Sena ulibabwene bantu bali mucifwanikiso?— Mbaa Matayo, Marko, Luka, Johane, Petro, Jakobo, Juda, alimwi a Paulo. Bantu aaba boonse bakapona aciindi ncaakapona Jesu alimwi bakalemba kujatikizya Jesu. Atwiiye zinji kujatikizya mbabo.

Botatwe bakali baapostolo ibakali kukambauka antoomwe a Jesu. Sena ulibazyi aaba botatwe kuti mbaani?— Mbaa Matayo, Johane, alimwi a Petro. Mwaapostolo Matayo alimwi a Johane bakalimuzyi kabotu Jesu, alimwi umwi  aumwi wabo wakalemba bbuku lyaamba zyabuumi bwa Jesu. Mwaapostolo Johane awalo wakalemba bbuku lya Ciyubunuzyo alimwi amagwalo otatwe aaitwa kuti Johane Wakusaanguna, Johane Wabili, alimwi a Johane Watatu. Mwaapostolo Petro wakalemba magwalo obilo aamu Bbaibbele. Aitwa kuti Petulo Wakusaanguna a Petulo Wabili. Mulugwalo lwabili, Petro wakalemba kujatikizya ciindi Jehova naakaambaula kuzwa kujulu kaamba kujatikizya Jesu kuti: ‘Ooyu mwanaangu. Ndilamuyanda alimwi ulandikkomanisya.’

Bamwi bantu bali mucifwanikiso abalo balatuyiisya kujatikizya Jesu mumabbuku ngobakalemba. Umwi wambabo ngu Marko. Ambweni wakaliko ciindi Jesu naakaangidwe alimwi wakazibona zyoonse zyakacitika. Umwi ngu Luka. Wakali musilisi alimwi ambweni wakaba Munakristo kafwide kale Jesu.

Basikulemba Bbaibbele bamwi bobilo mbomubwene mucifwanikiso bakali basyoonto ba Jesu. Sena ulibazyi mazina?— Mazina aabo mbaa Jakobo alimwi a Juda. Kumatalikilo tiibakali kumusyoma Jesu. Mane buya bakali kuyeeya kuti ulisondokede asyoonto. Pele mukuya kwaciindi bakamusyoma Jesu akuba Banakristo.

Sikulemba Bbaibbele wamamanino ngobwene mucifwanikiso ngu Paulo. Katanaba Munakristo, zina lyakwe wakali Saulo. Tanaakali kubayanda Banakristo alimwi wakali mukali. Sena ulicizyi cakapa kuti Paulo abe Munakristo?— Bumwi buzuba, Paulo naakali kweenda munzila, cakutayeeyela wakamvwa muntu kamwaambauzya kuzwa kujulu. Muntu ooyu wakali Jesu! Wakabuzya Paulo kuti: ‘Nkaambo nzi ncoli mukali kubantu bandisyoma?’ Kuzwa ciindi eeco, Paulo wakacinca akuba Munakristo. Paulo wakalemba mabbuku aamu Bbaibbele aali 14, kuzwa ku Baloma kusikila ku Bahebulayo.

Tulabala Bbaibbele abuzuba, tee kayi?— Kwiinda mukubala Bbaibbele, tulayiya zintu zinji kujatikizya Jesu. Sena inga wayanda kwiiya zinji kujatikizya Jesu?—