Makani 36: Moombe Wangolida
MAAWE! MAAWE! Ncinzi bantu ncobacita? Bakomba moombe. Nkaambo nzi ncobacitila boobu?
Musa akkale kwaciindi cilamfwu acilundu, bantu bati: ‘Tatuzyi cacitika kuli Musa. Aboobo atupange kaleza katusololele kuzwa munyika ino.’
Aloni munyina Musa wati: ‘Cili buyo kabotu nobantu. Amusamunune masikkiyo aangolida mundipe.’ Bantu bamupe buyo, Aloni waanyengulula akupanga moombe wangolida. Eelyo bantu bati: ‘Ooyu ngo Leza wesu wakatusololela kuzwa mu Ijipiti!’ Aciindi aawa bana Isilayeli bacita pobwe lipati akukomba moombe wangolida.
Jehova abone ceeci, wakalala kapati. Aboobo wati kuli Musa: ‘Fwambaana seluka! Bantu batalika kucita cintu citayandiki. Bailuba milawo yangu alimwi batalika kukomba moombe wangolida.’
Musa cakufwambaana waseluka acilundu. Asike aafwiifwi, nceeci ncaabona. Wajana bantu bajisi bubi kwiimba akuzyana kabazinguluka moombe wangolida. Musa wakalala cakuti mabwe obilo aapapalede aakalembedwe milawo, waasowa ansi eelyo apandauka aile kuba tupaanzi-paanzi. Kumane wabweza moombe wangolida wamunyengulula. Amane wamuziya-ziya waile kuba lusu.
Bantu bakacita cintu cibi kapati. Aboobo Musa waambila basankwa bamwi kubweza zipeni zyabo. Musa wati: ‘Ibantu babi bali kukomba moombe wangolida beelede kufwa!’ Aboobo basankwa bajaya bantu basika ku 3,000! Hena eeci tacitondezyi kuti tweelede kucenjela akukomba buyo Jehova alikke ikutali baleza bakubeja?
Kulonga 32:1-35.
Mibuzyo
- Ncinzi bantu ncobacita acifwanikiso, alimwi nkaambo nzi?
- Nkaambo nzi Jehova wakalala, alimwi ncinzi Musa ncaacita naabona bantu ncobacita?
- Ncinzi Musa ncaambila basankwa bamwi kucita?
- Nciiyo nzi makani aaya ncaatuyiisya?
Mibuzyo aimwi
- Bala Kulonga 32:1-35.
Mbuti cibalo eeci mbocitondezya Jehova mbwakubona kusanganya bukombi bwakubeja abwakasimpe? (Kul. 32:4-6, 10; 1 Kor. 10:7, 11)
Ntwaambo nzi Banakristo ntobeelede kucenjelela nobayanda kulikkomanisya kwiinda mukwiimba alimwi amukuzyana? (Kul. 32:18, 19; Ef. 5:15, 16; 1 Joh. 2:15-17)
Muunzila nzi musyobo wabana Levi mbowakaba cikozyanyo cibotu mukucita bululami? (Kul. 32:25-28; Int. 18:25)
Andiza Inga Mwaakkomanina Ayaaya
ZIFWANIKISO IZIGWASYILIZYA BANA KWIIYA BBAIBBELE
Bana Israyeli Bapanga Moombe Wangolida
Bana Israyeli bakapanga cikozyanyo akwaamba kuti cakali kwiiminina Leza, pele sena Leza wakazumina?
