1-3. Mbuti Jesu mbwaandaana abaapostolo bakwe, alimwi ino eeci cipa kubuzya mibuzyo nzi?

 TABAYANDI kuti Jesu abasiye. Kwansondo zyainda, baapostolo balikkomene kapati. Mbwaanga bakaluuside kwaciindi cili mbocibede, nobakabona kuti Jesu wabusyigwa bakaba alukkomano alimwi. Kwamazuba aali 40 lino, Jesu wali kulibonya cakwiinduluka-induluka, kayiisya alimwi akukulwaizya basikumutobela. Nokuba boobo, mubuzuba oobu, walibonya ciindi camamanino.

² Kabaimvwi a Cilundu ca Maolifa, baapostolo tabayandi kwiindwa noliba bbala lyomwe kuzintu zyoonse nzyaamba Jesu. Kabaciyandide kuswiilila, Jesu wamana kwaambaula, mpoonya watambika maanza akubaleleka. Watalika kuunka kujulu. Basikumutobela balamulangilila ciindi naunka kujulu. Kumane, kkumbi lyamuvwumba, mpoonya waleka kulibonya. Waunka, pele balo bazumanana kulanga kujulu.—Lk. 24:50; Mil. 1:9, 10.

 ³ Eeci icacitika capa kuti buumi bwabaapostolo ba Jesu bucince. Ino ncinzi ncobatiicite lino mbwaanga Simalelaabo waunka kujulu? Mubwini Simalelaabo wakabagwasya kuzumanana amulimo ngwaakatalisya. Ino wakabagwasya buti kutegwa baubeleke mulimo ooyu uuyandika kapati, alimwi ino bakacita buti? Mbuti Banakristo bamazuba aano mbobajatikizyidwe? Tulabujana bwiinguzi bukulwaizya mucaandaano cakusaanguna cabbuku lya Milimo.

4. Mbuti Luka mbwaatalika makani aakwe aali mubbuku lya Milimo?

⁴ Luka watalika makani aakwe kwiinda mukubandika a Teyofilo, mwaalumi nguwenya kusaanguna ngwaakalembela Makani Mabotu. a Kutegwa atondezye kuti ulazumanana amakani ngaakatalikide, Luka watalika kwiinda mukwaamba twaambo mubufwaafwi itulembedwe kumamanino aa Makani Mabotu aakwe, kabelesya mabala aayindene alimwi akupa bupanduluzi bupya.

5, 6. (a) Ncinzi icakali kukonzya kugwasya basikutobela Jesu kuzumanana kuba alusyomo luyumu? (b) Mbuti lusyomo lwa Banakristo mazuba aano mboluyeeme ‘abumboni bunji busalede’?

⁵ Ncinzi icakali kukonzya kuyumya lusyomo lwabasikutobela Jesu? Kulugwalo lwa Milimo 1:3, tubala boobu kujatikizya Jesu: “Wakalitondezya kulimbabo kali muumi kwiinda mubumboni bunji busalede.” Mu Bbaibbele, alikke “imusilisi uuyandwa” Luka ngowakabelesya mabala aakuti “bumboni busalede.” (Kol. 4:14) Mabala aaya akali kubelesyegwa mumalembe aabusilisi alimwi akali kutondezya bumboni businizyide. Jesu wakapa bumboni buli boobu. Wakalibonya kuli basikumutobela ziindi zinji, zimwi ziindi kuli omwe naa bobilo, zimwi ziindi kubaapostolo boonse, alimwi aciindi cimwi wakalibonya kubasyomi ibainda ku 500. (1 Kor. 15:3-6) Inzya, oobu mbumboni busalede.

⁶ Mbubwenya buyo amazuba aano, lusyomo lwa Banakristo bakasimpe luyeeme ‘abumboni bunji busalede.’ Sena kuli bumboni bwakuti Jesu wakapona anyika, kufwida zibi zyesu alimwi akuti wakabusyigwa? Inzya nkobuli. Zintu izyakacitika ncobeni izili mu Jwi lya Leza ilyakasololelwa amuuya uusalala, zyoonse zilapa bumboni busalede mbotuyandika. Kubala zibalo eezyi cakulomya kulakonzya kuluyumya kapati lusyomo lwesu. Kamuyeeya kuti, bumboni busalede bulatugwasya kuba alusyomo lwini-lwini muciindi cakwiile kusyoma buyo kakwiina bumboni busalede. Lusyomo lwini-lwini lulayandika kutegwa tukajane buumi butamani.—Joh. 3:16.

7. Ncikozyanyo nzi Jesu ncaakasiila basikumutobela ciindi naakali kuyiisya alimwi akukambauka?

⁷ Jesu alimwi wakali “kubapandulwida Bwami bwa Leza.” Mucikozyanyo, wakapandulula businsimi ibutondezya kuti Mesiya wakali kuyoopenga alimwi akufwa.  (Lk. 24:13-32, 46, 47) Ciindi Jesu naakali kupandulula mulimo wakwe kali Mesiya, wakaamba kujatikizya Bwami bwa Leza, nkaambo ngo Mwami Wakasalwa. Lyoonse Jesu naakali kukambauka, Bwami ngowakali mutwe wamakani, alimwi abalo basikumutobela bamazuba aano ngomutwe wamakani ngobakambauka.—Mt. 24:14; Lk. 4:43.

8, 9. (a) Mizeezo nzi yobilo iitaluzi, baapostolo ba Jesu njobakajisi? (b) Ino Jesu wakabagwasya buti, alimwi nciiyo nzi Banakristo ncobaiya mazuba aano?

⁸ Ciindi baapostolo nobakabungene a Cilundu ca Maolifa, bakajisi muswaangano wamamanino a Jesu aano anyika. Kabayandide kuzyiba bwiinguzi, bakabuzya kuti: “Mwami, sena ulapilusya Bwami ku Israyeli aciindi ecino?” (Mil. 1:6) Kwiinda mukubuzya mubuzyo ooyu omwe buyo, baapostolo bakatondezya kuti bakajisi mizeezo yobilo iitaluzi. Wakusaanguna, bakali kuyeeya kuti Bwami bwa Leza bwakali kuyoopilusyigwa kubana Israyeli bakumubili. Wabili, bakali kulangila kuti Bwami bwakasyomezyedwe bwakali kuyootalika kulela “aciindi eeco.” Ino Jesu wakabagwasya buti kucinca mizeezo yabo?

⁹ Jesu wakalizyi kuti muzeezo uutaluzi wakusaanguna ulalulamikwa cakufwambaana. Alimwi buya, basikumutobela bakalaafwaafwi kubona kuzyalwa kwacisi cipya, nkokuti Israyeli wakumuuya, kwainda buyo mazuba aali 10. Leza wakali afwaafwi kuleka kubelesya ba Israyeli bakumubili. Kujatikizya muzeezo uutaluzi wabili, calubomba Jesu wakabayeezya kuti: “Tauli mulimo wanu wakuzyiba ziindi naa mazuba ngabikkide Taata munguzu zyakwe mwini.” (Mil. 1:7) Jehova nguuyinda kubamba ciindi. Katanafwa Jesu, wakaamba kuti naba Mwana, aciindi eeco kunyina naakazyi ‘buzuba alimwi aciindi’ mamanino naakali kuyoosika, “pele buyo Taata.” (Mt. 24:36) Mazuba aano, ikuti Banakristo batalika kulibilika kujatikizya ciindi bweende bwazintu oobu nobuyoomana, nkokuti balibilika kujatikizya mulimo uutali wabo.

10. Mbube nzi mbobakajisi baapostolo andiswe mbotweelede kuba ambubo, alimwi nkaambo nzi?

¹⁰ Nokuba boobo, tweelede kucenjela kapati kutegwa tutababoni munzila iitaluzi baapostolo ba Jesu, baalumi ibakajisi lusyomo luyumu. Cakulicesya, bakazumina kululamikwa. Kwiinda zyoonse, nokuba kuti mubuzyo wabo wakayeeme akuyeeya kutaluzi, pele wakatondezya bube bubotu mbobakajisi. Cakwiinduluka-induluka Jesu wakali kubaambila kuti: “Amulangile.” (Mt. 24:42; 25:13; 26:41) Bakalipakamene kumuuya, kabajisi luyandisisyo lwakulangisisya bumboni bwakuti Jehova wakalaafwaafwi kubweza ntaamu. Oobu mbobube mbotweelede kuba ambubo mazuba aano. Alimwi buya, ‘mumazuba aaya aamamanino’ aakatazya tweelede kucita oobo kapati.—2 Tim. 3:1-5.

11, 12. (a) Mulimo nzi Jesu ngwaakapa basikumutobela? (b) Nkaambo nzi ncocakali kweelela kuti Jesu aambe muuya uusalala mumakani aajatikizya mulimo wakukambauka?

¹¹ Jesu wakayeezya baapostolo bakwe mulimo ngobakeelede kubikkila maano. Wakabaambila kuti: “Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu  Samariya, mane kusikila kumasena aakulamfwu kapati aanyika.” (Mil. 1:8) Mu Jerusalemu, oomo bantu mobakamujaya Jesu, momumo mulumbe wakubusyigwa kwakwe mowakali kuyoosaanguna kwaambilizyigwa. Kuzwa waawo, mulumbe wakali kuyakwaambilizyigwa mu Judaya moonse amu Samariya, mane akumasena aambi.

¹² Cakweelela, Jesu wakaamba mulimo wakukambauka ciindi naakamana kubayeezya cisyomezyo cakutuma muuya uusalala kutegwa ubagwasye. Eeci nciindi comwe buyo akati kaziindi ziinda ku 40 mabala aakuti “muuya uusalala” naalibonya mubbuku lya Milimo. Ciindi aciindi, bbuku eeli lyamu Bbaibbele iliyandika kapati lilacisalazya kuti tatukonzyi kucita kuyanda kwa Jehova kakunyina kugwasyigwa amuuya uusalala. Eelo kaka cilayandika kapati kuti katupaila ciindi aciindi kulomba muuya ooyo! (Lk. 11:13) Tuyandika muuya uusalala lino, kwiinda lyoonse.

13. Ino mupati buti mulimo wakukambauka ngobapedwe bantu ba Leza mazuba aano, alimwi nkaambo nzi ncotweelede kuubeleka caluyandisisyo?

¹³ Kubaapostolo, “masena aakulamfwu kapati aanyika,” akali kubikkilizya buyo zibeela zimwi zyamunyika, pele mazuba aano tulakambauka munyika yoonse. Nokuba boobo, kweelana ambotwakaiya mucibalo cainda, Bakamboni ba Jehova bakautambula camoyo woonse mulimo ooyu wakupa bumboni, kabazyi kuti Leza uyanda kuti bantu bamisyobo yoonse baamvwe makani mabotu aa Bwami bwakwe. (1 Tim. 2:3, 4) Sena mulabeleka canguzu mumulimo ooyu uufwutula buumi bwabantu? Eelo kaka kunyina mulimo uumbi uukkomanisya alimwi uupa kukkutila kunze lyamulimo ooyu! Jehova uyoomupa nguzu nzyomuyandika kutegwa muucite. Bbuku lya Milimo lilamwaambila zinji kujatikizya nzila zyakubelesya ziluzi alimwi abube mbomweelede kuba ambubo kutegwa muubeleke cakulomya mulimo ooyu wakukambauka.

14, 15. (a) Ncinzi ncobakaamba bangelo kujatikizya kupiluka kwa Kristo, alimwi ino bakali kupandulula nzi? (Amubone abupanduluzi buyungizyidwe.) (b) Mbuti kuboola kwa Kristo mbokutondezya kuti wakaboola “mbubwenya mbwaakaunka” kujulu?

¹⁴ Mbubwenya mbokwaambwa kale kumatalikilo aacibalo eeci, Jesu wakaunka kujulu alimwi tanaakacili kulibonya. Nokuba boobo, baapostolo ibali 11 bakazumanana kabaimvwi akulanga kujulu. Mpoonya bangelo bobilo bakalibonya akubaambila kuti: “Nobaalumi bamu Galilaya, nkaambo nzi ncomwiimvwi kamulanga kujulu? Ooyu Jesu iwatambulwa kujulu kuzwa kulindinywe uyooboola mbubonya oobu mbomwamubona kaunka kujulu.” (Mil. 1:11) Sena bangelo bakali kupandulula kuti Jesu wakali kuyoojoka mumubili ngweenya, kweelana azikombelo zimwi mboziyiisya? Peepe. Ino tuzyi buti oobo?

¹⁵ Bangelo bakali kwaamba kuti Jesu wakali kuyoopiluka ‘mbubwenya oobo mbobakamubona.’ b Ino wakaunka muciimo cili buti kujulu? Kunyina naakali kulibonya ciindi bangelo nobakaamba majwi aaya. Balikke baalumi aabo basyoonto, nkokuti baapostolo, mbabakabona kuti Jesu taciko munyika alimwi akuti wakali kuunka kuli Usyi kujulu. Oobo mbombubo kupiluka kwa Kristo mbokwakeelede  kuba. Amana buya oobo mbocakaba. Mazuba aano, balikke aabo ibapakamene kumuuya, mbebazyi kubako kwa Jesu munguzu zyabwami. (Lk. 17:20) Aboobo tweelede kuzyiba bumboni ibwakubako kwakwe alimwi akwaambila bamwi kutegwa abalo babone mpotweendela.

16-18. (a) Kweelana a Milimo 1:13, 14, ncinzi ncotwiiya kujatikizya miswaangano ya Bunakristo? (b) Ncinzi ncotwiiya kucikozyanyo ca Mariya banyina Jesu? (c) Nkaambo nzi miswaangano ya Bunakristo ncoiyandika mazuba aano?

¹⁶ Tacigambyi kuti baapostolo “bakapiluka ku Jerusalemu kabakkomene kapati.” (Lk. 24:52) Pele ino bakali kuyoocita buti kubusolozi alimwi amalailile aa Kristo? Mucaandaano 1 ca Milimo kapango 13 a 14, tubala kuti bakabungana “muŋanda yamujulu,” alimwi twiiya zintu zikkomanisya kujatikizya miswaangano iili boobu. Aciindi eeco, maanda aamu Palestine kanji-kanji akajisi ŋanda yamujulu, yalo iyakali kunjilwa kwiinda mukubelesya matantilo aali anze. Sena eeyi ‘neŋanda yamujulu’ iyakali atala aaŋanda iyaambidwe ku Milimo 12:12, iyakali yabanyina Marko? Kufwumbwa mbocakabede, bwakali busena buyo ibutakwe ambobubede, ibwakali kubelesyegwa abasikutobela Kristo. Pele ino mbaani ibakabungene, alimwi ncinzi ncobakali kucita?

¹⁷ Amubone kuti tabali baapostolo balikke naa bamaalumi, ibakabungene. “Abamakaintu bamwi” bakaliko, kubikkilizya a Mariya, banyina Jesu. Eeci nciindi camamanino Mariya naambwa cacigaminina mu Bbaibbele. Mubukkale oobu cileelela kuyeeya kuti Mariya tanaakali kuyanda kulijanina mpuwo, pele cakulicesya wakabungana kukomba antoomwe abakwesu abacizyi. Kweelede kuti cakamukulwaizya kapati kuti bana bakwe basankwa bone ibatakali basyomi ciindi Jesu naakali kupona, lino ulaantoomwe ambabo. (Mt. 13:55; Joh. 7:5) Kuzwa ciindi mwanookwabo naakafwa alimwi akubusyigwa, bakalicincide bube bwabo.—1 Kor. 15:7.

¹⁸ Alimwi amubone kaambo basikwiiya aaba ncobakabunganina: “Kabajisi muzeezo omwe aaba boonse bakazumanana kupaila.” (Mil. 1:14) Kubungana antoomwe ncintu ciyandika kapati mubukombi bwa Bunakristo. Tulabungana kutegwa tukulwaizyanye, tutambule malailile alulayo, alimwi kwiinda zyoonse, kutegwa tukombe Taateesu wakujulu, Jehova. Mipailo yesu alimwi anyimbo zyantembauzyo muziindi zili boobu zilamukkomanisya Jehova, alimwi zilayandika kapati kulindiswe. Aboobo tutaleki kujanika kumiswaangano eeyi iisetekene alimwi iikulwaizya!—Heb. 10:24, 25.

19-21. (a) Ncinzi ncotwiiya kumulimo Petro ngwaakali kubeleka mumbungano? (b) Nkaambo nzi Judasi ncaakeelede kunjililwa mubusena, alimwi ncinzi ncotukonzya kwiiya kweelana ambwaakeendelezyegwa makani aaya?

¹⁹ Basikutobela Kristo aaba, bakeelede kulanganya makani aayandika kapati aajatikizya ziyandika mumbunga, alimwi mwaapostolo Petro ngowakasololela mukuzilanganya. (Kapango 15-26) Eelo kaka cilaumbulizya kubona Petro mbwaakabeleka canguzu kucinca, nokuba kuti kwakaindide nsondo zili mbozibede kuzwa ciindi naakamukaka Mwami ziindi zyotatwe! (Mk. 14:72) Toonse tulabisya alimwi tuyandika kuyeezyegwa kuti Jehova “mubotu alimwi ulilibambilide kulekelela  zibi” kuli baabo beempwa kuzwa ansi aamoyo.—Int. 86:5.

²⁰ Petro wakabona kuti Judasi, mwaapostolo iwakamukaka Jesu wakeelede kunjililwa mubusena. Ino nguni wakali kweelela kumunjilila mubusena? Mwaapostolo mupya wakeelede kuba yooyo iwakamutobela Jesu mumulimo wakwe woonse waanyika alimwi iwakalibonena kubusyigwa kwakwe. (Mil. 1:21, 22) Eeci cakali kweendelana acisyomezyo ca Jesu cakuti: “Nywebo nomwanditobela anywebo muyookkala azyuuno zyabwami zili 12, akubeteka misyobo iili 12 ya Israyeli.” (Mt. 19:28) Kulibonya kuti Jehova wakakanzide kuti baapostolo ibali 12, aabo ibakatobela Jesu mumulimo wakwe waanyika, kumbele bakabambe “mabwe aantalisyo aali 12” aa Jerusalemu mupya. (Ciy. 21:2, 14) Aboobo Leza wakazumizya Petro kubona kuti businsimi bwakuti, “mulimo wakwe wabulangizi aucitwe amuntu uumbi,” bwazuzikizyigwa kuli Judasi.—Int. 109:8.

²¹ Ino kusala ooku kwakacitwa buti? Kwakacitwa kwiinda mukuuma cisolo, cilengwa icakadumide kaindi. (Tus. 16:33) Nokuba boobo, eeci nceciindi camamanino Bbaibbele nolitondezya kuti cilengwa eeci cakali kubelesyegwa munzila eeyi. Kumbele kunanikwa amuuya uusalala kwakacimana cilengwa eeci. Pele amubone kaambo cisolo ncocakali kubelesyegwa. Baapostolo bakapaila kuti: “Jehova, yebo oozyi myoyo yabantu boonse, kotutondezya ngoosala akati kabaalumi aaba bobilo.” (Mil. 1:23, 24) Bakali kuyanda kuti Jehova abe nguwe uusala. Matiya, iweelede kuti ngumwi wabasikwiya bali 70 aabo Jesu mbaakatumide kuyookambauka, nguwakasalwa. Aboobo Matiya wakaba umwi wabali “Kkumi Ababili.” c—Mil. 6:2.

22, 23. Nkaambo nzi ncotweelede kulibombya alimwi akubamvwida aabo basololela mumbungano mazuba aano?

²² Eeci cituyeezya kaambo ncociyandika kuti bantu ba Leza kababeleka calukamantano. Kusikila sunu, baalumi beelela balasalwa kubeleka kabali balangizi mumbungano. Baalu aaba balabikkila maano kulanga-langa zyeelelo zyamu Magwalo iziyandika kubalangizi aaba, alimwi balapaila kulomba busolozi bwamuuya uusalala. Akaambo kaceeci, mbungano ibona kuti baalumi aaba balasalwa amuuya uusalala. Aboobo tulazumanana kulibombya alimwi akumvwida busolozi bwabo, kutegwa tukulwaizye muuya walukamantano.—Heb. 13:17.

²³ Lino mbwaanga basikwiiya aaba bakayumizyigwa ciindi nobakabonana a Jesu naakamana kubusyigwa alimwi akubambululwa ikwakacitwa mumbunga, bakalilibambilide kujatikizya zintu izyakali kulangilwa kumbele. Mucibalo citobela, tuyoobandika kujatikizya zintu eezyo zikkomanisya.