Makani 16: Izaka Wajana Mukaintu Uuli Kabotu
HENA ulimuzyi mukaintu ooyu uuli acifwanikiso eeci? Izina lyakwe ngu Labeka. Alimwi musankwa ngwacinga ngu Izaka. Uya kuba munyokwabo. Ino eeci cakacitika buti?
Abbulahamu swaabo Izaka wakali kuyanda kujanina mwana wakwe mukaintu wakukwata uuli kabotu. Tiibakali kuyanda kuti Izaka akakwate bakaintu baku Kenani nkaambo bantu aaba bakali kukomba baleza bakubeja. Aboobo Abbulahamu wakaita mubelesi wakwe akumwaambila kuti: ‘Ndiyanda kuti ujokele kukkala bamukowa wangu ku Halani ukalete mukaintu wakuti mwana wangu Izaka akwate.’
Cakutasowa ciindi, mubelesi wa Abbulahamu wakabweza nkamela zili kkumi akutalika lweendo lulamfwu. Naakasika aafwiifwi ankobakali kukkala bamukowa wa Abbulahamu, wakaleya amugoti. Cakali ciindi cakumazuba bamakaintu bamumunzi nibakali kuboola kuteka meenda amugoti. Aboobo mubelesi wa Abbulahamu wakapaila kuli Jehova kuti: ‘Ndalomba kuti mukaintu uulaandipe meenda aakunywa akutekela nkamela zyangu abe ngonguyo ngoosala kuba mukaintu wa Izaka.’
Tiicakatola ciindi Labeka wakaboola kuteka meenda. Mubelesi naakamulomba meenda aakunywa, wakamupa. Kumane wakazyitekela meenda nkamela zyoonse zyakafwide nyota. Ooyo wakali mulimo mupati nkaambo nkamela zilanywa meenda manji.
Naakamana Labeka, mubelesi wa Abbulahamu wakamubuzya zina lyaba swaabo. Alimwi wakamulomba aakoona. Wakaingula kuti: ‘Bataata mba Betuweli alimwi nkobuli busena bwakoona.’ Mubelesi wa Abbulahamu wakalizyi kuti Betuweli wakali mwana wamunyina wa Abbulahamu uutegwa Naholi. Aboobo wakafwugama ansi akulumba Jehova akaambo kakumusololela kuli bamukowa wa Abbulahamu.
Ngeena masiku, mubelesi wa Abbulahamu wakaamba kuli Betuweli ncaakalonda akuli Labani munyina Labeka. Boonse bobilo bakazumina kuti Labeka baunke limwi akakwatwe kuli Izaka. Ino ncinzi Labeka ncaakaamba naakabuzyigwa? Wakati: ‘Inzya, ndilayanda kuunka.’ Nibwakaca bakakkwela nkamela akutalika lweendo lulamfwu kujokela ku Kenani.
Naakaba mangolezya bakasika. Labeka wakabona musankwa keenda mumuunda. Ooyo musankwa wakali Izaka. Wakakkomana kubona Labeka. Banyina Izaka ba Sala kwakaindide buyo myaka yotatwe nibakafwa, aboobo wakacili mubuumba. Pele lino Izaka wakamuyanda Labeka kapati cakunga wakatalika kukkomana alimwi.
Matalikilo 24:1-67.
Mibuzyo
- Ngwani musankwa amukaintu bali acifwanikiso?
- Mbuti Abbulahamu mbwaakacita kutegwa anjanine mwana wakwe mukaintu, alimwi nkaambo nzi?
- Mbuti mupailo wamubelesi wa Abbulahamu mbowakaingulwa?
- Ino Labeka wakaingula buti naakabuzyigwa kuti naa inga wayanda kukwatwa kuli Izaka?
- Ncinzi cakapa kuti Izaka akkomane alimwi?
Mibuzyo aimwi
- Bala Matalikilo 24:1-67.
Nkuloma kuli buti nkwaakatondezya Labeka naakamujana mubelesi wa Abbulahamu amugoti? (Matl. 24:17-20; Tus. 31:17, 31)
Ino bubambe Abbulahamu mbwaakabambila mwana wakwe Izaka bupa cikozyanyo nzi cibotu ku Banakristo sunu? (Matl. 24:37, 38; 1 Kor. 7:39; 2 Kor. 6:14)
Nkaambo nzi ncotweelede kujana ciindi cakukkala ansi kuyeeya mbuli mbwaakacita Izaka? (Matl. 24:63; Int. 77:12; Flp. 4:8)
Andiza Inga Mwaakkomanina Ayaaya
AMUBAYIISYE BANA BANU
Rebeka Wakali Kuyanda Kumukkomanisya Jehova
Ncinzi ncotukonzya kucita kutegwa tumwiiye Rebeka? Kobala makani aaya kutegwa wiiye zinji kujatikizya nguwe.
