Makani 12: Bantu Bayaka Ŋanda Mpati Ndamfwu
KWAKAINDA myaka minji. Ibana ba Nowa bakaba abana banji. Abalo bana babo bakakomena akuzyala bana banji. Kwaciindi buyo cisyoonto kwakaba bantu banji anyika.
Umwi wabantu aaba, wakali muzyukulu wa Nowa wakali kwiitwa kuti Nimulodi. Wakali muntu mubi, muwezi wakali kujaya banyama abantu. Alimwi Nimulodi wakalipa bwami bwakulela bantu bamwi. Leza tanaakali kumuyanda Nimulodi.
Boonse bantu kuciindi eeco bakali kwaambaula buyo mulaka omwe. Nimulodi wakali kuyanda kuti ababikke antoomwe kutegwa abalele kabotu. Aboobo hena ulicizyi ncaakacita? Wakaambila bantu kuyaka munzi a Ŋanda Ndamfwu. Kolanga buyo acifwanikiso baluujisi kuuma ncelwa.
Jehova Leza tanaakakukkomanina kuyaka ŋanda eeyi. Leza wakali kuyanda kuti bantu bamwaikizyanye bakakkale munyika yoonse. Pele bantu bakati: ‘Amuboole! Atuyake munzi aŋanda ndamfwu iisika kujulu. Eelyo tuya kuba ampuwo!’ Bantu bakali kuyanda kulipa bulemu kuleka kupa Leza.
Aboobo Leza wakabalesya bantu kuyaka ŋanda ndamfwu. Hena ulicizyi ncaakacita? Cakutayeeyelwa, wakapa kuti bantu batalike kwaambaula milaka iindenyi muciindi camulaka buyo omwe. Ibakali kuyaka, taku nibakali kukonzya kumvwana mukwaambaula. Nkakaambo kaako imunzi wabo ncowakazyi kwiitwa kuti Bbabbelo naa Bbabbuloni, ikupandulula “Kunyongana.”
Bantu aciindi aawa bakatalika kuzwa mu Bbabbelo. Bantu bakali kwaambaula mulaka omwe, bakaunka kwaakukkala antoomwe kulubazu lumwi lwanyika.
Matalikilo 10:1, 8-10; 11:1-9.
Mibuzyo
- Ino Nimulodi wakali ni, alimwi Leza wakamubona buti?
- Nkaambo nzi bantu ncobauma ncelwa walanga acifwanikiso?
- Nkaambo nzi Jehova ncaatakakkomana amulimo wakuyaka ŋanda?
- Mbuti Leza mbwaakaulesya mulimo wakuyaka ŋanda ndamfwu?
- Ino munzi wakali kwiitwa buti, alimwi izina eelyo lipandulula nzi?
- Ncinzi cakacitika Leza naakamana kwiinyonganya milaka yabantu?
Mibuzyo aimwi
- Bala Matalikilo 10:1, 8-10.
Milimo nzi Nimulodi njaakajisi, alimwi ino eeci citucenjezya nzi? (Tus. 3:31)
- Bala Matalikilo 11:1-9.
Makanze nzi ngobakajisi nobakali kuyaka ŋanda ndamfwu, alimwi nkaambo nzi mulimo ooyu ncootakaunkila ampela? (Matl. 11:4; Tus. 16:18; Joh. 5:44)
