CIBALO 17
“Wakali Kubasalazyila Magwalo”
Mpokuyeeme kuyiisya kabotu; cikozyanyo cibotu cabana Bereya
Kweelana a Milimo 17:1-15
1, 2. Ino mbaani bali mulweendo kuzwa ku Filipi kuya ku Tesalonika, alimwi kweelede kuti bayeeya nzi?
MUGWAGWA weebeka, iwakapangwa abasyaazibwene bana Roma iwiinda mumalundu. Mumugwagwa ooyu kanji-kanji inga kulimvwisya kulila kwambongolo, coongo camavwili aankalaki, alimwi kulalimvwisya acoongo cabantu baindene-indene mbuli, basimakwebo, basikalumamba abasyaazibwene muzyakupanga-panga. Baalumi botatwe Paulo, Sila a Timoteyo bayaabweenda mumugwagwa ooyu musinzo uulampa makkilomita aainda ku 130, bazwa ku Filipi kuya ku Tesalonika. Oolu ndweendo lukatazya, kwaambisya kuli Paulo a Sila. Kayi bacijisi zilonda nzyobakalicisa ku Filipi, ciindi nobakaumwa amisako.—Mil. 16:22, 23.
2 Ino baalumi aaba balaliyumya buti mumusinzo ooyu uucili mulamfwu? Mibandi iili akati kabo njiyagwasya kapati. Baciyeeyede kujatikizya cakuluula cikkomanisya camulindizi wantolongo waku Filipi walo amukwasyi wakwe mbobakaba basyomi. Eeci cacitika capa kuti basilweendo aaba bayumizyigwe kuzumanana kwaambilizya jwi lya Leza. Nokuba boobo, nobayaabuswena kumunzi wa Tesalonika uuli kunkomwe, ambweni baleezyeezya naa ba Juda bamumunzi ooyu balabatambula buti. Sena balabalwana naa kubauma buya, mbuli mbobakaumwa ku Filipi?
3. Ino cikozyanyo ca Paulo cakuba abusicamba bwakukambauka inga catugwasya buti mazuba aano?
3 Kumbele, Paulo wakatondezya mbwaakali kulimvwa mulugwalo ndwaakalembela Banakristo baku Tesalonika kuti: “Nokuba kuti musyule twakapenga akusampaulwa ku Filipi, mbubonya mbomuzyi, Leza wakatupa busicamba bwakuti tumwaambile makani mabotu aa Leza nokuba kuti twakali kukazyigwa kapati.” (1 Tes. 2:2) Kweelana amajwi aaya, kulibonya kuti Paulo wakalilibilikide kunjila mumunzi wa Tesalonika, kwaambisya ayeeya zyakacitika ku Filipi. Sena mulakonzya kubumvwisya bukkale bwa Paulo? Sena cilamuyumina kukambauka makani mabotu? Paulo wakasyoma Jehova kuti amuyumye akumugwasya kuba abusicamba mbwaakali kuyandika. Kwiiya cikozyanyo ca Paulo kulakonzya kumugwasya andinywe.—1 Kor. 4:16.
“Wakali Kubasalazyila Magwalo” (Milimo 17:1-3)
4. Ncinzi citondezya kuti Paulo wakakkala mvwiki ziinda kuli zyotatwe mu Tesalonika?
4 Cibalo citwaambila kuti naakacili mu Tesalonika, Paulo wakali kukambauka mucikombelo kwama Sabata otatwe. Sena eeci caamba kuti wakakkala buyo mvwiki zyotatwe mudolopo eeli? Peepe. Tatuzyi ciindi cini Paulo naakatalika kuunka mucikombelo kuzwa naakasika mudolopo eeli. Kuyungizya waawo, magwalo aa Paulo atondezya kuti nobakali ku Tesalonika, walo abeenzinyina bakali kubeleka kutegwa kabaligwasyilizya. (1 Tes. 2:9; 2 Tes. 3:7, 8) Kunze lyaboobo, kacili mumunzi ooyu, ziindi zyobilo Paulo wakatambula zintu zyakuligwasya kuzwa kubakwesu baku Filipi. (Flp. 4:16) Aboobo cilalibonya kuti wakakkala mu Tesalonika mvwiki ziinda ali zyotatwe.
5. Muunzila nzi Paulo mwaakabasika amoyo baswiilizi bakwe?
5 Naakaba abusicamba bwakukambauka, Paulo wakabandika abaabo bakabungene mucikombelo. Kweelana acilengwa cakwe “wakali kubasalazyila Magwalo, kapandulula akutondezya kwiinda muzilembedwe kuti cakaleelede kuti Kristo apenge akubuka kubafwu, wakati: ‘Ooyu ngo Kristo, ooyu Jesu ngondaambilizya kulindinywe.’” (Mil. 17:2, 3) Amubone kuti Paulo kunyina naakaambila baswiilizi bakwe zintu nzyobakali kuyanda kumvwa, pele wakali kubandika ambabo munzila yakali kubapa kuyeeya. Wakalizyi kuti aabo ibakali mucikombelo bakalaazyi alimwi akwaalemeka Magwalo. Nkuti buyo tiibakali kwaamvwisya. Aboobo Paulo, wakabandika, kupandulula alimwi akutondezya kuzwa mu Magwalo kuti Jesu waku Nazareta ngo Mesiya wakasyomezyedwe naa Kristo.
6. Mbuti Jesu mbwaakali kupandulula kuzwa mu Magwalo, alimwi ncinzi cakacitika?
6 Paulo wakatobela cikozyanyo ca Jesu, walo iwakali kubelesya Magwalo mukuyiisya kwakwe. Mucikozyanyo, ciindi naakali kukambauka kubuleya, Jesu wakaambila basikumutobela kuti kweelana a Magwalo, Mwanaamuntu wakali kuyoopenga, kufwa, alimwi akubusyigwa kuzwa kubafwu. (Mt. 16:21) Naakabusyigwa, Jesu wakalibonya kuli basikwiiya bakwe. Eeci citondezya kuti ani wakali kwaamba masimpe. Nokuba boobo, Jesu tanaakagolela buyo waawa pe. Kujatikizya zintu nzyaakaambila basikwiiya bakwe bamwi, tubala kuti: “Kutalikila kuli Musa alimwi a Basinsimi boonse, wakabapandulwida zintu zyaamba nguwe mu Magwalo oonse.” Ncinzi cakacitika? Basikwiiya bakwe bakagambwa kabati: “Sena myoyo yesu tiiyali kupya muzyamba zyesu ciindi naali kwaambaula andiswe munzila, anaali kutupandulwida Magwalo?”—Lk. 24:13, 27, 32.
7. Nkaambo nzi ncociyandika kuti nzyotuyiisya kaziyeeme a Jwi lya Leza?
7 Mulumbe wa Jwi lya Leza ulaanguzu. (Heb. 4:12) Mbubwenya mbuli Jesu, Paulo alimwi abaapostolo bamwi, nzyobayiisya Banakristo mazuba aano ziyeeme a Jwi lya Leza eeli. Andiswe tulabandika abantu, kubapandulwida ncaamba Magwalo, alimwi akusinizya nzyotuyiisya kwiinda mukubabalila Bbaibbele kubatondezya buya bamukamwiniŋanda ncolyaamba. Cili boobu, nkaambo mulumbe ngotukambauka tauli wesu pe. Kwiinda mukubelesya Bbaibbele kanji-kanji, tugwasya bantu kuzyiba kuti nzyotukambauka, taili mizeezo yesu, pele mizeezo ya Leza. Kuyungizya waawo, tatweelede kuluba kuti mulumbe ngotukambauka uyeeme a Jwi lya Leza. Ulasyomeka cakumaninina. Eelo kaka kuzyiba makani aaya, kutupa nguzu zyakuzumanana kwaaambilizya mulumbe cabusicamba mbubwenya mbuli Paulo!
“Bamwi . . . Bakaba Basyomi” (Milimo 17:4-9)
8-10. (a) Ino bantu baku Tesalonika bakaatambula buti makani mabotu? (b) Nkaambo nzi bamwi ncobakamufwida munyono Paulo? (c) Ino ba Juda basikukazya bakacita buti?
8 Paulo wakalibonena mbwaali aamasimpe majwi aa Jesu aakuti: “Muzike tali mupati kwiinda simalelaakwe. Ikuti bakandipenzya mebo, bayoomupenzya andinywe; ikuti bakaatobela majwi aangu, bayakwaatobela amajwi aanu.” (Joh. 15:20) Mu Tesalonika, Paulo wakabona kuti bantu bakaliindene-indene, bamwi bakalilibambilide kulitobela jwi, mpoonya bamwi bakali kulikaka. Kujatikizya baabo ibakalitambula, Luka wakalemba kuti: “Bamwi akati kabo [ba Juda] bakaba basyomi [Banakristo] alimwi bakasangana Paulo a Sila, alimwi ba Giriki banji ibakali kukomba Leza, antoomwe abamakaintu banji balemekwa abalo bakacita oobo.” (Mil. 17:4) Eelo kaka Banakristo aaba bakakkomana kugwasyigwa kwaamvwisya Magwalo!
9 Nokuba kuti bamwi bakali kwaakkomanina majwi aa Paulo, bamwi akali kubanyemya. Ba Juda bamwi mu Tesalonika bakaba amunyono nkaambo “ba Giriki banji” bakautambula mulumbe wa Paulo. Aabo ba Juda, kabajisi makanze aakupanga ba Juda basandule, bakayiisya ba Giriki Bamasi Magwalo aa Chihebrayo alimwi akutalika kubabona kuti aabo ba Giriki bazulilwa kuli mbabo. Aboobo, cakutayeeyela bakatalika kulimvwa kuti Paulo wakali kubabwezela ba Giriki aabo mumonya mucikombelo. Eelo kaka eeci cakabanyemya ba Juda!
‘Bakabayandaula kutegwa babalete kunkamu yabantu.’—Milimo 17:5
10 Luka ulatwaambila cakatobela naakati: “Ba Juda bakaba amunyono, eelyo bakabunganya baalumi bamwi babyaabi ibakali kwiingaila amusika eelyo bakapanga nkamu akutalika kunyonganya munzi. Bakanjila muŋanda ya Jasoni kabayandaula Paulo a Sila kutegwa babalete kunkamu yabantu. Nobatakabajana, bakakwelaanya Jasoni abakwesu bamwi kubatola kubeendelezi bamumunzi, kaboompolola kuti: ‘Bantu aaba ibanyonganya nyika nkobali akokuno, eelyo Jasoni wabatambula kuti babe beenzu bakwe. Bantu aaba boonse tabaitobeli milawo ya Kaisara, baamba kuti kuli mwami uumbi uutegwa Jesu.’” (Mil. 17:5-7) Ino kulwanwa ankamu eeyi kwakali kuyoomujatikizya buti Paulo abeenzinyina?
11. Milandu nzi njaakapegwa Paulo abasikwaambilizya Bwami beenzinyina, alimwi mulawo nzi ngobakali kuyeeya basikubakazya? (Amubone bupanduluzi buyungizyidwe)
11 Bantu balacita zintu zibyaabi kapati kuti bapanga nkamu yamanyongwe. Balanyonyoona citaambiki, mbakali alimwi tabanyoneki mbuli mulonga iwazula. Eeci ncecilwanyo ba Juda ncobakabelesya kutegwa batande Paulo a Sila mumunzi wabo. Nobakamana kutalisya ‘manyongwe mumunzi’ bakasola koongelezya beendelezi kwiinda mukubaambila kuti kwakali milandu mipati. Mulandu wakusaanguna ngobakapegwa wakali wakuti, Paulo alimwi abasikwaambilizya Bwami beenzinyina, ‘banyonganya nyika,’ kakuli walo Paulo abeenzinyina kunyina anobakatalisya manyongwe mu Tesalonika. Mulandu wabili wakali mupati ncobeni. Ba Juda bakali kutamikizya bamisyinali aaba kuti bakali kwaambilizya Mwami uumbi, Jesu, kwalo mubwini ikwakali kutyola milawo yamubwami. a
12. Ncinzi citondezya kuti milandu njobakatamikizyigwa Banakristo ku Tesalonika niyakaleta mapenzi mapati?
12 Kamuyeeya kuti basololi bazikombelo bakapa Jesu mulandu uukozyenye ayooyu. Bakaambila Pilato kuti: “Imuntu ooyu twakamujana kayunga bantu kuti babukile cisi cesu, . . . akwaamba kuti walo ngo Kristo, imwami.” (Lk. 23:2) Pilato wakazumizya kuti Jesu ajaigwe, ambweni akaambo kakuyoowa kuti bantu balayeeya kuti uzumizya kuzangila bulelo. Mbubwenya buyo, ayalo milandu njobakatamikizyigwa Banakristo baku Tesalonika niyakaleta mapenzi mapati. Bbuku limwi lyaamba kuti: “Ncuubauba kweezyeezya ntenda yakali kulangilwa kubasikila, nkaambo ‘muzeezo buyo wakuti bakazangila Bulelo kanji-kanji wakali kusololela kukujaigwa.’” Sena kukazyigwa ooku kwalunya kwakali kuyoozwidilila?
13, 14. (a) Nkaambo nzi makanze aankamu yabasimanyongwwe ncaatakazwidilila? (b) Mbuti Paulo mbwaakatondezya kucenjela nkwaakaamba Kristo, alimwi mbuti mbotukonzya kwiiya cikozyanyo cakwe?
13 Nkamu eeyi yabasimanyongwe yakaalilwa kuulesya mulimo wakukambauka mu Tesalonika. Nkaambo nzi? Kaambo kamwi nkakuti, tiibakamujana Paulo a Sila. Kunze lyaboobo, beendelezi bamumunzi tiibakakusyoma kutamikizyagwa kwabo. Nobakamana kutambula “mali aacisyomezyo aakkwene,” ambweni kutegwa kaambo kamane, bakamwaangulula Jasoni alimwi abamwi aabo ibakaletedwe kulimbabo. (Mil. 17:8, 9) Kwiinda mukutobela lulayo lwa Jesu lwakuti “amube bantu bacenjede mbuli nzoka, pele ibatajisi lweeno mbubonya mbuli nziba” Paulo cabusongo wakayeeleba ntenda eeyi kutegwa azumanane kukambauka kubusena bumbi. (Mt. 10:16) Cilalibonya kuti, busicamba mbwaakatondezya Paulo tiicakali kwaamba kuti tanaakacenjede pe. Mbuti Banakristo mazuba aano mbobakonzya kwiiya cikozyanyo cakwe?
14 Mazuba aano, basololi bazikombelo zya Bunakristo Bwanyika kanji-kanji bayunga nkamu zyamanyongwe kulwana Bakamboni ba Jehova. Inga bayunga beendelezi kuti babalwane Bakamboni, kabaamba kuti babukila naa kuzangila mfwulumende. Mbubwenya mbuli basikupenzya bamumwaanda wamyaka wakusaanguna, basikukazya bamazuba aano balacita oobo akaambo kamunyono. Mubwini, Banakristo bakasimpe kunyina nobalinjizya acaali muntenda. Kufwumbwa leelyo nocikozyeka, tulasolekesya kwaayeleba manyongwe aatalisyigwa abantu aaba ibakali alimwi ibatayeeyi kabotu, akuzumanana amulimo wesu caluumuno, naa ambweni akuyoobakambaukila zyaakukkalikila zintu.
“Bakali Amizeezo Mibotu” (Milimo 17:10-15)
15. Ino bana Bereya bakaatambula buti makani mabotu?
15 Kutegwa bakwabililwe, Paulo a Sila bakatumwa ku Bereya, ikwakali kulampa makkilomita aali 65. Mbwaakasikila buyo, Paulo wakaunka kucikombelo akutalika kubandika abaabo ibakaswaangene. Eelo kaka wakakkomana kujana nkamu iyakali kuswiilila! Luka wakalemba kuti ba Juda baku Bereya “bakali amizeezo mibotu kwiinda baku Tesalonika, nkaambo bakaliyandide kapati mumyoyo kutambula jwi, kabavwuntauzya cakulomya mu Magwalo abuzuba kutegwa babone naa zintu eezyi mbozibede ncobeni.” (Mil. 17:10, 11) Sena majwi aaya akali kutondezya kuti tiibakali kabotu aabo ibakakatambula kasimpe mu Tesalonika? Naaceya. Kumbele Paulo wakabalembela kuti: “Andiswe tulamulumba Leza cakutaleka, nkaambo nomwakatambula majwi aa Leza ngomwakamvwa kulindiswe, mwakaazumina ikutali mbuli majwi aabantu, pele mbubonya mbwaabede ncobeni, kaali majwi aa Leza, aayo alimwi aabeleka mulindinywe nobasyomi.” (1 Tes. 2:13) Aboobo, ncinzi cakapa kuti ba Juda baku Bereya kabali bantu bali aamizeezo mibotu?
16. Nkaambo nzi cakweelela bana Bereya ncobaambwa kuti bakali “amizeezo mibotu”?
16 Nokuba kuti bana Bereya bakamvwa makani mapya, tiibakaatongooka, kwaasampaula alimwi kunyina nibakaasyoma buyo akuumuna. Cakusaanguna, bakaswiilila cakubikkila maano kuzintu nzyaakali kwaamba Paulo. Mpoonya, bakavwuntauzya makani ngobakaiya kwiinda mukulanga-langa Magwalo, alo Paulo ngaakabapandulwida. Kuyungizya waawo, cabusungu bakali kuliiya Jwi lya Leza, kutali buyo mu Sabata molikke, pele buzuba abuzuba. Alimwi bakacita oobo ‘kabayandide kapati mumoyo,’ kabalyaabide kuyandisya kuzyiba ncaamba Magwalo kweelana amumuni wanjiisyo mpya eeyi. Kumane, cakulicesya kapati bakacinca bukkale bwabo, nkaambo “bunji bwabo bakaba basyomi.” (Mil. 17:12) Nkakaambo kaako, Luka wakabaamba kuti bakali “amizeezo mibotu.”
17. Nkaambo nzi cikozyanyo cabana Bereya ncocili cibotu, alimwi nkaambo nzi ncotweelede kuzumanana kucitobela cikozyanyo cabo nokuba kuti twali mukasimpe kwaciindi cilamfwu?
17 Bana Bereya aabo tiibakazyi kuti mulumbe uutondezya mbobakaatambula makani mabotu wakali kuyoobikkilizyigwa mu Jwi lya Leza alimwi akuba cikozyanyo cibotu kusikila kumazuba eesu. Bakacita kweelana ancaakali kulangila Paulo kuti bacite alimwi a Jehova Leza ncaakali kuyanda kuti bacite. Mbubwenya buyo, andiswe eeci ncencico ncotweelede kubakulwaizya kucita bantu, kulilingula cakulomya Bbaibbele kutegwa lusyomo lwabo luyume kweelana ancolyaamba Jwi lya Leza. Nokuba boobo, sena eeci caamba kuti tweelede kucileka kuba amizeezo mibotu, ikuti twaba basyomi? Peepe, amana ndendilyo buya nociyandika kapati kuzumanana kwiiya kujatikizya Jehova alimwi akufwambaana kubelesya njiisyo zyakwe. Kuti twacita oobo, tuyoozumizya Jehova kubumba mizeezo yesu alimwi akutuyiisya kucita kuyanda kwakwe. (Is. 64:8) Aboobo tuyoozumanana kubelesyegwa alimwi akumukkomanisya cakumaninina Taateesu wakujulu.
18, 19. (a) Nkaambo nzi Paulo ncaakazwa ku Bereya, alimwi mbuti mbotukonzya kutobela cikozyanyo cakwe cakuliyumya? (b) Ino mbaani ibatobela mbaakakambaukila Paulo, alimwi nkuukuli?
18 Paulo kunyina naakakkalisya mu Bereya. Tubala kuti: “Ba Juda baku Tesalonika nobakazyiba kuti Paulo wakali kwaambilizya jwi lya Leza aku Bereya, bakaunka ooko kutegwa bakayunge akukopanya makamu aabantu. Mpoonya cakufwambaana bakwesu bakatuma Paulo kulwizi, pele Sila a Timoteyo bakasyaala nkukonya ooko. Lino aabo ibakamusindikila Paulo bakaakumusisya ku Atene, mpoonya bakapiluka nobakamana kulaililwa kuti Sila a Timoteyo beelede kuunka kuli Paulo cakufwambaana.” (Mil. 17:13-15) Eelo kaka bakali aakazumanana basikukazya makani mabotu aabo! Mbwaanga tiibakazwidilila mukutanda Paulo ku Tesalonika; bakaunka ku Bereya akutalisya manyongwe ngeenya, pele akwalo tiibakazwidilila. Paulo wakalizyi kuti cilawo cakwe ncipati, ncaakaunkila kumbi akuyootalika kukambauka. Andiswe mazuba aano tweelede kuzyandamana kutegwa makanze aabaabo ibayanda kutulesya kukambauka anyongane.
19 Naakapa bumboni cakulomya kuba Juda bamu Tesalonika aku Bereya, tacidoonekwi buya kuti Paulo wakaiya mbociyandika kukambauka cabusicamba alimwi akusalazya makani kuzwa mu Magwalo. Andiswe mbotweelede kucita oobo. Aboobo, lino Paulo wakali kuyoojana bantu baindene, nkokuti Bamasi baku Atene. Ino zintu zilamweendela buti mudolopo eeli? Tuyoobona mucibalo citobela.
a Kweelana asyaazibwene umwi, aciindi eeco kwakali mulawo wa Kaisara iwakali kukasya kwaambilizya “kuboola kwamwami mupya naa bwami, kwaambisya kuti ooyo ulangilwa kuba mupati naa uboolela kubeteka bwami buliko.” Kweelede kuti basinkondonyina Paulo cabucenjezu bakaucinca mulumbe wabaapostolo kutegwa ulibonye mbuli kuti utyola mulawo ooyu. Amubone kabbokesi kakuti “ Ba Kaisara Alimwi a Bbuku lya Milimo.”
