Makani 29: Musa Ncaakaccijila
LANGA Musa nkwaccija mu Ijipiti. Hena wababona bantu nkobamutandila? Hena ulicizyi ncobayandila kumujaila Musa? Atubone naa inga twacibona.
Musa wakakomenena muŋanda ya Falawo mwami waku Ijipiti. Wakaba muntu musongo alimwi uulemekwa. Musa wakalizyi kuti tanaakali muna Ijipiti, pele bazyali bakwe beni-beni bakali bazike bana Isilayeli.
Buzuba bumwi kajisi myaka iili 40, Musa wakaunka kwaakubona mbobakali kupona bamukowa wakwe. Cakali kuusisya kubona mbobakali kupenzyegwa. Wakabona muna Ijipiti kauma muzike muna Isilayeli. Musa wakalanga ooku akooku, naakabona kuti taku muntu uulangilila, wakamupwaya muna Ijipiti eelyo wakafwa. Kumane Musa wakamusisa muntu ooyu mumuseenga.
Buce buyo Musa wakaunka kwaakubona bamukowa wakwe alimwi. Wakali kuyeeya kuti inga wabagwasya kutegwa bazwe mubuzike. Pele wakabona bana Isilayeli bobilo balalwana, aboobo Musa wakati kuli yooyo wakalubizya: ‘Ino nkaambo nzi ncouma munyoko?’
Muntu ooyo wakati: ‘Ino ngwani wakakubikka kuba muleli amubetesi wesu? Hena uyanda kuti undijaye mbuli mbookajaya muna Ijipiti?’
Musa lino wakayoowa. Wakazyiba kuti bantu bakazyiba ncaakacita kumuna Ijipiti. Awalo Falawo wakaamvwa makani aaya, aboobo wakatuma bantu kuti bamujaye Musa. Nkakaambo kaako Musa ncaakaccijila mu Ijipiti.
Musa naakazwa mu Ijipiti, wakaya kulamfwu kunyika yabana Midyani. Okuya wakaakujana Jetulo amukwasyi wakwe, akukwata mwana wa Jetulo wazina lya Zipola. Musa wakaba mweembezi wambelele zya Jetulo. Kwamyaka iili 40 wakakkala munyika yabana Midyani. Lino wakalijisi myaka iili 80. Buzuba bumwi Musa keembela mbelele zya Jetulo, cintu cimwi cilamya cakamucitikila calo cakacinca buumi bakwe boonse. Atubone cintu eeci cilamya.
Kulonga 2:11-25; Incito 7:22-29.
Mibuzyo
- Ino nkuli Musa nkwaakakomenena, pele ncinzi ncaakalizyi kujatikizya makani aabazyali bakwe?
- Ncinzi Musa ncaakacita naakaba amyaka iili 40?
- Ncinzi Musa ncaakaamba kumuna Isilayeli wakali kulwana, pele ino walo muna Isilayeli wakaingula buti?
- Nkaambo nzi Musa ncaakaccijila ku Ijipiti?
- Nkuli Musa nkwaakaccijila, alimwi ngwani ngwaakajana ooko?
- Ncinzi Musa ncaakacita mumyaka iili 40 naakaccija ku Ijipiti?
Mibuzyo aimwi
- Bala Kulonga 2:11-25.
Nokuba kuti Musa wakaiya kwamyaka minji akuba aluzyibo lunji mu Ijipiti, mbuti Musa mbwaakatondezya kusyomeka kuli Jehova alimwi akuli bamukowa wakwe? (Kul. 2:11, 12; Heb. 11:24)
- Bala Incito 7:22-29.
Nciiyo nzi ncotukonzya kwiiya kukusoleka kwa Musa alikke nzu kwakuyanda kugusya bana Isilayeli mubuzike kubana Ijipiti? (Inc. 7:23-25; 1 Pita 5:6, 10)
