Makani 5: Buumi Buyumu Bwatalika
NIBAKAZWA mumuunda wa Edeni, Adamu a Eva bakalijisi mapenzi manji. Bakeelede kubeleka canguzu kutegwa bajane cakulya. Muciindi cakuba azisamu zibotu zyamicelo, bakabona zisamu zinji zyamamvwa azyincenya kazyikomena munsi aamunzi. Eeci ncencico cakacitika Adamu a Eva nibakazangila Leza, alimwi bakaleka kuba balongwe Bakwe.
Icakainda kubija ncakuti, Adamu a Eva bakatalika kufwa. Koyeeya kuti Leza wakabacenjezya kuti bakali kukonzya kufwa ikuti balya mucelo kucisamu cimwi cakakasyidwe. Inzya, mubuzuba mbweena mbobakalya bakatalika kufwa. Elo kwakaba kufwubaala kaka kutamuswiilila Leza!
Bana ba Adamu a Eva boonse bakazyalwa Leza kabatandide kale mumuunda wa Edeni. Eeci caamba kuti abalo bana bakeelede kucembala akufwa.
Ikuti Adamu a Eva nibakamumvwida Jehova, buumi bwabo nibwakali bubotu kubikkilizya abwabana babo. Naniinga boonse nibakapona kukabe akutamani kabakkomenyi anyika. Taku wakali kukonzya kucembala, kuciswa nikuba kufwa.
Leza uyanda kuti bantu kabapona kukabe akutamani calukkomano, alimwi Usyomezya kuti buzuba bumwi baya kupona. Takuli buyo kuti nyika yoonse iya kuba mbotu, pele abantu boonse baya kuba abuumi bubotu. Bantu boonse anyika bani kuyandana alimwi boonse bani kuli balongwe ba Leza.
Pele Eva wakaleka kuba mulongwe wa Leza. Aboobo naakali kutumbuka, wakali kupenga. Cakali kucisa. Ikutaswiilila Jehova masimpe kwakamuletela mapenzi manji, hena tozumini oobo?
Adamu a Eva bakalijisi bana banji basankwa abasimbi. Naakazyalwa mwana wabo wakutaanguna, bakamuulika kuti ngu Kaini. Eelyo wabili wakaba Abela. Ino ncinzi cakabacitikila? Hena ulicizyi?
Matalikilo 3:16-23; 4:1, 2; Ciyubunuzyo 21:3, 4.
Mibuzyo
- Ino bakali kupona buumi buli buti ba Adamu a Eva nibakazwa mumuunda wa Edeni?
- Ncinzi cakatalika kucitika kuli Adamu a Eva, alimwi nkaambo nzi?
- Nkaambo nzi bana ba Adamu a Eva ncobakali kunga balacembala akufwa?
- Nikwali kutegwa Adamu a Eva bakamumvwida Jehova, ino buumi bwabo nibwakali buti kubikkilizya abwabana babo?
- Muunzila nzi kutamvwa kwa Eva mbokwakamuletela macise?
- Mbabaani mazina bana basankwa bobilo bakutaanguna ba Adamu a Eva?
- Ino mbana nzi abamwi bali acifwanikiso?
Mibuzyo aimwi
- Bala Matalikilo 3:16-23 a 4:1, 2.
Mbuti buumi bwa Adamu mbubwakajatikizyigwa kukusinganizyigwa kwanyika? (Matl. 3:17-19; Balo. 8:20, 22)
Nkaambo nzi izina lyakuti Eva ncolyakali kweelela kuti ‘Ngobanyina wabantu boonse’? (Matl. 3:20)
Mbuti Jehova mbwaakabeengelela ba Adamu a Eva kufwumbwa ciindi nibakamana kubisya? (Matl. 3:7, 21)
- Bala Ciyubunuzyo 21:3, 4.
‘Nzintu nzi zyakale’ nzyolangila kuti zikagusyigwe?
