Makani 3: Musankwa Wakutaanguna a Mukaintu
INO ncintu nzi ceenzu acifwanikiso eeci? Mbantu bali mumo. Musankwa wakutaanguna amukaintu. Ino ngwani wakabapanga? Ngu Leza. Hena ulimuzyi zina lyakwe? Ngu Jehova. Walo musankwa amukaintu bakaulikwa kuti Adamu a Eva.
Mboobu Jehova Leza mbwaakapanga Adamu. Wakabweza bulongo anyika akubumba mubili uulondokede wa Adamu. Amane wakafwulida muya mumpemo zya Adamu, eelyo Adamu wakaba muumi.
Jehova Leza wakalijisi mulimo wakupa Adamu kuti abeleke. Wakaambila Adamu kuulika banyama mazina boonse bamisyobo-misyobo. Adamu wakali kubabona banyama lyoonse kwaciindi cilamfwu, aboobo eeci cakamugwasya kubaulika mazina aabeelede boonse. Adamu naakali kuulika banyama mazina, wakatalika kubona cintu cimwi. Hena ulicizyi eeco ncaakabona?
Banyama boonse bakalijisi beenzyinyina. Kwakali bazovwu basankwa abasimbi alimwi abasyuumbwa basankwa abasimbi. Pele Adamu tanaakajisi wakali kukonzya kuba mukaintu wakwe. Aboobo Jehova wakapa kuti Adamu aone kapati, eelyo wakamugusya kabalo kulubazu lumwi. Kwiinda mukubelesya kabalo kakwe, Jehova wakamupangila mukaintu Adamu, eelyo wakaba mukaintu wakwe.
Aciindi aawa Adamu wakakkomana kapati! Alimwi koyeeya buyo mbwaakakkomana Eva kubikkwa mumuunda ooyu mubotu! Lino bakali kukonzya kuba abana akukkala antoomwe calukkomano.
Jehova wakali kuyanda kuti Adamu a Eva kabapona kukabe akutamani. Wakali kuyanda kuti basandule nyika yoonse ibe mbuli muunda wa Edeni kubota. Elo kaka Adamu a Eva bakakkomana nibakali kuyeeya mulimo ngobakapegwa! Hena anduwe nookayanda kubeleka mulimo ooyu wakubotezya nyika kuba muunda weebeka? Pele lukkomano lwa Adamu a Eva tiilwakatola ciindi cilamfwu. Atubone cakapa kuti cibe boobo.
Intembauzyo 83:18; Matalikilo 1:26-31; 2:7-25.
Mibuzyo
- Ino cifwanikiso cili mu Makani 3 ciindenyi buti acifwanikiso cili mu Makani 2?
- Ngwani wakapanga muntu wakutaanguna, alimwi wakali ni zina?
- Mulimo nzi Leza ngwaakapa Adamu kubeleka?
- Nkaambo nzi Leza ncaakapa kuti Adamu aone kapati?
- Mbulamfwu buli buti Adamu a Eva mbobakeelede kupona, alimwi mulimo nzi Jehova ngwaakali kuyanda kuti babeleke?
Mibuzyo aimwi
- Bala Intembauzyo 83:18.
Ngwani Leza zina, alimwi ninguzu nzi nzyajisi anyika? (Jelemiya 16:21; Dan. 4:17)
- Bala Matalikilo 1:26-31.
Ncilenge nzi camamanino Leza ncaakalenga mubuzuba bwacisambomwe, alimwi mbuti cilenge eeci mbocakaindenyi abanyama? (Matl. 1:26)
Ncinzi Jehova ncaakapa bantu abanyama kuti kabalya? (Matl. 1:30)
- Bala Matalikilo 2:7-25.
Ncinzi cakabikkilizyidwe mumulimo wa Adamu wakuulika mazina banyama? (Matl. 2:19)
Mbuti Matalikilo 2:24 mbwatugwasya kubona Jehova mbwakubona kukwatana, kwaandaana, akulekana? (Mt. 19:4-6, 9)
