BASANKWA aba awa basinikizya bantu kubeleka. Langa muntu nkwauma mubelesi acimboko! Babelesi aaba mbamukwasyi wa Jakobo alimwi baitwa kuti mbana Isilayeli. Pele bantu babasinikizya kubeleka, mbana Ijipiti. Bana Isilayeli baba bazike babana Ijipiti. Ino eeci cakacitika buti?

Kwamyaka minji mukwasyi wa Jakobo mupati wakali muluumuno mu Ijipiti. Josefa iwakali kuccilila mwami Falawo mubweendelezi mu Ijipiti ngowakali kubalanganya. Pele Josefa wakafwa. Aboobo, Falawo mupya watakali kubayanda bana Isilayeli ngowakaba mwami mu Ijipiti.

Aboobo Falawo ooyu mubi wakababamba buzike bana Isilayeli. Alimwi bantu mbaakabikka kubeendelezya bakali basilunya. Bakabasinikizya bana Isilayeli kubeleka kuyaka minzi ya Falawo. Pele nokuba boobo, mweelwe wabana Isilayeli wakali kuya ampela kukomena. Avwule mazuba, bana Ijipiti bakatalika kulibilika kuti bana Isilayeli baya kuvwula akuba basinguzu kapati.

Hena ulicizyi Falawo ncaakacita? Wakaambila bamakaintu bakali kutumbusya bana Isilayeli kuti: ‘Kamujaya kufwumbwa mwana musankwa wazyalwa.’ Pele bamakaintu aaba bakali kabotu alimwi tiibakali kubajaya bana.

Aboobo Falawo wakaambila bantu bakwe boonse kuti: ‘Amubweze bana basankwa babana Isilayeli akubajaya. Pele basimbi mutabajayi.’ Hena eeco tiicakali cintu cibi kwaambila bantu? Atubone mwana uumwi musankwa mbwaakafwutulwa.

Kulonga 1:6-22.