Cibeela 5

Buumi Bujisi Mulimo Mupati

1, 2. Ino inga twaziba buti kuti Leza ulatulanganya, alimwi ino nkokuli nkotunga twalangila kukwiingulwa kwamibuzyo mubuumi?

¹ Inzila nyika alimwi azintu zipona mbuzyaabambwa zitondezya kuti Mulengi wazyo ngu-Leza waluyando uulanganya. Alimwi Ijwi lyakwe, Bbaibbele, litondezya kuti ulalanganya; litupa kwiingula kuzwide kujatikizya mibuzyo yambuli kuti: Nkaambonzi ncotuli wano anyika? alimwi, Nkokuli nkotwiinka?

² Tweelede kulilingula Bbaibbele kumibuzyo eyo. Ijwi lya-Leza lyaamba kuti: “Na mwamuyandaula, ulajanwa kulindinywe, pele na mwamulekelezya, alakwe ulamulekelezya inywe.” (2 Makani 15:2) Aboobo lino, ino kuyandaula Ijwi lya-Leza kuyubununa mulimonzi ujatikizya ndiswe?

Leza Ncaakalengela Bantu

3. Ino Leza wakiilengelanzi nyika?

³ Ibbaibbele litondezya kuti Leza waabamba nyika kapati abantu mumizeezo. Muli Isaya 45:18 ulaamba kujatikizya nyika kuti Leza “teewakailenga kuti ibe yalupilingano pe, [pele] wakaibumba kuti ikalwe bantu.” Alimwi wakabika munyika zyoonse bantu nzyobanga bayanda, kutali buyo kupona, pele kutangala abuumi buzwide.—Matalikilo, caandaano 1 a 2.

4. Ino Leza wakabalengelenzi bantu bakusaanguna?

⁴ Mujwi lyakwe, Leza ulaamba zyakulenga bantu bakusaanguna, Adamu a-Eva, akuyubununa nzyaakajisi mumuzeezo kujatikizya mukwasyi wabantu. Wakati: “Atupange muntu mucinkozya cesu, abe mbubonya mbuli ndiswe, Baendelezye inswi zyamumaanzi, abayuni bakujulu, aŋombe, anyika yoonse, abauka boonse bayavula ansi.” (Matalikilo 1:26) Bantu bakeelede kweendelezya “nyika yoonse” abanyama boonse balengedwe.

5. Ino bantu bakusaanguna bakabikidwe kuli?

⁵ Leza waabamba muunda mupati, uuli mbuli paaki kubusena bwiitwa kuti Edeni, Kujwe Lyaakati. Amane “wakabweza oyo muntu, wamubika mumuunda wa-Edeni kuti aulime akuubamba.” Wakali paradaiso wakajisi zyoonse bantu bakusaanguna nzyobakeelede kuyanda kulya. Alimwi wakalijisi “misamu yoonse iiebeka kumeso amisamu mibotu yakulya,” azisyuuka zimwi alimwi amisyobo minji mibotu yaandeene yabanyama bapona.—Matalikilo 2:7-9, 15.

6. Ino bantu bakalengwa amizeezo amicito iili buti?

⁶ Mibili yabantu bakusaanguna yakalilondokede akulengwa, aboobo tebakali kukonzya kuciswa, kucembaala, nokuba kufwa. Alimwi bakalipedwe aziimo zimwi, zili mbuli kulisalila. Nzila mbubakapangidwe ilapandululwa a Matalikilo 1:27: “Leza wakalenga muntu mucinkozya cakwe. Wakamulenga mucinkozya ca-Leza. Wakabalenga baalumi abanakazi.” Mbokunga twakalengwa mucinkozya ca-Leza, titwaapegwa buyo ciimo cakumubili amaanu pele alimwi aciwa cakulilemenezya kumubili alimwi akumuuya, nkabela ezi zyeelede kuzuzikizigwa ikuti tukomane kabotu. Leza inga watupa nzila zyakuzuzikizya ziyandika ezyo mbubona mbwacilila luyando lwakulya, maanzi, amuuya. Mbubonya mbuli mbwakaamba Jesu Kristo kuti, “teensi insima [“cinkwa,” NW] ilike njaaponena muntu, ulaponena amajwi oonse aazwa kumulomo wa-Leza.”—Matayo 4:4.

7. Ninguzunzi bantu bobile bakusaanguna nzyobaapegwa?

⁷ Alimwi, Leza wakapa nguzu kubantu bobile bakusaanguna ciindi nibakali mu-Edeni kuti: “Amuzyalisye, muvule, muzuzye nyika.” (Matalikilo 1:28) Elyo bakali kunookonzya kuzyala akuba abana balondokede. Alimwi mukwasyi  wabuntu mbuwakali kuyaabukomena, bakeelede kuba amulimo mubotu wakutantamuna minyinza mitaanzi ya-paradaiso ya-Edeni, busena bwakali mbuli paaki. Muciindi, nyika yoonse yakeelede kusumpulwa kuba paradaiso, iikalwa abantu balondokede, bakomana bakonzya kupona kukabe kutamani. Ibbaibbele litwaambila kuti akumana kutalisya zyoonse ezi, “Leza naakabona zintu zyoonse nzyaakacita, wakabona kuti zyoonse zyabota loko.”—Matalikilo 1:31; amulange alimwi Intembauzyo 118:17.

8. Ino bantu bakeelede kubamba buti nyika?

⁸ Cilalibonya kuti bantu bakeelede kubelesya nyika iibombedwe kububotu bwabo. Pele eci cakeelede kucitwa munzila iiluleme. Bantu bakeelede kuba basikubamba kabotu lubono lwaanyika, kutali basikulunyonyoona. Kunyonyoonwa kwanyika nkotucita bukamboni sunu kulwana luyando lwa-Leza, elyo abo babweza lubazu mulinjiyo balaimpana amulimo wabuumi anyika. Bayoopegwa cisubulo akaambo kancico, nkaambo Bbaibbele lyaamba kuti Leza ‘uyoonyonyoona abo banyonyoona nyika.’—Ciyubunuzyo 11:18.

Acili Makanze a-Leza

9. Nkaambonzi ncotuli alusyomo kuti makanze a-Leza ayoozuzikizigwa?

⁹ Aboobo, kuzwa kumatalikilo akali makanze a-Leza kuti mukwasyi uulondokede wabuntu upone anyika ya-paradaiso kukabe kutamani. Alimwi acili makanze akwe! Makanze ayo taakakakilidwe, ayoozuzikizigwa. Ibbaibbele lyaamba kuti: “Jehova wamakamu wakonka kuti, Ncobeni ciyooba mbubonya mbundiyeeyede, makani ayo ngaonya ngendalailila ayoocitwa.” “Ndaamba kale makani, lino njooazuzikizya. Ndikanzide, lino njoocita obo.”—Isaya 14:24; 46:11.

10, 11. Ino Jesu, Petro, asintembauzyo Davide bakaamba buti zya-Paradaiso?

¹⁰ Jesu Kristo wakaamba zyamakanze a-Leza aakupilisya paradaiso anyika ciindi nakaambila umwi muntu wakali kuyanda bulangizi bwakumbele kuti: “Tunooli ayebo mu-Paradaiso.” (Luka 23:43) Muapostolo Petro awalo wakaamba zyakuboola kwanyika mpya ciindi  naakasinsima kuti: “Swebo tulangila majulu mapya [bubambe bupya bwamfulumende bulela kuzwa kujulu] anyika impya [nkamu mpya yanyika] mbubonya mbuli mbwaakatusyomezya [Leza], mulinzizyo momukala bululami.”—2 Petro 3:13, NW.

¹¹ Sintembauzyo Davide awalo wakalemba zyakuboola kwanyika mpya akulampa kwaciindi nkoitikatole. Wakasinsima kuti: “Balulami bayookona nyika, bayookala alinjiyo lyoonse.” (Intembauzyo 37:29) Nkakaambo Jesu nkaakasyomezya kuti: “Bali acoolwe abo balibombya, nkaambo bazoovuba nyika.”—Matayo 5:5.

12, 13. Amwaambe mubufwaafwi makanze mapati a-Leza kubantu.

¹² Mbulangizi bukomanisya buti obo, kupona kukabe kutamani anyika ya-paradaiso kakwiina bubi, bubbi, malwazi, mause, akucisa! Mubbuku lyakucaalizya Lyabbaibbele, Ijwi lisinsimi lya-Leza lilamanizya kwaamba makanze aya mapati kwiinda mukwaambilizya kuti: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” Lilayungizya akuti: “Mpawo oyo uukede acuuno cabwami wakati, Amubone, ndalengulula zintu zyoonse, zibe zipya. Alimwi wandaambila kuti, Lemba kuti majwi aya asyomeka, alisinizye.”—Ciyubunuzyo 21:4, 5.

¹³ Inzya, Leza ujisi makanze mapati mumizeezo. Ayooba nyika mpya iiluleme, paradaiso uutamani, wakasinsimwa Ayooyo uukonzya alimwi uyoocita nzyasyomezya, nkaambo ‘majwi akwe alasyomeka, alisinizye.’

[Mibuzyo yaciiyo]

[Zifwanikiso izili apeeji 21]

Leza wakali kuyanda kuti bantu bapone kukabe kutamani anyika ya-paradaiso. Ayo acili makanze aakwe

[Cifwanikiso icili apeeji 22]

Mukamwini inga wabapa mulandu bakala muŋanda yakwe basola kwiinyonyoona