Makani 1: Leza Watalika Kupanga Zintu
ZYOONSE zintu zibotu nzyotujisi zizwa kuli Leza. Wakapanga zuba kutegwa katuba amumuni masyikati, alimwi amwezi anyenyezi kutegwa katukonzya kuba amumuni masiku. Alimwi Leza wakatupangila nyika kuti katukkala.
Pele zuba, mwezi, nyenyezi anyika tazyili zintu Leza nzyaakataanguna kupanga. Hena ulicizyi ncaakataanguna kupanga? Kutaanguna, Leza wakapanga bantu bali mbuli nguwe. Tatukonzyi kubabona bantu aaba mbuli mbotutakonzyi kumubona Leza. Mu Bbaibbele bantu aaba baitwa kuti mbangelo. Leza wakapanga bangelo kuti kabakkala limwi kujulu.
Mungelo Leza ngwaakataanguna kupanga wakali kuyandika kapati. Wakali Mwana wa Leza wakutaanguna, alimwi wakabeleka aba Wisi. Wakamugwasya Leza kupanga zintu zimwi zyoonse. Wakamugwasya Leza kupanga zuba, mwezi, nyenyezi, kubikkilizya anyika yesu.
Ino nyika yakali buti kuciindi eeco? Kumatalikilo taku muntu wakali kukonzya kukkala anyika. Taku cakaliko pe, pele buyo lwaanje lomwe lupati nyika yoonse. Pele Leza wakali kuyanda kuti bantu kabakkala anyika. Aboobo wakatalika kutubambila zintu. Ino ncinzi ncaakacita?
Cakutaanguna nyika yakali kuyandika mumuni. Aboobo Leza wakapanga mumuni kuzwa kuzuba kutegwa kaumunika anyika. Wakacita kuti kube masiku amasyikati. Kumane Leza wakasumpula nyika atala lyameenda aalwaanje.
Kumatalikilo taku cintu cakaliko anyika. Yakali kulibonya mbuli cifwanikiso ncobona waawa. Tiikwakaliko maluba naa zisamu nibaba banyama. Alimwi taku nswi niiba yomwe yakaliko mulwaanje. Leza wakacijisi mulimo mupati wakubambulula nyika kuti ibote ncobeni kutegwa banyama abantu kabakkomenyi alinjiyo.
Jelemiya 10:12; Ba-Kolose 1:15-17; Matalikilo 1:1-10.
Mibuzyo
- Ino zintu zyoonse zibotu zyakazyila kuli, alimwi hena inga wapa cikozyanyo?
- Ncintu nzi cakutaanguna Leza ncaakalenga?
- Nkaambo nzi mungelo wakutaanguna ncaakali kuyandika kapati?
- Pandulula nyika mboyakabede kumatalikilo. (Bona acifwanikiso.)
- Mbuti Leza mbwaakaibamba nyika ikutegwa banyama abantu bakonzye kukkala ali njiyo?
Mibuzyo aimwi
- Bala Jelemiya 10:12, BT.
Mbube nzi bwa Leza butondezyegwa mukulenga kwakwe? (Is. 40:26; Balo. 11:33, Ci)
- Bala Ba-Kolose 1:15-17.
Ndubazu nzi Jesu ndwaakajisi mukulenga, alimwi mbuti eeci mboceelede kutujatikizya mbuli mbotumubona? (Kol. 1:15-17)
- Bala Matalikilo 1:1-10.
Ino nyika yakatalika buti? (Matl. 1:1)
Ncinzi cakacitika mubuzuba bwakulenga bwakutaanguna? (Matl. 1:3-5)
Pandulula cakacitika mubuzuba bwakulenga bwabili? (Matl. 1:7, 8)
