Makani 24: Josefa Wabasunka Ibanyina
JOSEFA uyanda kubona naa ibanyina bali 10 bacili basilunya asunu. Aboobo wati: ‘Muli basikutwela nywebo. Mwaboola kuzyi kweena nyika yesu.’
Baingula bati: ‘Peepe tatusyi. Swebo tuli bantu basyomeka. Toonse tuli banabunyina. Twakali 12. Pesi umwi mukwesu tako, pele keela nkokali kumunzi abataata.’
Josefa wacita mbuli kuti tanaabasyoma. Wamubikka Simiyoni munyina muntolongo, ibamwi wabaleka kuti batole cakulya kumunzi. Pele wabaambila kuti: ‘Mwaakuboola mweelede kuti mukakeetelezye keela.’
Bajokele kumunzi ku Kenani, babaambila ba Jakobo bawisi zintu zyoonse zyakacitika. Jakobo wausa kapati. ‘Josefa taciko, alimwi awalo Simiyoni waloba,’ walila munene. Tandiko kumuzumizya kumutola Bbenjamini mwana wangu keela.’ Pele naakabona kuti cakulya caceya, Jakobo wamuzumizya Bbenjamini kuti baunke limwi ku Ijipiti kwaakulanga cakulya.
Lino Josefa wababona banyina balaboola. Wakkomana kapati kubona Bbenjamini muce wakwe. Inzya, taku uuzyi kuti muntu ooyu uulemekwa ngu Josefa. Lino Josefa wacita cimwi cintu kusunka banyina bali 10.
Waambila babelesi bakwe kubabikkila cakulya mumasaka oonse. Pele kakutako ancobabwenyi, wabikkilizya nkapu yansiliva njayandisya kapati musaka lya Bbenjamini. Banyamuke buyo boonse akweenda kasinzo, Josefa watuma babelesi bakwe kubaccilila. Babeenzye, babelesi bati: ‘Nkaambo nzi ncomwabbida nkapu yansiliva yasimalelo wesu?’
Boonse banabunyina bati: ‘Tiitwabba nkapu yakwe. Ikuti nkapu ijanike kuli umwi wesu, mumujaye!’
Aboobo babelesi balangaula mumasaka oonse kusikila limwi biijana nkapu musaka lya Bbenjamini mbuli mbobona aawa. Babelesi bati: ‘Nywebo nyoonse kamuya, pele Bbenjamini tulaunka limwi.’ Ino ncinzi ibanyina bali 10 ncobalaacite ino?
Boonse bajokela a Bbenjamini kuŋanda ya Josefa. Josefa waambila banyina kuti: ‘Nyoonse kamuya kumunzi, pele Bbenjamini weelede kucaala kuno abe muzike wangu.’
Lino Juda wati: ‘Ikuti nduunke kumunzi katako mwana ooyu, bataata baya kufwa nkaambo balamuyanda kapati mwana ooyu. Akaka taata kojata ndime ndibe muzike wako, pele kondilekela mwana ooyu aunke kumunzi.’
Josefa wabona kuti banyina bakacinca. Tabacili bayumu moyo. Atubone ncaacita Josefa lino.
Matalikilo 42:9-38; 43:1-34; 44:1-34.
Mibuzyo
- Nkaambo nzi Josefa ncaabatamikizya ibanyina kuti mbaasikutwela?
- Nkaambo nzi Jakobo ncaamuzumizyila Bbenjamini keela kuunka ku Ijipiti?
- Mbuti nkapu yansiliva ya Josefa mbweekabikkilizyigwa musaka lya Bbenjamini?
- Ncinzi Juda ncaamba kutegwa Bbenjamini alekwe?
- Mbuti ibanyina Josefa mbobakacinca?
Mibuzyo aimwi
- Bala Matalikilo 42:9-38.
Mbuti majwi aa Josefa aali ku Matalikilo 42:18 mbwaali majwi mabotu sunu kuli baabo bajisi mikuli mumbunga ya Jehova? (Neh. 5:15; 2 Kor. 7:1, 2)
- Bala Matalikilo 43:1-34.
Nekuba kuti Lubeni nguwakali mutaanzi kuzyalwa, mbuti mbocakali kulibonya kuti Juda nguwakali kwaambauda ibanyina? (Matl. 43:3, 8, 9; 44:14, 18; 1 Mak. 5:2)
Mbuti Josefa mbwaakabasunka ibanyina, alimwi nkaambo nzi? (Matl. 43:33, 34)
- Bala Matalikilo 44:1-34.
Mboyakali nzila iimwi yakulisisa kubanyina, mbuti Josefa mbwaakalitondezya? (Matl. 44:5, 15; Lev. 19:26)
Mbuti ibanyina Josefa mbobakatondezya kuti muuya mubi walunya ngobakajisi kumunyina wakamana? (Matl. 44:13, 33, 34)
