Nomuyandwa mukwesu naa mucizyi:

Mbuli mbomuzyi, Bbaibbele ndibbuku ilyaamba kapati kujatikizya bantu. Ibunji bwabantu aaba bakali baalumi alimwi abamakaintu ibakali kujana buyumuyumu mbuli mbotujana andiswe. Bakali “kulimvwa mbubonya mbotulimvwa aswebo.” (Jakobo 5:17) Ibamwi bakali kukatazyigwa amapenzi alimwi akulibilika. Bambi bakacisizyigwa moyo kapati abanamukwasyi naa bakombinyina. Mpoonya bamwi bakali kulimvwa bubi naa kulipa mulandu akaambo kakulubizya kwabo beni.

Sena eeci caamba kuti bantu aaba bakamusiya Jehova cakumaninina? Peepe. Ibunji bwabo bakali mbuli sintembauzyo iwakapaila kuti: “Ndaingaila mbuli mbelele iisweekede. Kondiyandaula ndemubelesi wako, nkaambo tiindailuba milawo yako pe.” (Intembauzyo 119:176) Sena andinywe mbomulimvwa oobu?

Jehova tabalubi pe bakombi bakwe ibaleya kuzwa mubutanga bwakwe. Muciindi caboobo, ulayanda kubagwasya kuti bapilukile kulinguwe, ibunji bwaziindi ulacita oobo kwiinda mubasyomima. Mucikozyanyo, amuyeeye Jehova mbwaakagwasya mubelesi wakwe Jobu, ooyo iwakasikilwa mapenzi manji, kubikkilizya akunyonyookelwa lubono, kusweekelwa bayandwa, alimwi akuciswa kapati. Kuyungizya waawo, akamucisa kapati majwi ngobakaamba bantu ibakeelede kumuyumya. Pele kunyina naakamufwutatila Jehova, nokuba kuti aciindi cimwi wakalubizya mukuyeeya kwakwe. (Jobu 1:22; 2:10) Ino Jehova wakamugwasya buti Jobu kuti atalike alimwi kuzilanga kabotu zintu?

Nzila imwi Jehova mbwaakamugwasya Jobu nkwiinda mukubelesya musyominyina Jobu uutegwa Elihu. Ciindi Jobu naakali kwaamba mbwalimvwide, Elihu wakamuswiilila kumane wakaambaula. Ino wakaamba nzi? Sena wakamutongooka Jobu naa kumupa kucita cintu cimwi akaambo kakulimvwa kuba amulandu naa kufwa nsoni? Sena Elihu wakali kulibona kuti ulamwiinda maano Jobu? Peepe! Kwiinda mukweendelezyegwa amuuya wa Leza, Elihu wakaamba kuti: “Kuli Leza mwini-mwini mebo ndili buyo mbuli nduwe; andime ndakabumbwa kuzwa kubulongo.” Kumane wakamukkazika moyo Jobu ulaamba: “Toyelede kundiyoowa mebo pe, alimwi majwi ngondaamba taayelede kukunyonganya pe.” (Jobu 33:6, 7) Muciindi cakumuyungizyila mapenzi Jobu, caluyando Elihu wakamupa lulayo Jobu akumuyumya-yumya.

Nomuyandwa, amuzyibe kuti twakamulembela broshuwa eeyi katujisi muzeezo ngomunya ooyu. Cakusaanguna, twakaswiililisya, twakabikkila maano kapati kulanga-langa bukkale alimwi anzyobakaamba bakwesu abacizyi banji ibakaleyede. (Tusimpi 18:13) Mpoonya twakalanga ncaamba Magwalo, twakapaila alimwi akulanga-langa zibalo zyaamba Jehova mbwaakabagwasya babelesi bakwe bamusyule ciindi nibakalijana mubukkale buli boobu. Kumane twakalemba broshuwa eeyi kwiinda mukuzibikka antoomwe zibalo eezyo zyamu Magwalo alimwi azintu izyakacitikila babelesi bamwi bamazuba aano. Twamulomba camoyo woonse kuti mwaalange-lange makani aali mubroshuwa eeyi. Amuzyibe kuti tulamuyanda kapati, kuzwa ansi aamoyo.

Kabunga Keendelezya ka Bakamboni ba Jehova