1, 2. Ncilengaano nzi ncaakabona musinsimi Isaya, alimwi ino cituyiisya nzi kujatikizya Jehova?

 ISAYA wakakankamana cakuyoowa akaambo kaceeco ncaakabona, icilengaano cakazwide kuli Leza. Cakali mbuli kuti cakali kucitika ncobeni! Cilengaano eeco cakali cini-cini kulinguwe cakuti kumbele Isaya wakazikulemba kuti ‘wakabona Jehova’ kakkede acuuno cakwe cabwami cisumpukide. Cisani ca Jehova cilamfwu cakazuzya tempele mu Jerusalemu.​—Isaya 6:1, 2.

² Alimwi Isaya wakayoowa kapati kujatikizya nzyaakamvwa, nkokuti kwiimba canguzu ikwakazungaanya tempele lyoonse antalisyo yayo. Lwiimbo lwakali kwiimbwa abaserafi, izilenge zyamuuya zijisi mulimo uusumpukide kapati. Ikwiimba kwabo kubotu alimwi kwaantoomwe kwakamvwugwa kabotu-kabotu mumajwi aabulemu masyoonto aakuti: “Ulasalala, ulasalala, ulasalala Jehova wamakamu. Nyika yoonse izwide bulemu bwakwe.” (Isaya 6:3, 4) Kwiimba kwakuti “ulasalala” ziindi zyotatwe kwakali kukankaizya bbala eelyo munzila iilibedelede, alimwi kwakali kweelela nkaambo kusalala kwa Jehova kulisumpukide kapati. (Ciyubunuzyo 4:8) Kusalala kwa Jehova kulakankaizyigwa mu Bbaibbele lyoonse mbolizulwa. Tupango tunji tuswaanganya zina lyakwe kumabala aakuti “uusalala” alimwi ‘abusalali.’

3. Mbuti mizeezo iilubide kujatikizya busalali bwa Jehova mboisololela bantu banji kukaka Leza muciindi cakuba acilongwe anguwe?

³ Aboobo cilisalede kuti, icintu cimwi cipati ncayanda Jehova kuti tumvwisye kujatikizya nguwe ncakuti ulasalala.  Pele bantu banji mazuba aano tabaukkomanini muzeezo ooyu. Bamwi bajisi mizeezo iilubide nkaambo baamba kuti busalali buliswaangene akulisumpula naa bukombi bwakuupaupa ameso. Bantu ibalimvwa kuti banyina mpindu, busalali bwa Leza bulabayoosya muciindi cakubakkomanisya. Balakonzya kuyoowa kuti tabeeleli pe kuba acilongwe a Leza ooyu uusalala. Aboobo, ibanji balamukaka Leza akaambo kabusalali bwakwe. Eeci cilausisya, nkaambo ibusalali bwa Leza nkakaambo kapati ikeelede kutupa kuba acilongwe anguwe. Nkaambo nzi? Katutanaingula mubuzyo ooyu, atubandike mbobubede busalali bwini-bwini.

4, 5. (a) Ino ‘busalali’ caamba nzi, alimwi ino ncinzi ncobutaambi? (b) Muunzila nzi zyobilo ziyandika kapati Jehova ‘mwaandeene’?

⁴ Busalali bwa Leza tabwaambi kuti ulaliyanda, ngusicinguni naa sikunyansya bamwi. Mukwiimpana, ulabusulaika bube oobu. (Tusimpi 16:5; Jakobo 4:6) Aboobo, ino ncinzi cini ncolyaamba bbala lyakuti ‘kusalala’? Mu Chihebrayo, ibbala lyakasandululwa boobo lizwa kubbala lyaamba “kwaandaana.” Mubukombi, ibbala lyakuti ‘kusalala’ lyaamba ceeco icaandaanizyidwe kuti kacitabelesyegwi lyoonse naa icintu cisetekene. Alimwi ibbala lyabusalali lilaukankaizya kapati muzeezo wabulondo alimwi akusalalisya. Ino ibbala eeli libeleka buti kwaamba Jehova? Sena lyaamba kuti ‘ulaandeene’ kubantunsi batalondokede, akuti uli kule kapati andiswe?

⁵ Peepe. Kali “Uusalala wa Israyeli,” Jehova wakabasyomezya bantu bakwe kuti wakali akati kabo, nokuba kuti bakali basizibi. (Isaya 12:6; Hosea 11: 9) Aboobo ibusalali bwakwe tabumupi kutantamuka pe. Pele ino ‘waandeene’ buti? Ulaandeene munzila zyobilo ziyandika kapati. Yakusaanguna, ulaandeene kuzilenge zyoonse mukuti  walo alikke ngo Mupatikampatila. Kusalala abulondo bwakwe bulimaninide alimwi tabweeli. (Intembauzyo 40:5; 83:18) Yabili, Jehova ulaandaanizyidwe cakumaninina kububi boonse, alimwi tulakonzya kuumbulizyigwa amuzeezo ooyu. Nkaambo nzi?

6. Nkaambo nzi ncotunga twajana luumbulizyo mukwaandaana kwa Jehova kumaninide kububi?

⁶ Tupona munyika ibusalali bwini-bwini mobutajanwi-janwi. Zintu zyoonse zijatikizya ciinga cabantu cizandukide kuli Leza zilisofweede munzila ziindene-indene, zilisofwaazyidwe acibi alimwi akutalondoka. Toonse tuyandika kucilwana cibi cili mulindiswe. Alimwi toonse tuli muntenda yakuzundwa acibi ikuti twaleka kubikkila maano kuzintu zigwasya. (Baroma 7:15-25; 1 Bakorinto 10:12) Jehova tali muntenda iili boobu pe. Mbwaanga ulaandeene kububi cakumaninina, kunyina nayoosofwaazyigwa acibi nociceya. Eeci alimwi cisinizya lusyomo ndotujisi lwakuti Jehova ngo Taata uuyandika kapati, nkaambo eeci caamba kuti ulakonzya kusyomwa cakumaninina. Mukwiimpana abamatata bantunsi basizibi, Jehova kunyina nayakuba mumpelenge, sikutalyeendelezya naa silunya. Akaambo kabusalali bwakwe takonzyi kuba akampenda kali koonse akati katootu. Ciindi aciindi, Jehova wali kukonkezya kwiinda mubusalali bwakwe mwini, calo cipa kuti zikonke zyakwe zisyomeke cakumaninina. (Amosi 4:2) Sena eeco tacikatalusyi?

7. Nkaambo nzi ncokunga kwaambwa kuti busalali mbobube bwa Jehova?

⁷ Busalali mbobube bwa Jehova. Ino eeci caamba nzi? Mucikozyanyo: Amulange-lange bbala lyakuti “bantu” alimwi alyakuti “batalondokede.” Tamukonzyi kupandulula bantu kakunyina kuyeeya kutalondoka. Ikutalondoka nkokuzwide mumibili yesu alimwi nkokweendelezya zyoonse nzyotucita. Lino amulange-lange mabala obilo  aayimpene kapati, lyakuti “Jehova” alimwi alyakuti “ulasalala.” Jehova uzwide busalali. Zyoonse zijatikizya nguwe nzyabulondo, zilasalala alimwi zililuleme. Kunyina notunga twamuzyiba bwini mbwabede Jehova kakunyina kumvwisya kabotu cini ncolyaamba bbala eeli limaninide kapati lyakuti “ulasalala.”

8, 9. Ncinzi citondezya kuti Jehova ulabagwasya bantunsi batalondokede ikuba bantu basalala munzila iitamaninide?

⁸ Mbwaanga busalali buliswaangene kapati ambwabede Jehova, cakululama inga twaamba kuti kulinguwe nkokuzwa busalali boonse. Kunyina nabusisa ibube oobu butaliboteli akaambo kakuliyanda; ulabupa kuli bambi alimwi ulacita oobo cabwaabi kapati. Kayi ciindi Leza naakabandika a Musa kwiinda mumungelo acitewo ciyaka mulilo, noiba nyika iyakali mumbali-mbali yakali kusalala akaambo ka Jehova!​—Kulonga 3:5.

⁹ Sena ibantunsi batalondokede balakonzya kusalala kwiinda mukugwasyigwa a Jehova? Inzya balakonzya, pele kutali munzila iimaninide. Leza wakapa bantu bakwe bana Israyeli coolwe cakuba “cisi cisalala.” (Kulonga 19:6) Wakapa musyobo ooyu bubambe bwabukombi ibwakali kusalala alimwi bulondokede. Aboobo, busalali ngomutwe wiindulukwa-indulukwa kapati mu Mulawo wa Musa. Mane buya, mupaizi mupati wakali kusama mpande yangolida kumbele kwacitambala cakwe ooko boonse nkobakali kukonzya kubona kumweka kwanjiyo mumumuni. Ampande eeyo kwakalembedwe mabala aakuti: “Kusalala nkukwa Jehova.” (Kulonga 28:36) Aboobo, iceelelo cisumpukide kapati cabulondo akusalalisya ncecakali kuyakwaandaanya bukombi bwabo alimwi abukkale bwabo. Jehova wakabaambila kuti: “Mweelede kusalala nkaambo mebo nde Jehova Leza  wanu ndilasalala.” (Levitiko 19:2) Kwiinda mukutobela lulayo lwa Leza oolu kusikila aciimo ceelede bantunsi batalondokede, bana Israyeli bakali kunoozumanana kusalala, pele kutali cakumaninina.

10. Nkwiimpana nzi kwakaliko akati kabana Israyeli bansiku alimwi azisi zyakabeengelede kujatikizya busalali?

¹⁰ Ikukankaizya ooku kwakusalala kwakaliimpene kapati abukombi bwazisi zyakeengelede bana Israyeli. Eezyo zisi zyatakamuzyi Leza zyakali kukomba baleza bakubeja abakulengelezya buyo, baleza ibakali kwaambwa kuti mbalwani, mbalyato alimwi mbaamu. Bakalisofweede mumbazu zyoonse. Kukomba baleza bali boobo kwakapa bantu kuti baleke kusalala. Aboobo, Jehova wakacenjezya babelesi bakwe ikulyaandaanya kubantu bakali kukomba baleza bambi akumicito yabo yabukombi iisofweede.​—Levitiko 18:24-28; 1 Bami 11:1, 2.

11. Mbuti kusalala kwambunga ya Jehova yakujulu mbokutondezyegwa (a) mubangelo? (b) mubaserafi (c) muli Jesu?

¹¹ Nomuba mubukkale butaliboteli, musyobo wa Jehova ngwaakasalide iwabana Israyeli bansiku wakali kumweka buyo asyoonto kujatikizya busalali bwambunga ya Leza yakujulu. Mamiliyoni aazilenge zyamuuya izibelekela Leza cakusyomeka nzyaambwa kuti ‘zyuulu-zyuulu zyabasalali.’ (Deuteronomo 33:2; Juda 14) Zilakutondezya cakumaninina kumweka abubotu boonse bwabusalali bwa Leza. Alimwi amubayeeye baserafi mbaakabona Isaya mucilengaano. Makani aali mulwiimbo lwabo atondezya kuti eezyi zilenge zyamuuya zyanguzu zijisi mulimo mupati mukuzyibya busalali bwa Jehova mububumbo boonse. Pele kuli cilenge camuuya cisumpukide kwiinda zyoonse eezyi, nkokuti Mwana wa Leza simuzyalwaalikke. Jesu nguuyinda zilenge zyoonse mukutondezya busalali bwa Jehova. Aboobo cakweelela waambwa kuti “Musalali wa Leza.”​—Johane 6:68, 69.

12, 13. (a) Nkaambo nzi zina lya Leza cakweelela ncolipandululwa kuti lilasalala? (b) Nkaambo nzi zina lya Leza ncolyeelede kusalazyigwa?

¹² Ino mbuti kujatikizya zina lya Leza limugeme? Mbubwenya mbotwabona mu Cibalo 1, izina eelyo talili lyabulemu buyo pe naa kaambo kapandulula buyo mbwabede. Liiminina Jehova Leza, kubikkilizya abube bwakwe boonse. Aboobo, Bbaibbele litwaambila kuti ‘zina lyakwe lilasalala.’ (Isaya 57:15) Mu Mulawo wa Musa, cakalisalazyidwe kuti kufwumbwa muntu wakali kusampaula zina lya Leza wakeelede kujaigwa. (Levitiko 24:16) Alimwi amubone eeco ncaakabikka mubusena bwakusaanguna Jesu mumupailo naakati: “Taateesu ooli kujulu, alisalazyigwe zina lyako.” (Matayo 6:9) Kusalazya cintu cimwi caamba kucaandaanya akucibona kuti cilisetekene, ikucipa bulemu bulibedelede, ikucibona kuti cilasalalisya. Pele ino nkaambo nzi cintu cisalalisya moonse mbuli zina lya Leza limugeme ncolyeelede kusalazyigwa?

¹³ Zina lya Leza lyasampaulwa, lyasofwaazyigwa amakani aakubeja alimwi aakutamikizya. Mu Edeni, Saatani wakabejekezya Jehova akwaamba kuti Mwami uutaluleme. (Matalikilo 3:1-5) Kuzwa ciindi eeco, Saatani mweendelezi wanyika ino iitasalali, wapa kuti makani aakubeja kujatikizya Leza avwule kapati. (Johane 8:44; 12:31; Ciyubunuzyo 12:9) Zikombelo zyapa bantu kubona Leza kuti ngusilunya, tabikkili maano naa muyumu moyo. Baamba kuti ulabagwasyilizya mukutila bulowa kucitika munkondo zyabo. Milimo iigambya yakulenga bayaamba kuti yakaile kulicitikila naa yakaba kwiinda mukusanduka kwazintu. Masimpe, zina lya Leza lyasampaulwa citaambiki. Aboobo lyeelede kusalazyigwa; lyeelede kupilusilwa bulemu bwandilyo mbolyeelede. Tulombozya ciindi eeco Jehova nayoolisalazya zina lyakwe kukusampaulwa  kuli koonse. Uyoocita oobo kwiinda mu Bwami bweendelezyegwa a Mwanaakwe. Tulalukkomanina lubazu ndotujisi mumakanze aayo mapati.

14. Nkaambo nzi muuya wa Leza ncowiitwa kuti ulasalala, alimwi ino nkaambo nzi kusampaula muuya uusalala ncouli mulandu mupati?

¹⁴ Kuli acimbi ciswaangene kapati a Jehova calo ziindi zyoonse iciitwa kuti cilasalala, nkokuti muuya wakwe naa nguzu nzyabelesya. (Matalikilo 1:2) Jehova ulazibelesya nguzu eezyi kutegwa azuzikizye makanze aakwe. Zyoonse nzyacita Leza ulazicita munzila iisalala alimwi iilondokede, aboobo cileelela kuti nguzu nzyabelesya kaziitwa kuti, muuya uusalala naa muuya wabusalali. (Luka 11:13; Baroma 1:4) Kusampaula muuya uusalala, calo icibikkilizya kukazya makanze aa Jehova acaali, ncibi citakonzyi kulekelelwa pe.​—Marko 3:29.

15. Nkaambo nzi kuyoowa kubisizya Leza ncokweelela kuswaanganizyigwa abusalali bwa Jehova, alimwi ino kuyoowa kuli boobo kubikkilizya nzi?

¹⁵ Aboobo tacili ciyumu pe ikuzyiba kaambo Bbaibbele ncoliswaanganya kusalala kwa Leza akuyoowa kubisizya Leza nkobeelede kubaankuko bantu. Mucikozyanyo, bbuku lya Intembauzyo 99:3 lyaamba kuti: “Abatembaule zina lyako lipati, nkaambo lilayoosya alimwi lilasalala.” Kuyoosya ooku kubikkilizya kuyoowa kwabulemu, ibulemu busumpukide kwiinda boonse. Cileelela kulimvwa boobo, nkaambo busalali bwa Leza bulisumpukide kapati kulindiswe. Busalali bwakwe mbulondo kapati alimwi bulalemekwa. Nokuba boobo, tabweelede kututantamuna pe. Muciindi caboobo, kubulanga munzila yeelede busalali bwa Leza kuyootukulwaizya kuba acilongwe cibotu anguwe. Nkaambo nzi?

16. (a) Mbuti kusalala mbokuswaangene abulemu naa bweebesi? Amupe cikozyanyo. (b) Mbuti bupanduluzi bwazilengaano zya Jehova mbobukankaizya bulondo, kusalala alimwi amumuni?

 ¹⁶ Acimbi cintu ncakuti, Bbaibbele liswaanganya busalali kubweebesi. Kubbuku lya Isaya 63:15, ijulu lipandulwidwe kuti ‘mbusena bwa Leza busumpukide busalala alimwi bulemekwa [naa “bweebeka,” bupanduluzi buyungizyidwe].’ Bulemu abweebesi mbube butukwelelezya. Mucikozyanyo, amulange cifwanikiso cili apeeji 39. Sena tabumukkomanisyi busena oobo bubotu? Ino ncinzi cipa kuti kabutukkomanisya kapati? Amubone mbwaali mabotu meenda. Awalo muya weelede kuti tausofweede pe, nkaambo julu lijisi mubala wabbulu alimwi mumuni wiide kuŋaima-ŋaima. Pele kuti busena mbubwenya oobu bwacincigwa, kunyina nocinga catukkomanisya cifwanikiso eeci. Mucikozyanyo, ikuti kalonga aako kazula dooti, masamu amampangala aamabwe alambaikwa zintu zisofweede, alimwi muya wasofwaazyigwa abusi bununka, inga catusesemya buya cifwanikiso eeci. Ncilengwa buya kulindiswe toonse ikuswaanganya bulemu naa bweebesi kubulondo, kukusalala alimwi amumuni. Mabala aaya ngoona alakonzya kubelesyegwa kupandulula busalali bwa Jehova. Nkakaambo kaako ibupanduluzi bwazilengaano zya Jehova ncobutugambya kapati! Kungweemuka kwamumuni, kumweka-mweka mbuli mabwe mayandisi, kungalama mbuli mulilo naa kubengema kwamabwe mayandisi, oobu mbulemu naa bweebesi bwa Leza wesu uusalala.​—Ezekieli 1:25-28; Ciyubunuzyo 4:2, 3.

17, 18. (a) Mbuti mbwaakalimvwa Isaya kumatalikilo kujatikizya cilengaano cakwe? (b) Mbuti Jehova mbwaakabelesya umwi wabaserafi kuumbulizya Isaya, alimwi ino eezyo nzyaakacita muserafi zyakali kwiiminina nzi?

¹⁷ Pele sena busalali bwa Leza bweelede kutupa kulimvwa  kuti tulaansi kapati twalyeezyanisya kuli mbubo? Bwiinguzi mbwakuti, inzya. Kayi, tulaansi kapati kweelana a Jehova, alimwi aako kaambo takakwaambi munzila iizulide kubaansi kwesu. Sena kuzyiba ceeci kweelede kutuzandula kulinguwe? Amubone mbwaakalimvwa Isaya naakamvwa baserafi kabaambilizya busalali bwa Jehova. “Mpoonya ndakati: ‘Maawe mebo! Ndanyonyooka, nkaambo ndimuntu uusofweede kumilomo, alimwi ndikkede akati kabantu basofweede kumilomo; nkaambo meso aangu abona Mwami, Jehova wamakamu lwakwe!’” (Isaya 6:5) Inzya, ibusalali bwa Jehova ibuteeli bwakayeezya Isaya kujatikizya mbwaakali sizibi ambwaatakalondokede. Kumatalikilo, ooyo mwaalumi uusyomeka wakanyongana kapati mumizeezo. Pele Jehova tanaakamusiya amizeezo eeyo pe.

¹⁸ Omwe akati kabaserafi cakufwambaana wakamuumbulizya musinsimi. Munzila nzi? Cilenge camuuya eeco canguzu cakauluka kuya kucipaililo, caakubweza kkala lyamulilo kuzwa nkuko akugumika kkala eelyo kumilomo ya Isaya. Eeco inga caboneka mbuli kuti cakali kucisa kapati muciindi cakumuumbulizya. Pele amuyeeye kuti eeci cakali cilengaano, icakali kwiiminina zintu zinji. Isaya, mu Juda uusyomeka, wakalizyi kabotu-kabotu kuti zipaizyo zyakali kutuulwa abuzuba kucipaililo kutempele kutegwa zimanye milandu. Aboobo ooyu muserafi caluyando wakayeezya musinsimi ooyu kuti, nokuba kuti wakali muntu uutalondokede, imuntu “uusofweede kumilomo,” wakacili kukonzya kukkomaninwa a Leza. a Jehova wakalilisungwide ikubona muntu  uutalondokede, imuntu sizibi kuti ulasalala, nokuba kuti muunzila iitamaninide.​—Isaya 6:6, 7.

19. Ino cikonzyeka buti kulindiswe ikusalala munzila iitamaninide nokuba kuti tatulondokede?

¹⁹ Ncimwi buyo amazuba aano. Zipaizyo zyoonse izyakali kutuulwa acipaililo mu Jerusalemu zyakali kwiiminina cintu cimwi cipati, nkokuti icipaizyo comwe cilondokede, ncaakatuula Jesu Kristo mumwaka wa 33 C.E. (Bahebrayo 9:11-14) Ikuti naa tweempwa ncobeni zibi zyesu, twaleka nzila zibi alimwi akusyoma cipaizyo eeco, tulalekelelwa. (1 Johane 2:2) Aswebo tulakonzya kunookkomaninwa a Leza. Aboobo, mwaapostolo Petro utuyeezya kuti: “Kulilembedwe kuti: ‘Mweelede kusalala, nkaambo mebo ndilasalala.’” (1 Petro 1:16) Amubone kuti Jehova tanaakaamba kuti tweelede kusalala mbubwenya mbuli mbwasalala walo. Talangili kuti tucite cintu ncotutakonzyi kucita. (Intembauzyo 103:13, 14) Muciindi caboobo, Jehova utwaambila kuti tusalale nkaambo walo ulasalala. ‘Mbotuli bana bayandwa,’ tuyanda kumwiiya kusikila mpotugolela mbwaanga tuli bantu batalondokede. (Baefeso 5:1) Aboobo, ikusika abusalali ncintu cizumanana  kucitwa. Mbotuyaabuyaambele kumuuya, tulabikkila maano ‘kulondola kusalala’ buzuba abuzuba.​—2 Bakorinto 7:1.

20. (a) Nkaambo nzi ncociyandika kapati kuzyiba kuti tulakonzya kuba bantu basalala mumeso aa Leza wesu uusalala? (b) Ino Isaya wakalimvwa buti naakazyiba kuti zibi zyakwe zyakalekelelwa?

²⁰ Jehova ulaziyanda zintu ziluleme alimwi zisalala. Ulacisulaika cibi. (Habakuku 1:13) Pele tatusulaiki swebo pe. Kufwumbwa kuti cibi twacibona mbuli mbwacibona, nkokuti ikusulaika zintu zibyaabi, kuyanda zintu zibotu, alimwi akusolekesya kutobela mumikondo ya Jesu Kristo iilondokede, Jehova ulatulekelela zibi zyesu. (Amosi 5:15; 1 Petro 2:21) Notuzyiba kuti tulakonzya kuba bantu basalala mumeso aa Leza wesu uusalala, zintu zikonzya kucitika zilakonzya kutugambya. Amuyeeye kuti, kumatalikilo ibusalali bwa Jehova bwakayeezya Isaya kujatikizya kutasalala kwakwe. Wakalila ulaamba: “Maawe mebo!” Pele mbwaakazyiba buyo kuti zibi zyakwe zyakalekelelwa, wakakkomana kapati. Ciindi Jehova naakabuzya wakali kunga walisungula kucita mulimo umwi, cakufwambaana Isaya wakaingula, nokuba kuti tanaakazizyi azyakajatikizyidwe mumulimo ooyo. Cakufwambaana wakaingula ulaamba: “Ndime aano! Kondituma!”​—Isaya 6:5-8.

21. Nduzyibo nzi ndotujisi ilutupa kusyoma kuti tulakonzya kuba bantu basalala?

²¹ Twakalengwa mucinkozya ca Leza uusalala, alimwi twakalengwa katujisi bube bujatikizya kulilemeka alimwi anguzu zyakumvwisya zintu zijatikizya Leza. (Matalikilo 1:26) Toonse inga tulacikonzya kuba bantu basalala. Mbotuyaabuzumanana kubelekela kuti tube bantu basalala, Jehova ulatugwasya. Kwiinda mukucita boobo, tuyooba acilongwe ciyumu a Leza wesu uusalala. Kunze lyaboobo, twanoolanga-langa bube bwa Jehova muzibalo zitobela, tulabona kuti kuli twaambo tubotu kapati tumbi itweelede kutupa kuba acilongwe anguwe!