Makani 37: Tente lya Kukombela
HENA uliizyi ŋanda eeyi? Nditente liyandika kapati lyakukombela Jehova. Alimwi iitwa kuti ncikombelo. Bantu bakamanizya kwiiyaka mumwaka omwe nibakazwa ku Ijipiti. Hena ulimuzyi wakali amuzeezo ooyu wakuyaka?
Wakali muzeezo wa Jehova. Musa naakali atala lya Cilundu ca Sinai, Jehova wakamwaambila mbolyeelede kuyakwa. Wakati lipangwe munzila iitakatazyi koola. Munzila eeyi zibeela zilakonzya kunyamunwa kuya kubusena bumwi, alimwi ooko balakonzya kuliyaka alimwi. Aboobo bana Isilayeli nibakali kuya ciingaila munkanda, bakali kweenda atente.
Ikuti walanga mukaanda kali kumamanino aatente, ulakonzya kubona bbokesi naa ciyobwedo. Eeli liitwa kuti ndibbokesi lyacizuminano. Lyakalijisi bangelo bobilo naa bakelibu bangolida aumwi kulubazu lumwi. Leza alimwi wakalemba Milawo iili Kkumi amabwe obilo aapapalede, nkaambo Musa wakaapwaya aakutaanguna. Alimwi mabwe aaya akali kuyobodwa mubbokesi lyacizuminano. Ayalo nkapu yamana moyakali kuyobodwa. Hena uciyeeyede kuti mana ninzi?
Aloni munyina Musa ngomuntu Jehova ngwaasala kuba mupaizi mupati. Ulabasololela bantu mukukomba Jehova. Abalo bana bakwe mbapaizi.
Lino kolanga muŋanda mpati yatente. Twaanda tuniini tulanjila ziindi zyobilo kukomena kuŋanda eeyi. Hena walibona bbokesi naa kayobwedo kaniini kazwa busi? Eeci ncipaililo kwalo bapaizi nkobaumpila tununkila twiitwa kuti tununkilizyo. Alimwi kuli cibikkila malambe cijisi tulambe tuli ciloba. Eelyo cintu catatu cili muŋanda, nditebulu. Alindilyo kuli zinkwa zili 12.
Mulubuwa lwacikombelo kuli mumbale mupati uujisi meenda. Bapaizi mobasambila. Alimwi kuli cipaililo cipati. Ano mbelele, ŋombe ampongo mpozyuumpilwa kacili cipaizyo kuli Jehova. Tente lili akati kamunzi, eelyo bana Isilayeli bakkala mumatente aabo aali mumbali-mbali lyatente.
Kulonga 25:8-40; 26:1-37; 27:1-8; 28:1; 30:1-10, 17-21; 34:1, 2; Ba-Hebrayo 9:1-5.
Mibuzyo
- Ino ŋanda eeyi iili acifwanikiso iitwa buti, alimwi ibelesyegwa mulimo nzi?
- Nkaambo nzi Jehova ncaakaambila Musa kubamba tente kutegwa kalikonzyeka koolwa?
- Ndibbokesi nzi lili mukaanda kumamanino aatente, alimwi ncinzi ncelijisi bbokesi?
- Ngwani Jehova ngwaasala kuba mupaizi mupati, alimwi mulimo nzi mupaizi ngwabeleka?
- Amba zintu zyotatwe zili muŋanda mpati yatente.
- Nzintu nzi zyobilo zili mulubuwa lwacikombelo, alimwi zyibelesyegwa nzi?
Mibuzyo aimwi
- Bala Kulonga 25:8-40; 26:1-37; 27:1-8; a 28:1.
Ino bakelubi bakali kwiiminina nzi “abbokesi lyacizuminano”? (Kul. 25:20, 22; My. 7:89; 2 Bam. 19:15)
- Bala Kulonga 30:1-10, 17-21; 34:1, 2; a Ba-Hebrayo 9:1-5.
Nkaambo nzi Jehova ncaakakankaizya mbuli mbociyandika kusalala kumubili lyoonse kubapaizi babelekela acikombelo, alimwi mbuti eeci mbocitujatikizya sunu? (Kul. 30:18-21; 40:30, 31; Heb. 10:22)
Mbuti mwaapositolo Paulu mbwaakatondezya kuti cikombelo alimwi a Mulawo wacizuminano nzyakalimanide mulimo iciindi naakalemba lugwalo kuba Hebrayo Banakristo? (Heb. 9:1, 9; 10:1)
