BANTU nibakazwa mubwato, bakazumanana kupona mbuli mbobakali kupona kaindi. Taku nibakali kusyoma kuti Zambangulwe inga yaboola. Kweelede kuti bakaseka cakuzwa munzila. Pele tiicakatola ciindi bakaleka kuseka.

Cakutayeeyelwa, imvwula yakatalika kuwa. Yakakuna mbweena mbuli mbokuba nomukuna meenda ansi kuzwa mucibbekete. Nowa wakaliluzi! Pele aciindi aawa tiicakali kukonzyeka kumuntu uuli woonse kunjila mubwato. Mulyango wakali jalidwe canguzu a Jehova.

Tiicakatola ciindi yoonse myeezi yakabbila mumeenda. Meenda akaba mbuli milonga mipati. Akausya zisamu akukunkulisya mabwe mapati, alimwi akali kuvwuuma kapati. Bantu bakayoowa! Bakatanta mumalundu. Ma! bakaliyeeya kuti anu nitwakamuswiilila buyo Nowa katunjila mubwato mulyango nowakacijalukide! Pele lino ooku kwakaba kumuka.

Meenda akali kuya civwula. Kwamazuba aali 40 masiku amasyikati mvwula yakazumanana kuwa. Akabembeleka mumalundu alimwi tiicakatola ciindi cilamfwu naaba malundu malamfwu aalo akabbila. Aboobo kweelana ambwaakaambide Leza, boonse bantu abanyama batakali mubwato bakafwa. Pele boonse bakali mukati bakafwutuka.

Nowa abana bakwe bakawoonda mulimo wakupanga bwato. Meenda akabunyamuna bwato mujulu, eelyo bwakali kuya ciibauka. Kumane buzuba bumwi mvwula niya kaleka kuwa, zuba lyakatalika kubala. Kwakaile kugweemuka! Kwakali buyo lwaanje lomwe lupati koonse-koonse. Icintu buyo comwe cakali kukonzya kubonwa, mbwato bwakali kwiibauka.

Babbabbani aciindi aawa bakalifwide. Taku nibakaciliko kuti kabapenzya bantu. Boonse bakafwa kubikkilizya abamanyina alimwi abantu boonse babi. Pele ino ncinzi cakacitika kuli bama usyi?

Bama usyi bababbabbani tiibakali bantu beni-beni balya maila mbuli ndiswe. Bakali bangelo bakaboolede kuzyi kukkala anyika mbuli bantu. Aboobo Zambangulwe niya kaboola tiibakafwa pe antoomwe abantu. Bakacinca mibili yabo yanyama njobakajisi akujokela kujulu kabali bangelo. Pele taku nibakazumizyigwa kuba bamukwasyi wa Leza wabangelo bakwe. Aboobo bakaba bangelo ba Saatani. Mu Bbaibbele baitwa kuti madaimona.

Lino Leza wakaleta muwo, eelyo meenda aazambangulwe akatalika kuyuminina. Nikwakainda myezi iili yosanwe bwato bwakazyi kwiima atala aacilundu. Kwakainda mazuba manji, bantu bakali mubwato bakali kukonzya kusondela anze akubona malundu mpaali atala. Meenda akali kuyuminina abuzuba.

Kumane Nowa wakazwisya ciyuni cisiya mubwato ciitwa kuti cikwaangala. Cikwaangala wakali kukonzya kuuluka kwaciindi cilamfwu alimwi wakali kujokela kwakali bwato nkaambo tanaakali kukonzya kujana busena bubotu bwakukkala. Wakazumanana kucita oobu alimwi lyoonse naakali kujoka, wakali kukkala abwato.

Nowa wakali kuyanda kuti azyibe naa meenda akayuminina anyika, aboobo lweendo lwakaccilila wakatuma nziba. Pele ayalo nziba yakaile kujoka nkaambo tiiyakajana busena bwakukkala. Nowa wakaituma alimwi ciindi cabili, yakajoka kailumide kumulomo tewu lyaolifa. Aboobo Nowa wakazyiba kuti meenda akayuminina. Nowa alimwi wakaituma nziba ciindi catatu, lino yakajana busena buyumu bwakukkala.

Lino Leza wakaambaula kuli Nowa. Wakati: ‘Kozwa mubwato. Zwisya mukwasyi wako woonse abanyama mbomuli limwi.’ Bakakkala mubwato kwamwaka amazuba. Aboobo tulakonzya kuyeeya buyo mbobakakkomenyi kuzwa anze alimwi boonse kabali baumi!

Matalikilo 7:10-24; 8:1-17; 1 Pita 3:19, 20.