalika kulibuzya kuti naa mbondakali kulibona bwakaliindene ambwaakali kundibona Jehova. Kumatalikilo cakandikatazya kulibona mbuli mbwandibona Jehova. Ndakacili kulimvwa kuti Jehova kunyina nakonzya kundiyanda naaceya.

Nokwakainda mazuba masyoonto, ndakabala lugwalo lwakacinca buumi bwangu. Lwakali lugwalo lwa Isaya 1:​18, mwalo Jehova mwaamba kuti: “Amuboole lino tubambe twaambo akati kesu. . . . Nokuba kuti zibi zyanu zilasalala pyu, zilatubisyigwa buu mbuli caanda.” Ndakalimvwa mbuli kuti Jehova wakali kundaambila kuti: “Akaka Vicky, atubambe twaambo akati kesu. Ndilikuzyi, ndilizizyi zibi zyako, ndiluuzyi moyo wako, alimwi ndilakuyanda.”

Ndakaba acilabila busiku oobo boonse. Ndakacili kudooneka kuti naa Jehova wakali kukonzya kundiyanda, pele ndakatalika kuyeeya kujatikizya cinunuzyo cacipaizyo ca Jesu. Mukulaba kwaliso, ndakabona kuti Jehova wakandikkazikila moyo kwaciindi cilamfwu, ikutondezya kuti wakali kundiyanda munzila zinji kapati. Pele mebo, munzila imwi cakali mbuli kuti ndaamba kuti: “Luyando lwako ndusyoonto kapati kulindime. Cipaizyo ca Mwanaako tacikonzyi kubeleka kulindime.” Cakali mbuli kuti ndakali kukaka cinunuzyo. Pele lino, kwiinda mukuzinzibala kuyeeya kujatikizya cipego cacinunuzyo, ndakatalika kulimvwa kuyandwa a Jehova.

MBONDAGWASYIGWA:

Ndilimvwa kusalala alimwi akupona buumi bukkomanisya kapati. Cikwati cangu lino cili kabotu, alimwi ndilikkomene kuti ndilakonzya kubelesya nzyakandicitikila kugwasya bamwi. Ndilimvwa kuyaabuba afwaafwi kapati a Jehova.

• MWAKA WAKUZYALWA: 1974

• CISI NKOBAZWA: RUSSIA

• MBOBAKABEDE KAINDI: SIKUYANDISYA NYIMBO ZYA HEAVY-METAL

MBONDAKABEDE KAINDI:

Ndakazyalilwa ku Votkinsk, kubusena nkwaakazyalilwa mulembi wanyimbo iwakazyibidwe kapati, Pyotr Ilich Tchaikovsky. Mukwasyi wesu wakali mucete. Bataata bakajisi bube bubotu bunji, pele bakali bacakolwa aboobo kwakali kutakkala kabotu lyoonse aŋanda.

Tiindakali sicikolo uuli kabotu, aboobo mukuya kwamyaka, ndakatalika kulimvwa kuti ndili waansi kapati kwiinda bamwi. Ndakatalika kulizandula akutabasyoma bamwi. Kuunka kucikolo kwakali kundipa kulibilika kapati. Mucikozyanyo, ciindi nondakeelede kupa lipooti, bunji bwaziindi ndakali kwaalilwa nokuba kupandulula zintu zyuuba-uba zyalo nzyondakali kukonzya kupandulula ziindi zimwi. Nondakamanizya giledi 8, mulipooti foomu yangu bakalemba kuti: “Tacizyi kwaambaula kabotu, ulaalilwa kwaamba mbwayeeya.” Majwi aaya akandityompya kapati alimwi akayungizya kundipa kulimvwa kubula mpindu. Ndakatalika kulimvwa kuti taakwe ncondiponena.

Kandicili mukubusi, ndakatalika kunywa bukoko. Kumatalikilo, kunywa kwakali kundipa kulimvwa kabotu. Pele ciindi nondakali kunywa cakwiindilila, manjezeezya aangu akali kundipenzya. Buumi bwangu bwakali kulibonya kubula mpindu. Ndakatalika kulimvwa kutyompwa kapati, zimwi ziindi tiindakali kuzwa aŋanda kwamazuba manji. Ndakatalika kuyeeya kulijaya buyo.

Nondakakkwanya myaka iili 20, ndakajana nzila mpya yakulikatalusya, pele yakaindi kasyoonto buyo. Ndakatalika kuswiilila nyimbo zya heavy-metal. Nyimbo eezyi zyakali kundipa kulimvwa kuba anguzu alimwi ndakabayandaula bantu bambi ibakali kuziswiilila. Ndakaalekela kulampa masusu, ndakadonkola matwi alimwi akutalika kusama mbuli baimbi mbondakali kunyomenena. Asyoonto-syoonto, ndakaleka kulyeendelezya alimwi ndakaba sinkondo, bunji bwaziindi ndakali kuzwangana abanamukwasyi.

Ndakali kuyeeya kuti kuswiilila nyimbo zya heavy-metal kwakali kukonzya kundipa kukkomana, pele cakacitika cakaliimpene. Eelo kaka ndakatalika kucinca! Alimwi ciindi nondakazyiba zintu zibyaabi nzyobakali kucita baimbi mbondakali kukkomanina, ndakalimvwa kulekelezyegwa.

Ndakatalika kulombozya kulijaya alimwi, aciindi eeci ndakalisinizyide. Cintu celikke cakandilesya kuzumanana amuzeezo ooyu nkuyeeya baama mbobakali kukonzya kujatikizyigwa. Bakali kundiyanda kapati alimwi bakandicitila zintu zinji zibotu. Bukkale mondakabede bwakali kuusisya kapati. Tiindakali kuyanda kuzumanana kupona, pele alimwi tiindakali kukonzya kulijaya.

Kutegwa nditanyonganizyigwi, ndakatalika kubala mabbuku atwaano twaku Russia. Kaano kamwi kakali kwaamba zyamuntu umwi iwakali kubeleka mucikombelo. Mpoonya-mpoonya ndakatalika kulombozya kumucitila cintu cimwi Leza alimwi abantu. Ndakapaila kuzwa ansi amoyo kuli Leza, icintu ncondatalinacitide mubuumi bwangu. Ndakalomba Leza kuti anditondezye mbondikonzya kupona buumi bulaampindu. Nondakali kupaila, ndakalimvwa kukatalukwa kapati. Pele, kuli cintu cimwi cikkomanisya kapati cakacitika. Nokwakainda mawoola obilo buyo, Kamboni wa Jehova umwi wakasika aŋanda yangu akundibuzya kuti naa inga ndayanda kwiiya Bbaibbele. Ndakabona kuti oobu bwakali bwiinguzi bwamupailo wangu. Oobu bwakali buzuba bwakusaanguna bwabuumi bwangu bupya alimwi ibukkomanisya.

BBAIBBELE MBOLYAKANDICINCA:

Nokuba kuti cakali ciyumu kapati, ndakazisowa zintu zyangu zyoonse izyakaswaangene anyimbo zya heavy-metal. Nokuba boobo, nyimbo ndakacili kuziyeeya kwaciindi cilamfwu. Kufwumbwa nondakali kwiinda abusena aalila nyimbo eezyi, ndakali kutalika kuyeeya mbondakabede kaindi. Tiindakali kuyanda kutalika kuyeeya bukkale bwangu bubyaabi bwakaindi nkaambo aciindi eeci ndendilyo mizeezo mibotu noyakali kusimpa miyanda mumoyo wangu. Aboobo ndakatalika kwaayeleba masena aali boobu. Alimwi kufwumbwa ciindi nondakali kusunkwa kuyeeya mbondakabede kaindi, ndakali kupaila cabusungu. Kucita boobu kwakandigwasya kuba ‘aluumuno lwa Leza oolo lwiinda mizeezo yoonse.’​—Bafilipi 4:7.

Nondakali kwiiya Bbaibbele, ndakaiya kuti Banakristo beelede kwaambila bamwi nzyobasyoma. (Matayo 28:​19, 20) Ndakali kuyeeya kuti kunyina nondikonzya kucita oobo. Pele aciindi nciconya, zintu zipya nzyondakali kwiiya nzyakandiletela lukkomano kapati alimwi aluumuno lwamumizeezo. Ndakalizyi kuti bamwi bakeelede kwiiya kasimpe aaka abalo. Nokuba kuti ndakali kuyoowa, ndakatalika kwaambila bamwi nzyondakali kwiiya. Icakandigambya kapati ncakuti, kwaambila bamwi kujatikizya Bbaibbele kwakapa kuti nditalike kulibona munzila yeelede. Alimwi kwakayumya lusyomo ndondakajisi munjiisyo eezyi zipya.

MBONDAGWASYIGWA:

Lino ndilikwete alimwi tulikkomene kapati mucikwati cesu. Kuyungizya waawo, ndakakkomana kugwasya bantu ibali mbobabede kwiiya Bbaibbele, kubikkilizya amucizyi wangu alimwi abaama. Kubelekela Leza alimwi akugwasya bamwi kwiiya kujatikizya nguwe kwapa kuti ndibe abuumi bulaampindu.