Makani 7: Muntu Sicamba
MBOBAKALI kuya civwula bantu munyika, ibunji bwabo bakatalika kucita zintu zibi mbuli Kaini. Pele muntu omwe wakaliindenyi abamwi. Muntu ooyo ngu Enoki. Enoki wakali muntu sicamba. Bantu boonse bakali kucita zintu zibi kapati, pele Enoki wakazumanana kubelekela Leza.
Hena ulicizyi bantu kaindi ncobakacitila zibi zinji? Koyeeya buyo, Ino ngwani wakapa kuti ba Adamu a Eva bamuzangile Leza akulya mucelo ngwaakati tabeelede kulya? Ee, wakali mungelo mubi. Ibbaibbele limwiita kuti ngu Saatani. Alimwi ulasoleka kunyonganya bantu boonse kuti babe babi.
Buzuba bumwi Jehova Leza wakaambila Enoki kuti aambile bantu makani ngobatakali kuyanda kumvwa. Makani akali aakuti: ‘Buzuba bumwi Leza uya kubanyonyoona bantu boonse babi.’ Bantu bakakalala kapati kumvwa makani aaya. Kulibonya kuti bakali kuyanda kumujaya Enoki. Aboobo Enoki wakeelede kuba sicamba kutegwa akonzye kwaambila bantu cintu Leza ncaakali kuyanda kucita.
Leza tanaakayanda kuti Enoki akkale anyika kwamyaka minji abantu aabo babi. Enoki wakakkala myaka iili buyo 365. Ino nkaambo nzi ncotwaamba kuti “myaka iili buyo 365”? Nkaambo kakuti kaindi bantu bakali bayumu kwiinda bamazuba aano alimwi bakali kukkala. Inzya, kayi mwana wa Enoki wazina lya Metusela wakakkala myaka iili 969!
Aboobo naakafwa Enoki, bantu bakaindilila kubija. Ibbaibbele lyaamba kuti ‘zyoonse nzyobakali kuyeeya bantu, zyakali zibi mazuba oonse.’ Alimwi ‘nyika yakavwula mapenzi.’
Hena ulicizyi ncokwakali mapenzi manji anyika mazuba aayo? Nkaambo kakuti Saatani wakaba anzila mpya yakupa kuti bantu kabacita zibi. Tulaiya makani aaya mucibalo ciccilila.
Matalikilo 5:21-24, 27; 6:5; Ba-Hebrayo 11:5; Juda 14, 15.
Mibuzyo
- Mbuti Enoki mbwaakaindenyi abamwi?
- Nkaambo nzi Enoki naakali kupona bantu ncobakali kucitila zibi zinji boobu?
- Nzintu nzi nzibi bantu nzyobakali kucita? (Bona acifwanikiso.)
- Nkaambo nzi Enoki ncaakeelede kuba sicamba?
- Mbuti bantu kaindi mbobakali kukkala, pele ino Enoki wakakkala myaka yongaye?
- Ncinzi cakacitika Enoki naakafwa?
Mibuzyo aimwi
- Bala Matalikilo 5:21-24, 27.
Ncilongwe cili buti ncaakajisi Enoki kuli Jehova? (Matl. 5:24)
Kweelana ambolyaamba Bbaibbele, ino muntu nzi wakaindi wakapona myaka minji, alimwi wakajisi myaka yongaye naakafwa? (Matl. 5:27)
- Bala Matalikilo 6:5.
Ino nyika yakasika aali kubija Enoki naakafwa, alimwi mbuti eeci mbocikozyenyi amazuba aano? (2 Timo. 3:13)
- Bala Ba-Hebrayo 11:5.
Mbubotu nzi bwa Enoki ‘bwakamukkomanisya Leza,’ alimwi ncinzi cakaccilila? (Matl. 5:22)
- Bala Juda 14, 15.
Mbuti Banakristo sunu mbobaiya busicamba bwa Enoki nobaambila bantu kuboola kwankondo ya Amagedoni? (2 Timo. 4:2; Heb. 13:6)
