1. Ino nkukozyanya nzi kuliko akati ka Banakristo bamumwaanda wamyaka wakusaanguna a Bakamboni ba Jehova mazuba aano?

 BAKAPA bumboni cabusungu. Myoyo yabo yakabakulwaizya kutambula lugwasyo alimwi abusolozi bwamuuya uusalala. Kupenzyegwa tiikwakabapa kucileka kukambauka. Alimwi Leza wakabalongezya kapati. Eezyi nzyezyakabacitikila Banakristo bamumwaanda wamyaka wakusaanguna alimwi nzyezili mukucitika amazuba aano kuli Bakamboni ba Jehova.

2, 3. Nkaambo nzi bbuku lya Milimo ncolilibedelede?

² Cakutadooneka, mwakulwaizyigwa kapati amakani aayumya lusyomo aajanika mubbuku lyamu Bbaibbele lya Milimo ya Baapostolo! Ndebbuku lilikke lyakasololelwa a Leza ilyaamba zintu nzyobakacita Banakristo bamumwaanda wamyaka wakusaanguna kaunkide kale kujulu Jesu.

³ Bbuku lya Milimo lijisi mazina aabantu bali 95 ibazwa mumasi aali 32, mumadolopo aali 54 alimwi amunsumbu zili 9. Lijisi makani aakkomanisya aakaindi aajatikizya bantu, mbuli bantu-bantu buyo, bakombi bakubeja abasimapolitikisi ibalisumpula alimwi abasikupenzya bamwi basilunya. Pele makani ainda kukkomanisya ngolyaamba, ajatikizya Banakristonyoko bamumwaanda wamyaka wakusaanguna, ibakajisi mapenzi aamubuumi aakozyenye angomujisi, nokuba boobo bakazumanana kukambauka makani mabotu cabusicamba.

4. Nkaambo nzi ncotubayanda bantu mbuli Paulo, Tabita alimwi abakamboni bamwi bakaindi ibakali kusyomeka?

⁴ Kwainda kale myaka iitandila ku 2,000 kuzwa ciindi nobakali kupona baapostolo basungu ba Petro a Paulo, musilisi uuyandwa Luka, Barnaba mwaabi, Sitefano sicamba, Tabita siluzyalo, Lidiya sikusamausya beenzu alimwi abakamboni bamwi banji ibakali kusyomeka. Nokuba kuti kwainda ciindi cilamfwu kuzwa nobakali kupona, tulabayanda kapati bantu aaba. Nkaambo nzi? Akaambo kakuti tujisi mulimo uukozyenye wakugwasya bantu kuba basikwiiya. (Mt. 28:19, 20) Eelo kaka tulaacoolwe caalubazu kuubeleka mulimo ooyu!

5. Ino nkuli nkobakatalikila kukambauka basikutobela Jesu bamumwaanda wamyaka wakusaanguna?

⁵ Amubone mulimo Jesu ngwaakapa basikumutobela. Wakaamba kuti: “Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:8) Kusaanguna, muuya uusalala  wakabagwasya basikwiiya kutegwa babe bakamboni “mu Jerusalemu.” (Mil. 1:1–8:3) Mpoonya, kwiinda mukusololelwa amuuya, bakapa bumboni “mu Judaya moonse amu Samariya.” (Mil. 8:4–13:3) Kumane bakatalika kukambauka makani mabotu “kumasena aakulamfwu kapati aanyika.”—Mil. 13:4–28:31.

6, 7. Zintu nzi nzyotubelesya mumulimo wakukambauka zyalo nzyobatakajisi Banakristoma bamumwaanda wamyaka wakusaanguna?

⁶ Banakristonyoko bamumwaanda wamyaka wakusaanguna, kunyina nobakajisi Bbaibbele ilikkwene lyakubelesya mumulimo wabo wakupa bumboni. Bbuku lya Makani Mabotu aa Matayo tiilyakaningalembwa mane kusikila mu 41 C.E. Magwalo aamwi aa Paulo akalembwa bbuku lya Milimo kalitanalembwa, cakuma 61 C.E. Banakristo bamumwaanda wamyaka wakusaanguna bakanyina Magwalo Aasalala aabageme aakkwene naa mabbuku ngobakali kukonzya kusiila bantu mbobakali kukambaukila. Banakristo ba Juda balo bakali kwaamvwida kucikombelo Magwalo aa Chihebrayo kaabalwa, kabatanaba basikwiiya ba Jesu. (2 Kor. 3:14-16) Nokuba boobo, bakeelede kuba basikwiiya babikkila kapati maano, mbwaanga bakeelede kwaambila bamwi zintu nzyobakaswatila buya.

⁷ Mazuba aano, tobanabunji tulilijisi Bbaibbele litugeme alimwi amabbuku manji aamba zyamu Bbaibbele. Tulabagwasya bantu kuba basikwiiya kwiinda mukubakambaukila makani mabotu mumyaambo minji alimwi mumasi aali 240.

8, 9. (a) Ino muuya uusalala wakabagwasya kucita nzi basikwiiya ba Jesu? (b) Ino ncinzi muzike uusyomeka ncacita kwiinda mulugwasyo lwamuuya wa Leza?

⁸ Ciindi Jesu naakalailila basikwiiya bakwe kuba bakamboni, wakabaambila kuti: “Muyootambula nguzu muuya uusalala waakusika alindinywe.” Kwiinda mukusololelwa amuuya uusalala wa Leza, basikutobela Jesu bakali kuyooba bakamboni munyika yoonse. Kwiinda mukugwasyigwa amuuya uusalala, Petro alimwi a Paulo bakaponya balwazi, bakatanda madaimona, nokuba kubusya bafwide! Nokuba boobo, nguzu nzyobakatambula kwiinda mumuuya uusalala zyakalijisi makanze amwi aayandika kapati. Zyakali kupa baapostolo alimwi abasikwiiya bamwi kucikonzya kugwasya bantu kuba aluzyibo lwalo lupa buumi butamani.—Joh. 17:3.

⁹ Mubuzuba bwa Pentekoste 33 C.E., basikwiiya ba Jesu bakali kwaambaula “mumyaambo yiindene-indene mbubonya muuya mbowakali kubapa kwaambaula.” Aboobo bakatalika kupa bumboni kujatikizya “milimo mipati ya Leza.” (Mil. 2:1-4, 11) Kunyina notwaambaula mumyaambo iindene-indene camaleele mazuba aano. Nokuba boobo, kwiinda mukugwasyigwa amuuya wa Leza, muzike uusyomeka ulamwaya mabbuku aamba zyamu Bbaibbele mumyaambo minji. Mucikozyanyo, mamiliyoni aa Ngazi Yamulindizi alimwi a Sinsimuka! alasimbwa mwezi amwezi, alimwi awebbusaiti yesu ya jw.org, kulajanika mabbuku aamba zyamu Bbaibbele alimwi amavidiyo mumyaambo iinda ku 1,000. Zintu zyoonse eezyi zilatugwasya kwaambilizya “milimo mipati ya Leza” kubantu bazisi zyoonse, misyobo yoonse alimwi amilaka yoonse.—Ciy. 7:9.

10. Ncinzi cacitwa kale kujatikizya kusandulula Bbaibbele kuzwa mumwaka wa 1989?

¹⁰ Kuzwa mu 1989 muzike uusyomeka wali kubikkila maano kumwaya Bbaibbele lya Busanduluzi Bwanyika Mpya mumyaambo minji. Eeli Bbaibbele lyasandululwa kale mumyaambo iinda ku 200 alimwi mamiliyoni aa Bbaibbele eeli akasimbwa. Alimwi manji  kwiinda waawo acisimbwa. Zintu eezyi zilakonzyeka akaambo kalugwasyo lwamuuya uusalala wa Leza.

11. Ino ncinzi cacitwa kale kujatikizya mulimo ngobacita Bakamboni wakusandulula mabbuku?

¹¹ Mulimo wakusandulula uli mukucitwa a Banakristo basikulisungula banji muzisi ziinda ku 150. Eeci taceelede kutugambya, nkaambo kunyina mbunga iimbi munyika iisololelwa amuuya uusalala ‘iipa bumboni cakulomya’ nyika yoonse mboizulwa kujatikizya Jehova Leza, Mwami Mesiya ngwasalide alimwi a Bwami bwakujulu ibwakatalisyigwa!—Mil. 28:23.

12. Ino ncinzi cakagwasya Paulo a Banakristo bamwi kucikonzya kupa bumboni?

¹² Ciindi Paulo naakapa bumboni kuba Juda a Bamasi ku Antiokeya yaku Pisidiya, “aabo ibakali amyoyo mibotu, ibakalibambilide kutambula buumi butamani bakaba basyomi.” (Mil. 13:48) Luka wakamanizya kulemba bbuku lya Milimo kwiinda mukwaamba makani aajatikizya Paulo ‘kakambauka Bwami bwa Leza kaangulukide kapati kwaambaula, kakunyina uumukasya.’ (Mil. 28:31) Ino nkuukuli mwaapostolo nkwaakali kukambaukila? Nkomunya buya ku Roma—munzi mupati imwakali bweendelezi bwanyika yoonse. Kwiinda mumakani ngobakali kukanana naa nzila zimbi nzyobakali kubelesya, basikutobela Jesu bamumwaanda wamyaka wakusaanguna bakaucita cakulomya mulimo wakukambauka kwiinda mukugwasyigwa alimwi akusololelwa amuuya uusalala.

13. Nkaambo nzi ncotweelede kupaila ciindi notupenzyegwa?

¹³ Ciindi basikwiiya ba Jesu bamumwaanda wamyaka wakusaanguna nobakali kupenzyegwa, bakali kulomba Jehova kuti abape busicamba. Ino ncinzi cakali kucitika? Bakali kuzula muuya uusalala akucikonzya kwaamba jwi lya Leza cabusicamba. (Mil. 4:18-31) Mbubwenya buyo andiswe, tulapaila kulomba busongo alimwi anguzu kutegwa tuzumanane kukambauka nokuba kuti tulapenzyegwa. (Jak. 1:2-8) Tulazumanana kukambauka akaambo kakuti Leza ulatulongezya alimwi ulatugwasya amuuya wakwe. Kunyina cikonzya kuulesya mulimo wakukambauka—kube kukazyigwa naa kupenzyegwa kapati. Ciindi notupenzyegwa, tweelede kupaila kulomba muuya uusalala, busongo alimwi abusicamba kutegwa tucikonzye kukambauka makani mabotu.—Lk. 11:13.

14, 15. (a) Ino ncinzi cakacitika akaambo “kamapenzi aakabuka kujatikizya Sitefano”? (b) Ino bantu banji mu Siberia bakakaiya buti kasimpe?

¹⁴ Sitefano wakapa bumboni cabusicamba katanajaigwa abasinkondonyina. (Mil. 6:5; 7:54-60) “Kupenzyegwa kupati” nokwakatalika aciindi eciya, basikwiiya boonse bakamwaikila mumasena oonse aamu Judaya a Samariya kunze buyo lyabaapostolo. Pele eeco tiicakaulesya mulimo wakukambauka. Filipo wakaunka ku Samariya ‘kakambauka makani aa Kristo’ alimwi bantu bakaatambula kabotu. (Mil. 8:1-8, 14, 15, 25) Kuyungizya waawo, tubala kuti: “Aabo ibakamwaika akaambo kamapenzi aakabuka kujatikizya Sitefano bakaakusika ku Fonike, ku Kupro aku Antiokeya, pele bakali kukambaukila buyo ba Juda. Pele, baalumi bamwi akati kabo ibazwa ku Kupro aku Kurene bakaboola ku Antiokeya akutalika kwaambaula abantu bakanana Chigiriki, kabaambilizya makani mabotu aa Mwami Jesu.” (Mil. 11:19, 20) Aciindi eeco, kupenzyegwa kwakapa kuti mulumbe wa Bwami umwaike.

¹⁵ Mazuba aano, cintu cikozyenye aceeci cakacitika mucisi cakali kwiitwa kuti Soviet Union. Kwaambisya kuma 1950 ciindi Bakamboni ba Jehova banji nobakatolwa ku Siberia.  Akaambo kakuti bakalimwaikizyenyi mumasena manji, makani mabotu akali kukambaukwa cakutaleka mucisi eeco. Nicatakakonzyeka kuli Bakamboni banji kujana mali aakweendela musinzo ooyu, ambweni uusika kumakkilomita aali 10,000 kutegwa bakakambauke makani mabotu. Nokuba boobo, mfwulumende kwiigama yakabatuma kuunka nkuko. Mukwesu umwi wakaamba kuti: “Kweelana azintu mbozyakacitika, beendelezi bamfwulumende bakapa kuti cikonzyeke kugwasya bantu babombe myoyo banji mu Siberia kutegwa bakazyibe kasimpe.”

16, 17. Mbumboni nzi mbolitupa bbuku lya Milimo ibusinizya kuti Jehova wakali kuulongezya mulimo wakukambauka?

¹⁶ Jehova wakali kubalongezya Banakristo bamumwaanda wamyaka wakusaanguna. Paulo alimwi abamwi bakali kusyanga akutilila, “pele Leza nguwakali kukomezya.” (1 Kor. 3:5, 6) Zintu zyakacitika izyaambidwe kubbuku lya Milimo zilakasinizya kaambo aaka kakuti, kwakali kuyaambele akaambo kakuti Jehova wakali kuulongezya mulimo wakupa bumboni. Mucikozyanyo, “ijwi lya Leza lyakazumanana kumwaika, eelyo mweelwe wabasikwiiya wakali kuyaabukomena kapati mu Jerusalemu.” (Mil. 6:7) Mulimo wakukambauka nowakamwaika, “mbungano mu Judaya, mu Galilaya amu Samariya moonse yakaba muluumuno alimwi yakali kuyumizyigwa; mpoonya akaambo kakuti yakali kweenda cakuyoowa Jehova amuluumbulizyo lwamuuya uusalala, yakazumanana kuyungizyigwa.”—Mil. 9:31.

¹⁷ Mu Antiokeya yaku Siriya, ba Juda alimwi abantu baambaula Chigiriki bakakamvwa kasimpe kuli bakamboni basicamba. Bbaibbele lyaamba kuti, “Kunze lyaboobo, ijanza lya Jehova lyakali ambabo, alimwi bantu banji bakaba basyomi akusandukila ku Mwami.” (Mil. 11:21) Kujatikizya kuyaambele akumwi ikwakacitika, tubala kuti: “Ijwi lya Jehova lyakazumanana kuyaambele akumwaika.” (Mil. 12:24) Akaambo kakuti Paulo abamwi bakakambauka cakulomya kuli Bamasi, “ijwi lya Jehova lyakazumanana kuyaambele akuzunda canguzu kapati.”—Mil. 19:20.

18, 19. (a) Ino tuzyi buti kuti “ijanza lya Jehova” lilaandiswe? (b) Amwaambe cakuluula citondezya kuti Jehova ulabagwasya bantu bakwe.

¹⁸ Tacidoonekwi buya kuti “ijanza lya Jehova” nkolili aalindiswe mazuba aano. Nkakaambo kaako bantu banji baba basyomi alimwi balatondezya kulyaaba kwabo kuli Leza kwiinda mukubbapatizyigwa. Kuyungizya waawo, akaambo kakulongezyegwa alimwi akugwasyigwa a Leza, tulakonzya kuliyumya notukazyigwa akupenzyengwa mpoonya akuzwidilila notuubeleka mulimo wesu mbubwenya bwakacita Paulo a Banakristo bakusaanguna. (Mil. 14:19-21) Jehova Leza lyoonse unootugwasya. “Maanza aakwe aatamani” anootugwasya lyoonse mumapenzi eesu. (Dt. 33:27) Tweelede kuyeeya alimwi kuti, Jehova kunyina nabalekelezya bantu bakwe akaambo kazina lyakwe lipati.—1 Sam. 12:22; Int. 94:14.

¹⁹ Amubone cakuluula eeci: Akaambo kakuti Mukwesu Harald Abt wakazumanana kukambauka, ba Nazi bakamutola kucilabba cakupenzyezya caku Sachsenhausen lya Nkondo Yanyika Yoonse Yabili. Mu May 1942 bamapulisa ba Nazi baitwa kuti Gestapo bakaunka kuŋanda yabakaintu babo, ba Elsa, akubweza kana kabo kasimbi mpoonya akubaanga ba Elsa. Bakatolwa kuzilabba ziindene-indene. Mucizyi Abt wakaamba kuti: “Myaka yoonse njondakali muzilabba zyakupenzyezya mu German ndakaiya ciiyo ciyandika kapati, ndakabona muuya wa Jehova mboukonzya kutuyumya ciindi notupenzyegwa kapati! Kanditanaangwa, ndakabalide cakuluula camucizyi umwi iwakaamba kuti  ciindi notupenzyegwa kapati, muuya wa Jehova ulakonzya kutugwasya kutegwa tukkalwe moyo. Ndakabona mbuli kuti wakali kuciindizya asyoonto kujatikizya nzyaakali kwaamba. Pele nondakalijana mubukkale oobo, ndakabona kuti nzyaakali kwaamba zyakali zyamasimpe. Oobo mbocicitika ncobeni. Cilakatazya kweezyeezya ikuti kacitanakucitikila. Eeco ncecakandicitikila.”

20. Ino ncinzi Paulo ncaakali kucita ciindi naakaangidwe muŋanda, alimwi mbuti eeci mbocikonzya kubakulwaizya bakwesu abacizyi bamwi?

²⁰ Bbuku lya Milimo lilamana ciindi Paulo cabusungu naakali ‘kukambauka Bwami bwa Leza.’ (Mil. 28:31) Akaambo kakuti wakalaangidwe muŋanda, Paulo tanaakali kukonzya kukambauka kuŋanda-aŋanda ku Roma. Nokuba boobo, wakazumanana kubakambaukila boonse ibakali kumuswaya. Mazuba aano, bakwesu abacizyi bamwi tababukilwi bulo naa ambweni bakkala mumaanda bacembeede mobalanganizyigwa akaambo kakucembaala naa kuciswa-ciswa. Nokuba boobo, luyando lwabo kuli Leza alimwi aluyandisisyo lwakukambauka nduyumu mbuli lyoonse. Tulabapailila kulomba Taateesu wakujulu kuti abagwasye kujana bantu bayandisya kwiiya kujatikizya nguwe alimwi amakanze aakwe mabotu aakumbele.

21. Nkaambo nzi mulimo ooyu wakupa bumboni ncotweelede kuubeleka cakufwambaana?

²¹ Tobanabunji tulatola lubazu mubukambausi bwakuŋanda-ŋanda alimwi anzila zimwi zyabukambausi. Toonse atusoleke kusikila mpotugolela kuzuzikizya mukuli ngotujisi wakuba bakambausi ba Bwami, akuzumanana kutola lubazu mukupa bumboni “kumasena aakulamfwu kapati aanyika.” Mulimo ooyu ulibindide, nkaambo “citondezyo” cakubako kwa Kristo calibonya kale aantangalala. (Mt. 24:3-14) Tweelede kucibelesya kabotu ciindi cesu. Calino, tulijisi “zinji zyakucita mumulimo wa Mwami.”—1 Kor. 15:58.

22. Ino tweelede kuti katukanzide kucita nzi ciindi notulindila buzuba bwa Jehova?

²² Ciindi notulindila “buzuba bwa Jehova bupati alimwi ibuyoosya,” atube amakanze aakuzumanana kupa bumboni cabusicamba alimwi cakusyomeka. (Joel. 2:31) Tuyoobajana bantu banji ibali mbuli bana Bereya ‘ibakayandide kapati mumyoyo yabo kutambula jwi.’ (Mil. 17:10, 11) Aboobo atupe bumboni kusikila tukaamvwe majwi aakuti: “Wacita kabotu, omuzike mubotu alimwi uusyomeka!” (Mt. 25:23) Ikuti twaubeleka mulimo ngotupedwe wakugwasya bantu kuba basikwiiya cabusungu alimwi katusyomeka lyoonse kuli Jehova, tunookkomene lyoonse mane kukabe kutamani akaambo kacoolwe cakutola lubazu mumulimo ooyu ‘wakupa bumboni cakulomya’ kujatikizya Bwami bwa Leza!