Makani 30: Citewu Ciyaka
MUSA wakeenda kusikila kucilundu ca Holebu kalangaula bwizu bubotu bwakucezya mbelele. Aawa wakabona citewu kaciyaka mulilo, pele tiicakali kupya.
Musa wakaile kupuka mutwe, kati: ‘Henacibonede cili boobu! Ndilaunka buya aafwiifwi ndicibonesyesye.’ Naakasika aafwiifwi, wakamvwa jwi kuzwa mucitewu lyakati: ‘Utasweni kabili. Samununa mpato zyako nkaambo wiimvwi abusena busalala.’ Wakali Leza wakali kwaambaula kwiinda mumungelo, aboobo Musa wakalivwumba kumeso.
Kumane Leza wakati: ‘Ndabona kupenga kwabantu bangu mu Ijipiti. Aboobo ndiyanda kubagusya. Alimwi nduwe ngondilaatume kusololela bantu bangu kubagusya mu Ijipiti.’ Jehova wakali kuyanda kugusya bantu bakwe akubaleta munyika mbotu ya Kenani.
Pele Musa wakati: ‘Ndili muntu buyo mebo. Ino mbuti mbondinga ndacita eeci? Pele ikuti ndaunka, bana Isilayeli baya kundibuzya kuti, ‘Ino ngwani wakutuma? Ino nkaambe buti?’
Leza waingula wati, ‘mboobu mboya kwaamba. JEHOVA Leza wa Abbulahamu, Leza wa Izaka, Leza wa Jakobo ngoondituma kuno.’ Alimwi Jehova wakayungizya kuti: ‘Eeli ndezina lyangu kukabe kutamani.’
Musa wakaingula wati, ‘ino kuti batakandisyomi ndaakuti nduwe wandituma?’
Leza wabuzya kuti: ‘Ino ncinzi cili mujanza lyako?’
Musa waingula wati: ‘Ninkoli.’
Leza wati: ‘Koiwaala ansi.’ Musa aiwaale nkoli, yasanduka yaba nzoka. Jehova alimwi wamutondezya Musa maleele aambi. Wati: ‘Njizya janza lyako mujansi.’ Musa wanjizya, eelyo naakaligusya lyakatuba bu mbuli caanda! Ijanza lyakali kulibonya mbuli kuti muntu uuciswa mankuntu. Alimwi Jehova wamupa Musa nguzu zyakucita maleele ciindi catatu. Wakamanizya kati: ‘Ikuti ukacite maleele aaya, bana Isilayeli baya kusyoma kuti ndime ndakutuma.’
Kumane Musa waunka kumunzi kwaakwaambila Jetulo kuti: ‘Ndilomba kuti nduunke nkabone bamukowa wangu mbobapona ku Ijipiti.’ Aboobo Jetulo wakati weende kabotu Musa, eelyo Musa wakatalika lweendo lwakujokela ku Ijipiti.
Kulonga 3:1-22; 4:1-20.
Mibuzyo
- Ino wiitwa buti mulundu ooyu uuli acifwanikiso?
- Pandulula cintu cilamya ncaakabona Musa naakaunka kucilundu keembela mbelele.
- Ncinzi jwi ncilyakaamba lyakazwa mucitewu cakali kuyaka, alimwi lyakali lyaani jwi eelyo?
- Mbuti Musa mbwaakaingula Leza naakamwaambila kusololela bantu ba Leza kuzwa mu Ijipiti?
- Ncinzi Leza ncaakamwaambila Musa kuti nceelede kwaamba ikuti bantu babuzya wamutuma?
- Mbuti Musa mbwaakali kukonzya kusyoma kuti ngu Leza wakamutuma?
Mibuzyo aimwi
- Bala Kulonga 3:1-22.
Mbuti cakacitikila Musa mbocitupa lusyomo lwakuti nikuba kuti inga twalibona kuti takukonzyi kuukonzya mulimo wa Leza, Jehova ulakonzya kutugwasya? (Kul. 3:11, 13; 2 Kor. 3:5, 6)
- Bala Kulonga 4:1-20.
Nkucinca kuli buti kwa Musa mukuyeeya kwakacitika mumyaka iili 40 njaakakkala kunyika ya Midyani, alimwi nciiyo nzi kuli baabo basika azyeelelo zyakuba amikuli mumbungano ncobakonzya kwiiya? (Kul. 2:11, 12; 4:10, 13; Mik. 6:8; 1 Timo. 3:1, 6, 10)
Nikuba kuti twalaigwa a Jehova kwiinda mumbungano yakwe, ndusyomo nzi ndotukonzya kuba andulo twalanga cikozyanyo ca Musa? (Kul. 4:12-14; Int. 103:14; Heb. 12:4-11)
