Bakajana Cintu Ciinda Kubota
MAMILIYONI aa Banakristo basala kutasekelela Kkilisimasi. Ino balimvwa buti kujatikizya kusala kwabo? Sena balimvwa kuti kuli cintu cimwi ncobaindwa? Sena bana babo balimvwa kwiindwa cintu cimwi cibotu? Amubone Bakamboni ba Jehova nyika yoonse ncobaamba kujatikizya makani aaya.
Ba Eve
Kwiibaluka Jesu Kristo: “Kanditanaba umwi wa Bakamboni ba Jehova, tiindakali kuvwula kuunka kucikombelo. Ikuti naa ndaunka, ndakali kuunka buyo buzuba bwa Kkilisimasi naa Isita. Pele nociba ciindi eeco, mubwini kunyina nondakali kuyeeya kujatikizya Jesu Kristo. Mazuba aano, tandicisekeleli Kkilisimasi, pele ndilajanika kumiswaangano ya Bunakristo ziindi zyobilo ansondo alimwi buya akuyiisya bamwi ncoliyiisya Bbaibbele kujatikizya Jesu!”—BA EVE, BAKU AUSTRALIA.
Reuben
Lukkomano luboola akaambo kakupa: “Ndilakkomana kapati ciindi bantu nobandipa cipego ciindi nonditacilangili. Ndilakukkomanina kucitilwa zintu cakutayeeyela! Alimwi ndilakuyanda kupangila bamwi tukkaadi alimwi akupenta zifwanikiso nkaambo cibapa kukkomana alimwi andime cindipa kukkomana.”—REUBEN, WAKU NORTHERN IRELAND.
Ba Emily
Kugwasya bapengede: “Tulacikkomanina kujikila bacisidwe. Mpoonya zimwi ziindi tulabatolela maluba, kkekke naa kapego kasyoonto buyo kutegwa tubaumbulizye. Tulakkomana kapati kucita boobu nkaambo tulakonzya kubaswaya bantu aaba ciindi cili coonse camwaka.”—BA EMILY, BAKU AUSTRALIA.
Ba Wendy
Kuba antoomwe abanamukwasyi: “Ciindi mukwasyi wesu nouba antoomwe, bana besu balabazyiba kabotu bamaacisyanyina, bamaantinyina, bamanyinakulu, bamasyaanyinakulu alimwi abeeninyina cakulikwaya. Aboobo mbokunga tatulindili buyo ziindi zigaminide zyamwaka kutegwa tube antoomwe ambabo, tatulimvwi kufwundilizyigwa, alimwi banamukwasyi balizyi kuti tulakonzya kubaswaya kufwumbwa ciindi nkaambo tulabayanda.”—BA WENDY, BAKU CAYMAN ISLANDS.
Ba Sandra
Luumuno: “Ciindi ca Kkilisimasi, inga kuli zintu zinji zyakucita cakuti inga mbasyoonto buyo bantu ibayeeya kujatikizya luumuno. Ndaiya ncolisyomezya Bbaibbele kujatikizya bantu; ndilimvwa kukatalukwa. Ndilizyi kuti bana bangu bayookkomana abuumi bubotu kumbele.”—BA SANDRA, BAKU SPAIN.