BONA mwana nkwalila kumwi kajatide munwe wamusimbi. Ooyu mwana ngu Musa. Hena ulimuzyi musimbi ooyu mubotu boobu? Mwana wa Falawo mwami wa Ijipiti.

Banyina Musa bakamusisa mwana wabo kusikila wakkwanisya myezi yotatwe nkaambo tiibakali kuyanda kuti ajaigwe abana Ijipiti. Pesi bakalizyi kuti Musa ulakonzya kujanwa. Aboobo mboobu mbobakacita kufwutula mwana wabo.

Bakabweza mutaanga akuusinka kabotu-kabotu kutegwa kutabi meenda aanjila. Bamane bamubikka Musa mumutaanga akuubikka mumatete malamfwu muceeleele ca Mulonga wa Nailo. Miliyamu mucizyi wa Musa wakaambilwa kuti kamulindila mwana kutegwa abone cikonzya kucitika.

Kumane mwana wa Falawo musimbi wakaboola ku Mulonga wa Nailo kuzyi kusamba. Mpeena wakabona mutaanga mumatete malamfwu. Wakaita mubelesi wakwe umwi musimbi akumwaambila kuti: ‘Koya undiletele mutaanga uulya.’ Mwana wa Falawo naakazyi kuvwununa mutaanga, wajana kuli mwana. Elo nkubota mwana ngwaakajana! Musa wakali kulila, alimwi mwana wamwami wakeetezyegwa kubona nkwalila. Tanaakayanda kuti ajaigwe.

Kumane Miliyamu wakaboola. Ulakonzya kumubona acifwanikiso. Miliyamu wakalomba mwana wa Falawo kuti: ‘Hena nduunke nkaite mukaintu muna Isilayeli kuti kakulelela mwana?’

Mwana wamwami wakati: ‘Inzya koya.’ Kumane Miliyamu wakabalika cakufwambaana kwaakwaambila banyina. Banyina Musa nibakasika kumwana wamwami wakabaambila kuti: ‘Bweza mwana ooyu kondilelela ndiya kukupa bulumbu.’

Aboobo banyina Musa bakalikomezyela mwana wabo. Musa naakakomena-komena, bakamutola kumwana wa Falawo walo wakamukomezya mbuli mwana wakulizyalila. Mbombubo oobu Musa mbwaakazyi kukomenena muŋanda ya Falawo.

Kulonga 2:1-10.