1, 2. Ndiilili Jesu naakanyema, alimwi ino nkaambo nzi?

 CAKUTADOONEKA Jesu wakalinyemede​—pele wakali akaambo kabotu ncaakanyemena boobo. Inga camuyumina kumweezeezya kuti wakali muciimo eeco, mbwaanga wakali mubombe kapati. (Matayo 21:5) Pele wakalyeendelezya cakumaninina, akaambo kakuti bukali bwakwe bwakali bwabululami. a Pele ino ncinzi icakamupede kukalala boobo muntu ooyu siluumuno? Mbukkale bwatakaluleme kapati.

² Jesu wakali kuliyandisya kapati tempele ilyakali mu Jerusalemu. Munyika yoonse, mbobwakali busena busalala bulikke bwabukombi ibwakaabidwe kuli Usyi wakujulu. Iba Juda kuzwa muzisi zinji bakali kweenda misinzo milamfwu kuyookomba kubusena oobo. Nobaba bantu Bamasi ibakali kuyoowa Leza bakali kuboola; bakali kunjila mubbuwa lyatempele ndyobakabambilidwe kunoobelesya. Pele kakucili kumatalikilo kwamulimo wakwe, Jesu wakanjila mubusena ikwakali tempele, eelyo wakabona zintu zisesemya. Kayi busena oobo bwakeelene buyo amusika muciindi cakuba ŋanda yakukombela! Bwakazwide basambazi alimwi abasikucinca mali. Pele ino kutalulama kwakalaali? Kubantu aaba, itempele lya Leza bwakali buyo busena bwakuunina bantunyina​—mane akubabbida. Munzila nzi?​—Johane 2:14.

3, 4. Nduuni lwabulyatu luli buti lwakali kucitika kuŋanda ya Jehova, alimwi ino nintaamu nzi Jesu njaakabweza kutegwa alulamike zintu?

 ³ Basololi bazikombelo bakabikkide mulawo wakuti kakubelesyegwa musyobo wamali omwe buyo mukutela mutelo watempele. Basikuswaya bakeelede kucinca mali aabo ikutegwa bajane musyobo wamali aayo aakali kuyandika. Aboobo, basikucinca mali bakabikka matebule aabo mukati mwini mutempele, alimwi bakali kubbadelesya mali aali mbwaabede mukucincana akumwi kwakali kucitwa. Imakwebo aakusambala banyama alo aakali ampindu kapati. Basikuswaya ibakali kuyanda kutuula zituuzyo bakali kukonzya kuula kumusambazi uuli woonse mumunzi, pele beendelezi bakutempele bakali kulangilwa kuzikaka zituuzyo eezyo kufwumbwa leelyo nobakali kwaamba kuti tazili kabotu. Pele zituuzyo zyakali kuulilwa mwini mubusena mwakali tempele zyakali kuzuminwa lyoonse. Aboobo mbwaanga bantu teebakajisi nguzu zyakucita kufwumbwa ncobayanda, basambazi zimwi ziindi bakali kubbadelesya mali manji kapati. b Eeci cakali kwiinda amakwebo mabyaabi kapati akutabikkila maanu mbobalimvwa bamwi. Cakeelene akubba buya!

⁴ Jesu tanaakali kunga wakulanga buyo kutalulama kuli boobo kakunyina kutongooka. Eeyi yakali ŋanda ya Usyi! Wakapanga nswepu akutanda matanga aaŋombe aambelele kuzwa mutempele. Mpoonya wakaunkila basikucinca mali akutingamuna matebule aabo. Amweezeezye buyo mali aayo oonse nkwaawuumukila acibuye camabwe! Cabukali  wakalailila bantu bakali kusambala nkwilimba ategwa: “Amuzigusye omuno zintu eezyi!” (Johane 2:15, 16) Kulibonya kuti kunyina wakaba acamba cakukazya mwaalumi ooyu musungu.

5-7. (a) Ino buumi bwa Jesu katanaba muntunsi bwakabujatikizya buti bululami bwakwe, alimwi ino ncinzi ncotukonzya kwiiya kwiinda mukutelaika cikozyanyo cakwe? (b) Ncinzi Jesu ncaacita kujatikizya kutalulama Saatani nkwaaleta, alimwi mbuti mbwayoocita oobo kumbele?

⁵ Pele basambazi bakapiluka nokwakainda ciindi cili mbocibede. Kakwiindide myaka iitandila kuli yotatwe, Jesu wakabikkila maanu kupenzi ndimunya eelyo lyakutalulama, lino wakazubulula majwi aa Jehova mwini aakusinganya baabo ibakacita ŋanda yakwe kuba “ciyubilo cababbi.” (Jeremiya 7:11; Matayo 21:13) Inzya, eelyo Jesu naakabona mbobakali kuuninwa bantu cabulyatu alimwi akubisyigwa kwatempele lya Leza, wakalimvwa mbubwenya mbwaakali kulimvwa Usyi. Alimwi eeci tacigambyi pe! Jesu wakayiisyigwa a Usyi wakujulu kwatuulunzuma twamyaka minji. Akaambo kaceeco, wakalizyi mbobwakali kuyandika bululami mbubwenya mbuli Jehova. Wakaba cikozyanyo ceelela cakaambyo kakuti, Cinyina-nyina amwana wakacitoleela. Aboobo, ikuti katuyanda kubuteelela kabotu bube bwa Jehova bwabululami, icinga catugwasya kapati nkutelaika cikozyanyo ca Jesu Kristo.​—Johane 14:9, 10.

⁶ Mwana wa Jehova simuzyalwaalikke wakaliko eelyo Saatani naakatamikizya Jehova Leza kuti mubeji akukazya kululama kwabweendelezi bwakwe. Taalibijili akaka makani aayo aakubeja! Alimwi Mwana wakali kuteelela eelyo Saatani kumbele naakataminina kuti kunyina muntu wakali kunga wabelekela Jehova cakuliyandila akaambo kaluyando. Masimpe aaya makani aakubeja akamucisizya moyo  Mwana ooyo uululeme. Eelo kulangilwa kuti wakakkomana kapati kaka naakazyiba kuti wakali kunoojisi mulimo mupati mukululamika makani aayo aakubeja! (2 Bakorinto 1:20) Ino wakali kunocicita buti eeco?

⁷ Mbubwenya mbotwaiya mu Cibalo 14, Jesu Kristo wakapa bwiinguzi bumaninide butadoonekwi kumakani aa Saatani aakubeja aajatikizya kusyomeka kwazilenge zya Jehova. Aboobo Jesu wakabikka ntalisyo yakusalazya zina lya Leza lisalala, lyakuti Jehova, kububeji boonse, kubikkilizya abubeji bwakuti nzila yakwe yakweendelezya taili kabotu. Mbwali Mwiiminizi wa Jehova Mupati, Jesu uyookkazikizya bululami bwa Leza mububumbo boonse. (Milimo 5:31) Abwalo buumi bwakwe naakali anyika bwakatondezya bululami bwa Leza. Jehova wakamwaamba kuti: “Ndiyoobikka muuya wangu alinguwe, eelyo uyoobapa kuzyiba bululami bantu bamasi.” (Matayo 12:18) Mbuti Jesu mbwaakazuzikizya majwi aayo?

8-10. (a) Mbuti zilengwa zyakulwiidwa buyo abasololi bazikombelo iba Juda mbozyakali kusampaula bantu batakali ba Juda alimwi bamakaintu? (b) Muunzila nzi milawo yakulwiidwa buyo moyakasandula mulawo wa Jehova wa Sabata kuba cintu ciminya?

⁸ Jesu wakaukkomanina Mulawo wa Jehova alimwi akuutobela. Pele basololi bazikombelo bakuciindi cakwe bakuupilinganya akuubelesya munzila mbyaabi Mulawo ooyo. Jesu wakabaambila kuti: “Maawe kulindinywe nobalembi aba Farisi, nobasikuupaupa ameso! . . . Tamubikkili maano kumakani mapati aa Mulawo, nkokuti bululami, luse, alusyomo.” (Matayo 23:23) Kabacita acaali, aabo bamayi ba Mulawo wa Leza tiibakali kubupandulula kabotu “bululami.” Muciindi caboobo, bakali kuzimaazya bululami bwa  Leza. Munzila nzi? Amulange-lange zikozyanyo zisyoonto.

⁹ Jehova wakalailide bantu bakwe kuti balyaandaanye kumasi aakabeengelede aatakali kumukomba. (1 Bami 11:1, 2) Nokuba boobo, basololi bazikombelo basikwiintila bakakulwaizya bantu kunoonyansya bantu boonse batakali ba Juda. Ibbuku lyaba Juda litegwa Mishnah mane lyakabikkilizya amulawo ooyu wakuti: “Iŋombe tazyeelede kusiigwa mumasena mukkala bamasi mbwaanga bayeeyelwa kuti inga batalika kuzijata akuzyoona.” Iciimo eeco cakusalulula bantu boonse ibatakali ba Juda tiicakaluzi pe alimwi cakaliimpene kapati acini cakali kwaamba Mulawo wa Musa. (Levitiko 19:34) Milawo aimbi iyakaanzwa abantu yakali kusampaula bamakaintu. Milawo yakulwiidwa buyo imwi yakali kwaamba kuti imukaintu weelede kweendela kusyule, ikutali mumabali aamulumaakwe. Imwaalumi wakali kukasyigwa kubandika amukaintu uuli woonse mubuleya naba mukaintu wakwe. Mbubwenya mbuli bazike, bamakaintu kunyina nobakali kuzumizyigwa kupa bumboni munkuta. Alimwi mane kwakali mupailo wakali kupailwa oomo baalumi mobakali kulumba Leza akaambo kakuti tiibakali bamakaintu.

¹⁰ Basololi bazikombelo bakasinkilila Mulawo wa Leza amilawo-lawo minji yakaanzwa aabantu. Mucikozyanyo, mulawo wa Sabata iwakali kukasya kubeleka mulimo mu Sabata, wakalailila kuti buzuba oobo bube buyo bwakukomba, bwakukatalukwa munzila yakumuuya alimwi akulyookezya. Pele ba Farisi bakaucita kuba mulawo uuminya ncobeni. Bakalisalila bupanduluzi bwabo beni kujatikizya ncowakali kwaamba “mulimo.” Bakaamba zintu zili 39 kuti mulimo, mbuli kutebula alimwi akuvwima. Izibeela-beela eezyi zyakabusya mibuzyo minji kapati. Ikuti muntu wajaya intabwa mu Sabata, sena wali kuvwima? Ikuti wapulula nseke mujanza kutegwa kayaabulya munzila, sena wakali  kutebula? Ikuti waponya muntu mulwazi, sena wali kubeleka? Imibuzyo iili boobo yakeendelezyegwa abumpiyompiyo bwamilawo iitanyoneki.

11, 12. Mbuti Jesu mbwaakazikazya zilengwa zyaba Farisi zyatakali zyamumagwalo?

¹¹ Mubukkale buli boobo, mbuti Jesu mbwaakali kunga wabagwasya bantu kubuteelela kabotu bululami? Munjiisyo zyakwe alimwi abukkale, wakabakazya cabusicamba kapati aabo basololi bazikombelo. Cakusaanguna, amulange-lange zimwi zyanjiisyo zyakwe. Cakaanzambwene wakaikazya milawo minji yakaanzidwe abantu, kaamba kuti: “Mupa kuti jwi lya Leza libe lyabuyo akaambo katunsiyansiya twanu ntomwakasiilwa.”​—Marko 7:13.

¹² Cakusalazya Jesu wakayiisya kuti ba Farisi bakalilubizyide kujatikizya mulawo wa Sabata​—akuti mubwini tiibakaateelela makanze eeni aamulawo ooyo. Wakapandulula kuti Mesiya “Mwami wa Sabata,” aboobo wakaliluzi kuponya bantu mu Sabata. (Matayo 12:8) Ikutegwa akankaizye kaambo aako, camaleele wakaponya caantangalala mu Sabata. (Luka 6:7-10) Ikuponya ooko kwakali citondezyo buyo cakuponya nkwayoocita nyika yoonse mbwiizulwa mu Bweendelezi bwakwe bwa Myaka iili Cuulu. Myaka eeyo iili Cuulu inooli nje Sabata yini-yini iisumpukide kapati, eelyo bantu basyomeka boonse nobayoolyookezya kuzwa kumapenzi aaminya aacibi alimwi alufwu aali kucitika kwamyaanda yamyaka minji.

13. Mulawo nzi wakatalisyigwa akaambo kamulimo wa Kristo waanyika, alimwi ino mbuti mbowakaindene awooyo ngowakanjilila busena?

¹³ Alimwi Jesu wakabupandulula kabotu bululami kwiinda mumulawo mupya, “mulawo wa Kristo” iwakatalisyigwa naakamanizya mulimo wakwe waanyika. (Bagalatiya 6:2) Mukwiimpana amulawo wakusaanguna, nkokuti Mulawo wa Musa, ooyu mulawo mupya mumbazu zinji  wakayeeme kapati anjiisyo ikutali amulongo wamilawo-lawo buyo iilembedwe. Pele wakabikkilizya amilawo imwi iigaminide. Umwi akati kayeeyi Jesu wakawaamba kuti “mulawo mupya.” Jesu wakayiisya basikumutobela boonse kuti beelede kuyandana mbubwenya mbuli mbwaakabayanda walo. (Johane 13:34, 35) Inzya, luyando lwakulisungula kufwida bamwi ndolwakeelede kuba mbaakani iibaindanya boonse ibatobela “mulawo wa Kristo.”

14, 15. Mbuti Jesu mbwaakatondezya kuti wakalizyi mpozyakali kuyiila nguzu zyakwe, alimwi ino nkaambo nzi eeci ncocikatalusya?

¹⁴ Nzinji nzyaakacita Jesu kunze buyo lyakuyiisya luyando. Wakautobela “mulawo wa Kristo.” Wakabonwa kacita boobo mubukkale bwakwe. Amulange-lange nzila zyotatwe oomo cikozyanyo ca Jesu mocakatondezya cakusalazya ncobwaamba bululami.

¹⁵ Yakusaanguna njakuti, Jesu wakabona kwaamba kuti kunyina naakacita zintu zili zyoonse zitaluleme. Ambweni mwalibonena kuti izintu zinji zitaluleme zilacitika eelyo bantu batalondokede nobaba basicinguni akusotoka minyinza mweelede kuyiila bweendelezi bwabo. Jesu tanaakacita oobo pe. Aciindi cimwi, imwaalumi umwi wakasikila Jesu akwaamba kuti: “O Mwiiyi, komwaambila mukwesu kuti andaabile cibeela calukono.” Ino Jesu wakamwiingula buti? “Yebo muntu, ino nguni wakandisala kuti ndibe mubetesi naa sikukosola makani akati kanu nywebo nyobilo?” (Luka 12:13, 14) Sena eeco tacigambyi? Ibusongo bwa Jesu, ikweelela kwakwe mukuba mubetesi alimwi mane akusumpuka kwabweendelezi mbwaakamupede Leza zyakali kwiinda aali zyoonse zyakajisi muntu uumbi anyika; nokuba boobo, wakakaka kulinjizya mumakani aaya, mbwaanga tanaakaningapegwa nguzu zyakucita boobo. Lyoonse Jesu wali kulibombya munzila eeyi, neliba leelyo katanaba muntunsi  kwazyuulu-zyuulu zyamyaka. (Juda 9) Ilusyomo ndwajisi Jesu muli Jehova lwakuti nguuyelede kusala cintu ciluleme lutondezya bube bulombozyeka alimwi ibuyandika kapati.

16, 17. (a) Mbuti Jesu mbwaakatondezya bululami mukukambauka makani mabotu aa Bwami bwa Leza? (b) Mbuti Jesu mbwaakatondezya kuti bululami bwakwe bwakamupa kuba silubomba?

¹⁶ Yabili njakuti, Jesu wakatondezya bululami kujatikizya mbwaakakambauka makani mabotu aa Bwami bwa Leza. Kunyina naakali kulanga ziimo zyabantu naa kusalulula. Muciindi caboobo, wakasolekesya kusikila bantu boonse, ibavwubi abacete. Mukwiimpana, iba Farisi bakali kubatanda ibacete, ibantu buyo alimwi akubaita zina naa bbala lyakusampaula lyakuti ʽam-ha·ʼaʹrets naa kuti “bantu baansi.” Cabusicamba, Jesu wakakululamika kutalulama ooko. Naakayiisya bantu makani mabotu​—aleelyo naakali kulya abantu, naakabasanina, kubaponya naa naakali kubabusya kuzwa kubafwu​—wakasumpula bululami bwa Leza uuyanda kusikila “bantu boonse.” c​—1 Timoteyo 2:4.

¹⁷ Yatatu njakuti, mbwaakali kubuyanda bululami Jesu cakatondezya kuti wakali muntu ulaalubomba kapati. Wakalitakata kugwasya basizibi. (Matayo 9:11-13) Wakalilibambilide lyoonse kugwasya bantu ibakanyina nguzu zyakulikwabilila. Mucikozyanyo, Jesu tanaakabasangana basololi bazikombelo mukutabasyoma Bamasi boonse. Calubomba wakabagwasya alimwi akubayiisya bamwi akati kabo, nokuba kuti mulimo mupati ngwaakaboolela wakagaminide ba Juda. Wakazumina kuponya munzila yamaleele nkwaakalomba mupati wabasikalumamba wabana Roma  kaamba kuti: “Kunyina muntu ngondajana mu Israyeli uulaalusyomo lupati luli boobu.”​—Matayo 8:5-13.

18, 19. (a) Muunzila nzi Jesu mwaakabalemeka bamakaintu? (b) Ino mbuti cikozyanyo ca Jesu mbocitugwasya kuteelela mbobuswaangene busicamba abululami?

¹⁸ Mbubwenya buyo, Jesu kunyina naakasumpula zilengwa zyakadumide kujatikizya mbobakali kubonwa bamakaintu. Muciindi caboobo, wakacita zintu ziluleme cabusicamba. Bamakaintu bana Samariya bakali kubonwa kuti balisofweede mbubwenya mbuli Bamasi. Nokuba boobo, Jesu kunyina naakawayawaya kukambaukila mukaintu muna Samariya kumukalo waku Sukari. Mubwini, nkuumukaintu ooyu Jesu nkwaakalipandulula cakusaanguna kuti ngowakali Mesiya wakasyomezyegwa. (Johane 4:6, 25, 26) Ba Farisi bakali kwaamba kuti bamakaintu tabeelede kuyiisyigwa Mulawo wa Leza, pele Jesu wakatola ciindi cinji kabikkila maanu kuyiisya bamakaintu. (Luka 10:38-42) Alimwi nokuba kuti kweelana atunsiyansiya, ibamakaintu tiibakali kunga basyomwa mukupa bumboni businizide, Jesu walo wakabalemeka bamakaintu banji kwiinda mukubapa coolwe cilibedelede cakuba bataanzi kumubona naakabusyigwa kubafwu. Alimwi mane wakabaambila kuti baunke kuyooambila basikwiiya bakwe baalumi kujatikizya makani aaya aayandika kapati!​—Matayo 28:1-10.

¹⁹ Inzya, munzila iili kabotu Jesu wakabapandulwida bantu ncobwaamba bululami. Ziindi zinji, wakacita oobo nokuba kuti ikucita boobo kwakali kunoomuletela mapenzi mapati. Cikozyanyo ca Jesu citugwasya kuteelela kuti ikusumpula bululami bwini-bwini kuyandika busicamba. Cakweelela, wakali kwaambwa kuti “Syuumbwa wamusyobo wa Juda.” (Ciyubunuzyo 5:5) Amuyeeye kuti syuumbwa ncitondezyo cabululami bwabusicamba. Pele ino-ino, Jesu uyooleta bululami bwiinda waawo. Munzila iilondokede, ‘wakabikka bululami munyika.’​—Isaya 42:4.

20, 21. Mbuti Mwami wabu Mesiya mbwaasumpula bululami munyika yoonse alimwi amumbungano ya Bunakristo muciindi cesu ecino ncicona?

²⁰ Kuzwa ciindi naakaba Mwami wabu Mesiya mumwaka wa 1914, Jesu wasumpula bululami munyika. Munzila nzi? Wabweza mukuli wakuzuzikizya businsimi bwakwe buli kuli Matayo 24:14. Basikutobela ba Jesu anyika bayiisya bantu bamuzisi zyoonse ikasimpe kajatikizya Bwami bwa Jehova. Mbubwenya mbuli Jesu, balakambauka cakutasalulula alimwi munzila yabululami, kabajisi mbaakani yakusikila bantu boonse​—kunyina makani naa mwana antela mupati, muvwubi naa mucete, mwaalumi naa mukaintu​—ikuti babape coolwe cakuzyiba Jehova, Leza wabululami.

²¹ Alimwi Jesu uli mukusumpula bululami mumbungano ya Bunakristo, oomo walo mwali Silutwe. Mbubwenya mbokwakasinsimwa, ulapa “zipego mubantu,” ibaalu Banakristo basyomeka ibasololela mumbungano. (Baefeso 4:8-12) Nobeembela butanga bwa Leza ibuyandika kapati, ibaalumi aaba batobela cikozyanyo ca Jesu Kristo mukusumpula bululami. Lyoonse balayeeya kuti Jesu uyanda kuti mbelele zyakwe kazyeendelezyegwa cabululami​—kunyina makani acuuno ncobajisi, impuwo naa bukkale bwakumubili.

22. Ino Jehova ulimvwa buti kujatikizya kutalulama kwiindilide kuli munyika sunu, alimwi ino wabikka Mwanaakwe kuti acite nzi kujatikizya nkuko?

²² Pele ino-ino, Jesu uyookkazikizya bululami munyika munzila iitanabwenwe. Ikutalulama kulidumide kapati munyika iino iisofweede. Mwana umwi aumwi uufwa anzala ulafwa akaambo kakutalulama ikwaindila, kapati eelyo notuyeeya mali alimwi aciindi icibelesyegwa cabutaka mukupanga zibelesyo zyamunkondo amukuzuzikizya zisusi zyabasikuyanda kulikkomanisya. Lufwu lwabantu ibabalilwa  kutuulunzuma tuli mbotubede ibafwa amwaka ncibeela buyo comwe cakutalulama kucitwa, kwalo ikubusya bukali bwa Jehova ibululeme. Wabikka Mwanaakwe ikulwana nkondo yabululami kujatikizya bweende bwazintu oobu boonse bubyaabi kutegwa amanizye kutalulama koonse mane kukabe kutamani.​—Ciyubunuzyo 16:14, 16; 19:11-15.

23. Mbuti Kristo mbwayoosumpula bululami munyika yoonse mane kukabe kutamani yaakwiinda nkondo ya Amagedoni?

²³ Nokuba boobo, bululami bwa Jehova bujatikizya zinji kunze buyo lyakunyonyoona bantu babyaabi. Alimwi wabikka Mwanaakwe kuti ayendelezye kali “Mwami waluumuno.” Yaakwiinda nkondo ya Amagedoni, bweendelezi bwa Jesu buyookkazikizya bululami munyika yoonse, alimwi uyooyendelezya “kwiinda mulubeta luluzi.” (Isaya 9:6, 7) Mpoonya Jesu uyoomanizya kutalulama koonse ikwaleta macise alimwi akupenga kutaambiki munyika. Cakusyomeka, uyoosumpula bululami bwa Jehova bulondokede lyoonse mane kukabe kutamani. Aboobo cilayandika kapati kuti twiiye kutondezya bululami bwa Jehova lino. Atubone mbotunga twacita boobo.