Ibbaibbele Lilakonzya Kubacinca Bantu

Ncinzi cakukulwaizya sikuuma njuka alimwi kabwalala kuleka cilengwa cakwe akuncica mbwaakali kupona? Amubale ncaakaamba.

“Ndakali kwaayandisya kapati mabbiza aakubalisya.”​—BA RICHARD STEWART

MWAKA WAKUZYALWA: 1965

CISI NKOBAZWA: JAMAICA

MBOBAKABEDE KAINDI: KUUMA NJUKA ALIWMI ABUGWEBENGA

MBONDAKABEDE KAINDI: Ndakakomena mubusena muli bucete alimwi mukkala bantu banji kapati ku Kingston, dolopo pati lya Jamaica. Kwakanyina milimo, alimwi milandu yakalivwulide. Tubunga twazigwebenga twakali kupa bantu kukkala cakuyoowa. Kanji-kanji ndakali kumvwa kudubuka kwantolo.

Baama bakali kubeleka canguzu kutupa zyoonse zyotuyandika mebo abasyoonto bangu musankwa amusimbi. Bakaba masimpe kuti twajana lwiiyo lubotu. Tiindakali kuciyanda cikolo, pele ndakali kwaayanda kapati mabbiza aakubalisya. Ndakali kulovwa kucikolo akuunka kumuzundano wakubalisya mabbiza. Alimwi buya andime ndakali kweenzya mabbiza.

Mukuyakwaciindi ndakatalika kuuma njuka nkwaabalikila mabbiza. Ndakali kupona buumi bwakutalilemeka, akucita bwaamu abamakaintu banji kapati. Ndali kufweba lubanje akubba kutegwa kanduula zyondakali kuyanda. Ndalijisi ntobolo zinji, pele ndilalumba kuti kunyina wakafwa moonse mondakali kubba.

Kumamanino, bakapokola bakandijata akunditola kuntolongo yabasimilandu. Nondakaangululwa, ndakazumanana abukkale mbondakali kupona kanditana kwaangwa. Alimwi buya, ndakaindila kwiinda mbondakabede kanditana kwaangwa. Nokuba kuti ndakali kulibonya kubula luzyibo kujatikizya cibi cilicoonse, ndakali muntu uutajolwi, uufwambaana kunyema, alimwi silunya. Tiindakalikwe ndaba amuntu.

BBAIBBELE MBOLYAKANDICINCA: Muciindi eeci cikatazya cabuumi bwangu, baama bakali kwiiya Bbaibbele kumane bakaba umwi Bakamboni ba Jehova. Ndakabona kucinca kubotu kubube bwabo mpoonya ndakayanda kuzyiba zinji. Ndakayanda kuzyiba cakapa kuti baama bacince, aboobo ndakatalika kwiiya Bbaibbele a Bakamboni ba Jehova.

Ndakajana kuti njiisyo zya Bakamboni ba Jehova ziliindene azyazikkombelo zimbi alimwi nzyobayiisya ziyeeme a Bbaibele. Nkokabunga kalikke nkondazyi kakali kukambauka kung’anda ang’nda mbuli mbobakali kucita Banakristo bakusaanguna. (Matayo 28:19; Milimo 20:20) Ndakasinizya kuti ndacijana cikombelo cakasimpe ciindi nondakabona luyando lwini-lwini ndobakali kutondezya kuli umwi amweenzyinyina.​—Johane 13:35.

Nzyondakali kwiiya mu Bbaibbele, zyakandipa kubona kuti ndiyandika kucinca buumi bwangu. Ndakazyiba kuti Jehova Leza tabuyandi bwaamu alimwi kutegwa ndimukkomanisye, ndakeelede kuleka micito iyakali kusofwaazya mubili wangu. (2 Bakorinto 7:1; Bahebrayo 13:4) Ndakajatikizigwa kapati nondakazyiba kuti Jehova kuli mbwalimvwa alimwi akuti micito yangu ilakonzya kumucisa naa kumukkomanisya. (Tusimpi 27:11) Aboobo ndakalikukanzide kucileka kufweba lubanje, kucileka kubelesya ntobolo zyangu, alimwi akusoleka kucinca bube bwangu. Akati kakucinca nkondakapanga, izyakali kukatazya kapati kwakali kuleka buumi bwakutalilemeka alimwi akuuma njuka.

Kumatalikilo, tiindakali kuyanda kuti beenzuma bazyibe kuti ndakali kwiiya Bbaibbele a Bakamboni ba Jehova. Pela zintu zyakacinca ciindi nondakama kubala lugwalo lwa Matayo 10:​33, kwalo nkotubala majwi aa Jesu aaya: “Pele kufwumbwa uundikaka kumbele lyabantu, andime ndiyoomukaka kumbele lya Taata uuli kujulu.” Majwi aaya akndikwaizya kwaambila beenzuma kuti ndakali kwiiya a Bakamboni. Bakagambwa. Tiibakalikusyoma kuti muntu uuli mbuli ndime inga wayanda kuba Munakristo. Pele ndakabaambila kuti tiindakacili kuyanda kupona buumi mbondakajisi kaindi.

MBONDAGWASYIGWA: Baama bakakkomana kapati ciindi nobakabona kuti ndatalika kupona kweelana anjiisyo zyamu Bbaibbele. Lino tabacibiliki kuti ambweni ndicita zintu zibi. Tulabandka kujatikizya cilongwe ncotujisi toonse​—luyando ndotujisi kuli Jehova. Zimwi ziindi nondilanga mbondakabede musyule, ndilagambwa kubona kucinca nkondakapanga kwiinda mulugwasyo lwa Jehova. Tandicinyomeneni buumi mbondakali kupona bwakutalilemeka, alimwi akuyandisya lubono.

Ikuti nondatakautambula mulumbe wamu Bbaibbele, andiza sunu nondalifwide naa nondili muntolongo. Pele lino, ndijisi mukwasyi mubotu aliwmi uukkomene. Cindipa kukkomana kapati kubelekela Jehova Leza antoomwe amukaintu alimwi amwanaangu uulilemeka kabotu. Ndilamulumba kapati Jehova kundizumizya kuba cibeela cabunyina bwa Bunakristo bwaluyando. Alimwi ndilikkomene kuti muntu umwi wakabeleka canguzu kundiyiisya kasimpe kamu Bbaibbele. Alimwi ndicibona kuba cintu ciyandika cipati colwe ncondijisi cakugwasya bambi kwiiya Bbaibbele. Kwaambisya ndilamulumba kapati Jehova akaambo kaluzyalo lwakwe kundikwela kulinguwe.

[Majwi aakwelelezya sikubala]

“Ndakaiya kuti kuli mbwalimvwa alimwi akuti micito yangu ilakonzya kumucisa naa kumukkomanisya”

[Majwi aakwelelezya sikubala]

Kandili amukaintu alimwi amwanaangu

[Majwi aakwelelezya sikubala]

Ndakabona kucinca kubotu kubube bwabaama