1-3. (a) Ino nkaambo nzi mwaapostolo Paulo ncaabijilwa kapati mumoyo ciindi nali mu Atene? (b) Ncinzi ncotukonzya kwiiya kwiinda mukulanga-langa cikozyanyo ca Paulo?

 PAULO wabijilwa kapati mumoyo. Uli mu Atene yamu Girisi, busena ikwakali zikolo zisumpukide kapati kwalo bamayi basyaabusongo mbuli Socrates, Plato, alimwi a Aristotle nkobakali kuyiisyila. Bantu bamu Atene balakuyandisya kapati kukomba. Koonse nkwaalanga, kutalikila mumatempele, mumabuwa aabuleya, alimwi amumigwagwa, Paulo wiile kubona mituni, akaambo kakuti bana Atene bakomba baleza banji. Paulo ulizyi kabotu Jehova Leza wakasimpe mbwakubona kukomba mituni. (Kul. 20:4, 5) Mwaapostolo ooyu uusyomeka ubona zintu mbuli mbwazibona Jehova, nkokuti uliisulide mituni!

² Ncaabona Paulo ciindi naanjila mumusika, cilagambya kapati. Wabona zibumbwa zinji zyaleza uutegwa Herme kazibikkidwe ambali kunyika lwaambo, afwaafwi amulyango mupati ubelesyegwa kunjila mukati. Mumusika kuli malende manji. Ino mwaapostolo ooyu musungu ulabakambaukila buti bantu aaba bayandisya kukomba mituni? Sena ulacikonzya kutondezya kulilesya akujana makani akonzya kubapa kubikkila maano baswiilizi bakwe? Sena ulazwidilila kugwasya bamwi akati kabo kutegwa bamuyandaule Leza wakasimpe akumujana ncobeni?

³ Makani Paulo ngaakaamba kubaalumi bayiide bamu Atene, aalembedwe ku Milimo 17:22-31, apa cikozyanyo cibotu cakupasaula kukanana alimwi akubelesya bupampu. Kwiinda mukulanga-langa cikozyanyo ca Paulo, tulakonzya kwiiya zinji caboola kukwaamba twaambo ntobakonzya kuzumina baswiilizi besu alimwi akubagwasya kuyeeya.

4, 5. Ino nkuli Paulo nkwaakali kukambaukila ciindi naakali mu Atene, alimwi ino musyobo nzi uukatazya wabantu mbaakajana?

⁴ Paulo wakaswaya Atene mulweendo lwakwe lwabili lwabumisyinali cakuma 50 C.E. a Naakali kulindila Sila a Timoteyo kuti basike kuzwa ku Bereya,  Paulo “mucikombelo wakatalika kubapandulwida cakusalazya ba Juda,” mbubwenya mbuli mbwaakali kucita lyoonse. Alimwi wakaunka “kumusika” kubusena kwalo nkwaakali kukonzya kujana bana Atene ibatakali basicisi ba Juda. (Mil. 17:17) Musika wamu Atene iwakali kunyika lwaambo aa Acropolis, wakali kulampa mahekele aali 12 naa kwiinda waawo. Musika ooyu tiibwakali buyo busena bwakucitila makwebo, pele lyakali bbuwa lyamumunzi ilyabanamaleya. Bbuku limwi lyakaamba kuti oobu mbobusena ibwakali kubandikilwa makani “aamakwebo, mapolitikisi alimwi azilengwa.” Bana Atene cakali kubakkomanisya kuunka kumusika kutegwa bakabandike makani aabusongo.

⁵ Paulo wakajana baswiilizi bakatazya kapati ookuya kumusika. Akati kabo kwakali ba Epikureya alimwi aba Stoiki, ibakali kuzulilwa muzikolo izyakali kuzundana mukusumpula busongo bwabantu. b Ba Epikureya bakali kusyoma kuti buumi bwakasanduka buya. Bakali kwaamba boobu kujatikizya buumi: “Taakwe kaambo keelede kutupa kuyoowa Leza; Wafwa kunyina nokonzya kumvwa kucisa; Zintu zibotu tulakonzya kuzizuzikizya; Zintu zibi tulakonzya kuliyumya.” Ba Stoiki balo, bakali kusyoma kuti bantu balakonzya kuba abuumi bubotu kwiinda mubusongo bwabo alimwi tiibakali kusyoma kuti Leza Muntu uyeeya alimwi ulaambwalimvwa. Ba Epikureya alimwi aba Stoiki tiibakali kusyoma kuti kuli bubuke kweelana ambobakali kuyiisya basikwiiya ba Kristo. Cilalibonya kuti, kasimpe katakatazyi kumvwa nkaakali kukambauka Paulo kalo nkobakali kusyoma Banakristo bakasimpe, kakaliindene kapati anjiisyo ziyeeme abusongo bwabantu zyalo nzyobakali kusyoma ba Epikureya alimwi aba Stoiki.

6, 7. Ino basyaabusongo bana Giriki bamwi bakacita buti kumakani Paulo ngaakali kuyiisya, alimwi nkukozyanya nzi nkotukonzya kujana mazuba aano?

⁶ Ino ba Giriki basyaabusongo bakaatambula buti makani ngaakali kuyiisya Paulo? Bamwi bakali kumwiita kwiinda mukubelesya mabala aamba muntu “simalabali,” naa “mubwelebwezi.” (Mil. 17:18) Kujatikizya bbala eeli lya Chigiriki, syaazibwene umwi wakalemba kuti: “Bbala eeli lyakali kubelesyegwa kwaamba kayuni ikakali kugomenena maila, mpoonya kumbele lyakatalika kubelesyegwa kwaamba muntu iwakali kubwezelela bufwefwelenga bwazyakulya, limwi waakulijana kumusika. Nokuba boobo mukuya kwaciindi, lyakatalika kubelesyegwa munzila yamaambilambali kwaamba muntu uuli woonse iwakali kuyaabuswiilila makani ngatakonzyi kumvwisya.” Mubwini, baalumi aaba bayiide bakali kwaamba Paulo kuti kunyina ncaakazyi alimwi akuti wakali kwiile kwiinduluka buyo makani ngaakamvwa bamwi kabaamba. Nokuba boobo, Paulo kunyina naakayoowa akaambo kakufwubaazyigwa ooko mbubwenya mbotulaabone.

⁷ Oobo mbocibede amazuba aano. Mbotuli Bakamboni ba Jehova, kanji-kanji bantu balatufwubaazya akaambo kanjiisyo zyamu Bbaibbele nzyotusyoma. Mucikozyanyo, bamayi bamwi bayiisya kuti makani aakusanduka ngamasimpe alimwi akuti naa koli musongo nkokuti weelede kwaasyoma. Mubwini, babona baabo bataasyomi makani aaya kuti balaziima. Aaba basyaabusongo bayanda kuti bantu kabatubona kuti tuli ‘babwelebwezi’ ciindi notubaambila ncolyaamba Bbaibbele alimwi akubagwasyilizya kubona kuti kuli Mulengi. Pele tatuyoowi pe. Muciindi caboobo, tulaamba kwiiminina nzyotusyoma cabusicamba ciindi notubapandulwida kuti buumi bwakalengwa buya a Mulengi musongo, Jehova Leza.—Ciy. 4:11.

8. (a) Ino baswiilizi ba Paulo bamwi bakacita buti? (b) Ino nkaambo nzi Paulo ncaakatolwa ku Areopagi? (Amubone bupanduluzi buyungizyidwe.)

 ⁸ Bamwi bakamubona munzila iindene Paulo ciindi naakali kukambauka kumusika. Bakaamba kuti, “Uboneka kuti ngusikwaambilizya baleza bamasi.” (Mil. 17:18) Sena masimpe kuti Paulo wakali kwaambilizya baleza beenzu kuli bana Atene? Aaya akali makani mapati alo aakapa kuti Socrates apegwe mulandu wakujaigwa myaka minji iyakaindide. Aboobo tacigambyi kuti Paulo wakatolwa ku Areopagi kutegwa akapandulule kujatikizya njiisyo zipya nzyaakali kuyiisya bana Atene. c Ino mbuti Paulo mbwaakali kuyakwaayiminina makani ngaakali kuyiisya, kubantu aaba ibakanyina luzyibo luli loonse lwamu Magwalo?

9-11. (a) Mbuti Paulo mbwaakasolekesya kwaamba twaambo ntobazuminana abaswiilizi bakwe? (b) Mbuti mbotukonzya kwiiya cikozyanyo ca Paulo mubukambausi?

⁹ Kamuyeeya kuti Paulo wakabijilwa kapati mumoyo akaambo kamituni njaakabona. Pele muciindi cakufwambaana kusola kubapa kuti bacileke kukomba mituni,  Paulo wakakkazika moyo. Wakabelesya twaambo ntobazuminana abaswiilizi bakwe kutegwa abape kuba aluyandisisyo. Wakatalika kwiinda mukwaamba kuti: “Nobaalumi bamu Atene, ndabona kuti muzintu zyoonse nywebo mulibonya kuti mulabayoowa kapati baleza kwiinda bamwi.” (Mil. 17:22) Munzila imwi, Paulo wakali kwaamba kuti, ‘Ndabona kuti mulayandisya kukomba.’ Cabusongo, Paulo wakabalumbaizya akaambo kakuti bakali bakombi. Wakalizyi kuti bamwi ibakali kusyoma njiisyo zyakubeja, bakali kukonzya kukatambula kasimpe. Amana buya, Paulo wakalizyi kuti walo kumugama aciindi cimwi wakali ‘kucita zintu cakutazyiba alimwi wakanyina lusyomo abuniini.’—1 Tim. 1:13.

¹⁰ Kazumanana kwaamba twaambo ntobazuminana, Paulo wakaamba kuti wakabona cipaililo ca “Leza Uutazyibidwe” ncobakayaka kuti, bwakali bumboni butakonzyi kuzumbauzyigwa bwakuti bana Atene bakali kubuyandisya bululami. Bbuku limwi lyakaamba kuti: “Cakali cilengwa kuba Giriki alimwi abamwi kuyakila ‘baleza batazyibidwe’ zipaililo akaambo kakuyoowa kuti balakonzya kusiya leza umwi mubukombi bwabo calo cikonzya kupa kuti ooyo leza wasiigwa anyeme.” Kwiinda mukuyaka cipaililo eeco, bana Atene bakali kuzumina kuti kuli Leza uupona walo ngobatakazyi. Paulo wakabelesya cipaililo eeci kutegwa abaambile makani mabotu ngaakali kukambauka. Wakapandulula kuti: “Ooyo ngomukomba cakutazyiba, ooyu ngonguwe ngondaambilizya kulindinywe.” (Mil. 17:23) Bukambausi bwa Paulo bwakali anguzu nokuba kuti bwakali bwakwiinda mumbali. Tanaakali kukambauka baleza beenzu kweelana abantu bamwi mbobaamba. Pele wakali kukambauka kujatikizya Leza ngobatakazyi—nkokuti Leza wakasimpe.

¹¹ Mbuti mbotukonzya kwiiya cikozyanyo ca Paulo mumulimo wamumuunda? Ikuti katubikkila maano, tulakonzya kubona kuti muntu ulayandisya kukomba, andiza kwiinda mukubona zintu nzyasamide, zili muŋanda, naa zintu nzyabikkide alubuwa. Tulakonzya kwaamba kuti: ‘Ndabona kuti mulakuyandisya kukomba. Ndali kuyandisya kubandika amuntu uubikkila kapati maano zyabukombi.’ Kwiinda mukuzyiba muntu mbwaabona makani aajatikizya bukombi kulakonzya kutugwasya kubamba kabotu ntalisyo. Katuyeeya kuti taali makanze eesu kubeteka bantu kweelana abukombi bwabo. Bunji bwabakwesu abacizyi mazuba aano bakali kusyoma njiisyo zyabukombi bwakubeja aciindi cimwi.

12. Mbuti Paulo mbwaakali kucinca-cinca nzila zyabukambausi nzyaakali kubelesya?

¹² Paulo wakatalika mubandi wakwe atwaambo ntobazuminana abaswiilizi bakwe, pele sena wakali kuyoozumanana kutubelesya twaambo ooto atalika kubakambaukila? Paulo wakali kucinca-cinca nzila nzyaakali kubelesya nkaambo wakalizyi kuti baswiilizi bakwe bakaiya kapati busyaabusongo bwaba Giriki alimwi kunyina ncobakazyi kujatikizya Magwalo. Cakusaanguna, wakabelesya makani aali mu Bbaibbele kakunyina kwaazubulula cacigaminina Magwalo ngaakali kubandika. Cabili, wakali kupa baswiilizi bakwe kulimvwa kuti balabikkilwa maano alimwi akuti walo kumugama wakali mbubwenya mbuli mbabo. Catatu, wakali kuzubulula nzyaakali kwaamba zimwi kuzwa mumabbuku aa Chigiriki kutegwa babone kuti nzyaakali kuyiisya zyakali kujanika amumabbuku aabo beni. Lino atwaalange-lange majwi aanguzu ngaakaamba Paulo. Ntwaambo nzi twamasimpe ntwaakabasalazyila bana Atene kujatikizya Leza uutazyibidwe kulimbabo?

13. Ino Paulo wakaamba nzi kujatikizya kulengwa kwazintu, alimwi ncinzi ncaakali kupandulula?

 ¹³ Leza wakalenga julu anyika. Paulo wakaamba kuti: “Leza iwakalenga nyika azintu zyoonse zili mumo, mbwaanga ngo Mwami wakujulu aanyika, takkali mumatempele aakayakwa amaanza.” d (Mil. 17:24) Bubumbo tiibwakasanduka buya pe. Leza wakasimpe ngo Mulengi wazintu zyoonse. (Int. 146:6) Mukwiimpana abaleza babana Atene naa baleza bambi buyo balo ibakali kulemekwa akaambo katempele, malende naa cipaililo mpobakali kukkala, Mwami Singuzuzyoonse wakujulu alimwi aanyika takonzyi kukkwana mumatempele ngobayaka bantu. (1 Bam. 8:27) Ncaakali kupandulula Paulo cakalisalede kuti: Leza wakasimpe wakali mupati kapati kwiinda mituni iili yoonse iyakali kupangwa abantu alimwi iyakali kukkala mumatempele aakapangwa abantu.—Is. 40:18-26.

14. Mbuti Paulo mbwaakatondezya kuti Leza takonzyi kugwasyigwa amuntu?

¹⁴ Leza tayandiki lugwasyo kuzwa kubantu. Cakali cilengwa kuli basikukomba mituni kusamika zibumbwa zyabo zisani zidula, kuleta zipego zidula, zyakulya alimwi azyakunywa mbuli kuti mituni kuli noiyandika zintu eezyi! Nokuba boobo, kweelede kuti basyaabusongo bana Giriki bamwi bakali kusyoma kuti baleza tabayandiki lugwasyo kuzwa kubantu. Ikuti naa mbocakabede oobo, nkokuti bakali kuzuminana amajwi aa Paulo aakuti Leza “tabelekelwi amaanza aabantu mbuli kuti kuli nabula cintu.” Masimpe, kunyina cintu bantu ncobakonzya kumupa kutegwa bamugwasye Mulengi! Muciindi caboobo, walo nguupa bantu nzyobayandika—nkokuti “buumi, muya alimwi azintu zyoonse,” kubikkilizya azuba, mvwula alimwi abulongo bubotu. (Mil. 17:25; Matl. 2:7) Aboobo, Leza Sikupa zintu zyoonse, talangili lugwasyo kuzwa kubantu balo ibalindila kugwasyigwa.

15. Ino Paulo wakakululamika buti kuyeeya nkobakali kusyoma bana Giriki kwakuti balisumpukide kapati kwiinda bantu batali ba Giriki, alimwi nciiyo nzi ciyandika kapati ncotwiiya kucikozyanyo ca Paulo?

¹⁵ Leza wakalenga muntu. Bana Atene bakali kusyoma kuti balisumpukide kwiinda bantu ibatakali ba Giriki. Pele kusalaulana mubala takweendelani pe akasimpe  kali mu Bbaibbele. (Dt. 10:17) Paulo wakabaambila makani aaya munzila yabupampu. Ciindi Paulo naakaamba kuti, “[Leza] kuzwa kumuntu omwe wakalenga bantu ibali muzisi zyoonse,” tacidoonekwi buya kuti majwi aaya akabapa kukkala ansi kuyeeya baswiilizi bakwe. (Mil. 17:26) Wakali kwaamba cibalo cabbuku lya Matalikilo icaamba zya Adamu, ikwakazwa musyobo wabantu. (Matl. 1:26-28) Mbwaanga bantu boonse bazwa kumuntu omwe, nkokuti taakwe mwaambo uusumpukide kapati kwiinda weenzinyina. Baswiilizi ba Paulo bakakabona kaambo. Kuli ciiyo ciyandika kapati ncotwiiya kucikozyanyo ca Paulo. Nokuba kuti tweelede kunyoneka alimwi akubelesya bupampu ciindi notuli mumulimo wakukambauka, tatuyandi kusiya kasimpe kali koonse kamu Bbaibbele akaambo buyo kakuyanda kuti bantu bakatambule.

16. Makanze nzi Mulengi ngajisi kujatikizya bantu?

¹⁶ Makanze aa Leza aakuti bantu baswene kulinguwe. Nokuba kuti basyaabusongo ibakali kuswiilila Paulo bakali kukazyanya kwaciindi cilamfwu ikaambo muntu ncaponena, nobatakacikonzya kwaapandulula munzila iisalede makani aaya. Nokuba boobo, Paulo wakaamba cakusalazya makanze ngajisi Mulengi kujatikizya bantu, nkokuti “kutegwa bamuyandaule Leza, nokuba kwaampaampa buya akumujana ncobeni nokuba kuti mubwini tali kulamfwu kuli umwi aumwi wesu.” (Mil. 17:27) Cakali kukonzyeka kumuzyiba Leza iwatakazyibidwe kubana Atene. Alimwi buya tali kulamfwu kuli baabo ibayanda ncobeni kumuzyiba alimwi akwiiya kujatikizya nguwe. (Int. 145:18) Amubone kuti Paulo wakabelesya mabala aakuti “wesu,” ikutondezya kuti wakali kulibikkilizya ali baabo ibayandika ‘kumuyandaula’ alimwi ‘akumwaampaampa’ Leza.

17, 18. Nkaambo nzi bantu ncobeelede kumuyanda Leza, alimwi ncinzi ncotukonzya kwiiya kuli Paulo kujatikizya mbwaakabapa kuba aluyandisisyo baswiilizi bakwe?

¹⁷ Bantu beelede kumuyanda Leza. Paulo wakaamba kuti, Leza, “nguutupa  buumi, kweenda akupona.” Basyaazibwene bamwi baamba kuti Paulo wakali kuzubulula majwi ngaakalemba Epimenides, sikweema muna Krete wamumwaanda wamyaka wacisambomwe B.C.E. alimwi majwi aayo “akali kubelesyegwa kapati lyazilengwa izyabukombi mu Atene.” Paulo wakaamba akambi kaambo bantu ncobeelede kumuyanda Leza kakuti: “Basikweema banu bamwi mbobaamba kuti, ‘Nkaambo andiswe tuli bana bakwe.’” (Mil. 17:28) Bantu beelede kulimvwa kuti bajisi cilongwe cibotu a Leza akaambo kakuti walo ngowakali usyi wamuntu wakusaanguna, nkobakazwa bantu boonse. Kutegwa abakwelelezye baswiilizi bakwe, cabusongo Paulo wakazubulula magwalo aa Chigiriki alo ambweni ngobakali kulemeka kapati baswiilizi bakwe. e Mbubwenya mbuli Paulo, zimwi ziindi tulakonzya kuzubulula kuzwa mumabbuku aakunyika aamba makani aakaindi naa mabbuku aambi aayelela mbuli ma encyclopedia. Mucikozyanyo, kuzubulula makani ngobazyi kabotu bantu kulakonzya kugwasya muntu uutali Kamboni kuzyiba matalikilo aazilengwa zimwi zyabukombi bwakubeja.

¹⁸ Nokuba kusikila aciindi eeci, Paulo wakali kubaambila kasimpe kajatikizya Leza kwiinda mukubelesya twaambo ntobakazyi baswiilizi bakwe. Ino ncinzi mwaapostolo ooyu ncaakali kuyanda kuti bana Atene bacite kumulumbe wakwe ooyu uuyandika kapati? Kakunyina akusowa ciindi, wakabaambila cakucita ciindi naakazumanana amakani aakwe.

19, 20. (a) Mbuti Paulo cabupampu mbwaakayubununa bufwubafwuba bwakukomba mituni iipangwa abantu? (b) Nintaamu nzi baswiilizi ba Paulo njobakeelede kubweza?

¹⁹ Paulo wakalilibambilide kukulwaizya baswiilizi bakwe kuti babweze ntaamu. Kazubulula kuzwa mumabbuku aa Chigiriki wakati: “Aboobo mbwaanga tuli bana ba Leza, tatweelede kuyeeya kuti Leza uli mbuli ngolida, nsiliva naa bbwe, mbuli cintu cibezedwe eeco basyaazibwene ncobakaide kuyeeyela buyo akupanga.” (Mil. 17:29) Ikuti bantu bakalengwa aa Leza, ino mbuti Leza mbwakonzya kuba mutuni, cintu cipangwa amuntu? Majwi aa Paulo aanguzu akatondezya bantu mbobakafwubeede kwiinda mukukomba mituni yalo iipangwa abantu. (Int. 115:4-8; Is. 44:9-20) Kwiinda mukwaamba kuti “tatweelede . . . ,” Paulo wakapa kuti lulayo ndwaakapa lutabanyemyi baswiilizi bakwe.

²⁰ Mwaapostolo wakacitondezya antangalala kuti ntaamu yakali kuyandika naakati: “Leza wazileka buyo ziindi zyakutazyiba kuli boobu [nkokuti kwakuyeeya kuti Leza ulakonzya kukkomanina bantu bakomba mituni], pele lino waambila bantu boonse bali kumasena oonse kuti beelede kweempwa.” (Mil. 17:30) Kweelede kuti baswiilizi bakwe bamwi bakagambwa kumumvwa Paulo kabaambila kuti beempwe. Nokuba boobo, majwi aakwe aanguzu akatondezya antangalala kuti bakaleelede kumumvwida Leza alimwi akuti bakali kuyoolyaambilila Kulinguwe. Bakeelede kumuyandaula Leza, kwiiya kasimpe kujatikizya nguwe alimwi akupona kweelana akasimpe  aako. Kubana Atene, eeci cakali kwaamba kuzyiba kuti kukomba mituni ncibi alimwi akucitantamuka cibi eeco.

21, 22. Majwi nzi aanguzu Paulo ngaakaamba kumamanino aamakani aakwe, alimwi ino majwi aaya atujatikizya buti swebo mazuba aano?

²¹ Paulo wakamanizya makani aakwe amajwi aanguzu kapati aakuti: “[Leza] wabikka buzuba mbwayoobeteka nyika mubululami kwiinda mumuntu ngwasalide, alimwi wapa cisinizyo kubantu boonse kwiinda mukumubusya kubafwu.” (Mil. 17:31) Buzuba Bwalubeta ibuboola, eelo kaka nkaambo kalimvwisya kakeelede kubapa kumuyandaula Leza wakasimpe akumujana! Paulo tanaakamwaamba zina Mubetesi uusalidwe. Muciindi caboobo, Paulo wakaamba cintu cimwi cigambya kujatikizya Mubetesi ooyu cakuti: Wakapona kali muntu, wakafwa alimwi wakabusyigwa a Leza kuzwa kubafwu!

²² Majwi aakulwaizya ngaakaamba kumamanino alatujatikizya kapati swebo mazuba aano. Tulizyi kuti Mubetesi ngwaakasala Leza ngu Jesu Kristo iwakabusyigwa kuzwa kubafwu. (Joh. 5:22) Alimwi tulizyi kuti Buzuba bwa Lubeta buyootola myaka iili 1,000 alimwi bwaswena afwaafwi. (Ciy. 20:4, 6) Kunyina pe notubuyoowa Buzuba bwa Lubeta, nkaambo tulizyi kuti buyooleta zilongezyo zitaambiki kuli baabo ibayoojanika kuti balasyomeka. Tulaalusyomo lwakuti bulangizi bwesu bubotu bwakumbele buyoozuzikizyigwa akaambo kamaleele mapati aakacitika—ikubusyigwa kwa Jesu Kristo kuzwa kubafwu!

23. Sena bakali boonse ibakautambula mulumbe wa Paulo?

²³ Tabali boonse ibakautambula mulumbe wa Paulo. “Bamwi bakatalika kumuseka” nobakamvwa zyakubuka kwabafwu. Kakuli bamwi bakatondezya bulemu nokuba kuti tiibakeempwa, bakali kwaamba kuti: “Tuyookumvwa alimwi kujatikizya makani aaya.” (Mil. 17:32) Nokuba boobo: “Baalumi bamwi bakamusangana alimwi bakaba basyomi. Akati kabaaba kwakali Dionisiyo, imubetesi munkuta ya Areopagi, amukaintu uutegwa Damarisi alimwi abambi kunze lyabaaba.” (Mil. 17:34) Oobo mbobacita bantu ciindi notuli mumulimo wamumuunda. Bamwi balakonzya kutufwubaazya kakuli bamwi balakonzya kutondezya bulemu. Nokuba boobo, tulakkomana kapati ciindi bamwi nobautambula mulumbe wa Bwami akuba basyomi.

24. Ncinzi ncotukonzya kwiiya kumajwi Paulo ngaakaamba kali mu Areopagi?

²⁴ Nzinji nzyotukonzya kwiiya kwiinda mukulanga-langa mulumbe wa Paulo. Twiiya kwaamba makani munzila iitobeleka, kwaamba twaambo ntobatakonzyi kudooneka baswiilizi alimwi akucinca-cinca kweelana abaswiilizi mbotwajana. Kuyungizya waawo, twiiya kukkazika moyo alimwi akubelesya bupampu ciindi notukambaukila baabo ibasyoma njiisyo zyabukombi bwakubeja. Nceeci alimwi ciiyo ciyandika kapati ncotwiiya: Tatweelede kuubyaubya kasimpe kali mu Bbaibbele akaambo kakuyanda kukkomanisya baswiilizi besu. Pele, kwiinda mukwiiya cikozyanyo camwaapostolo Paulo, tulakonzya kuba bamayi bacibwene mumulimo wamumuunda. Kuyungizya waawo, balangizi abalo balakonzya kuba bamayi bacibwene mumbungano. Aboobo tunoolibambilide cakumaninina kugwasya bamwi kutegwa “bamuyandaule Leza . . . akumujana ncobeni.”—Mil. 17:27.