Cibeela 7

Makanze A-Leza Alaafwi Kuzuzikizigwa

1, 2. Nkaambonzi ncotunga twaba masimpe akuti Leza uyoobweza ntamu kumana bubi akupenga?

¹ Nekuba kuti Leza wazumizya kutalondoka akupenga kwaciindi cilamfu kweelana akulanga kwabuntu, takaleki ziimo zibi kuzumanana kukabe kutamani. Ibbaibbele litwaambila kuti Leza ujisi ciindi cakwe cakuzumizya zintu ezi kucitika.

² “Zintu zyoonse zilijisi ciindi cazyo.” (Mukambausi 3:1) Ciindi cibikidwe ca-Leza cakuzumizya bubi akupenga caakusika kumamanino, lino uyoonjilila mutwaambo twabantu. Uyoomana bubi akupenga elyo uyoozuzikizya makanze aakwe mataanzi anyika izwide mukwasyi wabantu balondokede, bakomana aluumuno alimwi abuvubi butazungaani ansi aziimo zya-Paradaiso.

Kubeteka kwa-Leza

3, 4. Ino bbuku lya Tusimpi lipandulula buti ziyoozwa mukunjilila kwa-Leza?

³ Amulange buyo zice zyabusinsimi Bwabbaibbele zyalo zitondezya kunjilila kwa-Leza, nkokuti, ziyoozwa akubeteka kwakwe, eneeno ncoziyoopandulula kumukwasyi wabantu:

⁴ “Baluleme bayookala munyika; baololokede mbebayoosyaala mulinjiyo; pele basizibi bayoonyonyoonwa munyika, abasilweeno bayoogwisigwa.”—Tusimpi 2:21, 22.

5, 6. Ino Intembauzyo 37 itondezya buti ciyoocitika ciindi Leza aakunjilila?

⁵ “Basizibi balanyonyooka, pele balangila Jehova mbombabo bayookona nyika. Kaba kaindi kaniini sizibi takooyooba wo . . . Pele babombemyoyo bayoovuba nyika, bayookondwa muluumuno lunji.”—Intembauzyo 37:9-11.

⁶ “Lindila kuli-Jehova akubamba inzila yakwe, lino ulakusumpula kuti ukone nyika, nkabela uyoobona lunyonyooko lwabasizibi.  Langisya uuololokede! Bona mululami! Nkaambo muntu siluumuno nguuyoojana coolwe kumamanino. Pele basizibi bayoonyonyoonwa antoomwe; mamanino aababi ndunyonyooko.”—Intembauzyo 37:34, 37, 38.

7. Nkulayanzi kwamaanu nkolitupa Jwi lya-Leza?

⁷ Aboobo, kweelana azintu zibotu kapati ziyooboola kumbele kuli baabo bazyi kweelela kwabulelo Bwamulengi singuzu zyoonse, tukulwaizigwa kuti: “Moyo wako ujatisye malailile aangu; nkaambo koongola, amyaka yabuumi, aluumuno, zilakuletela ezi zyoonse.” Atwaambe, buumi butamani buyooyungizigwa kuli baabo basala kucita luyando lwa-Leza! Aboobo, Ijwi lya-Leza lilaya kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”—Tusimpi 3:1, 2, 5, 6.

Bulelo bwa-Leza Buzwa Kujulu

8, 9. Munzilanzi Leza mwayoosalazya nyika eyi?

⁸ Leza uyookonzya kusalazya nyika eyi kwiinda mumfulumende mbotu kwiinda muntu njanga wajana. Nimfulumende iiminina busongo bwakujulu nkaambo ilalela kuzwa kujulu ansi abweendelezi bwa-Leza. Alimwi obo Bwami bwakujulu buyoogwisya bulelo boonse bwabantu ano anyika. Bantu tabacikabi limbi kusola kusala kulilela kunze a-Leza.

⁹ Akaambo aka businsimi ali Daniele 2:44 bwaamba kuti: “Mumazuba aabaami abo [mfulumende ziliwo sunu], Leza wakujulu uyoobusya bwami [kujulu] butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi [bantu tabacikazumizigwi limbi kulela kunze a-Leza]. Obo bwami buyoopwayaula akumanisya mami aya oonse [aliwo sunu], alimwi bwalo buyooima nji kukabe kutamani.”—Alimwi amulange Ciyubunuzyo 19:11-21; 20:4-6.

10. Nkaambonzi ncotunga twaba masimpe kuti ansi Abwami bwa-Leza bwakujulu, takucikabi limbi kutasyomeka mubulelo?

¹⁰ Nkokuti, muntu tacikabi limbi abulelo butasyomeki, nkaambo Leza aakugwisya bweende obu, bulelo bwabantu bwaangulukide kuzwa kuli nguwe tabucikabi limbi. Abwalo Bwami bunoolela kuzwa kujulu tabukeenwi, mbokunga Leza Ngomutalisi alimwi Nguubambilila. Mubusena bwaceeco, buyoobelekela kububotu bwabantu ansi ambubo. Lino luyando lwa-Leza luyoocitwa anyika yoonse mbubonya mbuli kujulu. Nkankakaako Jesu nkakayiisya basiciiya bakwe kukomba kuli Leza kuti:  “Abuze Bwami bwako, alucitwe luyando lwako, ansi ano mbubonya mbuli kujulu.”—Matayo 6:10.

Ino Tulaafwi Buti?

11. Nkokuli Mubbaibbele nkotujana businsimi bunga bwatugwasya kuziba mbuli mbotuli afwaafwi amamanino anyika eyi?

¹¹ Ino tulaafwi buti amamanino abweende bwazintu obu butakomanisyi alimwi amatalikilo anyika mpya ya-Leza? Kusalazya businsimi Bwabbaibbele bulatupa kwiingula. Muceezyo, Jesu mukamwini wakaambilalimwi nzyotweelede kulanga kutegwa tuzibe busena bwesu kujatikizya, mbubonya mbuli Bbaibbele mbolicibika eci, “mamanino abweende bwazintu.” (NW) Ezi zyakalembwa muli Matayo caandaano 24 alimwi a 25, Marko 13, alimwi a Luka 21. Alimwi, mbuli mbokulembedwe muli 2 Timoteo caandaano 3, muapostolo Paulo wakaambila limwi kuti kuyooba ciindi ciitwa kuti “mazuba aakumamanino” ciindi zitondezyo zinji noziyootondezya kabotu mpotubede mukati kaciindi.

12, 13. Ino Jesu a-Paulo bakaambanzi kujatikizya ciindi camamanino?

¹² Jesu wakaamba kuti ciindi eci ciyootalika azicitika ezi: “Cisi cizoolwana acisinyina, abwami buzoolwana abwaminyina. Alimwi kuzooba inzala amizuzumo yanyika mumasena aansininsini.” (Matayo 24:7) Luka 21:11 itondezya kuti awalo wakaamba kuti “kuyooba . . . zilwazi mumasena aandeene.” Alimwi wakacenjezya, akuti, kuyooba “kuvula kwamilandu.”—Matayo 24:12.

¹³ Muapostolo Paulo wakaambilalimwi kuti: “Pele koziba kuti kumazuba aakumamanino kuyooba ziindi zikataazya. Nkaambo bantu bayooba basikuliyanda, basimuyanda mali, basimantumbwaambwa, basikakomokomo, basikasankusanku, batamvwi bamawisi, batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula, bayandisya misalo yaansi kwiinda Leza, balijisi ciwa cabukombi pele inguzu zyambubo balazikazya. . . . Bantu babi abasikulibeja balainda anka kubija, banooena akweenwa.”—2 Timoteo 3:1-5, 13.

14, 15. Ino zicitika zyamumwaanda uno wa 20 zitondezya buti kuti masimpe tuli mumazuba aamamanino?

¹⁴ Sena zintu ezyo Jesu a-Paulo nzyobakaambila limwi zyabweza busena muciindi cesu? Inzya, zyacita obo. Inkondo Yanyika ya I yakali njenkondo mbyaabi kwiinda kusikila ceeco ciindi. Yakali nkondo yanyika yakusaanguna alimwi cakaba ciindi cakunyona muzicitika mazuba aano. Antoomwe ankondo eyo kwakaboola kuceya kwazyakulya, kalwalo kamalwazi, antenda zimwi. Zicitika ezyo kutalikila mu 1914 kuya kumpela zyakali, kweelana ambwaakazibika Jesu, “masaangunino aamapenzi.” (Matayo 24:8) Akatalika ciindi cakasinsimwa kuti “mazuba aakumamanino,” matalikilo azyalani lyamamanino ciindi Leza ncazumizya bubi akupenga.

¹⁵ Mweelede kuti mulizizi zicitika zyamumwaanda wa 20. Mulizi manyongwe alo atanta. Bantu balangilwa ku 100 miliyoni bajaigwa munkondo. Myaanda yamamiliyoni abamwi bafwa kunzala amalwazi. Mizuzumo yajaya bantu batabaliki. Kutalanganya buumi alubono kwatanta. Kuyoowa bubbi kwaba cibeela cabuumi bwabuzuba abuzuba. Kulilemeka kwatonkelwa ambali. Kuvula kwabantu kweeta mapenzi atakonzyi kupasununwa. Kubisigwa kwaluuwo maanzi anyika kwabisya bubotu bwabuumi alimwi kulabucisa. Kasimpe, tuli mumazuba aamamanino kutalikila mu 1914 mane tuyandosika ajeleele lyabusinsimi Bwabbaibbele bujatikizya ciindi cesu.

16. Mazuba aakumamanino ajisi ciindi cilampa buti?

¹⁶ Nciindi cilamfu buti mazuba aaya aakumamanino mbwaayooba? Jesu wakaamba kujatikizya ciindi ciyoolangana “amasaangunino aamapenzi” kutalikila mu 1914 kuya kumpela: “Izyalani elino talikooyoomana mane zintu ezi zyoonse zizoobe.” (Matayo 24:8, 34-36) Nkokuti, zintu zyoonse zyamazuba aakumamanino zyeelede kubweza busena mubuumi bwazyalani lyomwe, izyalani lyamu 1914. Elyo bamwi bantu bakali kupona mu 1914 bacinoopona ciindi bweende obu bwaakusika  kumamanino. Izyalani elyo lyabantu sunu lyatanta mumyaka, citondezya kuti takucikwe ciindi cilamfu ciciceede Leza katanaleta kumamanino bweende bwazintu obu.

17, 18. Mbusinsiminzi butondezya kuti tuli afwaafwi kapati amamanino anyika eyi?

¹⁷ Abumwi businsimi butondezya kuti mamanino abweende obu bulaafwaafwi kwakapegwa amuapostolo Paulo, wakaambila limwi kuti: “Buzuba bwa [Jehova] buleza mbwasika uubba masiku. Nobanoozoocili mukwaamba kuti, Kwatontola, kwaliiba, elyo muciindi eco nciconya lunyonyooko luzoofwambaana kubasikila . . . , nkabela tabakooyooloboka pe.”—1 Ba-Tesalonika 5:2, 3; alimwi amulange Luka 21:34, 35.

¹⁸ Sunu Nkondo Yakukongana yamana, alimwi inkondo zyaakati kazisi tazicinooli zintu ziyoosya kapati. Aboobo zisi inga zyayeeya kuti lino balaafwaafwi kusika abubambe bupya bwanyika. Pele ciindi nobalimvwa kuti kusola kwabo kuyandozwidilila, ciyoopandulula zyaandeene anzyobayeeya, nkaambo eco ciyooba citondezyo camamanino kuti kunyonyoonwa a-Leza kwabweende obu kulaafwaafwi. Amuyeeye, kumvwana mutwaambo twacisi akuzuminana takupangi kusanduka kupati mubantu. Takuciti kuti bantu bayandane umwi amweenzinyina. Alimwi basololi banyika baalilwa kukasya bubi, nokuba kugwisya malwazi alufu. Aboobo mutasyomi luumuno akuliiba kucitwa abantu akusyoma kuti lino nyika eyi ili munzila yakumana mapenzi. (Itembauzyo 146:3) Kwaambilizya oko kuyoopandulula kuti nyika eyi ilaafwaafwi kumana.

Kukambauka Makani Mabotu

19, 20. Mbusinsiminzi bujatikizya kukambauka mumazuba aamamanino mbotubwene kuti buli mukuzuzikizigwa?

¹⁹ Abumwi businsimi butondezya kuti tuli mumazuba aakumamanino kutalikila mu 1914 nkooko nkwaakapa Jesu kuti: “Makani Mabotu akakambaukwe kumasi oonse.” (Marko 13:10) Na mbuli Matayo 24:14 mbwaamba kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”

²⁰ Sunu kwiinda mbuli lyoonse, makani mabotu amamanino anyika eyi akuboola kwanyika mpya ya-Paradaiso ansi a-Bwami bwa-Leza kulakambaukwa nyika yoonse. Abani? Amamiliyoni Abakamboni ba-Jehova. Balakambauka muzisi zyoonse anyika.

21, 22. Ncinzi, kapati, cizibya Bakamboni ba-Jehova kuti Mbakristo ncobeni?

²¹ Kuyungizya akukambauka kwabo Kwabwami bwa-Leza, Bakamboni ba-Jehova balalilemeka munzila ibatondezya kuti mbatobeli ba-Kristo bakasimpe, nkaambo ulati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” Aboobo, Bakamboni ba-Jehova balijatene antoomwe mbuli babunyina munyika aluyando lutakonzyi kupasununwa.—Johane 13:35; alimwi amulange Isaya 2:2-4; Ba-Kolose 3:14; Johane 15:12-14; 1 Johane 3:10-12; 4:20, 21; Ciyubunuzyo 7:9, 10.

²² Bakamboni ba-Jehova basyoma ncolyaamba Bbaibbele kuti: “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” (Incito 10:34, 35) Balanga Bakamboninyina muzisi zyoonse mbuli babunyina abasazi bakumuuya, kutalanga mukowa na mubala. (Matayo 23:8) Alimwi ikuba kwabulongwe bwanyika yoonse buli boobu sunu munyika kuyungizya bukamboni bwakuti makanze a-Leza eneeno ayoobonwa.

[Mibuzyo yaciiyo]

[Cifwanikiso icili apeeji 26]

Bwami bwa-Leza bwakujulu bulondokede mbombubo bulike buyooba bulelo bwamuntu munyika mpya