Nomuyandwa Basikumwaya ba Bwami:

Amweezyeezye kuti muli akati kabaapostolo baimvwi a Cilundu ca Maolifa. Jesu walibonya kumbele lyanu. Kali afwaafwi kuunka kujulu, waamba kuti: “Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:8) Ino inga mwalimvwa buti?

Ambweni inga mwalitenga kubona mulimo mbouli mupati. Mulakonzya kulibuzya kuti, ‘Mbuti swebo tobasikwiiya basyoonto mbotunga twacikonzya kupa bumboni “kumasena aakulamfwu kapati aanyika”?’ Ambweni mulaayeeya majwi aakucenjezya Jesu ngaakaamba busiku bwakuti juunza ulafwa, wakati: “Muzike tali mupati kwiinda simalelaakwe. Ikuti bakandipenzya mebo, bayoomupenzya andinywe; ikuti bakaatobela majwi aangu, bayakwaatobela amajwi aanu. Pele bayoocita zintu zyoonse eezyi zyakumukazya akaambo kazina lyangu, nkaambo tabamuzyi ooyo wakandituma.” (Joh. 15:20, 21) Kuzinzibala kuyeeya majwi aaya kulakonzya kumupa kulibuzya kuti: ‘Mbuti mbondikonzya kupa bumboni cakulomya ciindi nondikazyigwa akupenzyegwa?’

Andiswe mazuba aano, mbotulimvwa oobo. Mbotuli Bakamboni ba Jehova, tuyandika kupa bumboni cakulomya “kumasena aakulamfwu kapati aanyika,” nkokuti ‘kubantu bazisi zyoonse.’ (Mt. 28:19, 20) Mbuti mulimo ooyu mboukonzya kubelekwa, ikwaambisya notukazyigwa kweelana ambokwakasinsimwa?

Mubbuku lya Milimo, tujana makani aakkomanisya aatondezya baapostolo a Banakristonyina bamumwaanda wamyaka wakusaanguna mbobakacikonzya kuuzuzikizya mulimo wabo kwiinda mukugwasyigwa a Jehova. Bbuku eeli ndyomubala lyakabambilwa kumugwasya kwaalanga-langa makani aayo alimwi akukkomana azibalo zili mukati. Mulagambwa kubona kukozyanya kunji kuliko akati kababelesi ba Leza bamumwaanda wamyaka wakusaanguna alimwi abantu bakwe mazuba aano. Mulabona kuti kukozyanya ooku takujatikizyi buyo mulimo, pele alimwi ambotusololelwa kutegwa tuubeleke mulimo ooyu. Cakutadooneka, kuzinzibala kuyeeya kukozyanya ooku, kuyooyumya lusyomo lwanu lwakuti Jehova Leza wazumanana kwiisololela mbunga yakwe yaanyika.

Tusyoma kuti kulanga-langa bbuku lya Milimo, kuyooyumya lusyomo lwanu lwakuti Jehova uyoomugwasya akuti nguzu zyamuuya wakwe uusalala ziyoomuyumya. Aboobo amuzumanane ‘kupa bumboni cakulomya’ kujatikizya Bwami bwa Leza akugwasya bantu kweenda munzila iitola kulufwutuko.—Mil. 28:23; 1 Tim. 4:16.