Makani 9: Nowa Wapanga Bwato
NOWA wakalijisi mukaintu abana basankwa botatwe. Mazina aabana bakwe kwakali Semu, Hamu a Jafeti. Aumwi mwana wakalijisi mukaintu. Aboobo kwakali bantu basika kulusele mumukwasyi wa Nowa.
Lino Leza wakaambila Nowa kuti acite cintu cimwi cilamya. Wakamwaambila kuti apange bwato bupati. Bwato oobo bwakali bupati, alimwi bwakali kulibonya mbuli cibbokesi cipati alimwi cilamfwu. Leza wakati: ‘Upange maanda otatwe kuya mujulu alimwi ubikke maanda mukati.’ Maanda akali aa Nowa amukwasyi wakwe, abanyama amwakubikkila zyakulya zyakuti boonse kabalya.
Leza alimwi wakaambila Nowa kuti abusinke bwato kutegwa meenda kaatanjili. Leza wakati: ‘Lino mebo ndaleta zambangulwe lyamaanzi akunyonyoona nyika yoonse. Kufwumbwa ooyo uutani kuli mubwato uya kufwa.’
Nowa abana bakwe bakamuswiilila Jehova, eelyo bakatalika kupanga bwato. Pele bantu bamwi bakali kuseka cakufwubaazya. Bakaya ampela kubija. Taku naba omwe wakamusyoma Nowa naakali kubaambila ceeco Leza ncaakali kuyanda kucita.
Cakatola ciindi cilamfwu kupanga bwato nkaambo bwakali bupati kapati. Eelyo nokwakainda myaka minji bwakamana. Aboobo Leza wakaambila Nowa kuti anjizye banyama mubwato. Leza wakati anjizye misyobo yobilo-yobilo yabanyama bamwi musankwa amusimbi. Pele musyobo umwi wabanyama, Leza wakaambila Nowa kuti anjizye bali ciloba. Alimwi Leza wakaambila Nowa kuti alete misyobo yoonse yabayuni. Nowa wakacita Leza mbwaakamwaambila.
Kumane, Nowa amukwasyi wakwe bakanjila mubwato. Eelyo Leza wakajala mulyango. Kabali mukati, Nowa amukwasyi wakwe bakalindila. Koyeeya buyo kuti nkoli anduwe mubwato ambabo kamulindila. Ulakonzya kubuzya kuti, hena ncobeni iya kusika zambangulwe mbuli Leza mbwaakaamba?
Matalikilo 6:9-22; 7:1-9.
Mibuzyo
- Bakali bongaye mumukwasyi wa Nowa, alimwi ino bakali baani mazina bana bakwe basankwa botatwe?
- Ncintu nzi cilamya Leza ncaakaambila Nowa kucita, alimwi nkaambo nzi?
- Mbuti basimukobonyina a Nowa mbobakacita naakabaambila makani aakupanga bwato?
- Ncinzi Leza ncaakaambila Nowa kucita kubanyama?
- Leza naakamana kujala mulyango wabwato, ncinzi Nowa amukwasyi wakwe ncobakeelede kucita?
Mibuzyo aimwi
- Bala Matalikilo 6:9-22.
Ncinzi cakapa kuti Nowa abe mukombi uulibedelede wa Leza mwini-mwini? (Matl. 6:9, 22)
Mbuti Jehova mbwalubona lupyopyongano, alimwi mbuti eeci mboceelede kutugwasya kusala zyakulikondelezya zili kabotu? (Matl. 6:11, 12; Int. 11:5)
Mbuti mbotukonzya kumwiiya Nowa notutambula busolozi kwiinda mumbungano ya Jehova? (Matl. 6:22; 1 Joh. 5:3)
- Bala Matalikilo 7:1-9.
Mbuti kaambo kakuti Jehova wakabona Nowa muntu uutalondokede kuba mululami mbokutukulwaizya mazuba aano? (Matl. 7:1; Tus. 10:16; Is. 26:7)
