Makani 25: Mukwasyi Walongela ku Ijipiti
JOSEFA tacicikonzyi kulisisa. Waambila babelesi bakwe boonse kuzwa muŋanda. Eelyo acaale abanyina muŋanda, Josefa watalika kulila. Katuyeeya buyo banyina mbobakalimvwa kubona muntu wiile kulila ancalila tacilibonyi. Limwi walipandulula, wati: ‘Ndime Josefa. Hena bataata bacipona?’
Ibanyina balamwa cakuti cabula acakwaamba. Bayoowa. Pele Josefa wati: ‘Amuswene afwiifwi.’ Baswene buyo, wati: ‘Ndime Josefa munyoko ngomwakauzya ku Ijipiti.’
Josefa ulaambaula ajwi libombe kati: ‘Mutapengi akaambo kakuti mwakanduuzya kuno. Wakali Leza wakandituma kokuno ku Ijipiti kutegwa nkafwutule bantu. Falawo wandibikka kuba mweendelezi wacisi coonse. Aboobo lino amufwambaane mukabaambile bataata makani aaya. Mukabaambile bakaboole bazyi kukkale kuno.’
Kumane Josefa wabakumbatila akubamyonta banyina boonse. Falawo amvwe buyo kuti banyina Josefa baboola, waambila Josefa kuti: ‘Abapope zikkocci bakabalete bawisi amukwasyi wabo oonse. Ndiya kubapa nyika iinda kubota mu Ijipiti.’
Bapopa akuunka. Aawa ulakonzya kumubona Josefa nkwacinga bawisi nibakasika ku Ijipiti amukwasyi wabo oonse.
Mukwasyi wa Jakobo wakakomena kapati. Antoomwe bakali 70 bakalongela ku Ijipiti. Ikuti twabala, kuli Jakobo, bana bakwe abazyukulu. Pele alimwi kwakali abamakaintu bakwe ambweni ababelesi banji. Boonse aaba bakazyi kukkala mu Ijipiti. Bakali kwiitwa kuti mbana Isilayeli nkaambo Leza wakacinca zina lya Jakobo kuba lya Isilayeli. Bana Isilayeli bakaba bantu bayandwa kapati kuli Leza mbweena mbotulaabone kumpela ooku.
Matalikilo 45:1-28; 46:1-27.
Mibuzyo
- Ncinzi cacitika Josefa naali pandulula kubanyina?
- Ncinzi Josefa caluzyalo ncaapandulula kubanyina?
- Ncinzi Falawo ncaacita naamvwa ibanyina ba Josefa?
- Wakali mupati buti mukwasyi wa Jakobo nibakalongela ku Ijipiti?
- Mbuti mukwasyi wa Jakobo mbowakazyi kwiitwa, alimwi nkaambo nzi?
Mibuzyo aimwi
- Bala Matalikilo 45:1-28.
Mbuti cibalo ca Bbaibbele ca Josefa mbocitondezya kuti Jehova ulakonzya kunyona cintu cikonzya kucisa babelesi bakwe kuba cintu cibotu? (Matl. 45:5-8; Is. 8:10; Flp. 1:12-14)
- Bala Matalikilo 46:1-27.
Ncisyomezyo nzi Jehova ncaakamusyomezya Jakobo kayanda kunyamuka kuya ku Ijipiti? (Matl. 46:1-4)
