Makani 38: Basikutwela Bali 12
LANGA micelo bantu aaba njobanyamude. Bona mbocili cipati cikungo camasaansa. Basankwa bobilo mbabakonzya kwiinyamuna kwiinda mukubelesya cisamu. Langa nkuyu amapomegileneti. Ino micelo eeyi mibotu boobu yakazyila kuli? Yakazyila kunyika ya Kenani. Koyeeya kuti, ku Kenani nkonkuko nkwaakali kukkala Abbulahamu, Izaka a Jakobo. Pele akaambo kanzala ooko, Jakobo amukwasyi wakwe bakalongela ku Ijipiti. Aboobo kwiinde myaka iili 216, Musa wakasololela bana Isilayeli kujokela ku Kenani. Bakasika kubusena bwamu nkanda bwiitwa kuti Kadesi.
Kuli bantu babi bakkala munyika ya Kenani. Aboobo Musa wakatuma basikutwela bali 12 akubaambila kuti: ‘Kamuya mukabone naa mbanji buti bantu bakkala kooko akuti naa mbayumu buti. Mukabone anyika naa nimbotu kulima. Alimwi mutakalubi kuleteezya amicelo.’
Bajoke basikutwela ku Kadesi, bakati kuli Musa: ‘Cisi ncibotu, alimwi taku ciinda waalya.’ Kutegwa basinizye kuti bakasika nconzyo, Musa bamutondezya micelo. Pele basikutwela bali 10 bati: ‘Bantu bakooku mbapati alimwi balijisi nguzu. Baya kwiile kutujaya ikuti tukasole kubanyanga nyika.’
Bamvwe boobo bana Isilayeli bayoowa. Bati: ‘Nicakainda kubota kufwida mu Ijipiti nimuba munkanda. Baya kwiile kutujaya munkondo alimwi baya kutunyanga bamakaintu abana besu. Atusale musololi mupya mubusena bwa Musa tujokele ku Ijipiti.’
Pele basikutwela bobilo balamusyoma Jehova, alimwi baluujisi kuumbulizya bantu. Mazina aabo mbaba Josyuwa a Kalebe. Bati: ‘Mutayoowi Jehova ulaandiswe! Ciya kuba cintu cuuba-uba kubweza nyika.’ Pele bantu tabamvwi. Alimwi buya bayanda kubajaya ba Josyuwa a Kalebe.
Eeci capa kuti Jehova akalale kapati alimwi wati kuli Musa: ‘Bantu bajisi myaka iili 20 kuya kumpela kunyina naba omwe uuya kunjila munyika ya Kenani. Bakabona maleele ngindakacita ku Ijipiti amunkanda, pele ncimwi buyo tabandisyomi. Aboobo bana kwiile kwiingaila munkanda kwamyaka iili 40 kusikila muntu wamamanino akafwe. Alikke Josyuwa a Kalebe mbabaya kunjila munyika ya Kenani.’
Myeelwe 13:1-33; 14:1-38.
Mibuzyo
- Ncinzi ncobona acifwanikiso kumakani aacikungo camasaansa, alimwi nkuli nkwaakazyila?
- Nkaambo nzi Musa ncaakatumina basikutwela bali 12 kunyika ya Kenani?
- Ncinzi ncibakamwaambila Musa basikutwela bali 10 nibakajoka?
- Ino mbuti basikutwela bobilo mbobakatondezya lusyomo muli Jehova, alimwi mbabaani mazina aabo?
- Nkaambo nzi Jehova wakalala, alimwi wamwaambila nzi Musa?
Mibuzyo aimwi
- Bala Myeelwe 13:1-33.
Mbabaani bakasalwa kwaakulanga nyika, alimwi nciindi nzi cibotu ncobakaba ancico? (My. 13:2, 3, 18-20)
Nkaambo nzi Josyuwa a Kalebe nkobakaindana abamwi basikutwela, alimwi cituyiisya nzi eeci? (My. 13:28-30; Mt. 17:20; 2 Kor. 5:7)
- Bala Myeelwe 14:1-38.
Nkucenjezyegwa kuli kujatikizya baiminizi ba Jehova baanyika nkotweelede kubikkila maano? (My. 14:2, 3, 27; Mt. 25:40, 45; 1 Kor. 10:10)
Mbuti Myeelwe 14:24 mbwatondezya kuti Jehova ulabikkila maano kumubelesi wakwe aumwi? (1 Bam. 19:18; Tus. 15:3)
