AMUZYIBE kuti Jehova uyoomutambula amaanza obilo mwaakupiluka kulinguwe. Uyoomugwasya kuti mulwane zintu zimulibilisya, akuti muleke kumvwa moyo kucisa, muliibe alimwi akukkalwa moyo akaambo kakuba amanjezyeezya aasalala. Aboobo, eeci ciyoomupa kuti mutalike alimwi kubelekela Jehova antoomwe abakombinyoko. Ibukkale bwanu buyooba mbuli bwa Banakristo bamwi bamumwaanda wamyaka wakusaanguna, aabo mwaapostolo Petro mbaakalembela kuti: “Mwakali mbuli mbelele ziyaabusweeka, pele lino mwapilukila kumweembezi amulangizi wabuumi bwanu.”—1 Petro 2:25.

Ikupilukila kuli Jehova ncintu ciinda kubota ncomukonzya kucita. Nkaambo nzi? Muyookkomanisya moyo wa Jehova. (Tusimpi 27:11) Mbuli mbomuzyi, kuli mbwalimvwa Jehova, aboobo nzyotucita zilamujatikizya awalo. Masimpe, Jehova tatusinikizyi kuti tumuyande akumubelekela. (Deuteronomo 30:19, 20) Syaazibwene umwi mumakani aamu Bbaibbele wakacaamba kuti: “Moyo wamuntu taujaludwi mpouli anze pe. Ujaludwa mukati.” Kwiinda mukukomba Jehova akaambo kakuti tulamuyanda kapati, tulakonzya kusala kumujaluda moyo wesu. Ciindi notucita boobo, tumupa cipego citaliboteli, nkokuti kusyomeka kwesu, alimwi tupa kuti moyo wakwe ukkomane kapati. Mubwini, taaku cikonzya kweelana alukkomano ndotujana akaambo kakumukomba Jehova walo ooyo iweelela ncobeni kukombwa.—Milimo 20:35; Ciyubunuzyo 4:11.

Kuyungizya waawo, ciindi mwaakutalika alimwi kutola lubazu mubukombi bwa Bunakristo, munoosololelwa anguwe alimwi nzala yanu yakumuuya iyoomana. (Matayo 5:3) Munzila nzi? Bantu munyika yoonse mboizulwa balalibuzya kuti, ‘Nkaambo nzi ncotuli waano anyika?’ Balaanzala yakuyanda kuzyiba ncotuponena. Bantu balaanzala eeyi nkaambo oobo mbwaakabalenga Jehova. Wakatulenga munzila yakuti kacitukkomanisya kumubelekela. Taaku ciinda kutukkomanisya mbuli kuzyiba kuti tukomba Jehova akaambo kakuti tulamuyanda.—Intembauzyo 63:1-5.

Nobayandwa, amuzyibe kuti Jehova uyanda kuti mupilukile kulinguwe. Ino inga mwaasyoma buti makani aaya? Amuyeeye buyo: Broshuwa eeyi yakalembwa musyule lyakupaila canguzu. Yakaletwa kulindinywe, ambweni amwaalu Munakristo naa musyominyoko umbi buyo. Kumane mwakabweza ntaamu kuti mwiibale akuutambula mulumbe uuli mumo. Zyoonse eezyi zitondezya kuti Jehova tanaamuluba pe. Muciindi caboobo, cabubombe umukwelela kulinguwe, kuti mupilukile kulinguwe.—Johane 6:44.

Tulakonzya kukkalwa moyo akaambo kakuzyiba kuti Jehova tabalubi pe babelesi bakwe ibasweekede. Eeco ncencico ncaakazyikumvwisya mucizyi umwi wazina lya Donna. Wakaamba kuti: “Asyoonto-syoonto ndakazyikuleya akuzwa mukasimpe, pele bunji bwaziindi ndakali kulijana kuti ndiyeeya lugwalo lwa Intembauzyo 139:23, 24, ilwaamba kuti: ‘O Leza, kondilanga-langa, uuzyibe moyo wangu. Kondilingula, wiizyibe mizeezo iindilibilisya. Kobona naa mukati kangu kuli nzila iili yoonse mbyaabi, alimwi kondeenzya munzila iiliko lyoonse mane kukabe kutamani.’ Ndakalizyi kuti tandili wanyika—mubwini ndakanyina cangu mulinjiyo—alimwi ndakalizyi kuti ndakeelede kuba mumbunga ya Jehova. Ndakatalika kubona kuti Jehova tanaakandifwutatila pe; ndakeelede buyo kupiluka kulinguwe. Lino ndilikkomene kapati kuti ndakacita oobo!”

Camoyo woonse tupailila kuti andinywe mutalike alimwi kuba ‘alukkomano lwa Jehova.’ (Nehemiya 8:10) Tamukausi pe akaambo kakupilukila kuli Jehova.