BANTU boonse, kubikkilizya abantu ba Leza, balijisi zintu zibalibilisya. Sintembauzyo wakalemba kuti: ‘Mizeezo minji iilibilisya yakandikatazya.’ (Intembauzyo 94:19) Alimwi Jesu wakaamba kuti kumazuba aamamanino, “kulibilika azintu zyamubuumi” kwakali kuyoopa kuti cikatazye kapati kubelekela Jehova. (Luka 21:34) Sena oobo mbocibede akulindinywe? Sena mulalibilika kapati akaambo kapenzi lyamali, mapenzi aamumukwasyi naa akaambo kakuciswa? Ino Jehova inga wamugwasya buti kutegwa muliyumye?

Tatukonzyi kulwana zintu zitulibilisya munguzu zyesu tobeni pe. Mwaapostolo Paulo wakalemba kuti: “Tulasyanikizyigwa munzila iili yoonse . . . ; tulizyingidwe . . . ; tulaumputwa ansi.” Nokuba boobo, alimwi wakaamba kuti “tatumanikidwe cakutakonzya kuputauka pe,” “cakubulila limwi aakupolela,” akuti “tatunyonyooki pe.” Ino ncinzi citugwasya kuliyumya? ‘Ninguzu zigambya iziinda zyabantu,’ nkokuti nguzu izizwa kuli Leza wesu Singuzuzyoonse, Jehova.—2 Bakorinto 4:7-9.

Amuyeeye buyo mbomwakapegwa “nguzu zigambya iziinda zyabantu” musyule oomu. Sena muliyeeyede makani amwi aakulwaizya mbwaakamupa kumulumba Jehova akaambo kaluyando lwakwe lutamani? Sena lusyomo lwanu muzisyomezyo zya Jehova lwakayuma ciindi nomwakayiisya bamwi kujatikizya bulangizi bwakuba mu Paradaiso? Ciindi notujanika kumiswaangano ya Bunakristo akwaambila bamwi lusyomo ndotujisi, tulajana nguzu izitupa kuliyumya muzintu zilibilisya mubuumi alimwi tulakkalwa moyo cakunga tulakonzya kumubelekela Jehova calukkomano.

Kwaamba masimpe, zimwi ziindi mulakonzya kugolelwa maano akaambo kakujata maankamaanka. Mucikozyanyo, Jehova utwaambila kuti katusaanguna kuyandaula Bwami akuzumanana kuba abubambe bubotu bwakucita zintu zyakumuuya. (Matayo 6:33; Luka 13:24) Pele ino mbuti kuti kukazyigwa, kuciswa-ciswa, naa mapenzi aamumukwasyi zimupa kulimvwa kukatala? Naa ino mbuti kuti mulimo wanu wakumubili umumanina ciindi alimwi anguzu nzyomweelede kubelesya mumbungano? Akaambo kakuti nzinji nzyomweelede kucita, pele mujisi buyo ciindi cisyoonto alimwi anguzu ziniini zyakuzicita, mulakonzya kugolelwa maano. Ambweni mwakasika mpomuyeeya kuti zintu Jehova nzyalangila kulindinywe nzinji kapati kwiinda nzyomukonzya.

Jehova ulamvwisya. Talangili zinji kulindiswe kwiinda nzyotukonzya kumupa. Alimwi ulizyi kuti citola ciindi kuti swebo tuubulukwe naa kulemunukwa akuleka kukatazyigwa mumoyo.—Intembauzyo 103:13, 14.

Mucikozyanyo, amuyeeye Jehova mbwaakamulanganya musinsimi Elija. Ciindi Elija naakatyompwa kapati akuyoowa cakunga wakatijila munkanda, sena Jehova wakamunyemena musinsimi ooyu akumwaambila cabukali kuti ajokele kumulimo wakwe? Peepe. Ziindi zyobilo Jehova wakatuma mungelo wakwe kuti amubusye Elija cabubombe akumupa cakulya kuti alye. Nokuba boobo, nokwakainda mazuba aali 40, Elija wakacili kulibilika akuyoowa. Ino ncinzi cimbi Jehova ncaakacita kutegwa amugwasye?  Cakusaanguna, Jehova wakatondezya kuti ulakonzya kumukwabilila. Cabili, Jehova wakamukkazika moyo Elija kwiinda mukubelesya “jwi libombe lyaansaansi.” Camamanino, Jehova wakamuyubunuda kuti kwakali bantu abambi banji kapati ibakali kumukomba Leza cakusyomeka. Tiilyakalampa pe, Elija wakatalika alimwi kuubeleka mulimo wakwe kali musinsimi musungu. (1 Bami 19:1-19) Ino twiiya nzi kumakani aaya? Ciindi Elija naakazyingidwe akaambo kazintu zilibilisya, Jehova wakamukkazikila moyo akumufwida lubomba. Jehova tacincide pe. Oobo mbombubo mbwatulanganya andiswe.

Nomuyeeya nzyomukonzya kumucitila Jehova, amuzilange kabotu zintu. Muteelanyi nzyomukonzya kucita lino azyeezyo nzyomwakali kucita musyule. Mucikozyanyo: Muntu iwakali kutola lubazu mumuzundano wakusiyana pele iwakacileka kulunduka kwamyezi naa myaka minji takonzyi kutalika kulunduka mbuli mbwaakali kulunduka kaindi mbwaabukila buyo. Muciindi caboobo, ulatalika asyoonto-syoonto kwiinda mukulibikkila mbaakani izikonzya kumugwasya kuyumya mubili wakwe akumupa nguzu zyakuliyumya. Banakristo bali mbuli bantu ibatola lubazu mumuzundano wakusiyana. Balaliyiisya kabajisi makanze aagaminide. (1 Bakorinto 9:24-27) Amusole kulibikkila mbaakani zyakumuuya nzyomukonzya kuzuzikizya lino. Mucikozyanyo, mulakonzya kulibikkila mbaakani yakujanika kumuswaangano wambungano. Amumulombe Jehova kuti amugwasye kuzuzikizya mbaakani yanu. Nomuyaabuba anguzu zyakumuuya, ‘muyoolabila akubona kuti Jehova mubotu.’ (Intembauzyo 34:8) Kamuyeeyede kuti kufwumbwa cintu ncomucita kutegwa mutondezye kuti mulamuyanda Jehova, nokuba kuti ciboneka mbuli kuti ncisyoonto, cilayandika kapati kulinguwe.—Luka 21:1-4.

Ino mbuti Jehova mbwaakabayumya ba June kuti bapiluke kulinguwe? Baamba kuti: “Ndakazumanana kupaila kuli Jehova, kumulomba kuti andigwasye. Mpoonya mukamwanaangu wakandaambila zyamuswaangano wabbazu mudolopo mondakali kukkala. Ndakakanza kujanika buzuba bomwe bwamuswaangano ooyu. Eelo kaka ndakalimvwa kabotu kuba akati kabantu ba Jehova alimwi! Muswaangano ooyu wakandisinsimuna kuti ndibweze ntaamu njondakali kuyandika kubweza kwaciindi cilamfwu. Lino ndakatalika alimwi kumubelekela Jehova calukkomano. Buumi bwangu bulaampindu kapati lino. Ndazyiba kuti tandeelede kulizandula kubakwesu abacizyi akuti ndeelede kuzumina kugwasyigwa ambabo. Ndililumbide kapati kuti ndakacijisi ciindi cakupiluka.”