CIBALO 23
“Amuswiilile”
Paulo wakaiminina kasimpe kumbele lyankamu iinyemede alimwi a Nkuta Mpati Yaba Juda
Kweelana a Milimo 21:18–23:10
1, 2. Ncinzi capa kuti mwaapostolo Paulo aboole ku Jerusalemu, alimwi mbuyumuyumu nzi mbwalangila kujana?
PAULO alimwi uli mu Jerusalemu. Uleendeenda mumigwagwa misyoonto alimwi imuli bantu banji. Munzi ooyu ulijatikizyidwe alimwi ulilibedelede kapati mumakani aakaindi aajatikizya bantu ba Jehova. Kuzwa kaindi, bunji bwabantu bamumunzi ooyu bakali kuuyandisya kapati munzi wabo akaambo kabulemu mbowakajisi. Paulo ulizyi kuti Banakristo banji basyoma kapati zintu izyakacitika kaindi muciindi cakubikkila maano kuyaambele kweelana amakanze aa Jehova aakali kuyaabuyubununwa. Aboobo Paulo wabona kuti bayandika lugwasyo lwakumuuya kunze buyo aalugwasyo lwakumubili ilwakamukulwaizya kusala kujokela kumunzi mupati ooyu ciindi naakali mu Efeso. (Mil. 19:21) Nokuba kuti eeci cakali kukonzya kubikka buumi bwakwe muntenda, kunyina nocakamulesya kupiluka alimwi kumunzi ooyu.
2 Mbuyumuyumu nzi lino Paulo mbwalangila kujana ku Jerusalemu? Buyumuyumu bumwi bulazwa kuli basikutobela Kristo bamwi ibakopene akaambo kantwiintwi nzyobamvwa kujatikizya Paulo. Buyumuyumu bupati bulazwa kuli basinkondonyina Kristo balo ibalaamutamikizye Paulo, kumuuma akukanza kumujaya. Bukkale oobu bukatazya bulapa Paulo coolwe cakuliiminina. Kulicesya, busicamba alusyomo ndwaakatondezya ciindi naakali mubukkale oobu bukatazya zibapa cikozyanyo cibotu Banakristo mazuba aano. Atubone ncotwaambila boobu.
“Bakalemeka Leza” (Milimo 21:18-20a)
3-5. (a) Muswaangano nzi ngwaakajanika Paulo ku Jerusalemu, alimwi ncinzi cakabandikwa? (b) Nziiyo nzi nzyotukonzya kwiiya kumuswaangano ngwaakajisi Paulo abaalu mu Jerusalemu?
3 Buzuba bwakatobela kuzwa nobakasika mu Jerusalemu, Paulo abeenzinyina bakaunka kuyoobonana abaalu bambungano. Baapostolo ibakacili kupona aciindi eeco tabaambidwe mucibalo eeci; ambweni akaambo kakuti boonse bakalilongede kuyoobelekela mumbungano zimbi mumasena aamunyika. Nokuba boobo, walo Jakobo imwanookwabo a Jesu wakaciliko. (Gal. 2:9) Kulibonya kuti, Jakobo nguwakali sicuuno amuswaangano ciindi ‘baalu boonse kubikkilizya a Paulo nobakaliko.’—Mil. 21:18.
4 Paulo wakabaanzya baalu “akutalika kupandulula zintu zyoonse Leza nzyaakacita akati kabamasi kwiinda mumulimo wakwe.” (Mil. 21:19) Eelo kaka kweelede kuti bakwesu bakakulwaizyigwa kapati! Andiswe mazuba aano tulakkomana ciindi notumvwa mulimo mbouyaambele mumasena amwi.—Tus. 25:25.
5 Mumubandi wakwe, kweelede kuti Paulo wakaamba kujatikizya zyakusanga nzyaakaleta kuzwa ku Europe. Kubikkila maano nkobakatondezya bakwesu bakumasena aakulamfwu kweelede kuti kwakabakkomanisya kapati alimwi akubapa kulumba baswiilizi ba Paulo. Aboobo, kujatikizya makani aa Paulo, cibalo caamba kuti: ‘Baalu bakalemeka Leza’! (Mil. 21:20a) Mbubwenya buyo, bunji bwabakwesu abacizyi ibaliyumya akaambo kakucitikilwa ntenda naa kuciswa bulwazi bujaya, balakulwaizyigwa kapati ciindi basyominyina nobabapa lugwasyo luyandika naa nobabakulwaizya.
Banabunji Bacili ‘Basungu Kutobela Mulawo’ (Milimo 21:20b, 21)
6. Ndipenzi nzi Paulo ndyaakazyiba?
6 Baalu bakaambila Paulo kuti kwakali penzi mu Judaya ilyakali kujatikizya nguwe. Bakamwaambila kuti: “Wabona mukwesu, kuti kuli zyuulu-zyuulu zyabasyomi akati kaba Juda, alimwi boonse buyo mbasungu kutobela Mulawo. Pele bamvwa ntwiintwi yakuti yebo wali kuyiisya ba Juda boonse akati kabamasi zintu zyaluleyo kumulawo wa Musa, kwiinda mukubaambila kuti batanoopaluli bana babo nokuba kutobela ziyanza izyalikucitwa lyoonse.” a—Mil. 21:20b, 21.
7, 8. (a) Nkuyeeya nzi kutaluzi nkobakajisi Banakristo banji mu Judaya? (b) Nkaambo nzi kuyeeya kutaluzi nkobakajisi Banakristo ba Juda bamwi ncobwatakali busiluleyo?
7 Nkaambo nzi ncokwakacili Banakristo banji, balo ibakacili kukakatila kutobela Mulawo wa Musa nokuba kuti kwakaindide myaka iili 20 kuzwa nowakacileka kubeleka? (Kol. 2:14) Mu 49 C.E. baapostolo abaalu ibakali mu Jerusalemu bakatuma lugwalo kumbungano, kubapandulwida kuti basyomi aabo ibakali akati kabantu bamasi tiibakeelede kwaazumina makani aakupalulwa alimwi akuti tiibakacili kweendelezyegwa a Mulawo wa Musa. (Mil. 15:23-29) Nokuba boobo, lugwalo oolu kunyina nolwakaamba kujatikizya Banakristo ba Juda basyomi pe, balo bunji bwabo ibatakali kumvwisya kuti Mulawo wa Musa wakalilekede kubeleka.
8 Sena kuyeeya ooku kutali kabotu, kwakapa kuti aaba ba Juda basyomi bateeleli kuba Banakristo? Peepe. Kayi takuli kuti aaba ba Juda kaindi bakali kukomba baleza bakubeja alimwi akuti lino bazumanana kutobela zilengwa zyabukombi bwabo bwakaindi. Pele Mulawo ooyu ngobakali kubona kuti ulayandika kapati ba Juda basyomi aaba wakazwide kuli Jehova. Kunyina nowakajatikizyidwe amadaimona pe. Nkuti buyo Mulawo wakali kujatikizya cizuminano cakaindi, kakuli Banakristo lino bakali kweendelezyegwa acizuminano cipya. Kutobela cizuminano ca Mulawo lino kwakalicilekede kubeleka kayi kwakali bukombi busalala. Banakristo Bahebrayo ibakali basungu kutobela Mulawo tiibakali kumvwisya kuti bakeelede kucileka kutobela cizuminano ca Mulawo nkaambo lino bakali kweendelezyegwa acizuminano cipya. Bakeelede kutalika kuyeeya kweelana akasimpe ikakali kuyaabuyubununwa buce-buce. b—Jer. 31:31-34; Lk. 22:20.
‘Ntwiintwi Nzyobakamvwa Nzyakubeja’ (Milimo 21:22-26)
9. Ncinzi Paulo ncaakayiisya kujatikizya Mulawo wa Musa?
9 Ino mbuti kujatikizya ntwiintwi zyakuti Paulo wakali kuyiisya ba Juda ibakali akati kabamasi kuti “batanoopaluli bana babo nokuba kutobela ziyanza izyalikucitwa lyoonse”? Paulo wakali mwaapostolo kuli Bamasi, alimwi balo bakali kuyeeya kuti usumpula muzeezo wakuti Bamasi tiibakeelede kuutobela Mulawo. Alimwi wakali kumuyubununa muntu uuli woonse, ooyo iwakali kusola kusinikizya Bamasi basyomi kuti bakeelede kupalulwa kacili citondezyo cakutobela Mulawo wa Musa. (Gal. 5:1-7) Kunze lyaboobo, Paulo wakali kukambauka makani mabotu kuba Juda ibakali mumadolopo ngaakali kuswaya. Cakutadooneka wakali kubapandulwida aabo ibakali kuswiilila kuti lufwu lwa Jesu lwakapa kuti Mulawo ucileke kubeleka, alimwi akuti lusyomo ndolwakali kupa muntu kuba mululami kutali kutobela Mulawo wa Musa.—Rom. 2:28, 29; 3:21-26.
10. Mbuti Paulo mbwaakali kubikkila maano mbobalimvwa bamwi kumakani aajatikizya Mulawo alimwi aakupalulwa?
10 Nokuba boobo, Paulo wakali kubamvwisya aabo ibakali kuyanda kutobela tunsiya-nsiya tumwi twaba Juda, mbuli kutabeleka mu Sabata naa kulikasya kulya zyakulya zimwi. (Rom. 14:1-6) Alimwi kunyina naakabikka milawo iikasya kupalulwa. Amana buya, Paulo wakamupalula Timoteyo, kutegwa ba Juda bamuzumine, kayi bausyi bakali ba Giriki. (Mil. 16:3) Kupalulwa akaba makani aakulisalila. Paulo wakaambila bana Galatiya kuti: “Ibupalule naa kutapalulwa zinyina mulimo uuli woonse, pele lusyomo ilubeleka antoomwe aluyando ndolujisi mulimo.” (Gal. 5:6) Nokuba boobo, kwakali kubula lusyomo kuti muntu wapalulwa akaambo kakuyanda kweendelezyegwa a Mulawo naa kuyeeya kuti kutobela cilengwa eeci kulakonzya kupa kuti akkomaninwe a Jehova.
11. Ndulayo nzi baalu ndobakapa Paulo, alimwi ino kulutobela kwakali kujatikizya nzi? (Amubone abupanduluzi buyungizyidwe.)
11 Aboobo, nokuba kuti ntwiintwi nzyobakamvwide zyakali zyakubeja, zyakacili kubanyonganya ba Juda basyomi. Akaambo kaceeci, baalu bakalailila Paulo kuti: “Tulijisi baalumi bone bakakonka. Koya abaalumi aaba ukalisalazye omwini antoomwe ambabo kweelana amulawo alimwi ukababbadelele nzyobayandika, kutegwa mitwe yabo ikagelwe. Aboobo boonse bayoozyiba kuti ntwiintwi nzyobakamvwa kujatikizya nduwe nzyakubeja, pele kuti weenda munzila yeelede, akuti ulautobela Mulawo.” c—Mil. 21:23, 24.
12. Mbuti Paulo mbwaakatondezya kuti ulanyoneka alimwi akubelekela antoomwe abaalu bamu Jerusalemu ciindi naakatobela lulayo ndobakamupa?
12 Paulo naakaamba kuti penzi lini, tiizyakali ntwiintwi zijatikizya nguwe pe, pele bwakali busungu mbobakajisi ba Juda aabo ku Mulawo wa Musa. Nokuba boobo, walo Paulo wakalilibambilide kucinca akuzumina kucita zyoonse baalu nzyobakamwaambila, kufwumbwa buyo kuti kucita boobo kakweendelana anjiisyo zya Leza. Musyule wakalembede kuti: “Kuli baabo beendelezyegwa amulawo ndakaba mbuli muntu weendelezyegwa amulawo ikutegwa ndigwasye baabo beendelezyegwa amulawo, nokuba kuti mebo lwangu tandeendelezyegwi amulawo.” (1 Kor. 9:20) Aciindi eeci, Paulo wakabelekela antoomwe abaalu bamu Jerusalemu alimwi akuba mbuli baabo “beendelezyegwa amulawo.” Kwiinda mukucita boobo, wakatusiila cikozyanyo cibotu cakubelekela antoomwe abaalu alimwi akutaba amuuya wakuzumanana kucita zintu mbuli mbotuyanda.—Heb. 13:17.
Ciindi nokwakanyina njiisyo yamu Magwalo iyakatyolwa, Paulo wakali kunyoneka. Sena andinywe mulacita oobo?
“Teelede Kuti Kapona Pe!” (Milimo 21:27–22:30)
13. (a) Nkaambo nzi ba Juda bamwi ncobakatalisya manyongwe mutempele? (b) Ino Paulo wakafwutuka buti?
13 Zintu tiizyakeenda kabotu kutempele. Ciindi mazuba aakuzuzikizya zikonke naakali aafwaafwi, ba Juda ibazwa ku Asiya bakamubona Paulo, akumutamikizya kuti wakali kutalisya manyongwe mutempele, aboobo bakayunga bantu kutalisya manyongwe. Ikuti mweendelezi wabasikalumamba muna Roma naatakamuvwuna, Paulo nobakamuuma calufwu. Kweelana ambozyakacitika zintu, sikalumamba muna Roma wakamubikka muntolongo. Kuzwa buzuba oobo, cakali kuyootola myaka yone kutegwa Paulo akaangununwe. Alimwi ntenda eeyi yacibukilambuta tiiyakaningamana kuli Paulo. Ciindi mweendelezi wabasikalumamba naakababuzya ba Juda kaambo ncobakali kumulwana Paulo, bakaamba twaambo twiindene-indene twakumutamikizya. Akaambo kakuyobeka, sikalumamba ooyu kunyina ncaakamvwa. Bukkale nobwakaindila kubija, Paulo mane buya wakagusyigwa abusena aawo. Ciindi Paulo abasikalumamba bana Roma nobakali kuyanda kunjila mumaanda aabasikalumamba, Paulo wakalomba mweendelezi wabasikalumamba kuti: “Ndakukomba, kondizumizya ndaambaule kubantu.” (Mil. 21:39) Wakamuzumizya, aboobo Paulo wakalwiiminina lusyomo lwakwe cabusicamba.
14, 15. (a) Ncinzi Paulo ncaakaambila ba Juda? (b) Ncinzi ncaakacita mweendelezi wabasikalumamba muna Roma kutegwa azyibe cakali kupa ba Juda kunyema?
14 Paulo wakatalika kwiinda mukwaamba kuti: “Amuswiilile ndimwaambile kaambo kangu.” (Mil. 22:1) Paulo wakaambaula ankamu mu Chihebrayo, calo cakapa kuti bamuswiilile cakubikkila maano. Wakabapandulwida cakutainda mumbali kaambo ncaakali sikutobela Kristo. Kwiinda mukucita boobu, cabupampu Paulo wakaamba twaambo ba Juda ntobakali kunga basinizya ikuti nobakali kuyanda. Paulo wakali sicikolo wamuntu iwakazyibidwe kapati Gamaliyeli alimwi kweelana ambobakazyi bamwi aciindi eeco, wakali kubapenzya basikutobela Kristo. Aboobo, naakali munzila kuya Damasiko, kwiinda mucilengaano Kristo iwakabusyigwa wakabandika anguwe. Basilweendonyina Paulo bakaubona mumuni uumwekesya akumvwa jwi, pele “tiibakamvwa ncolyakali kwaamba jwi.” (Mil. 9:7; 22:9) Kuzwa waawo, basilweendonyina Paulo, bakamujatilila buya kuunka ku Damasiko mbwaanga wakoofwazyigwa amumuni. Okuya Hananiya, mwaalumi iwakazyibidwe aba Juda bakubusena obuya, camaleele wakamuponya Paulo.
15 Paulo wakazumanana kuluula kuti naakapiluka ku Jerusalemu, Jesu wakalibonya kulinguwe mutempele. Aciindi eeci, ba Juda bakayoowa akoompolola cabukali kuti: “Amumujaye azwe anyika muntu uuli boobu, nkaambo teelede kuti kapona pe!” (Mil. 22:22) Kutegwa Paulo akwabililwe, mweendelezi wabasikalumamba wakamutola muŋanda yabasikalumamba. Kayandide kuzyiba kaambo kakali kupa ba Juda kunyema akaambo ka Paulo, mweendelezi wabasikalumamba wakalailila kuti Paulo alibambile kubuzyigwa-buzyigwa kwiinda mukumukwibbaula. Nokuba boobo, Paulo wakabelesya lwaanguluko ndwaakajisi alimwi akuliyubununa kuti wakali sicisi muna Roma. Mbubwenya buyo, abalo bakombi ba Jehova mazuba aano babelesya nzila ziliko kutegwa balwiiminine lusyomo lwabo. (Amubone kabbokesi kakuti “ Mulawo Wabana Roma Alimwi Abusicisi”, alimwi akakuti “ Kulwanina Lwaanguluko Mazuba Aano.”) Mbwaakamvwida buyo kuti Paulo wakali sicisi muna Roma, mweendelezi wabasikalumamba wakabona kuti wakeelede kujana nzila iimbi yakuti azyibe makani manji. Buzuba bwakatobela, wakaleta Paulo kumuswaangano wamu Nkuta Mpati Yaba Juda.
“Ndili mu Farisi” (Milimo 23:1-10)
16, 17. (a) Amupandulule cakacitika ciindi Paulo naakali kubandika mu Nkuta Mpati Yaba Juda. (b) Ciindi naakaumwa, mbuti Paulo mbwaakayiisya mbociyandika kulicesya?
16 Kumatalikilo aamubandi wakwe kumbele lya Nkuta Mpati yaba Juda, Paulo wakaamba kuti: “Nobaalumi, bakwesu, ndalikupona amanjezyeezya aasalede kapati kuli Leza kusikila sunu.” (Mil. 23:1) Katanasakana kwaambaula, cibalo caamba kuti: “Naakamvwa boobo imupaizi mupati Hananiya wakalailila baabo bakaimvwi munsi lyakwe kuti bamuume kumulomo.” (Mil. 23:2) Eelo kaka kwakali kufwubaala ooku! Alimwi lwakali lusalululo lutaambiki, ikutamikizya Paulo kuti wakali mubeji kakuli kunyina bumboni buli boonse mbwaakamvwa. Nkakaambo kaako Paulo wakaingula kuti: “Leza ulakuuma ayebo, yebo obwaanda busyingulwidwe mulambo uutuba. Sena ulakkala kundibeteka kweelana a Mulawo pele aciindi nciconya usotoka Mulawo kwiinda mukulailila kuti nduumwe?”—Mil. 23:3.
17 Bamwi akati kabaabo ibakaliko bakagambwa, kutali kujatikizya yooyo iwakauma Paulo, pele kujatikizya Paulo ncaakaamba. Bakaamba kuti: “Sena yebo utukila mupaizi mupati wa Leza?” Mukwiingula, walo Paulo wakabayiisya ciiyo cijatikizya kulicesya alimwi akulemeka mulawo. Wakaamba kuti: “Bakwesu, tiindalizyi kuti mupaizi mupati. Nkaambo kulilembedwe kuti, ‘Toyelede kusampaula muleli wabantu bako.’” d (Mil. 23:4, 5; Kul. 22:28) Paulo lino wakabelesya nzila iindene. Mbwaanga wakalizyi kuti Nkuta Mpati yaba Juda ipangidwe aaba Farisi aba Saduki, wakaamba kuti: “Nobaalumi, bakwesu, ndili mu Farisi, imwana waba Farisi. Ndilabetekwa aano akaambo kabulangizi bwakubuka kwabafwu.”—Mil. 23:6.
Mbubwenya mbuli Paulo, tweelede kujana makani ngotuzuminana ciindi notubandika abantu bazulilwa mucikombelo cimbi
18. Nkaambo nzi Paulo ncaakalyaamba kuti wakali mu Farisi, alimwi mbuti andiswe mbotukonzya kwiibelesya nzila eeyi?
18 Nkaambo nzi Paulo ncaakalyaamba kuti wakali mu Farisi? Nkaambo wakali ‘mwana wamu Farisi’ iwakali kuzulilwa kukakamu kabukombi aaka. Aboobo, bana bunji bakali kumubona kuti wakali mu Farisi. e Ino mbuti lino Paulo mbwaakaswaangene aba Farisi caboola kukusyoma mububuke? Kwaambwa kuti, ba Farisi bakali kusyoma kuti muuya tiiwakali kufwa ciindi muntu naafwa akuti myuuya yabalulami yakali kuzumanana kupona mumubili. Tabusyi mbwaakali kusyoma Paulo oobo pe. Walo wakali kusyoma bubuke kweelana ambwaakayiisya Jesu. (Joh. 5:25-29) Nokuba boobo, Paulo wakali kuzuminana aba Farisi kuti kwakali bulangizi bwakuti kuli bubuke bwabafwu, kwiindana ambobakali kusyoma ba Saduki, balo ibatakali kusyoma kuti kunooli buumi kumbele. Tulakonzya kwiibelesya nzila eeyi ciindi notubandika abantu ibalyaamba kuti basyoma Kristo. Tulakonzya kubaambila kuti, andiswe tulasyoma muli Leza mbubwenya mbuli mbabo. Nokuba kuti, balo basyoma mu Butatu, swebo tusyoma muli Leza ngotubala mu Bbaibbele. Pele toonse tulasyoma kuti Leza nkwali.
19. Nkaambo nzi mumuswaangano wamu Nkuta Mpati Yaba Juda ncokwakaba manyongwe?
19 Majwi aa Paulo akapa kuti kube kwaandaana mu Nkuta Mpati Yaba Juda. Cibalo caamba kuti: “Kwakaba kuyobeka kupati, alimwi bamwi balembi munkamu yaba Farisi bakaima akutalika kukazya cabukali, kabati: ‘Kunyina cibi ncotwajana mumwaalumi ooyu, pele ikuti cilenge camuuya cimwi naa mungelo wakaambaula anguwe.’” (Mil. 23:9) Ngoonya muzeezo wakuti mungelo wakabandika a Paulo, tiibakauzumina ba Saduki, kayi balo tabasyomi mubangelo! (Amubone kabbokesi kakuti “ Ba Saduki aba Farisi.”) Manyongwe akaindila cakuti mane mweendelezi wabasikalumamba muna Roma wakamuvwuna alimwi mwaapostolo. (Mil. 23:10) Nokuba boobo, Paulo wakacili muntenda. Ncinzi cakali kuyoomucitikila mwaapostolo? Tuyakwiiya zinji mucibalo citobela.
a Mbwaanga kwakali ba Juda Banakristo banji, kulangilwa kuti mbungano zinji zyakali kuswaanganina mumaanda.
b Nikwakainda myaka misyoonto, mwaapostolo Paulo wakalembela bana Hebrayo lugwalo, mwalo mwaakatondezya mbocakasumpukide cizuminano cipya. Mulugwalo oolo, wakacisalazya kuti cizuminano cipya cakapa kuti cizuminano cakaindi cileke kubeleka. Kunze buyo lyakubaambila twaambo tulimvwisya Banakristo ba Juda aabo ibakacili kusyoma kuti Mulawo wa Musa ucibeleka, cakutadooneka Paulo wakayumya lusyomo lwa Banakristo bamwi ibakali kukulwaizya kapati kutobela Mulawo wa Musa.—Heb. 8:7-13.
c Basyaazibwene baamba kuti baalumi aaba bakapangide cikonke cabu Naziri. (My. 6:1-21) Masimpe kuti lino Mulawo wa Musa alo cikonke cabu Naziri mpocakayeeme, tiiwakacili kubeleka. Nokuba boobo, walo Paulo wakacili kusyoma kuti tiicakalubide pe kubaalumi aabo kuzuzikizya cikonke ncobakakonka kuli Jehova. Aboobo, tiicakalubide pe kulinguwe kubbadelela nzyobakali kuyandika alimwi akubasangana. Tatucizyi cikonke cini cakajatikizyidwe, pele kufwumbwa naa cakali buti, kweelede kuti Paulo naatakabagwasyilizya mukupa cituuzyo camunyama (mbobakali kucita ba Naziri), kabasyoma kuti cakali kuyoobasalazya kuzibi. Lino mbwaanga Kristo ncecituuzyo cilondokede, nkokuti zituuzyo zyabanyama zyakacinyina nguzu zyakupa kuti muntu alekelelwe zibi. Nokuba kuti mubwini tatucizyi cakapa kuti acite boobo, tulizyi kuti Paulo naatakazumina kucita cintu cili coonse cakali kunga canyonganya manjezyeezya aakwe.
d Bamwi bayeeyela kuti Paulo tanaakali kubona kabotu, calo cakapa kuti aalilwe kumuzyiba mupaizi mupati. Naa ambweni akaambo kakuti tanaakaliko mu Jerusalemu kwaciindi cilamfwu, aboobo tanaakali kunga wamuzyiba mupaizi mupati wakaliko aciindi eeco. Ambweni Paulo tanaakali kucikonzya kumubona munkamu ooyo iwakapa malailile aakuti aumwe.
e Mu 49 C.E., ciindi baapostolo abaalu nobakakkala kubandika naa Bamasi beelede kutobela Mulawo wa Musa, bamwi akati ka Banakristo ibakaliko aawo bakali ‘basyomi aabo kaindi ibakali mukakamu kacikombelo caba Farisi.’ (Mil. 15:5) Cilalibonya kuti, aabo basyomi munzila imwi bakacili kwiitwa kuti ba Farisi.
