Makani 6: Mwana Uuli Kabotu a Mwana Mubi
LANGA Kaini a Abela. Boonse sunu bakomena baba basankwa. Kaini waba mulimi. Ulalima zisyango zyanseke, micelo alimwi azisyu.
Abela waba muvwubi wambelele. Ulayandisya kweembela twana twambelele. Twakomena akuba mbelele zipati, muciindi buyo cisyoonto Abela waba abutanga bwambelele bwakweembela.
Buzuba bumwi Kaini a Abela bakaleta zipego kuli Leza. Kaini wakaleta zilyo nzyaakalima. Walo Abela wakaleta mbelele iinda kubota. Jehova wakamukkomanina Abela acipego cakwe. Pele Kaini tanaakamukkomanina acipego cakwe. Hena ulicizyi ncaatakamukkomanina?
Takuli buyo kuti cipego ca Abela ncibotu kwiinda ca Kaini. Pele nkaambo kakuti Abela muntu uuli kabotu. Ulamuyanda Jehova amunyina. Pele Kaini mubi; tamuyandi munyina amwainda.
Aboobo Leza waambila Kaini kuti aleke nzila zyakwe zibi. Pele Kaini tamvwi. Wakalala kapati nkaambo Leza wayanda Abela. Aboobo Kaini waambila Abela kuti: “Atweende musokwe.” Okuya kabali balikke, Kaini wamuumputa Abela munyina. Wamuumputa canguzu cakuti wamujaya. Hena eeco tiicakali cintu cibi Kaini ncaakacita?
Nokuba kuti Abela wakafwa, Leza ucimuyeeyede. Abela wakali muntu uuli kabotu, alimwi Jehova tabalubi bantu bali boobo. Aboobo buzuba bumwi Jehova Leza uya kumubusya Abela. Aciindi eeco Abela taku naya kufwa kabili. Uya kupona ano anyika kukabe akutamani. Hena tacikabi cintu cibotu kuzyiba bantu bali mbuli Abela?
Pele Leza takkomani abantu bali mbuli Kaini. Aboobo Kaini naakamana kujaya munyina, Leza wakamusubula kwiinda mukumutanda kulamfwu amukwasyi. Kaini naakaunka kwaakukkala kulubazu lumwi lwanyika, wakatoleezya amucizyi wakwe akuba mukaintu wakwe.
Tiicakatola ciindi, Kaini amukaintu wakwe bakatalika kuba abana. Abamwi bana ba Adamu a Eva basankwa abasimbi bakakwatana alimwi abalo bakaba abana. Mukaindi buyo kasyoonto kwakaba bantu banji anyika. Atubaiye bamwi babaabo.
Matalikilo 4:2-26; 1 Johane 3:11, 12; Johane 11:25.
Mibuzyo
- Milimo nzi Kaini a Abela njibakali kucita?
- Nzipego nzi Kaini a Abela nzyibakaleta kuli Jehova?
- Nkaambo nzi Jehova ncaakacikkomanina cipego ca Abela, alimwi nkaambo nzi ncaatakacikkomanina ca Kaini?
- Ino Kaini muntu uuli buti, alimwi muunzila nzi Jehova mwasola kumunyona?
- Ncinzi Kaini ncaacita kabali balikke amunyina musyokwe?
- Pandulula cakacitika kuli Kaini naakamana kumujaya munyina.
Mibuzyo aimwi
- Bala Matalikilo 4:2-26.
Mbuti Jehova mbwaakabwaamba bukkale butaluzi bwa Kaini? (Matl. 4:7)
Mbuti Kaini mbwaakatondezya bwini mbwaakabede mumoyo? (Matl. 4:9)
Ino Jehova ukubona buti kutila bulowa bwabantu batako mulandu amuntu? (Matl. 4:10; Is. 26:21)
- Bala 1 Johane 3:11, 12.
Nkaambo nzi Kaini ncaakakalala kapati, alimwi mbuti eeci mboili ncenjezyo kuli ndiswe sunu? (Matl. 4:4, 5; Tus. 14:30; 28:22)
Mbuti Bbaibbele mbolitondezya kuti kufwumbwa kuti boonse bamukowa wesu kabatamuyandi Jehova taciko makani tulakonzya kuzumanana kusyomeka? (Int. 27:10; Mt. 10:21, 22)
- Bala Johane 11:25.
Ncisyomezyo nzi Jehova ncasyomezya boonse aabo bafwa akaambo kabululami? (Joh. 5:24)
Andiza Inga Mwaakkomanina Ayaaya
AMWIIYE LUSYOMO LWABO
Abelo—“Nokuba Kuti Wakafwa, Ucaambaula”
Ncinzi ncotukonzya kwiiya kujatikizya Abelo alimwi alusyomo lwakwe nokuba kuti kuli buyo makani masyoonto aajatikizya nguwe mu Bbaibbele?
