Makani 20: Dina Wanjila Mumapenzi
HENA wababona Dina mbayanda kwaakuswaya? Uyanda kwaakubona basimbi bakkala munyika ya Kenani. Hena wisi Jakobo inga waakkomanina makani aaya? Ikutegwa ukonzye kwiingula mubuzyo ooyu, koyeeya buyo Abbulahamu a Izaka mbobakali kubabona basimbi baku Kenani.
Hena Abbulahamu kuli naakayanda kuti Izaka mwana wakwe akwate musimbi waku Kenani? Peepe tanaakayanda pe. Hena Izaka a Lacelo kuli nibakayanda kuti Jakobo mwana wabo akwate musimbi muna Kenani? Peepe tiibakayanda pe. Hena ulikazyi kaambo ncibatakayandila?
Nkaambo kakuti aaba bantu baku Kenani bakali kukomba baleza bakubeja. Tiibakali bantu babotu bakukwatana, alimwi tiibakali bantu bakubamba cilongwe ambabo. Inzya tulakonzya kubona kuti Jakobo tanaakali kukonzya kukkomana kubona mwana wakwe kabamba cilongwe abasimbi aaba bana Kenani.
Masimpe, Dina wakanjila mumapenzi. Hena wamubona acifwanikiso musankwa muna Kenani nkwamumenena mate Dina? Izina lyakwe ngu Sekemu. Buzuba bumwi Dina naakaunka kwaakuswaya, Sekemu wakamujata! Eeci cakabija nkaambo bakwetenyi balikke mbabazumizyidwe koonana. Eeci cibi Sekemu ncaakacita kuli Dina cakaile kuyungizya buyo mapenzi.
Ibacizyi ba Dina nibakamvwa cakacitika, bakakalala kapati. Simiyoni a Levi, bakakalala kapati cakunga bakabweza zipeni akunjila mumunzi akubajana basankwa kabaliibide. Basankwa bobilo aaba abanyina bakamujaya Sekemu kubikkilizya abasankwa bamwi. Jakobo wakakalala kapati nkaambo bana bakwe bakacita cintu cibi eeci.
Ino mapenzi woonse aaya akatalika buti? Akatalika akaambo kakuti Dina wakabamba cilongwe abantu batakali kuccilila milawo ya Leza. Taku notuya kubamba cilongwe abantu bali boobo, hena tabusyi?
Matalikilo 34:1-31.
Mibuzyo
- Nkaambo nzi Abbulahamu a Izaka ncibatakayandila kuti bana babo bakwate naa bakwatwe kubantu baku Kenani?
- Hena cakamukonda Jakobo ncaakacita mwana wakwe musimbi cakubamba cilongwe abasimbi bana Kenani?
- Ngwani musankwa acifwanikiso uumumenena mate Dina, alimwi ncibi nzi ncaakacita?
- Ncinzi bacizyi ba Dina ba Simiyoni a Levi ncibakacita nibakamvwa cakacitika?
- Hena Jakobo wakakkomana ncibakacita ba Simiyoni a Levi?
- Mbuti mapenzi oonse mbwaakatalika mumukwasyi?
Mibuzyo aimwi
- Bala Matalikilo 34:1-31.
Hena cilongwe Dina ncaakabamba abasimbi bana Kenani cakali cakutazyiba? Pandulula. (Matl. 34:1)
Nkaambo nzi Dina ncuuli mukuli wakwe wakunyonganya busimbi bwakwe? (Gal. 6:7)
Mbuti bana sunu mbobakonzya kutaba abalongwe babi mbuli bwakacita Dina? (Tus. 13:20; 1 Kor. 15:33; 1 Joh. 5:19)
