Makani 2: Muunda Mubotu
LANGA nyika mboibede awa! Taku ciinda waawa kubota! Langa bwizu, zisamu, maluba abanyama boonse. Hena ulakonzya kumuzyiba muzovwu abasyuumbwa?
Ino muunda ooyu mubotu boobu wakaboola buti? Nkooko atulange-lange Leza mbwaakatubambila nyika.
Kutaanguna Leza wakapanga mweemvwu kuvwumba nyika. Alimwi wakapanga misyobo yoonse yazyisyango zisyoonto-syoonto, zitewu azisamu. Eezyi zintu zikomena anyika zipa kuti nyika yeebeke. Pele tauli ngomulimo ooyo olikke ngozijisi. Izinji zilatupa zyakulya zibotu zijisi munse.
Kuzwa waawo Leza wakapanga nswi kuti kazyisaya mumeenda alimwi abayuni kuti kabauluka mujulu. Wakapanga babwa, bakkiti amahacci; banyama bapati-pati abasyoonto-syoonto. Ino mbanyama nzi bavwubwa amunzi? Hena tatukonzyi kukkomana kuti Leza wakatupangila zintu eezyi zyoonse?
Kumane, Leza wakabamba cibeela cimwi canyika kuba busena bweebeka kapati. Oobu busena wakabwiita kuti muunda wa Edeni. Bwakali bubotu. Zyoonse zyakali mumo zyakali kweebeka. Alimwi Leza wakali kuyanda kuti nyika yoonse ibe mbuli muunda ooyu mubotu ngwaakabamba.
Pele langa alimwi acifwanikiso camuunda ooyu. Hena ulicizyi eeco Leza ncaakabona kuti taciko? Atubone.
Matalikilo 1:11-25; 2:8, 9.
Mibuzyo
- Mbuti Leza mbwaakatubambila nyika kuba munzi wesu wakukkala?
- Pandulula misyobo-misyobo yabanyama Leza njaakapanga. (Bona acifwanikiso.)
- Nkaambo nzi muunda wa Edeni ncowakali kuyandika kapati?
- Ino Leza wakali kuyanda kuti nyika yoonse ibe buti?
Mibuzyo aimwi
- Bala Matalikilo 1:11-25.
Ncinzi Leza ncaakalenga mubuzuba bwatatu bwakulenga? (Matl. 1:12)
Ncinzi cakacitika mubuzuba bwane bwakulenga? (Matl. 1:16)
Misyobo nzi yabanyama Leza njaakalenga mubuzuba bwakulenga bwasanu abwacisambomwe? (Matl. 1:20, 21, 25)
- Bala Matalikilo 2:8, 9.
Zisamu nzi zyobilo ziyandika kapati Leza nzyaakasyanga mumuunda, alimwi nzyakali kwiiminina nzi?
