Amupone Kukabe Kutamani Anyika Ya-Paradaiso
Cibeela 8
Amupone Kukabe Kutamani Anyika Ya-Paradaiso
1, 2. Ino buumi buyooba buti ansi abulelo Bwabwami bwa-Leza?
1 Ino buumi bunooli buti Leza aakugwisya bubi amapenzi anyika akunjizya nyika yakwe mpya ansi akweendelezegwa kubotu Kwabwami bwakwe bwakujulu? Leza usyomezya ‘kufumbatula janza lyakwe akukutya kusukama kwabaumi boonse.’—Intembauzyo 145:16.
2 Ino nzintunzi ziluleme nzyomulombozya? Sena tazili buumi bukomanisya, mulimo mubotu, kuba azintu zinji, masena mabotu, luumuno akati kabantu boonse, akwaanguluka kuzwa kuzibi, malwazi, kupenga, alufu? Alimwi ino mbuti kutangala azintu zyakumuuya? Zintu zyoonse ezyo ziyakucitwa ansi abulelo Bwabwami bwa-Leza. Amulange ncobwaamba businsimi Bwabbaibbele kujatikizya zilongezyo zibotu ziyooboola munyika eyo mpya.
Bantu Boonse Muluumuno Lwini
3-6. Nkusyomezyanzi nkotujisi kutondezya kuti bantu bayookonzya kuba aluumuno munyika mpya?
3 “[Leza] ulalesya inkondo mane kusikila kumamanino aanyika, uladunsaula mata akutyolaula masumo; ulatenta inkalaki [zyankondo] mumulilo.”—Intembauzyo 46:9.
4 “Bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”—Isaya 2:4.
5 “Babombemyoyo bayoovuba nyika, bayookondwa muluumuno lunji.”—Intembauzyo 37:11.
6 “Nyika yoonse yaumuna, yatontola. Lino boonzomoka kwiimba.”—Isaya 14:7.
Bantu Abanyama Muluumuno
7, 8. Nduumunonzi lunooli akati kabantu abanyama?
7 “Umpe uyookala antoomwe akabelele; siluwe uyoolala antoomwe atupongo; moombe akalavu bayoolya mucilido comwe; boonse bayoolala antoomwe, nkabela mwana muniini uyoobeembela. Impwizi asuntwe bayootangana mulongo; bana babo bayoolala antoomwe. Alakwe mulavu uyoocela bwizu mbubonya mbuli iŋombe. Mwana uucinyonka uyoosobana abulyango bwanzoka, amwana uulesedwe uyoobika ijanza lyakwe abwina bwacipile. Tabakooyooluma nikuba kunyonyoona.”—Isaya 11:6-9.
8 “Mubuzuba obo njoobatangila cizuminano; tuyootangana cizuminano abanyama bamusokwe abayuni bakujulu abauka baansi. . . . Nkabaoneke cakutayoowa.”—Hosea 2:18.
Buzumi Bulondokede, Buumi Butamani
9-14. Amwaambe buzumi mbobuyooba munyika mpya.
9 “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.”—Isaya 35:5, 6.
10 “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.”—Ciyubunuzyo 21:4.
11 “Takukooyooba naba omwe akati kabantu banyika uuamba kuti, Ndaciswa.”—Isaya 33:24.
12 “Inyama yakwe ilaba impya kwiinda yamwana; inguzu zyabulombe bwakwe bulajoka.”—Jobu 33:25.
13 “Caabilo ca-Leza mbuumi butamani bwamuli-Kristo Jesu Mwami wesu.”—Ba-Roma 6:23.
14 “Umwi umwi uumusyoma . . . [uyooba] abuumi ubutamani.”—Johane 3:16.
Bafwide Kuboozegwa Kubuumi
15-17. Mbulangizinzi bujisi baabo bakafwa kale?
15 “Kulaba kubuka kwabafu, akwabaluleme akwabataluleme.”—Incito 24:15.
16 “Ciindi ciyoosika ncobati kamvwe ijwi lyakwe boonse abali muzyuumbwe [mumizeezo ya-Leza] bayoozwa mpoonya.”—Johane 5:28, 29.
17 “Lwizi lwakabweedezya bafu bali mulindulo, alwalo lufu acikalilo cabafu [cuumbwe] zyoonse zyakabweedezya bafu bali mulinzizyo.”—Ciyubunuzyo 20:13.
Nyika, Paradaiso Yazinji
18-22. Ino nyika yoonse iyoosandulwa kubanzi?
18 “Kuyooloka lusunsumina lwacoolwe. Ayalo misamu yamumyuunda iyoozyala micelo yayo, anyika iyookuzya zilyo, aboobo bayookala anyika yabo cakutayoowa.”—Ezekieli 34:26, 27.
19 “Nyika yapa micelo yayo; Leza, Leza wesu, watulongezya.”—Intembauzyo 67:6.
20 “Inkanda amatongo zyoonse ziyoosekelela, alyalo igundu liyookondwa akusyuuka malubaluba aaebeka.”—Isaya 35:1.
21 “Zilundu atulundulundu zyoonse ziyootalika kwiimba kubusyu bwanu, amisamu yoonse yamuzisaka iyookambilila. Mucibaka camamvwa muyoomena musamu wakupresi, amucibaka camutubetube muyoomena muzimbwa.”—Isaya 55:12, 13.
22 “Tunooli ayebo mu-Paradaiso.”—Luka 23:43.
Maanda Mabotu Aboonse
23, 24. Nkusyomezyanzi nkotujisi kutondezya kuti kuyooba maanda abantu boonse?
23 “Bayooyaka maanda akukala mulingao . . . Maanda ngebayaka taakooyookalwa umbi, amicelo njibabyala tiikooyooligwa umbi pe . . . Bantu mbensalide bayoongozya milimo yamaanza aabo. Tabakooyoobeleka cabuyo nikuba kubelekela mapenzi.”—Isaya 65:21-23.
24 “Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.”—Mika 4:4.
Mulakonzya Kupona Kukabe Kutamani mu-Paradaiso
25. Nkulangilanzi nkotujisi kukomanisya kujatikizya zyakumbele?
25 Ma, kwabota kulangila oku nkotujisi kumbele! Wabota mulimo uunga wabelesegwa buumi lino buyaamikwa alusyomo lwini munyika mpya ya-Leza ciindi mapenzi oonse asunu nayoobedalimwi zintu zyakale! “Ezyo zyakusaanguna tazikooyooibalukwa limbi nikuba kuyeeyegwa.” (Isaya 65:17) Alimwi nkutontozya kuli buti kuziba kuti buumi aciindi eco buyooba butamani: “Lufu [Leza] walumenenena mane kukabe kutamani.”—Isaya 25:8.
26. Ncinzi cikonzya kucitwa kuti tupone kukabe kutamani munyika mpya ya-Leza?
26 Sena mulayanda kupona kukabe kutamani munyika eyo mpya ya-Paradaiso ilafwaafwi lino? ‘Ino ncinzi ncenga ndacita kuti ndizumininwe a-Leza kumamanino anyika eyi akutolelela kupona munyika yakwe mpya?’ inga mwabuzya. Mweelede kucita ncaakatondezya Jesu mucikombyo kuli Leza: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”—Johane 17:3.
27. Ncinzi ncomweelede kucita kuti mubweze lubazu mumakanze a-Leza?
27 Aboobo, amujane Bbaibbele, akubona masimpe zyomwabala mukabbuku aka. Amubayandaule abo baiya akuyiisya bwini obu Bwabbaibbele. Amwaanguluke kuzwa kubukombi bwakubeja obo buyiisya akucita zintu zyaandeene Abbaibbele. Amwiye nywebo, antoomwe amamiliyoni abamwi bacita kale luyando lwa-Leza, mbuli mbomunga mwaabana muluyando lwa-Leza kuti bantu balakonzya kupona kukabe kutamani anyika ya-paradaiso. Alimwi acibe mumoyo Ijwi lya-Leza lyoozeledwe ncolyaamba zyakumbele: “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:17.
[Mibuzyo yaciiyo]
[Cifwanikiso icili apeeji 31]
Makanze a-Leza akubweedezya paradaiso anyika alaafwi kuzibwa
