1-4. Nkaambo nzi Paulo ncaunkila ku Jerusalemu alimwi ncinzi ciyoomucitikila okuya?

 BOONSE baluuside ciindi Paulo a Luka nobaunka ku Melito. Eelo kaka camuyumina Paulo a Luka kubasiya baalu baku Efeso, aabo mbobayandisya kapati! Bamisyinali aaba bobilo baliimvwi kumbali aabwato. Zibbudu zyabo zizwide zintu ziyandika mulweendo lwabo. Alimwi banyamwide mali ngobakayobolola aa Banakristo ibakali kuyandika lugwasyo mu Judaya alimwi baliyandide kuti bakacisisye cipego eeci.

² Kawo ikaunga kabotu kaungila mumilembo yabwato aboobo bweenda kuzwa kucito ikuli coongo. Baalumi aaba bobilo, antoomwe abeenzinyina ibali ciloba, babalanga basyominyina bauside ibali kunkomwe. (Mil. 20:4, 14, 15) Basilweendo aaba bazumanana kubabbaibbika beenzinyina kusikila mane bacileka kulibonya.

³ Kwamyaka iitandila kuli yotatwe, Paulo wali kubelekela antoomwe abaalu bamu Efeso. Pele kwiinda mukusololelwa amuuya uusalala, lino uli munzila kuunka ku Jerusalemu. Munzila imwi, ulakonzya kweezyeezya iziyoomucitikila. Musyule, wakaambila baalu aabo kuti: “Munguzu zyamuuya ndili mulweendo lwakuya ku Jerusalemu, nokuba kuti tandizyi iziyoondicitikila ookuya, nokuba kuti mumunzi amunzi mondiinda muuya uusalala ulainduluka kundaambila kuti ntolongo amapenzi zilandilindila.” (Mil. 20:22, 23) Nokuba kuti kuli ntenda, Paulo ulimvwa kuti “munguzu zyamuuya” ujisi mukuli alimwi ulilisungwide kutobela busolozi bwamuuya bwakuunka ku Jerusalemu. Ulabulemeka buumi bwakwe, pele kucita kuyanda kwa Leza ncecintu ciyandika kapati kulinguwe.

⁴ Sena mbomulimvwa oobo? Ciindi notwalyaaba kuli Jehova, tusyomezya kuti kucita kuyanda kwakwe ncecintu ciyandika kapati mubuumi bwesu. Tulakonzya kugwasyigwa kwiinda mukulanga-langa cikozyanyo cakusyomeka camwaapostolo Paulo.

5. Ino Paulo abeenzinyina bakeenda buti kuunka ku Turo?

⁵ Bwato mbwaakatantide Paulo abeenzinyina bwakeenda ‘cakululama.’ Nkokuti bwakatonkwa amuwo kakunyina kunyonauka, calo cakapa kuti bakaakusike ku Kose mubuzuba mbubonya oobo. (Mil. 21:1) Kulibonya kuti  bwato bwakaima ooko masiku kabutanazumanana kuya ku Rode alimwi aku Patara. Nobakasika ku Patara, iili kunkomwe yakumusanza kwa Asia Minor, bakwesu bakatanta bwato bupati ibunyamuna zintu, ibwakabatola cacigaminina ku Turo, mu Fonike. Nobakali munzila, bakainda ‘kunsumbu ya Kupro nkoili kulumwensyi kulubazu ikuli cito.’ (Mil. 21:3) Nkaambo nzi Luka, imulembi wabbuku lya Milimo, ncaakakabikkilizya kaambo aaka kakuti bakainda kunsumbu ya Kupro?

6. (a) Ino nkaambo nzi kubona nsumbu ya Kupro ncokwakamukulwaizya Paulo? (b) Ciindi nomuzinzibala kuyeeya mbwaamulongezya Jehova alimwi akumugwasya, ino inga mulimvwa buti?

⁶ Ambweni Paulo wakatondeka kunsumbu akuluula zyakamucitikila ooko. Mulweendo lwakwe lwakusaanguna lwabumisyinali myaka iitandila kufwuka musyule, Paulo antoomwe a Barnaba a Johane Marko, bakayaanya Elima simasalamuzi, iwakali kukazya mulimo wabo wakukambauka. (Mil. 13:4-12) Kubona nsumbu eeyo alimwi akuyeeya zintu zyakacitika ooko kweelede kuti kwakamukulwaizya Paulo alimwi akumuyumya kujatikizya zintu izyakali kulangilwa kumbele. Andiswe tulakonzya kugwasyigwa kwiinda mukuzinzibala kuyeeya mbwatulongezya Leza alimwi akutugwasya kuliyumya mumasunko. Kuzinzibala kuyeeya munzila iili boobo kulakonzya kutugwasya kulimvwa mbwaakalimvwa Davida, iwakalemba kuti:  “Mapenzi aamululami manji, pele Jehova ulamuvwuna mulingawo oonse.”—Int. 34:19.

7. Ncinzi basilweendo ncobakacita mbobakasikila buyo ku Turo?

⁷ Paulo wakalizyi mbokuyandika kapati kuyanzana kwa Bunakristo alimwi wakali kuyandisisya kuba abasyominyina. Nobakasika ku Turo, Luka wakalemba kuti “twakayandaula akujana basikwiiya.” (Mil. 21:4) Mbwaanga bakalizyi kuti kwakali Banakristonyina mu Turo, basilweendo aaba bakabayandaula alimwi ambweni bakakkala ambabo. Cimwi cacilongezyo cipati cakuba mukasimpe ncakuti kufwumbwa nkotwaunka, tulakonzya kujana basyomima ibayootutambula amaanza obilo. Aabo ibamuyanda Leza alimwi ibali mubukombi bwakasimpe balijisi balongwe munyika yoonse.

8. Mbuti mbotweelede kulumvwisya lugwalo lwa Milimo 21:4?

⁸ Naakali kupandulula mazuba aali ciloba ngobakakkala mu Turo, Luka wakalemba kaambo kamwi kumatalikilo ikakonzya kulimvwisya kugambya kakuti: “Kweelana anzyobakaambilwa amuuya [bakwesu mu Turo], cakwiinduluka-induluka bakaambila Paulo kuti atakalyati kuulu mu Jerusalemu.” (Mil. 21:4) Sena Jehova wakali kuyanda kuti Paulo aunke kubusena bumbi? Sena lino wakali kulailila Paulo kuti ataunki ku Jerusalemu? Peepe. Muuya wakatondezya kuti Paulo wakali kuyoopenzyegwa mu Jerusalemu, pele kutali kuti wakeelede kuweeleba munzi. Kulibonya kuti kwiinda mumuuya uusalala, bakwesu mu Turo bakaliluzi kwaamba kuti Paulo wakali kuyoojana mapenzi mu Jerusalemu. Aboobo, akaambo kakumubikkila maano Paulo, bakamukulwaizya kuti ataunki ku Jerusalemu. Kulombozya kwabo kwakuyanda kukwabilila Paulo kumapenzi aayo aakali kulangilwa kulalimvwisya. Nokuba boobo, kakanzide kucita kuyanda kwa Jehova, Paulo wakazumanana mulweendo lwakwe lwakuunka ku Jerusalemu.—Mil. 21:12.

9, 10. (a) Mbukkale nzi bukozyenye Paulo mbwaakayeeya ciindi naakamana kumvwa kulibilika nkobakajisi bakwesu mu Turo? (b) Muzeezo nzi uudumide munyika mazuba aano, alimwi wiindene buti amajwi aa Jesu?

⁹ Naakamana kumvwa kulibilika kwabakwesu, ambweni Paulo wakayeeya mbobakalimvwa basikwiiya ba Jesu ciindi naakabaambila kuti ulaunka ku Jerusalemu, akuyoopenzyegwa kapati alimwi akujaigwa. Akaambo kakuti wakeetezyegwa, Petro wakaambila Jesu kuti: “Kolyeengelela Mwami; eeci tacikakucitikili pe.” Jesu wakamwiingula kuti: “Koya kusyule lyangu, Saatani! Uli cilebyo kulindime, nkaambo ulaamizeezo yabantu ikutali ya Leza.” (Mt. 16:21-23) Jesu wakalilisungwide kutondezya kulyaaba mumulimo Leza ngwaakamupede. Awalo Paulo mbwaakalimvwide oobo. Tacidoonekwi buya kuti bakwesu bamu Turo mbubwenya mbuli mwaapostolo Petro, bakajisi makanze mabotu pele tiibakamvwisya kuti aaya akali makanze aa Leza.

¹⁰ Bantu banji mazuba aano bakkomanina kucita cintu cilibonya kuti ncuubauba nokuba kuti taciluzi. Kanji-kanji bayanda bukombi buzumizya kucita nzyobakkomanina alimwi butajisi zyeelelo zinji nzyobeelede kutobela aabo bazulilwa mumo. Mukwiimpana, Jesu wakakulwaizya bukkale bwiindene kapati. Wakaambila  basikwiiya bakwe kuti: “Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela.” (Mt. 16:24) Kutobela Jesu nintaamu yabusongo alimwi iiluzi, pele tacili cuuba-uba pe.

11. Mbuti basikwiiya mu Turo mbobakatondezya luyando alimwi akumugwasyilizya Paulo?

¹¹ Muciindi cisyoonto buyo, Paulo, Luka alimwi abasilweendonyina bamwi bakali kuyoozumanana alweendo lwabo. Cilakulwaizya kapati kubona zyakacitika mulweendo lwabo. Citondezya luyando bakwesu mu Turo ndobakajisi kuli Paulo alimwi ambobakali kuugwasyilizya kapati mulimo wakwe. Baalumi, bamakaintu abana bakamusangana Paulo abasilweendonyina kuunka kunkomwe. Kabali nkamu, boonse bakafwugama akupaila antoomwe mpoonya bakalayana. Kuzwa waawo, Paulo, Luka abasilweendonyina bakatanta bwato bumbi akuzumanana kuya ku Tolemai, ooko nkobakaswaangana abakwesu akukkala ambabo buzuba bomwe.—Mil. 21:5-7.

12, 13. (a) Ino nimpuwo iili buti yakubeleka cakusyomeka njaakajisi Filipo? (b) Mbuti Filipo mbwali cikozyanyo cibotu kubamausyi Banakristo mazuba aano?

¹² Kuzwa waawo, Luka wakaamba kuti Paulo abasilweendonyina bakaunka ku Kaisareya. Nobakasika ooko, ‘bakaakunjila muŋanda ya Filipo mukambausi.’ a (Mil. 21:8) Kweelede kuti bakakkomana kumubona Filipo. Myaka iitandila ku 20 musyule mu Jerusalemu, wakasalwa abaapostolo kutegwa agwasyilizye mukwaabila cakulya mumbungano mpya ya Bunakristo. Kwaciindi cilamfwu Filipo wakali mukambausi musungu. Amuyeeye kuti ciindi kupenzyegwa nokwakapa kuti basikwiiya bamwaike, Filipo wakaunka ku Samariya akutalika kukambauka. Kumbele, wakakambaukila muna Etiopiya uulemekwa alimwi akumubbapatizya. (Mil. 6:2-6; 8:4-13, 26-38) Eelo kaka wakajisi mpuwo mbotu yakubeleka cakusyomeka!

¹³ Busungu Filipo mbwaakajisi kumulimo kunyina nobwakamana pe. Lino kali mu Kaisareya, wakacili musungu mumulimo wakukambauka, kweelana ambwaakatondezya Luka kwiinda mukumwiita kuti “mukambausi.” Alimwi twiiya kuti aciindi aawa wakajisi bana basimbi bone ibakali kusinsima, calo citondezya kuti bakatobela mikondo yabausyi. b (Mil. 21:9) Aboobo kweelede kuti Filipo wakabeleka  canguzu kuuyaka mukwasyi wakwe kumuuya. Bamausyi Banakristo mazuba aano balakonzya kwiiya cikozyanyo cakwe cibotu, kwiinda mukusololela mumulimo wakukambauka alimwi akugwasya bana babo kuukkomanina mulimo wakukambauka.

14. Ino kweelede kuti nzilongezyo nzi izyakaba akaambo kakuswaya kwa Paulo abasyominyina, alimwi nzyoolwe nzi nzyotujisi andiswe mazuba aano?

¹⁴ Mubusena bumwi abumwi, Paulo wakali kuyandaula basyominyina akuyanzana ambabo. Cakutadooneka bakwesu banyenzi aaba bakali kuyandisisya kumusamausya misyinali weendeenda ooyu alimwi abeenzinyina. Cakutadooneka kuswaya kuli boobo kwakali kupa kuti kube ‘kuyumizyanya.’ (Rom. 1:11, 12) Zyoolwe zili boobu zilajanika amazuba aano. Kuli zilongezyo zinji zijanika mukwaaba ŋanda yanu kuti mulangizi wabbazu amukaintu wakwe kabasikila mumo, nokuba kuti inga kaitali mpati.—Rom. 12:13.

15, 16. Ino Agabo wakaleta mulumbe nzi, alimwi wakabajatikizya buti aabo ibakaumvwa?

¹⁵ Ciindi Paulo ncaakakkede a Filipo, kwakasika mweenzu aumbi uulemekwa, nkokuti Agabo. Aabo ibakabungene muŋanda ya Filipo bakalizyi kuti Agabo musinsimi; kayi musyule wakasinsimide kuti kwakali kuyooba nzala mpati mubweendelezi bwa Kilaudiyo. (Mil. 11:27, 28) Ambweni bakali kulyaambauzya kuti: ‘Ncinzi ncaaboolela Agabo? Ino waleta mulumbe nzi?’ Ciindi nobakali kulangilila cakubikkila maano, wakabweza lutambo lwa Paulo, nkokuti mulembo mulamfwu iwakali kwaangwa mucibuno imwakali kukonzya kubikkwa mali azintu zimwi buyo. Kwiinda mukubelesya ndulo, Agabo wakalyaangilila kumaulu alimwi akumaanza. Mpoonya wakaambaula. Cakutainda mumbali wakati: “Mboobu mbowaamba muuya uusalala, ‘Mwaalumi mukamwini lutambo oolu ba Juda bayoomwaanga mbubonya oobu ku Jerusalemu akumwaaba mumaanza aabantu bamasi.’”—Mil. 21:11.

¹⁶ Businsimi bwakasinizya kuti Paulo ulaunka ku Jerusalemu. Alimwi bwakatondezya kuti kukambaukila ba Juda kwakali kuyoopa  kuti aabwe “mumaanza aabantu bamasi.” Businsimi oobu bwakabanjila kapati aabo ibakajanika. Luka wakalemba kuti: “Lino notwakamvwa makani aaya, swebo abaabo ibakali kooko twakatalika kumukombelezya kuti ataunki ku Jerusalemu. Mpoonya Paulo wakaingula kuti: ‘Ino mwabaanzi ncomulila akusola kundityompya? Mutapengi, ndililibambilide ikutali buyo kwaangwa mu Jerusalemu pele akufwa akaambo kazina lya Mwami Jesu.’”—Mil. 21:12, 13.

17, 18. Mbuti Paulo mbwaakatondezya kuti wakalikanzide kucita kuyanda kwa Leza, alimwi ino bakwesu bakacita buti?

¹⁷ Amweezyeezye bukkale oobu. Bakwesu, kubikkilizya a Luka, bakombelezya Paulo kutegwa atazumanani alweendo lwakwe. Bamwi balalila. Mbwaanga Paulo wajatikizyigwa kapati aluyando ndobamutondezya, calweetelelo wabaambila kuti basola ‘kumutyompya,’ naa kweelana abupanduluzi bumwi bwa Chigiriki, nkokuti ‘bamucisizya moyo.’ Nokuba boobo, ulikanzide cakutazungaana alimwi mbubwenya mbocakabede naakaswaangana abakwesu mu Turo, kunyina natiilekele kukombelezyegwa naa kulila kuti zimupe kuzungaana. Muciindi caboobo, wabapandulwida ncayelede kuunkila. Eelo kaka wakatondezya busicamba alimwi akulisungula! Mbubwenya mbuli Jesu, Paulo wakalikanzide kuunka ku Jerusalemu. (Heb. 12:2) Takuli kuti Paulo wakali kuyanda kujaigwa akaambo kalusyomo lwakwe, pele kuti cili boobo cacitika, wakali kuyoocibona kuti ncoolwe kufwa kali sikutobela Kristo Jesu.

¹⁸ Ino bakwesu bakacita buti? Munzila imwi inga twaamba kuti, bakamulemeka. Tubala kuti: “Notwakakakilwa kumukasya kuunka, twakaumuna buyo akwaamba kuti: ‘Kuyanda kwa Jehova akucitike.’” (Mil. 21:14) Aabo ibakali kusola kupa kuti Paulo ataunki ku Jerusalemu kunyina nobakakakatila kumuzeezo wabo. Bakamuswiilila Paulo akutobela ncaakaamba, bakakuzyiba alimwi akukutobela kuyanda kwa Jehova nokuba kuti kucita boobo cakali ciyumu kulimbabo. Paulo wakatalika lweendo oolo ilwakali kuyoomusololela kulufwu. Cakali kuyoomuubila Paulo ikuti aabo ibakali kumuyanda nobatakasola kumukasya.

19. Ino nciiyo nzi ciyandika kapati ncotwiiya kuli ceeco cakamucitikila Paulo?

¹⁹ Twiiya ciiyo ciyandika kapati kuli ceeco cakamucitikila Paulo: Tatweelede kusola kubakasya bamwi ciindi nobayanda kulyaaba kubelekela Leza. Tulakonzya kucibelesya ciiyo eeci mubukkale bunji, ikutali buyo boobo ibujatikizya buumi alufwu. Mucikozyanyo, nokuba kuti bazyali Banakristo banji cilabayumina ciindi bana babo nobazwa aŋanda akuyoobelekela Jehova kumasena aali kulamfwu, balikanzide kutabatyompya munzila iili yoonse. Ba Phyllis, ibakkala ku England balayeeya mbobakalimvwa ciindi mwanaabo omwe buyo musimbi naakaunka ku Africa kali misyinali. Ba Phyllis bakati: “Cakali ciindi ceetezya kapati. Cakandiyumina kuzyiba kuti unooli kulamfwu kapati. Ndakaluuside pele alimwi ndakalikkomene aciindi ncimunya. Ndakaapailila kapati makani aaya. Pele wakalisalila mwini alimwi kunyina nondakasola kucinca kusala kwakwe. Amana buya, lyoonse ndakali kumuyiisya kubikka ziyandika zya Bwami mubusena bwakusaanguna! Lino wabeleka kumasi aambi kwamyaka iili 30 yainda alimwi ndilamulumba Jehova buzuba abuzuba akaambo kakusyomeka kwakwe.” Eelo kaka cileelela kuti katubakulwaizya basyomima ibajisi muuya wakulyaaba!

20, 21. Ncinzi citondezya kuti Paulo wakali kuyandisisya kuba abasyominyina, alimwi nkaambo nzi ncaakali kuyandila kuba ambabo?

²⁰ Bubambe bwakabikkwa, mpoonya Paulo wakazumanana mulweendo lwakwe antoomwe abakwesu aabo ibakapa bumboni bwakuti bakalilyaabide kugwasya camoyo woonse. Kufwumbwa mpobasika mulweendo lwabo lwakuya ku Jerusalemu, Paulo abasilweendonyina bakali kuyandaula Banakristonyina kutegwa bayanzane. Ku Turo, bakajana basikwiiya alimwi bakakkala ambabo mazuba aali ciloba. Mu Tolemai, bakajuzyanya abasyominyina alimwi bakakkala ambabo buzuba bomwe. Ku Kaisareya, bakakkala mazuba aali mbwaabede muŋanda ya Filipo. Kuzwa waawo, basikwiiya bamwi kuzwa ku Kaisareya bakamusindikila Paulo abeenzinyina ku Jerusalemu, ooko umwi wabasikwiiya bakusaanguna Munasoni, nkwaakabatambula. Kumamanino, basilweendo aaba nobakasika mu Jerusalemu, Luka wakaamba kuti “bakwesu bakatutambula amaanza obilo.”—Mil. 21:17.

²¹ Cilisalede kuti, Paulo wakali kuyanda kuba abaabo mbakozyenye limwi lusyomo. Mwaapostolo wakakulwaizyigwa abasyominyina mbubonya andiswe mbotukulwaizyigwa mazuba aano. Cakutadooneka, kukulwaizya ooko kwakamuyumya Paulo kulibambila kujatikizya basikukazya banyemede ibakali kuyandaula nzila yakumujaya.