KOLANGA buyo kukomena mukwasyi ooyu. Aaba mbana basankwa ba Jakobo bali 12. Alimwi wakalijisi abana basimbi. Hena kuli mwana ngozyi zina aawa? Atubone mazina aamwi.

Leya wakazyala Lubeni, Simiyoni, Levi a Juda. Lacelo naakabona kuti tajisi mwana naba omwe, wakausa kapati. Aboobo wakapa Biliha mubelesi wakwe musimbi kuli Jakobo, eelyo Biliha wakaba abana basankwa bobilo, Dani a Nafitali. Kumane awalo Leya wakapa Zilipa mubelesi wakwe musimbi kuli Jakobo, Zilipa wakazyala Gadi a Asya. Leya wakaba abana abamwi basankwa bobilo, Isaka a Zebuloni.

Kumane awalo Lacelo wakakonzya kuba amwana wakulizyalila. Wakamuulika kuti ngu Josefa. Kumpela tulaiya zinji zya Josefa nkaambo wakazyi kuba muntu uulemekwa kapati. Aaba mbabana basankwa bali 11 mbaakazyala Jakobo naakali kukkala abaswaabo Lacelo ba Labani.

Jakobo wakalijisi abana basimbi, pele Bbaibbele lyaamba buyo omwe. Izina lyakwe ngu Dina.

Cakasika ciindi Jakobo naakayanda kuzwa mumunzi wa Labani akujokela ku Kenani. Wakabunganya mukwasyi wakwe mupati, abutanga bwambelele zyakwe zinji kapati abwaŋombe, akutalika kweenda musinzo mulamfwu.

Jakobo amukwasyi wakwe nibakajoka ku Kenani, bakakkala buyo mazuba masyoonto Lacelo wakazyala mwana musankwa. Wakatalika kumyongwa kabacili munzila. Lacelo cakamukatazya kutumbuka, aboobo wakafwa ntumbukila. Pele mwana musankwa wakali buyo kabotu. Jakobo wakamuulika kuti ngu Bbenjamini.

Tuyanda kuti katwaayeeyede mazina aabana basankwa bali 12 bana ba Jakobo, nkaambo mukowa woonse wa Isilayeli nkowakazwa. Mubwini, misyobo iili 12 yabana Isilayeli yakaulikwa mazina aabana basankwa ba Jakobo bali 10, abana bobilo ba Josefa. Izaka wakakkala myaka minji kabazyedwe kale bana aaba, alimwi kulibonya kuti wakali kkomenyi ikuba abazyukulu banji boobu. Pele atubone cakacitika kumuzyukulu wakwe Dina.

Matalikilo 29:32-35; 30:1-26; 35:16-19; 37:35.